Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 BIBILO GEM IOR

Yange M Nôngo Gbeev Kwa Imôngo Cii Ve M Va Tile Dông Ye

Yange M Nôngo Gbeev Kwa Imôngo Cii Ve M Va Tile Dông Ye
  • I MAR UN KEN INYOM I:1953

  • TAR NA: AUSTRALIA

  • INJAOR I YANGE LU YÔ: YANGE KWAGH U UFOTO MBA IJIMBAGH YA TOR KEN A NA

YIASE YAM:

Ken inyom i 1949 la, terem mough ken tar u Jamani va ken Australia. Yange va u va keren tom hen ikyômpeni i dughun awen a ill shi nan usu, maa lu hen anijiir ugen i yer ér Victoria la. Lu hen ijiir ne vôso ngôm ye, maa i marem ken inyom i 1953.

Anyom nga kar kpuaa yô, ngôm hii u henen Bibilo vea Mbashiada mba Yehova, nahan m kôr atesen a Bibilo shighe u m lu iyev la je. Kpa terem gema lumun a kwaghaôndo môm môm ga. Yange nyôr u eren tswam shi tan se mciem iyol, nahan kwagh na cier ngôm iyol kpishi. Nahan kpa, ngôm za hemen u henen Bibilo ken myer, maa va hingir u soon akaa a Bibilo i tese la. Terem yange una lu her ga yô, ngôm a tôô akaa a a hen la cii, a ôrom vea anngôm u kwase u kiriki la. Yange ôr se kwagh u ken hemen, shighe u tar ua va hingir paradiso la, man er aluer se mba dondon akaawan a Bibilo ve a saan se iyol yô.—Pasalmi 37:10, 29; Yesaia 48:17.

Shighe u m lu anyom 18 la, terem tswamem gbem tsô va gandem m undu ya. Shin er m na jighjigh a akaa a ngôm yange tesem ken Bibilo la nahan kpa, m nenge a iwasen ker ga. Nahan m dondo ityesen la ga. M hii u eren tom u sôron usu hen ajiir a i dughun awen a ill shin inya la. M va nyer anyom 20 yô, m vôso kwase. Anyom nga kar atar yô, se mar wan wase u hiihii, lu u kwase, maa m hide m gba henen sha kwagh u me er a uma wam ve a wasem yô. Yange m fa dedoo mer Bibilo ia wase tsombor wase, nahan m hii u henen Bibilo vea Orshiada u Yehova ugen. Kpa kwase wam gema soo kwagh u Mbashiada mba Yehova ga. Yange m ze mkombo vea ve kwagen yô, kwase wam tam icin ér mo me de u henen Bibilo gayô, una lumun ér m lu hen ya vea na ga. Er m lu a tuula ga yô, m er kwagh u soo la, nahan m due gbenda u Mbashiada. Ken masejime yô, m va vaa afanyô er yange m kera za hemen u eren kwagh u m fa dedoo mer ka u vough la ga yô.

Iyange igen la, ior mbagenev hen ijiirtom yam za hii u tesen mo ufoto mba ijimbagh. Yange kpiligh mo iyol shi kundam iyol kpaa, shi ishima lu nan mo ibo tsung. Er m umbur kwagh ugen u yange m hen ken Bibilo yô, m na jighjigh mer Aôndo una tsaham. Kpa ufoto mba ijimbagh lu seer a seer hen ijiirtom yam, nahan mnenge wam gema sha kwagh ve. Shighe kar yô, kwagh u ufoto mba ijimbagh ya tor ken a mo.

Hii shighe la je, m undu akaa a yange ngôm nôngo tesem la. Ieren ne ya tor ken a mo zan zan anyom 20. Ieren yam lu tesen akaa a m lu henen ken ishima yô. Yange m lam alam a ijimbagh shi asenge am kpa lu a ijimbagh. M lu a mnenge u vough sha kwagh u yaven a or la ga. Shin er m lu vea kwase wam nahan kpa, m lu keren kasev mbagenev. Iyange igen la, m hen sha kwagh wam gbaan, maa m kôr uma wam ihyom. Mo u yange m naan iyol yam icivir ne, m kera soo i ga.

M va pav ivaa, shi uma wam hingir dang. Nahan m er msen hen Yehova sha gbashima. Maa m hide m hii u henen Bibilo, shin er m de u henen i kuma anyom 20 nahan kpaa. Hen shighe ne terem kpe, nahan ngôm er batisema hingir kwase u civir Yehova.

GBENDA U BIBILO GEMA UMA WAM LA:

Gbenda u yange m eren kwagh ken uma wam la kaha kposo a ityesen i Bibilo ica je. Kpa m hiden i hiin Bibilo i henen yô, m kange ishima mer me zua a bem u Bibilo i tende zwa a mi la. Nahan m hii mer me de alam a ijimbagh kua ishimanyoon. Shi m de ijimba i eren kua ishor i gbidyen man u man msôrom karen ikyaa inya, shi m de u iin orvesen u yange tôôm tom la.

Ior mba hen ijiirtom yam la kav er i hii ve m de u eren akaa la ken uma wam ga. Yange ve shi zan mo iyol ér m hide m eren akaa a yange m eren la. Ve zam iyol nahan gbem kuma anyom atar. Yange mea nôngo gbeev sha ankwagh u cuku, mea nyoon ishima daalaa shin mea ter ishember i dang i môm tseegh kpa, i doo ve je ve kaa ér: “En heen! Joe wase u tse hide ve.” Yange vea ôr nahan i vihim kpen kpen! I lum er kwagh hembam nahan.

Yange ufoto mba ijimbagh mba ken ityakerada kua mba sha Intanet de ishar hen ijiirtom yam. Mo kua ior mba hen ijiirtom yam yange se samber a ufoto mba ijimbagh ken ukômputa asev. M lu nôngon mer me due ken kwagh ne kera, kpa lu inja er ve kange ishima ér vea za hemen u tseren mo mbaagbe hanma kwa u m soo u duen ker sha nahan. Nahan m ker iwasen hen orgen u yange henen Bibilo a mo yô. Yange kegh ato a mo, m pase un ishima yam vindi vindi. A ôrom avur a Bibilo shi tesem kwagh u me er ve me due ken ieren i nengen ufoto mba ijimbagh la sha yô, shi wam kwagh ér m ker iwasen hen Yehova sha u eren msen gbem.—Pasalmi 119:37.

Iyange igen la, m yila ior mbagenev mba m eren tom a ve imôngo yô mitin. Mba ve yô, m kaa a ve mer ve na iorov uhar mbagenev ken a ve bia ve ma. Lu ior mba ve hunden msôrom yô. Maa ve cii ve venda taver taver ér: “Kighir kwagh la kpum kpum! Ior mban mba nôngon ér vea de u man msôrom karen ikyaa inya!” Maa m gema m kaa a ve mer: “Ka mimi, kape mo kpa i lu je la.” Hii shighe la je, ior mbara kav er m lu nôngon mer me de kwagh u ufoto mba ijimbagh yô, nahan ve kera zam iyol ér m hide m nyôr iyol ken aeren a am a tse la ga.

Shighe kar yô, Yehova wasem m de u nengen ufoto mba ijimbagh. Ken inyom i 1999 la, i erem batisema m hingir Orshiada u Yehova. M wuese kpishi er a nem ian sha kwa har ér m hide m lu or u eren kwagh sha gbenda u vough shi i saan mo iyol kpaa yô.

Hegen ne, m kav wang er i hii ve akaa a yange ya tor ken a mo anyom imôngo la cii, Yehova a ker a ihyom yô. Er a lu Ter u lun a dooshima yô, yange soo u palegh mo a kwaghbo u ufoto mba ijimbagh ka ve va a or a mi la. M nenge a mimi u kwagh u i er ken Anzaakaa 3:5, 6 la! Ijiir la kaa ér: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.” Jighilii yô, m nenge mer akaawan a Bibilo nga kuran mo tseegh tsô ga, kpa er m lu dondon a yô, me fatyô u eren kwagh u vough.—Pasalmi 1:1-3.

IWASEN I M ZOUGH A MI LA:

Ashighe a ken ijime la, yange m kôr uma wam ihyom kpishi, kpa hegen ne, m ngu a icivir shi m zua a bem ken ishima. M ngu wang shi m nenge mer Yehova dem kwaghbo shi ngu wasen mo. Ken inyom i 2000 la, m vôso anmgbian u kwase u doon ashe tsung, u Yehova a doo un ishima kpishi er mo nahan yô. Ya wase ka ijiir i bem a lu her kpishi yô. Se nenge ser ka kwagh u icivirigh kpishi u lun ken mzough u anmgbianev mba sha tar cii, mba ve lu wang shi ve doo ayol a ve la.