Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura  |  Namba  4 2016

 ITINEKWAGH I TAMEN | YIASE I PASEN MWAR U BIBILO

Kwagh u A Ne Ve Bibilo I War Yô

Kwagh u A Ne Ve Bibilo I War Yô

Bibilo war ngi her zan zan nyian. Kwagh ne na yô, we kpa u fatyô u zuan a kôpi u Bibilo wou. Man zum u u lu ôron Bibilo yô, fa wer ka mkaanem ma Bibilo ma yange i hii ngeren la jighilii je u lu ôron ye. Kpa ka nyi i ne ve Bibilo i war akaa a vihin i, man ior mba vendan i, kua ior mba nôngon ér vea gema kwagh sha loho u Bibilo u yange i hii ngeren laa? Man er nan ashighe kpishi Bibilo ka i war akaa ne sha gbenda u kpilighyol nahana? Ka nyi i ne ve takerada ne u lu kposo a ityakerada igen ciilii?

“Hegen m fa dedoo mer Bibilo i m lu a mi ne ka iyua i Aôndo a nem yô”

Ior kpishi mba ve tim ken Bibilo yô, nenge ér Bibilo ka mkaanem ma Aôndo, er apostoli Paulu kpa yange nenge nahan. A nger ér: “Icighanruamabera cii ka Aôndo A ne i nger ye.” (2 Timoteu 3:16) Ve na jighjigh ér Bibilo war ka sha ci u kaMkaanem ma Aôndo shi ka Aôndo a kura i i lu her zan zan nyian ye. Or u i yer un ér Faizal, u se ôr kwagh na ken ngeren u hiihii la kpa yange va tôv sha kwagh ne iyol na ken Bibilo. Tev sha mi yô, a zua a kwagh u kpiligh un iyol. Fese je a kav er atesen kpishi a Mbakristu Mbaaiev ve tesen la a dugh ken Bibilo ga yô. Shi yange kav kwagh u Aôndo a pase ken Mkaanem nam ér un wa ishima u eren sha ci u tar la, nahan kwagh ne kôr un ken ishima.

A kaa wener: “Hegen m fa dedoo mer Bibilo i m lu a mi ne ka iyua i Aôndo a nem yô. Bee kera yô, aluer Aôndo kôrcio u gban sha man tar yô, ka takerada ve una kera lu a tahav mbu nan se shi kuran u sha ci wase ga yee? Aluer m kaa mer Aôndo ngu a tahav mbu eren nahan ga yô, tese ér m ngu panden Aôndo Uhembanagee tahav! Man m ngu di nyi je u me er kwagh la?”—Yesaia 40:8.