Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Ican I Yan—Ka Gbenda u Aôndo a Tsahan Ior Yôô?

Ican I Yan—Ka Gbenda u Aôndo a Tsahan Ior Yôô?

LUZIA KA A ZENDEN A KENDEN NGUHAR KU KEN IMESE. Shighe u lu wanye la, zua a angev mbu kpen alegh mbu i yer ér poliomyelitis la. Angev mbun ka mbu nôngo ityav a igbila i ken iyol i or shi mbu ngôôr tsaren ga. Luzia va nyer anyom 16 yô, kwase ugen u Luzia eren tom sha ikyev na la, kaa a na ér, “Aôndo ta u angev mbu kpen alegh ne sha ci u yange u ungwan imo i ngô u ga shi u eren a na dang dang.” Anyom kar kpishi kpa, Luzia za hemen u umbur er kwagh u kwase la ôr a na la vihi un tsung yô.

SHIGHE U DAMARIS VA KAV ÉR UN NGU A KYANSA I KEN ITYOU LA, ter na pine un ér: “Ka nyi u er ve kwagh ne a er u we? A shi nan kpa u er kwagh u bo. Ka nahan ve Aôndo a lu tsahan we ye.” Mkaanem nam man vihi Damaris je pev.

Ior na jighjigh ér ka Aôndo a tsahan ior sha u tan ve angev ye, anyom udubu imôngo hegen. Takerada u i yer ér Manners and Customs of Bible Lands la kaa er, ior kpishi mba sha ayange a Kristu la na jighjigh ér, “yange or gba angev sha ci u isholibo i nan, shin nan gba angev sha ci u isholibo i or u hen tsombor u nan, man angev mbura mbu lu mtsaha, sha ci u isholibo la.” Ken derianyom u sha utaan la, takerada u i yer ér Medieval Medicine and the Plague la, kaa ér, “ior mbagenev na jighjigh ér Aôndo ka a va a atsan sha a ve sha u tsahan ve sha asorabo a ve.” Sha nahan yô, ior umiliôn mba yange ve kpe angev mbugen ken Yuropa, sha derianyom u sha 14 la, lu Aôndo tsaha mbaaferev yee? Shin yange lu ankaam mba umav mba i nengen a mi sha ashe a boon ga la, yange ve va a angev mbura, nahan ior hingir u kpen, er mbatwerev vande ôron nahana? Alaghga mbagenev vea pine ér, ka Aôndo jighilii ka a ta ior angev sha u tsahan ve sha asorabo ve yee? *

NENGE: Aluer angev man ican ka gbenda u Aôndo yange tsahan ior sha asorabo a ve yô, Yesu yange been ior angev sha ivande sha ci u nyi? Luun er Aôndo tsahan ior sha uange yô, angev mbu Yesu been ior la ma tese ér Aôndo ngu perapera ga shi ôron ijir sha mimi ga. (Mateu 4:23, 24) Mayange Yesu una hendan a kwagh u Aôndo a er ga. Yesu kaa ér: “M eren akaa a doon Un gbem” shi ér, “M eren er Ter A wem kwagh yô.”—Yohane 8:29; 14:31.

Kwagh u Bibilo i ôr la wanger. Yehova Aôndo “ngu a ifer ga.” (Duteronomi 32:4) Ikyav i tesen yô, mayange Aôndo una fatyô eren ér girgi i purugh i gba i wua mbaishôôv uderi imôngo, sha ci u a soo u tsahan or môm ken ve mba ve nyer i la ga! Aberaham u civir Yehova sha mimi la, yange ôr kwagh u zua sha perapera u Aôndo la yô, ér, mayange Aôndo una “tim orperapera a orifer imôngo” ga. A kaa ér, “tuna” u Aôndo a er imbakwagh la. (Genese 18:23, 25) Shi Bibilo kaa ér, “Aôndo Una er iferkwagh mayange ga”; “una er kpe ga.”—Yobu 34:10-12.

KWAGH U BIBILO I TESE SE SHA KWAGH U ICAN I YAN YÔ

Shighe u se lu yan ican yô, tese ér Aôndo ngu tsahan se sha ma isholibo i se er ga. Yesu iyolna kpa yange pase kwagh ne wang, shighe u un vea mbahenen nav nenge a orgen u i mar un a ashe a pirin yô. “Mbahenen Nav pine Un ér: Rabi, ka anti nan er isholibo man i mar un a ashe a pirini, ka un, shin ka mba ve mar un laa? Yesu gema kaa er: Or ne er  isholibo ga, mbamaren nav kpaa ga; kpa ka sha er á pase ityom i Aôndo ker a na yô.”—Yohane 9:1-3.

Er yange mbamhen mba kpeegh samber sha ikyar ne yô, a shi nan kpa, yange cier mbahenen mba Yesu iyol er a kaa a ve ér or la shin mbamaren nav er isholibo ve kwagh u vihin la a er un ga yô. Yesu yange bugh or la ashe tseegh ga, kpa er yange er nahan yô, gema ta iwanger sha kwagh u jighjigh u nan u kpeegh u ior lu a mi ér Aôndo ka a na or ican sha u tsahan nan la. (Yohane 9:6, 7) Mba ve lu yan ican a angev mbu vihin tsung nyian la vea fatyô zuan a msurshima, er ve fe ér ka Aôndo a te ve angev ga yô.

Aluer Aôndo yange lu tsahan ior sha asorabo ve sha u tan ve iangev yô, hii nan ve Yesu lu been ior iangeva?

Ruamabera na se vangertiôr ér

  • “Á fatyô u meen Aôndo sha kwagh u ifer ga, man Un yô meen ma or ga.”(YAKOBU 1:13) Sha mimi yô, “aferakaa” aa uumace ve tagher a mi anyom uderi imôngo hegen, er angev man mnyoon man ku nahan la cii, ica i a gba ga tsô vea kera lu ga.

  • Yesu Kristu yange “bee mba ve lu yan ican a iangev la cii iangev vev, [NW].” (MATEU 8:16) Er wan u Aôndo bee ior mba ve vaan hen na la iangev yô, lu tesen kwagh u Tartor u Aôndo ua er tar shawon cii yô.

  • “Una [Aôndo] ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—MPASE 21:3-5.

KA AN NAN NE VE SE LU YAN ICANAA?

Hii nan ve uumace ve nyer ken mnyoon tsung shi ve lu yan ican yumu? Uumace mba henen sha mpin ne anyom uderi imôngo hegen. Aluer ka Aôndo a eren ior ican ga yô, ka ana? Se na mlumun sha mbampin mban ken ngeren u a dondo ne.

^ par. 4 Er sha ayange a tsuaa la Aôndo a tsaha ior sha asorabo a ve agen nahan kpa, Bibilo tese ér Yehova ngu eren tom a angev shin uaahe sha u tsahan ior sha asorabo ve hegen ga.