Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

“Ashe a Ou nenge ijenawambe yam.”—PASALMI 139:16

Aôndo Kav Er I Lu U ken Ishima Yôô?

Aôndo Kav Er I Lu U ken Ishima Yôô?

KWAGH U IGBETAR I TESE SE YÔ

Gbidye ase kwar sha mlu u kôôsôô u ka a lu hen atô u ahina a ka a bee ayol a ve tsung la. Ka ve hemba fan ayol a ve. Nancy Segal u a nengen sha Twin Studies Center shi un iyol na kpa a lu ahina la, kaa ér, Ahina agen je yô “ka ve lamen ayol ave shi ve kav hanma kwagh u hanma ve nan soo la.” Kwase ugen pase mlu na vea anmgbian na u ve lu ahina shi ve bee ayol a ve la kaa ér: “Se fa ayol ase tsembelee.”

Ka nyi i ne ve ahina ka a fa ayol a ve shi a lu kôôsôô i hemba hanma orgen ciili? Mbatôvon sha akaa mbagenev kaa ér, ka ikyasen man mbamaren ka ve na ve kwagh a lu nahan ye. Kpa kwagh u vesen yô, ka iveghemkwagh i nderan uma la ka i na ve ahina a a bee ayol ve la, ka a lu kôôsôô shi a hemba fan ayol a ve ye.

NENGE: Un u agbe akaa cii kua iveghemkwagh i nderan uma la fa mlu u hanma wase hemba hanma orgen cii. Ka nahan ve, Orpasalmi Davidi yange kaa ér: “Ka We U maghem ken iyav mbu ngôm ye. Akuhe am lu U myer ga, zum u i erem ken myer. . . . Ashe a Ou nenge ijenawambe yam, man i nger a ken ruamabera Wou cii.” (Pasalmi 139:13, 15, 16) Ka Aôndo tseegh a fe se man aveghemakaa ase a nderan uma la vindi vindi shi a fe akaa a a er se ken uma ve a gem mlu wase la ye. Gbenda u Yehova a fa se tsembelee man aveghemakaa ase a nderan uma la, tese wang je ér Yehova fa se sha hanma gbenda cii.

KWAGH U BIBILO I TESE SE SHA KWAGH U MFE U AÔNDO YÔ

Davidi yange er msen kaa ér: “TERE, U tôvom, U fam. Mtem wam man mmough wam kpaa We U fa, U fa mhen wam ken ica je. Gadia er kwaghôron a lu a duem ken zwa ga je tsô, We TER U fa cii.” (Pasalmi 139:1, 2, 4) Heela tseegh ga, Yehova fa er ka i lu se ken ishima la shi “A kav hanma mhen cii.” (1 Kroniku 28:9; 1 Samuel 16:6, 7) Ka nyi avur ne a tese se sha kwagh u Aôndo?

Shin er alaghga se fatyô u pasen mbamhen asev kua er ishima i lu se ker la cii ken msen ga nahan kpa, Orgban wase nengen kwagh u se eren la tseegh ga, kpa shi ka a kav er i hii ve se er kwagh shon la kpaa. Kwagh u seer yô, ka a kav kwagh u dedoo u se we ishima u eren la, aluer mbamyen asev yange se u eren kwagh u se we ishima u eren la je kpaa. Sha ci u Aôndo gba se a dooshima, sha nahan yô ka a kegh iyol shi i girim un iyol u nengen shi kaven mbamhen man mbaawashima asev mba sha dooshima la.—1 Yohane 4:7-10.

Kwaghmôm u Aôndo a nengen a mi ga yô, ngu ga. Aôndo ka a fa atsan a ase shighe u alaghga mbagenev vea fa a ga la je kpaa, shin ve kav a vindi vindi ga la

Ruamabera na se vangertiôr ér

  • “Ashe a Ter yô, nga sha mbaperapera shi veren ato sha zamber ve kpaa.”—1 PETERU 3:12.

  • Aôndo tôndo zwa ér: “Me pase u, shi Me tese u gbenda u ú za kpaa; Me wase u henen; ishe Yam ia lu sha a we.”—PASALMI 32:8.

 AÔNDO NGU A MHÔÔNOM MA ZUNGWEN TSUNG

Aluer se fa ser Aôndo kav mlu wase man er i lu se ken ishima la yô, kwagh ne una wase se u wan ishima a mbamtaver. Nenge ase kwagh u er Anna u a lu ken tar u Najeria la. “A kaa ér, yange m lu a akperan sha kwagh u mluainja u lun uma la, sha ci u mbamlu mba vihin tsung mba m tagher a mi la. Yange m lu kwasecôghol shi m lu nengen sha wan wam u kwase, u lu ken iyouci i lu sôron un angev mbu ka mbu er or nan kehe ityough i yer ér ikyombo la. Hen shighe ne i karem ken iyouci i zuam a kyansa sha tumba, nahan gba u a pavem a sôr kyansa shon. Mo vea wan wam u kwase la cii se lu ken iyouci uange, nahan taver mo u nôngon a zayol ne kpishi.”

Ka nyi yange i wase Anna u nôngon a zayol ne? “Yange m gbidye kwar sha Mbafilipi 4:6, 7, ape i kaa ér ‘bem u Aôndo u a gande hanma mfe wase cii una kura asema a en man mbamhen enev’ la. Er m va fe mer Yehova hemba kaven mo a mo iyol yam yô, hanma shighe u mea umbur avur a ruamabera ne yô, m nenge mer m ngu kôôsôô a na. Shi anmgbianev av mba nomso man mba kasev mba doon mo ishima mba ken tiônnongo u Kristu yange ve taver mo ishima.”

“Er m lu nôngon a angev av her nahan kpa, mlu wam man u wan wam u kwase la hemba doon. Er Yehova a te ikyaa a vese yô, se hen u henen kwagh sha gbenda u vough shighe u se tagher a mbamtaver yô. Yakobu 5:11 na se vangertiôr ér: ‘Mba ve taver ishima yô, ka se yila ve ser, mba i saan ve iyol. Ne ungwa er Yobu a taver ishima yô, man shi ne nenge mkur u Ter kure kwagh na yô, mhôônom ma ker Ter man shi zungu mhôônom kpaa.’ ” Yehova yange kav mlu u Yobu la vindi vindi, sha nahan yô, se fatyô u lun a vangertiôr ser a kav nyityô mtaver u se lu yan ican a mi la cii.