Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 BIBILO GEM IOR

M Hen U Nan Kasev Icivir kua Iyol Yam Kpaa

M Hen U Nan Kasev Icivir kua Iyol Yam Kpaa
  • I MAR UN KEN INYOM I: 1960

  • TAR NA: FRANCE

  • INJAOR I YANGE LU YÔ: OR U MAN ICIMBIM MA MBOM, EREN IPILA SHI EREN A KASEV DANG

YIASE YAM:

Yange i marem hen geri u Mulhouse, ken tar u France. Ior mba hen vegher geri wase la lu mbaibanave, shi i eren ipila her kpoghuloo. Icombor i hen ijiir yase la yange i gbidye iyol je awambe a haa. Yange i nengen kasev kwagh hen tsombor wase ga, shi i waan kwagh ve sha ada ga. I kaa a mo ér tom u kwase yô saa sha u yôron shin kicin shi nengen sha nomso man mbayev.

Yange m ya ican shighe u m lu iyev la kpishi. Shighe u m lu anyom pue la, terem kpe sha ikyaa i msôr. Anyom nga kar ataan yô, anngôm u nomso u lu vesen a mo yô, wua iyol na. Ken inyom shon i môm, tsombor ugen nôngo num je wua or sha ashe am. Kwagh ne kundam iyol je saa her. Yange tsombor wam tesem u nôngon num a ihyô man gbuuka. Er m lu gumor u taver inja yô, m hii u gberen akaa iyol kpurughaa shi man msôrom.

Shighe u m nyôr anyom 16 la nahan, m lu man msôrom hii akpe 10 zan zan 15 ken hanma iyange, ica gba ga maa m hii u man mcimbim ma bom. Yange m va gema kohol ajija a uikya teen shi iin sha er me zua a inyaregh ki eren abumeakaa ne a mi yô. Cii man m nyôr anyom 17 nahan, i wuhem. Jighilii yô, ken uma wam cii i wuhem kwa 18 sha ikyaa i ipila man iv.

Shighe u m kar anyom 20 daalaa la, m hemba saan ishe cii. Yange m ma ikya i kuma kwa 20 ken iyange i môm, shi m maan hiron kua akaa a man agen a garen ityough ker. Ashighe agen m ma akaa ne i za kar ikyaa inya, je m nôngo ku. Kwagen la m kegh orgen gbuuka, kpa ikyôr na yô, igbo la busa sha ityough ki kwange na kar yem! Shighe u m lu anyom 24 la, ngôm saa ku, kwagh ne na yô m hemba wan tswam cii. Mbazenden angahar sha godobi yange vea nenge a mo yô, ve palegh ve per gbenda vegher la. Ashighe kpishi m tsa hen tashan u dasenda sha iyange i Sati shin Lahadi sha ikyaa i num. Shighe ugen m tsa ken iyouci, i koron mo avav.

M va vôso kwase shighe u m lu anyom 28 la. Kpa er m eren a kasev sha inja ga yô, kwase wam kpa m eren kwagh a na sha icivir ga. Yange m tuhwa un shi m gbidye un m kighir sha mi. M eren kwagh a na sha inja i nom man kwase ga. Yange m hen mer er m lu iin akaa a eren hwe kpishi nan un je kuma. Maa kwagh va er u taver mo kpishi. Kwase wam va hii u henen Bibilo vea Mbashiada mba Yehova. Sha iyange i hii henen Bibilo vea ve la je de taav u man, shi venda inyaregh ki mbaiv, shi hide a akaa a eren hwe la nam. Yange ishima vihim je m venda mer una kera hen Bibilo ga. Shi m ma taav m kura mnyim  m haa un ken ishi. Shi m mough m lam sha a na côu côu hen ikyasen yase la cii.

Tugh mbugen la m lu hunden msôrom, maa m nande ya wase la. Kwase wam yange due a mo man wan wase u kwase u lun anyom ataan la ken usu la kera. Msôrom ma wanger mo ashe yô, ishima yam iv a ibo kpishi. Ken ishima yam yô, m tôô mer mayange Aôndo una dem kwaghbo wam ga. M umbur iyange igen la pastô ugen pase adua kaa wener mbaaferev cii mba hian ken igyamusu. Ortwer wam je kpa yange kaa a mo ér: “Kwagh wou bee! Kwaghbo wou gande u den we.”

GBENDA U BIBILO GEMA UMA WAM LA:

Ya wase yange hian kera yô, se yem se za lu vea mbamaren mba kwase wam. Mbashiada mba Yehova mba ve kwase wam inya yô, m pine ve mer, “Aôndo una fatyô u den mo a asorabo am cii je he?” Ve tesem kwagh u Bibilo i er ken 1 Mbakorinte 6:9-11 la. Ijiir ne ter aeren a Aôndo a vende la, kpa gema kaa ér: “Kape ne mbagenev kpaa ne vande lun la.” Mkaanem man na m lu a vangertiôr mer me fatyô u geman. Maa Mbashiada mbara ôrom kwagh u i nger ken 1 Yohane 4:8 la shi ve pasem wang er m doo Aôndo ishima yô. Kwagh ne surum ishima kpishi, nahan m kaa a Mbashiada mbara mer ve henen Bibilo a mo kwa har ken kasua, shi m hii u zan mbamkombo mba Mbakristu vea ve. M za hemen u eren msen hen Yehova hanma shighe cii.

Ken atô u uwer môm tseegh, m de u man mcimbim ma bom kua msôrom. Fese je maa kera gba zuan mo ken iyol ga! Yange mnyam ma bov ma cier mo, shi ityough ki nandem shi iyav mbu zômon mo shimi kpoghuloo, shi m tagher a mbamnyoon mbagen kpaa sha kwagh ne. Nahan cii kpa, ikyav tesem ér lu Yehova gbam sha uwe lu taver mo ye. M lu a mnenge u apostoli Paulu kpa lu a mi la. Yange ôr kwagh u iwasen i Aôndo na un la kaa ér: “M ngu a agee a eren akaa cii je ken Un u A taver mo ne.” (Mbafilipi 4:13) Shighe kar yô, taav kpa m va de u man.—2 Mbakorinte 7:1.

Bibilo yange wasem u kôron iyol tsaha tseegh ga, i sôr tsombor wam kpaa. M gema gbenda u m eren kwagh a kwase wam la. M gema nan un icivir shi kaan a na mer “wea lumun yô” kua “m sugh u.” Shi m hii u eren kwagh a wan wase u kwase la sha inja i ter u fan kwagh. M henen Bibilo ka kom inyom i môm yô, m tsegha iyol yam sha ci u Yehova, maa i erem batisema; m dondo ikyav i kwase wam la.

IWASEN I M ZOUGH A MI LA:

M na jighjigh mer akaawan a Bibilo yima uma wam. Anmgbianev av mba ve lu Mbashiada ga la je kpa nenge ér alaghga yange ma m kpe sha ci u m ma msôrom shin mcimbim ma bom, shi m nôngo num kar ikyaa inya yum.

Er Bibilo i tesem akaa a i gbe u nom shin ter nana eren hen tsombor la wang yô, m gema gbenda u yange m eren kwagh a tsombor wam la vindi vindi. (Mbaefese 5:25; 6:4) Se gema eren kwagh imôngo hen tsombor wase. Hegen m kera nenge mer tom u kwase wam saa sha u yôron ken kicin tseegh ga, kpa m ngu suen un ken tom u pasen kwagh hanma shighe u a lu eren la saan saan. Shi un kpa saan un iyol u suen mo ken tom u ortamen u m lu eren ken tiônnongo la.

Dooshima u Yehova Aôndo man mhôônom nam ma a zungwem la wasem ken uma wam kpishi je. Sarem kpishi u ma m ôr kwagh u aeren a na a dedoo la hen mba i nenge ér mba a ishimaverenkeghen ga la, gadia kape mo kpa yange ior nengen mo je la. M na jighjigh mer Bibilo ngi a tahav mbu wasen hanmaor u hingir wang shi zuan a msaanyol u mimi la ken uma u nan. Bibilo tesem u soon nomso kua kasev shi eren kwagh a ve sha icivir tseegh ga, i tesem u nan iyol yam kpa icivir.