Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Shighe u Or Wou Nan Kpe Yô

Shighe u Or Wou Nan Kpe Yô

Vanessa, u a lu ken tar u Australia la kaa ér: “Anmgbian wam u nomso yange va kpe kpoo, nahan vihim kpishi er yange m er kwaghmôm sha u yangen ku na ga yô. Iwer yange i kar, kpa mea umbur ku na yô, i vihim tsung, nahan m nenge mer me kera fatyô u wan ishima ga. Ashighe agen yô, ishima i vihim ker. M pine mer anmgbian wam kpe sha ci u nyi? Shi ishima yange i nam ibo, er m vihin shighe vea na kpishi ga yô.”

ALUER or kpe u yô, we kpa alaghga ishima ia lu u ker dang, u nyôr ken ijungwen man mtswenem shi u nenge wer kwagh hemba u. Shi alaghga ishima ia vihi u ker shi ia lu nan we ibo shi mciem ma a gba u iyol. Alaghga u nenge wer, ityôkyaa i injaa kera ngi i u za hemen u lun uma ga.

Aluer u zungwe ku u or wou shighe gôgônan je kpa, ka kwaghbo ga. Kwagh ne tese er or shon nan doo u ishima kpishi yô. Nahan kpa, shighe u u lu zungwen ku la, u fatyô u zuan a ishimasurunuu?

KWAGH U MBAGENEV KA VE ER KEN MLU NE YÔ

Er ka i lu inja er mnyoon u ku u or wou la, una fatyô u been ga nahan kpa, aluer u dondo mbamhen mba ve lu shin heen ne yô, alaghga u zua a ishimasurun:

U FATYÔ U ZUNGWEN SHIGHE GÔGÔNAAN

Gbenda man shighe u ior ka ve tôô u zungwen ku la ngu kwaghmôm ga. Kpa mbagenev mba ve taver ishima ga yô, ka vea vaa yô, ishima i gba ve shimi. Vanessa u se vande ôron kwagh na la, kaa ér: “Ka mea vaa yô, vanger a yôhôr mo shimi.” Sofía u yange anmgbian na u kwase va kpe kpoo la, kaa ér: “Ka mea hen sha kwagh ne yô i nyoon mo tsung, vough er ka a za sagh or ivav ken iyouci, a ôôn ve i nyoon nan nahan. Ka i nyoon tsung, kpa kwagh ne a gema a wase ivav la i bee.”

PASE MBAGENEV ER I LU U KEN ISIHMA LA

Ashighe agen alaghga a lu u pe lun tswen, man ka sha inja je. Kpa aluer u ngu wan ishima a ijungwen  tswen yô, ka inja er u ngu nôngon wer u tôô ikyav mbi yuhwan kpishi iyol you nahan. Jared u a lu anyom pue kar utaankaruhar, u ter na yange saa ku la, umbur wener: “Yange m pase mbagenev er i lum ken ishima la. Kpa i lum er mba kaven kwagh u u m lu ôron ve la ga nahan, kpa zum u mea pase ve er i lum ken ishima yô, ishima i gbam shimi.” Janice, u se vande ôron kwagh na ken ngeren u hiihii la, shi pase iwasen i kwagh ne igen ér: “Er yange m lu pasen mbagenev er lum ken ishima la yô, m zua a ishimasurun kpen kpen je. Yange ve kav er lum ken ishima la, nahan m nenge mer m ngu mo tswen ga.”

LUMUN IWASEN

Ortwer ugen kaa ér: “Aluer mba ve lu zungwen ku u or ve la, de ér azende man mba hen tsombor ve, ve na ve iwasen sha hiihii u ku u er ve la je yô, a kera taver ve u wan ishima a ijungwen shi hemban i ga.” Pase azende a ou a fa kwagh u u soo wer ve wase u sha mi la; alaghga vea soo u wasen we, kpa alaghga vea fa kwagh u u soo wer ve wase u sha mi la ga.—Anzaakaa 17:17.

KPOROM IKYUA A AÔNDO

Tina kaa ér: “Shighe u nomom kpe angev mbu kyansa la, lu kwagh u me kera fatyô u pasen un mbamzeyol av ga, sha nahan yô, m pase Aôndo hanma zayol wam cii! Hanma sev yô, m sôn Aôndo mer a wasem sha mbamtaver av cii zan zan iyange shon i kar been. Aôndo yange wasem sha igbenda kpishi je yô, me fatyô u ôron been ga.” Tarsha, u lu anyom 22 shighe u ngô na kpe la, kaa ér: “Bibilo i ôron yange i nam ishimasurun hanma sev. Yange m zua a kwagh u nan mo ishimataver u me gbidye kwar sha mi yô.”

GBIDYE KWAR SHA KWAGH U MNDER U SHIN KU LA

Tina za hemen kaa ér: “Sha hiihii la m zua a ishimasurun sha kwagh u mnder u shin ku la ga, sha ci u m soo u lun vea nomom shi mbayev av kpa soo u lun vea ter ve. Nahan kpa, hegen u anyom anyiin a kar ne yô, m ngu a ishimaverenkeghen sha kwagh u mnder u shin ku la tsung. I nam ishimasurun shi i wasem u wan ishima. Ka m gbidye kwar m nenge a shighe u a va nder un shin ku la, nahan kwagh ne ka a nam bem ishima man iember!”

Alaghga ku a er u shighe a kar kpa u lu zungwen her. Nahan kwagh u yange er Vanessa la, una fatyô u nan we ishimasurun. A kaa ér, “Ka u hen wer, mayange u fatyô u saan ga, kpa shighe a karen yô, kure kure tsô i gba saan we iyol.”

Umbur wer, er ka i sar u u nengen a or wou u nan kpe la nahan kpa, u fatyô u zuan a ityôkyaa i injaa i zan hemen u lun uma. Sha iwasen i Aôndo yô, u fatyô u zan hemen u kôron azende a kôôsôô shi lun a uma u injaa. Shi ica a gba ga tsô, Aôndo una nder mbakpenev. Aôndo soo ér we u hide u nenge a ior ou mba ve kpe la, shi u kuve ve kpaa. Hen shighe la, mnyoon u ken ishima you la, una bee kera gbem shawon!