Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Shighe u Nom Shin Kwase Wou Nan Er Idya Yô

Shighe u Nom Shin Kwase Wou Nan Er Idya Yô

Maria, u a lu ken tar u Spain la kaa ér: “Shighe u nomom kaa a mo ér, un ngu undun mo una yem a za kohol gumkwase u m lu tamen a na la, lum pe kpen. Yange m nenge mer a er hanma kwagh cii a mo sha mimi ga, hemban je yô, shighe u mea umbur akaa a yange m de karem sha ci na la yô.”

Bill, u a lu ken tar u Spain la kaa ér: “Shighe u kwase wam va undum kpoo la, lum inja er ma ilyeegh ki gen ken iyol yam kpe nahan. Akaa a se soo u eren man ishimaverenkeghen yase kua mbaawashima asev cii saa ishe. Ayange agen m nenge mer ishima de u nyian mo, kpa fese nahan ishima i hide i gba nyian mo tsung.”

SHIGHE u nom shin kwase nan er idya yô, ka i vihi or u nan lu iyolshô la kpishi. Ka mimi, noov shin kasev mbagenev nenge ér vea fatyô u den ikyar ve u ken ivese u nan er idya, kpa nan gem ishima la kwaghbo shi vea hide a za hemen a ivaa ve. * Nahan cii kpa, ivese ka ia pav shin ia pav ga je kpa, ka i vihi nom shin kwase u nan va kav ér ikyar u nan u ken ivese er idya la kpishi. Mba kwagh ka a er ve u vihin kpishi nahan ne, vea fatyô u nôngon a mlu ne nena?

AVUR A BIBILO A A FATYÔ U WASEN WE YÔ

Er kwagh ne ka a vihi tsung nahan kpa, noov man kasev mbaishôôv kpishi zua a msurshima ken Ruamabera. Ve hen ve fa ér Aôndo nengen a mliam vev mara shi un kpa kwagh ne ka a doo un ga.—Malaki 2:13-16.

“Zum u mbamhen ve ngeem ken ishima yô, mbamsurshima Ou nam ishima i saan saan.”Pasalmi 94:19.

Bill, umbur kwagh u za hemen yô, ér: “Er m ôr ivur Bibilo ne yô, m gbidye kwar m nenge er Yehova a lu nan mo msurshima, er ter u mhôôn nahan yô.”

“Or u nan zungu mhôônom yô, U tese di nan mhôônom Ou ma zungwen je.”Pasalmi 18:25.

Carmen, u nom na lu eren idya iwer imôngo la pase wener, “Nomom yange lu eren kwagh a mo sha mimi ga, kpa m na jighjigh mer, Yehova yô, una er kwagh a mo sha mimi. Mayange una vam ahenge ga.”

“Ishima i̱ de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber . . . man bem u Aôndo u a gande hanma mfe wase cii una kura asema a en man mbamhen enev.”Mbafilipi 4:6, 7.

Sasha, kaa ér, “Yange m ôr avur ne kwa kimbir kimbir. Shi er m lu seer a seer u eren msen hen Yehova yô, Yehova nam bemshima.”

Mba se ôr kwagh ve sha heen ne cii, ashighe agen yange ve nenge ér kwagh hemba ve. Kpa yange ve suur sha Yehova Aôndo shi ve hen Mkaanem nam, nahan ve zua a ishimataver. Bill kaa wener: “Shighe u lu inja er hanma kwagh cii saa ishe la, jighjigh u nan wam wase uma wam lu a inja. Er sha shighe ugen la, m kar hen ‘pev u mure u kuugh’ nahan kpa, Aôndo lu a mo.”—Pasalmi 23:4.

^ par. 4 Wea soo u fan aluer ka u u de ikyar u la kwaghbo shin u de ga yô, nenge ngeren u When a Mate Is Unfaithfulu i duen a mi ken Awake! la, ken Awake! u Aipor 22, 1999 la.