Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Mbacivir Akaa a sha Kwavaôndo man Mbatsengan Pasen Akaa Vea Fatyô u Pasen Ior Akaa a ken Hemene?

Mbacivir Akaa a sha Kwavaôndo man Mbatsengan Pasen Akaa Vea Fatyô u Pasen Ior Akaa a ken Hemene?

MBACIVIR AKAA A SHA KWAVAÔNDO

Mbacivir akaa a sha kwavaôndo ka ior mba ve ne jighjigh ér asan man uwer man kwavaôndo ka ve pase kwagh u una va za hemen ken uuma mba iorov shin tar yô. Ka ve kaa ér gbenda u kwavaôndo u lu sha mi shighe u i mar wanye la, ka u tese inja i nana va lu a mi la man mlu u nan u ken hemen la.

Er i lu ken Babilon u tsuaa la yange i hii kwagh u civir akaa a sha kwavaôndo nahan kpa, ior kpishi mba civir akaa a sha kwavaôndo ne her. Sha kwagh u kwaghtôvon ugen ken tar u Amerika a tese yô, 1 ken atô u iorov 3 mba yange i pine ve kwagh u ityesen i civir akaa a sha kwavaôndo la yô, hen ér “kwagh ne ka vegher u sainsi ugen,” ior 10 ken atô u iorov 100 kaa ér mcivir u akaa a sha kwavaôndo la ka kwagh u “sainsi kpôô kpôô.” Kpa kape i lu laa? Ei. Nenge ase atôakaa ne.

  • Akaa a sha kwavaôndo shin asan nga a tahav mbu pasen kwagh u uumace, er mbacivir akaa a sha kwavaôndo ve kaa ér nga eren la ga.

  • Ashighe kpishi akaa a ka ve tsenganpasen la, ka i lu akaa a a fatyô u va eren hanma or cii yô.

  • Mbacivir akaa a sha kwavaôndo nyian ka ve er ayenge a zua sha jighjigh u nan u ior mba sha ayange a tsua lu a mi, ér ityar igen kase tar wase ne, nahan ka i ningir u la. Nahan kpa, sha mimi yô, ka iyange ityar ka i ningir i ye.

  • Akaa a mbacivir akaa a sha kwavaôndo kposo kposo ka ve pase ér aa va er or la ka a gba zwa môm ga.

  • Mbacivir akaa a sha kwavaôndo ka ve pav ior ve ver ken ma vegher u ken avegher 12 a sha kwavaôndo la, er ayange a mar ve a tese la. Ken uderi mbaayomov mba karen ne, tar gema kure kure tile sha ijiir igen ken iamegh, nahan ati a yange i yilan avegher a sha kwavaôndo la, kera zua sha ati a i yilan atihi-asan a i pav a i ver ken avegher shon, shighe u iyange i lu karen ken a nyian la ga.

I kaa ér avegher a sha kwavaôndo la ka a wase u fan inja i or. Kpa jighilii yô, ior mba i mar ve iyange môm la je kpa mba lun a inja môm ga; sha nahan yô, iyangemar i or i pasen kwaghmôm sha inja i nan ga. Er mbacivir akaa a sha kwavaôndo ma ve nengen ior er ve lu la yô, ka ve gema ve keren mbaahaba, er ve nenge aeren man anza a ior a tese la. Kwagh ne ka gbenda ugen u tesen ér mba sangen ior sha dooshima ga zee?

 MBATSENGAN PASEN AKAA

Ior ka ve za hen mbatsengan pasen akaa sha er vea za fa mbamlu vev mba ken hemen yô, hii sha ayange a tsuaa la je. Ior mba ve ne jighjigh a ityesen ne yô, ka ve keren u fan akaa ken myam ma inyam shin ma orumace gayô ve ver ishima ve nenge er nomkyegh a lu sangen wua sha zwa hen inya la, sha er vea fa ma kwagh u ken hemen yô. Mbagenev yô, yange ve kenger ikya i tii gayô hen inya i kaha kofi yô, maa ve ker ahaba sha ma kwagh u una va er ken hemen yô. Nyian ne yô, ka ve er tom a kati u kpehen ishor a mi man bor u kpehen ishor man agbende a tsendan kua akaa agen, sha er vea “fa” mlu u or u ken hemen yô. Kwagh u mbatsengan pasen akaa ve eren la ka gbenda u hemban doon u fan mlu u ken hemene? Mayange ga. De se time sha kwagh ne.

Time ase sha gbenda u ve eren kwagh, kwaghmôm ga la. Igbenda i ve eren tom a mi u pasen mlu u ken hemen la, ashighe kpishi ka i gba zwa môm a igen ga. Iorov uhar ka vea er tom a gbenda môm u pasen kwagh u ken hemen je kpa, mpase ve a kaha. Ikyav i tesen yô, aluer or pine iorov uhar mbatsengan pasen akaa ér ve er tom a ma kati u kpehen ishor ve pase nan kwagh u mlu u nan u ken hemen yô, doo u ma ve gbe “zwa môm,” kpa ashighe kpishi yô, kwagh ka a lu nahan ga.

Igbenda shin mbaawashima mba mbatsengan pasen akaa la taver ior tsung. Mbapuunakaa kaa ér kati u kpehen ishor man bor u kpehen ishor la, ka kwagh u mbatsengan pasen akaa ve eren tom a mi u suen mbamhen vev di tsô. Mbatsengan pasen akaa ka ve kenger ieren i or, ka i lu akaa la ga. Ikyav i tesen yô, ortsengan pasen akaa u nan fe tom ne tsembelee yô, ka nan gba pinen mpin tsô, maa nan kpe iyol nan kegh ato shi nan nenge kwagh u or la nana ôr shi nana er la, sha er nana fa ma kwagh u nan yô. Nahan ortsenganpasen akaa la nan zua a iwuese sha akaa a or la iyol i nan, nan pase kpa nan fe ga la. Mbatsengan pasen akaa mban ka vea nôngon mba ve ze hen a ve mbara vea naan ve jighjigh yô, maa mbatsengan pasen akaa mban mbagenev ve ngohol inyaregh hen ve kpishi.

KWAGH U BIBILO I TESE SE YÔ

Akaa a mbacivir akaa a sha kwavaôndo man mbatsengan pasen akaa ve eren la, ka a tese ér i vande veren kwagh u una va er se ken hemen yô. Kpa ka nahanaa? Bibilo kaa a vese ér se mba a ian i tsuan kwagh u se na jighjigh a mi shin se er yô, nahan kwagh u se tsough la una bende a mlu wase u ken hemen la.—Yosua 24:15.

Mbacivir Aôndo mba a ityôkyaa igen i vendan kwagh u mbacivir akaa a sha kwavaôndo man mbatsengan pasen akaa ve tesen la, sha ci u Aôndo yange hanma ishor i kpehen cii. Se zua a mkaanem man ken Bibilo, ér: ‘I̱ de zough a or u kpehen ishor, shin or u eren ahir, shin or u pasen uivande, shin or u lamen ishor, shin or u yangen akombo, shin or u nan pin jijingi u orkpen kwagh, shin nan pin jijingi u tsengan pasen akaa kwagh, shin or u lamen a mbakpenev ken a we ga. Gadia hanma or u nan eren akaa angan cii, nan ngu Yehova * kwagh u ihôngorough je.’—Duteronomi 18:10-12.

^ par. 17 Yehova ka iti i “Aôndo uhembanagee” la.—Ekesodu 6:3.