Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Kwaghwan u Bibilo la Ngu a Iwasen Nyian Je Kpa?

Kwaghwan u Bibilo la Ngu a Iwasen Nyian Je Kpa?

MBAGENEV KAA ÉR, EI. Ortwer ugen kaa ér kwagh u eren tom a Bibilo sha u zuan a kwaghwan la, ngu kwaghmôm vea u tôôn takerada u kyemisteri u i gber ken kwavanyom u 1920 la, sha u tesen mbayev kwagh a mi nyian ken kelase. Alaghga ma or u nan lu a icivir sha Bibilo ga yô, nana kaa ér, or nana fatyô u tôôn takerada u wasen or u henen fan kômputa, u sha ayange a tsuaa la ér u wase nan u henen fan kômputa u he u sha ayange ne la a mi ga. Inja na yô, mbagenev nenge ér Bibilo ya tsegh, nahan ngi a iwasen ga.

A hii nan ve or nana tôô takerada u tse u ngura nahan ér nana ôr hegen u tar u bugh ashe shi iwavaren i ze hemen kpishi nee? Kera ga je kpa, ajiir dumbur sha Intanet a ior ve keren kwaghwan her yô. Shi ior mba fan kwagh, er ior mba ve hen gbenda u orumace a henen shi a eren kwagh la man mbafankwagh mba ka ve duen ior a mbamhen mba wasen ve la kua mbagberen ityakerada, ka ve shi lamen a ior sha televishen sha akaa ne. Kwagh ugen yô, ushôôpu mba, mba ka ve teen ityakerada kpishi i wasen ior ken uma, man i ka i na ikômpeni i zua a udola ubiliôn ubiliôn yô.

Er akaawan a lu kpishi hegen hanma shighe cii yô, doo u se ker kwaghwan ken Bibilo, takerada u i nger u i bee, anyom a kar i nôngo u kuman 2,000 ken ijime laa? Kwagh u mba ve lu a icivir sha Bibilo ga, ve kaa ér, kwagh u eren tom a Bibilo sha u zuan a kwaghwan la, ngu kwaghmôm a u ôron takerada u kyemisteri u tse shin takerada u tse u wasen or u henen kômputa fan la, ka mimii? Jighilii yô, kwagh u ve ôr la, ngu sha mi ga. Iwavaren man akaa a mbasainsi ve ôron la, ka a geman fele fele, nahan kape mlu u uumace kpa ka a geman laa? Ior mba zan hemen u keren msaanyol u akuma akuma man uma u dedoo man mkôr, shi ve soo u lun ken bem vea mba hen tsombor ve shi kôron azende a injaa kpaa.

Er Bibilo i tse hegen kpishi nahan kpa, ngi a iwasen sha mbamgbe asev mbara kua sha akaa agen kpaa. Shi Bibilo kaa ér ka Un u a gbe se la, a ne i nger i ye. I̱ kaa ér ia fatyô u wasen se sha hanma kwagh u ken uma wase shi ia wa se agoyol u nôngon a nyityô mtaver u se tagher a mi cii. (2 Timoteu 3:16, 17) Kwagh ugen yô, i̱ kaa ér ngi a kwaghwan u mayange una ya tsegh ga yô! Bibilo iyol i i kaa ér: “Mkaanem ma Aôndo ma uma je.”—Mbaheberu 4:12.

Akaa a Bibilo i ôr la ka a mimi? Bibilo i ya tsegh shin ka takerada u u hembe lun a inja a hanma takerada cii, je yô u hingir takerada u uma? Awashima u mgber u Iyoukura ne, i i lu mgber u hiihii ken mbamgber mba injaav ne la yô, ka u wasen se u zuan a mbalumun sha mbampin mban.