Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Setemba 2016

Zua a Iwasen ken Kwaghwan u Yehova Nyian

Zua a Iwasen ken Kwaghwan u Yehova Nyian

KWAGH U DOON TSUNG U YANGE M TSUA U EREN KEN TAR U POLAND YÔ

“YANGE m er batisema shighe u m lu anyom 15 la. Iwer ngi kar er ataratar nahan yô, m hii u eren ishuen pania. Inyom karen môm yô, m hii u eren pania u keke. M va been kôleeji yô, m soo u yemen za pasen kwagh ape kwagh a hembe gban sha mbapasenkwagh u Tartor la. Yange m kera soo u lun hen ijiir yam, ape m lu vea ngôm u tamen u lu Kwaseshiada u Yehova ga la ga. Ishima yange i vihim kpishi shighe u ortamen u sôron atôônanongo kaa a mo ér, a gba u me za hemen u pasen kwagh hen ijiir yam la! Yange m nôngo mer a de fe er i vihim ga. Maa m sua ityough inya, m kar m gba yemen; m lu henen sha kwagh u a ôr a mo la. Tsô, m kaa a anmgbian u kwase u m duen kwagh pasen vea na la mer: ‘Kam er m ngu eren kwagh er Yona nahan. Kpa Yona va yem ken gar u Ninive ken masejime. Nahan yô, mo kpa me er tom ape i kaa ér mo m er la.’

“M er tom pania hen ijiir yam anyom anyiin hegen. Doom kpishi er yange m dondo kwaghwan la yô. Zayol wam u vesen yô, lu mnenge u shami ga u m lu a mi la. Saan mo iyol kpishi hegen. Uwer ugen la, m hen Bibilo a ior kuma iorov 24. Sha iwasen i Yehova yô, m hii Bibilo i henen vea ngôm u tamen u yange hendan a mo la je kpaa.”

KWAGH U DOON TSUNG DUE KEN KWAGH U ANMGBIAN U KWASE UGEN ER KEN TAR U FIJI LA

Kwase u henen Bibilo ugen ken tar u Fiji yange venda u dondon nom na ér vea za iniongo i umbur iyange i mar i anmgbian u nom na, sha er una za mkohol u Mbakristu yô. Nom na lumun ér a za mkohol shon. Yange kaa a nom na ér una hiden mkohol la yô, una va iniongo shon. Nahan hiden mkohol la yô, nenge ér doo u una er kwagh u una na un gbev mbu nôngon ken jijingi ga, nahan maa kera za iniongo shon ga.

Shighe u lu ken mkohol la, nom na kaa a anmgbianev nav ér, kwase na za “mkombo u Mbashiada,” una hiden yô, una va kohol ve hen iniongo shon. Kpa ve kaa a na ér: “Una va ga; Mbashiada mba Yehova mba eren iniongo i umbur iyange i mar ga!” *

Sha nahan yô, kwagh la doo nom na a na er tile dông sha atesen a a lumun a mi la shi er kwagh u imoshima na ia na un ibo ga la yô. Gbenda u er kwagh sha mimi la na yô, va zua a ian i pasen nom na man mbagenev kwagh. Nahan lu nyi i due kere? Nom na yange lumun ér i hen Bibilo a na shi hii u van mbamkombo vea kwase na.

^ par. 7 Nenge ngeren u ken Iyoukura i Maaci 1, 2002, u a lu a itinekwagh ér, “Mbampin mba Mbaôron Takerada Ne Ve Pin La.”