Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Mei 2017

 NGEREN U PASEN YIASE YASE

“Yôô Nen Angwe u Tor man Tartor La!”

“Yôô Nen Angwe u Tor man Tartor La!”

YANGE hii u tseen iyol sha iyange i Tomataan pepe, ken uwer u Setemba 1922 la, er iorov 8,000 za iv poo ken iyou i mkohol yô. Orkyôn u mkohol la yôô ér, shighe u iaven i hange hange ne ia lu zan hemen la, i na hanma or ian i duen ken iyou la kera, kpa aluer nan due yô, a kera na nan ian i hiden nyôron ker ga.

Mba we atsam a “Wuese Yehova,” a hiin mkohol la cii yô, Anmgbian Joseph F. Rutherford mough za tile ape nan kwaghôron la. Lu mbazan mkohol kpishi toon toon u fan kwagh u una er yô. Mbagenev kpuaa nahan, fatyô u teman inya gir gir ga, ve lu zenden sha, kôndon shi senen, sha ci u tsee iyol kpishi. Ornankwaghôron la taver ve ishima ér ve tema inya ve keghen ato. Shighe u i hii u nan kwaghôron la, yange ior nenge a zegeikyondo i i hure i ta tsembelee sha ishigh ki tsembe u nan kwaghôron laa?

Anmgbian Rutherford yange lam sha itinekwagh i “Tartor u sha mgbôghom” la. Yange na kwaghôron ne kuma er ihwa i môm man tiôn nahan, shi ikyenge na lu duen gbungur gbungur ken iyou i i kohol ker la. Yange time sha kwagh u uprofeti mba sha ayange a tsuaa, mba ve yôô kwagh u mve u Tartor la a mciem shio yô. Ngur zurum u been kwaghôron na yô, a pine ér, “Ne na jighjigh ner Tor u iengem la, hii hemen na kpa?” Maa mbazan mkohol cii ger ikyuu ér: “Een!”

Tsô Anmgbian Rutherford ôr baver baver ér: “Ne ônov mba Aôndo u hembanagee cii, hide yem za pase nen kwagh! Nenge, Tor hii hemen ve! Ne mba mba yôôn angwe na. Sha nahan yô, yôô nen, yôô nen, yôô nen angwe u Tor man tartor na.”

Hen shighe ne i sagh ikyondo i i hure i kange sha la i pase, maa ior nenge a ngeren ne, ér: “Yôô Nen Angwe u Tor man Tartor La!”

Anmgbian Ray Bopp umbur nahan ér: “Yange kpiligh mba ve za mkohol ne la iyol kpishi.” Anmgbian Anna Gardner kaa ér “ior yange ve ger amo taver je yô, ikyon i i kôr haav mbu iyou la tenger.” Anmgbian Fred Twarosh kpa kaa ér, “Mbazan mkohol la cii mough tile sha shighe môm.” Anmgbian Evangelos Scouffas di kaa ér: “Yange lu inja er tahav mbu vesen mbu gen kôr se mough a mi sha mkam ma se tema sha mi la yô. Er se tile sha la, mliam iv se ken ashe poo.”

Ior kpishi mba ve za mkohol u vesen ne la, lu vanden samber a loho u dedoo u Tartor la. Nahan kpa, ve seer zuan a ishimataver hen shighe ne i eren tom u pasen kwagh la. Anmgbian Ethel Bennecoff pase ér, Mbahenen Bibilo yange ve “seer lun a gbashima man dooshima ken a ve hemba ave a tse.” Anmgbian u kwase Odessa Tuck, u lu anyom 18 hen shighe ne la, hidi mkohol u vesen la yô, kange ishima u nan mlumun sha mpin u i pine ér, ‘Ka an nana zaa?’ la. A kaa ér: “Yange m fa ape me pase kwagh shin er me er tom shon shin kwagh u me pase la kpaa ga. Kwaghmôm u yange m fa yô, lu u eren kwagh u Yesaia kaa la, ér: ‘Mo ne, tindim’ la!” (Yes. 6:8) Anmgbian Ralph Leffler kaa ér: “Iyange i iemberegh ne, bugh gbenda u yôôn angwe u Tartor, u i lu samber a mi tar sha won cii nyian ne.”

Kera kpiligh se iyol er mkohol u vesen u i er ken  inyom i 1922, hen geri u Cedar Point, kpentar u Ohio la, a hingir yiase i doon tsung i nongo u Aôndo ga! Anmgbian George Gangas kaa ér: “Mkohol u vesen la taver mo ishima ér mayange m de bunden mkohol u vesen môm tsô kpaa ga.” Shi a umbur nahan ér, hii shighe la je, mayange un ngu a bunde mkohol ga. Anmgbian u kwase Julia Wilcox di nger wener: “Hanma shighe ka a ter kwagh u mkohol u ken geri u Cedar Point, inyom i 1922 la ken ityakerada yase yô, i doom i saa her. Hanma shighe u ka a ter kwagh ne yô, m kaa mer: ‘M sugh u Yehova, er yange u nam ian m za mkohol la yô.’”

Se mbagenev kpishi nyian kpa, alaghga ka se umbur ma mkohol u vesen ugen u yange doo se tsung, nahan se seer lun a gbashima man dooshima sha Aôndo wase u hembancii kua Yesu u Aôndo a ver un tor la. Ka sea umbur akaa la yô, se kpa kwagh ne a mgbegha se u kaan ser: “M sugh u Yehova, er yange u nam ian m za mkohol la yô.”