Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Msaanyol u Lun a Akaa ken Uma Akuma Akuma

Msaanyol u Lun a Akaa ken Uma Akuma Akuma

DANIEL VEA MIRIAM yange mba eren ivese ken uwer u Setemba 2000 la yô, ve yem ve za lu ken gar u Barcelona, tar u Spain. Daniel kaa ér: “Se lu eren akaa ken uma er ior kpishi eren nahan. Ityom i se eren la na yô, se yaan kwaghyan ken uhôtel mba doon tsung shi se zenden se yemen ken ityar igen shi se huan akondo a taver ishe shi se duen kwaghpasen hanma shighe kpaa.” Kpa kwagh va gema.

Sha mkohol u vesen ugen ken inyom i 2006 la, Daniel ungwa i na kwaghôron ugen, i pine ker ér: “Se mba eren kwagh u se fetyô la cii ser se wase mba ve lu ‘zan ze ze ze hen ijiir i sôngon’ la, sha u ve zende sha gbenda u nan uma u tsôron la kpa?” (Anz. 24:11) Kwaghôron la pase tom u se lu a mi u wasen ior ve fa loho u Bibilo u nan uma la wang. (Aer. 20:26, 27) Daniel kaa ér: “Yange m nenge mer ka mo jighilii Yehova a lu lamen a mo ye.” Shi kwaghôron la tese ér, aluer or seer eren tom u pasen kwagh la yô, nana seer zuan a msaanyol. Daniel yange fa ér kwagh ne ka mimi. Miriam lu vanden eren pania, nahan lu zuan a averen, a a na un msaanyol kpishi yô.

Daniel kaa ér: “Yange m kure ikyaa mer shighe kuma u me gema gbenda u m lu eren akaa ken uma la vindi vindi.” Shi lu kwagh u er vough je la. Yange pande ahwa a a lu eren tom la, maa hii u eren pania, shi hen sha msaanyol u un man Miriam vea fatyô u zuan a mi sha u za eren tom ape kwagh a hembe gban sha mbapasenkwagh u Tartor la.

MBAMTAVER LU SHA HIIHII LA, KPA KWAGH U DOON TSUNG GEMA DUE KER

Ken uwer u Mei 2007 la, Daniel vea Miriam de ityom i ve lu eren la, maa ve mough ve yem ken tar u Panama, ape yange ve vande zan zende ker kwagen la. Haregh ve u he u pasen kwagh, u hen tiôntar u Bocas del Toro Archipelago, ken Zegemnger u Caribbean la, lu a uicile kpishi, shi lu ior mba i yer ve ér Guaymi la, lu marnya u ijiir ne ye. Daniel vea Miriam yange ve hen ér inyaregh ki ve koso her la, kia kuma u vea za tsa ken Panama a nôngo u kuman iwer anigheni.

Yange ve zenden ken uicile mban shin tso man sha ikyekye, shi ka ve umbur er sha kwa u hiihii la, ve naha ikyekye nôngo u kuman ukilomita 32, ve unde agungu, ken oo gyang yô. Daniel yange vôr je nôngo u humen. Nahan cii kpa, icombor i ior i Guaymi i i lu sha uya mba ve lu sha gbenda ne la cii, ve ngohol ve doo doo, hemban je yô, shighe u ve wa fan zwa ve u ityôô la. Ica gba ga je maa ve lu henen Bibilo a iorov 23.

Nahan kpa, inyaregh ki ve koso la ki va been yô, anmgbian ne vea kwase na hingir u zungwen, kera saan ve iyol ga. Daniel kaa ér: “Yange se ndôr akinde, maa se hii u henen sha kwagh u hiden ken tar u Spain la. Se ure kpishi sha ci u gba u se undu mba se lu henen Bibilo a ve la.” Kpa uwer môm ngu kar yô, ve ungwa kwagh u doon ve tsung. Miriam kaa ér: “Yange i kaa ér se er tom u ikpur pania. Er se za hemen u eren tom wase her yô, se zua a msaanyol!”

MSAANYOL VE U HEMBAN CII

Ken inyom i 2015 la, i nyôôso akaa ken nongo wase, nahan i kaa a Daniel man Miriam ér, ve za hemen u eren tom u pasen kwagh la, sha u eren pania u keke. Nahan ve er nena? Ve suur sha ityendezwa i i lu ken Pasalmi 37:5 la. Ijiir la kaa ér: “Wa TER gbenda wou sha ikyev, suur sha a Na, Una er sha mi vough.” Yange ve ker tom u uke ve lu eren sha u suen ayol a ve ken tom pania la, nahan nyian mba eren tom vea tiônnongo ugen u a lu hen tiôntar u Veraguas, tar u Panama la.

Daniel kaa ér: “Cii man se undu tar u Spain yô, yange se fa jighilii ser se fatyô u lun a akaa ken uma akuma akuma ga. Kpa nyian se mba eren kwagh ne, shi kwaghmôm u injaa kpa ban se ga.” Ka nyi i hembe nan ve msaanyol ciilii? Ve kaa ér, “Ka u wasen ior mba ve hiden a ayol a ve ijime la u henen kwagh u Yehova, man kwagh ne na se msaanyol hemba hanma kwagh ugen cii!”