Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Er U Hen Bibilo sha Gbenda u Kwaghhenen la Una Wase U shi Una Maa U Iyol Yô

Er U Hen Bibilo sha Gbenda u Kwaghhenen la Una Wase U shi Una Maa U Iyol Yô

YOSUA yange tagher a kwagh u taver kpishi. Gba u una hemen ikyurior i Iserael vea nyôr ken Tar u Ityendezwa, man mbamtaver lu kpishi. Nahan kpa Yehova kaa a na ér una kôrcio u eren tom ne; a taver un ishima ér: ‘Lu taveraa, taver ishima, waan atindi am ikyo. Timen kimi tugh man atetan, sha er ú ver ishima u eren akaa a i nger kimi cii; gadia ka nahan man ikyôr ia lagh u sha akaa cii, shi ka nahan man ú er kwagh sha inja kpaa ye.’—Yos. 1:7, 8.

Se mba ken “ashighe a ican,” nahan se kpa se mba tagher a mbamtaver mba vesen kpishi. (2 Tim. 3:1) Kpa aluer se dondo kwaghwan u Yehova wa Yosua la yô, se kpa se kôrcio u hemban ve er Yosua nahan. Gba u se ôron Bibilo hanma sev shi se ver ishima se dondon akaawan a Bibilo la zum u se tagher a kwagh u karen jighjigh wase yô.

Nahan kpa, alaghga se kpishi se kaa ser se mba fetyô u henen kwagh ga shin kwaghhenen ngu a na se ican. Kpa er i lu hange hange u se henen Bibilo yô, time sha ngeren u kiriki u a lu a itinekwagh ér “ Kar Dondon Mbamhen Mban” la, sha er u zua a igbenda i dedoo i ia wase u u henen kwagh er kwaghhenen shon una wase u shi una maa u iyol kpaa yô.

Orpasalmi yange wa icam kaa ér: ‘Erem m̱ zende sha gbenda u atindi a Ou, gadia ka u u doom ye.’ (Ps. 119:35) We kpa a doo u u henen mkaanem ma Aôndo. Er u lu henen Bibilo la, u zua a akaainjaa a doon kpishi.

Er i gbe u u hemen ikyurior er Yosua nahan ga kpa, u ngu a mbamtaver mba u tagher a mi yô. Nahan henen Mkaanem ma Aôndo shi eren sha akaa a i nger ker la er Yosua nahan sha ci u iwasen you. U er nahan yô, we kpa ikyôr ia lagh u shi u er kwagh sha inja kpaa.