Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Ve Na Ayol a Ve​—⁠U Za Pasen Kwagh ken Tar u Madagascar

Ve Na Ayol a Ve​—⁠U Za Pasen Kwagh ken Tar u Madagascar

ANMGBIAN u kwase Sylviana u a lu pania shi a lu anyom 27 la, kaa ér: “Shighe u m ungwa akaa a dedoo a a er azende a am, a a za pase kwagh sha ajiir a kwagh a hembe gban sha upania la yô, sarem tsung u mo kpa za benden nengen.” Shi a kaa ér: “Kpa, yange cier mo iyol sha ci u m hen mer, m ngu a tahav mbu za eren tom ape kwagh a hembe gban sha mbapasenkwagh la ga.”

We kpa ka i lu u ken ishima er Sylviana nahana? Sar u tsung u za eren tom hen haregh u kwagh a gbe sha mbapasenkwagh u Tartor kpishi la kpa, ka u hen wer u fatyô u kuren isharen you la gaa? Aluer kape i lu u ken ishima la yô, iyol i de kpeen we ga! Sha iwasen i Yehova yô, anmgbianev asev mba nomso man mba kasev udubu imôngo fatyô u hemban mbamtaver mba yange ve lu yangen ve u seer eren tom u pasen kwagh la. Aluer u soo u fan er Yehova a bugh mbagenev gbenda u eren kwagh ne yô, de se ôr nen kwagh u za hemen ken tar u Madagascar, icile i sha unyiin ken uicile mba hemban kehen sha tar cii la.

Ken anyom a hemban pue a karen ne, upania man mbapasenkwagh sha gbashima mba hemban 70, mough ken ityar * i kuman 11 nahan, va mba va pasen kwagh ken Afrika, hen ijiir i ior kpishi ve lu ngohol mimi shi ve lu a icivir sha Bibilo ne. Shi mbapasenkwagh mba hen ityônya kpishi kegh iyol u moughon yemen za wasen u samber a loho u dedoo u Tartor la, hen haregh u zege icile ne cii. De se fa nen mbagenev ken ve.

VE HEMBA MCIEM MAN IYOLKPEN

Perrine vea Louis

Anmgbian Louis vea kwase na Perrine, mba ve hemba anyom 30 la, ve mough ken tar u France, ve yem ken Madagascar. Yange ve lu a isharen i moughon za eren tom u kwaghpasen ken tar ugen la, anyom kpishi ken ijime. Kpa Perrine lu tan anu sha kwagh u moughon yemen ken tar ugen la. Perrine pase ityôkyaa wener: “Yange cier mo iyol u moughon yemen hen ijiir i m fe i ga la. Ishima yange i nyian mo sha kwagh u moughon undun tsombor wase man tiônnongo wase man ya wase man ajiir a se fa a la cii, kua akaa a se eren ayange ayange la. Sha mimi yô, yange gba u me hemba ishimanyian yam, i i lu kwagh u vesen u lu yangen mo u moughon la.” Nahan ken inyom i 2012 la, Perrine taver ishima, maa un vea Louis ve mough ve yem. Yange ve nenge kwagh u ve tsua u eren ne nena?  A kaa wener: “M hide m nenge ken ijime yô, me fatyô u kaan mer, m nenge er Yehova a wase se yô, nahan kwagh ne taver jighjigh wase u nan.” Louis di kaa ér, “Ku umbur u Yesu u se er sha kwa hiihii ken Madagascar la, iorov pue mba se henen Bibilo a ve la va, nenge kwagh u doon tsung ne sha wono!”

Lu nyi i na Louis vea kwase na tahav mbu zan hemen a tom ve zum u ve va tagher a mbamzeyol laa? Yange ve zamber a Yehova ken msen ér a na ve tahav mbu mbua wase ve u wan ishima yô. (Fil. 4:13) Louis kaa ér: “Yange se nenge er Yehova ungwa msen wase shi na se ‘bem u Aôndo’ yô. Nahan se fatyô u hemban veren ishima yase sha msaanyol u se lu zuan a mi ken tom wase la. Shi azende a ase a ken ya, tindi se a ilyoho sha Intanet man ken uwashika sha u taver se ishima ér, se de gbe uwer ga.”—Fil. 4:6, 7; 2 Kor. 4:7.

Yehova yange ver Louis vea Perrine kpishi sha ishimawan ve la. Louis kaa ér: “Ken uwer u Oktoba inyom i 2014 la, se za Makeranta u Henen Bibilo Ú Mbakristu Mba Ve Vese Ayol a Ve Yô * ken France. Makeranta u se za ne, ka iyua i Yehova a ne se i se hungur a mi mayange ga yô.” Yange mba been makeranta ne yô, i hide shi i tindi ve ér ve za er tom u pasen kwagh la ken Madagascar, nahan doo ve kpen kpen.

“SE TA AVE VANGER A VEN!”

Nadine vea Didier

Shighe u anmgbian Didier vea kwase na Nadine, ve mough ken France ve yem ken Madagascar, ken inyom i 2010 la, ve hemba anyom 50. Didier kaa ér: “Yange se er pania shighe u se lu agumaior la, maa se va mar mbayev utar. Mba va we ikyondo yô, se gba henen sha kwagh u moughon za eren tom ken tar ugen la.” Nadine ôr sha mimi nahan ér: “Yange kwagh u moughon yemen undun mbayev la, taver mo, kpa ve kaa a vese ér: ‘Aluer ne mough ne yem ken tar ugen, sha u za eren tom u pasen kwagh, ape kwagh a hembe gban sha mbapasenkwagh la yô, se ta ave vanger a ven!’ Mkaanem vev mara taver se ishima u moughon yemen. Er se lu ica a mbayev asev hegen nahan kpa, saan se iyol kpishi er se fetyô u lamen a ve hanma shighe yô.”

Yange lu Didier vea Nadine ican kpishi u henen zwa u Malagasy. Nadine se teghelee kaa ér “Se kera mba anyom 20 hegen ga.” Ka nyi yange i wase ve u henen zwa shono? Sha hiihii la ve zaan mkombo vea tiônnongo u eren mkombo ken zwa French yô. Shighe kar yô, ve nenge ér mba a shighe kpishi u henen zwa Malagasy, maa ve mough ve yem hen tiônnongo u eren mkombo ken zwa Malagasy yô. Nadine kaa ér: “Ior kpishi mba se zuan a ve ken kwaghpasen la, soo u henen Bibilo. Ashighe kpishi ka ve sugh se er se ze ve inya yô. Sha hiihii la, lum er ka mnyamciem yô. Doom kpishi u eren tom pania hen haregh ne. Ka mea nderen sha gambe yô, m kaa mer, ‘Doo ve, nyian kpa me za kwaghpasen!’”

Didier umbur shighe u hii u henen zwa Malagasy la, maa se teghelee. A kaa ér: “Yange m hemen mkombo ugen ken tiônnongo, kpa m kav mbamlumun mba anmgbianev mba nomso man mba kasev lu nan la ga. Kwagh u m fatyô u ôron yô lu, ‘M sugh u’ tseegh. Yange m sughun anmgbian u kwase ugen sha mlumun na, u na la yô, mba ve tema un shin ijime la, hii u eren akav a tesen mo ér, mlumun na la ka u shami ga. Maa fese je, m yila anmgbian u nomso ugen, u na mlumun u vough sha mpin shon la, m hen mer yange lu mlumun u vough di je.”

 A LUMUN U ZAN A ISHIMA I GBAR GBAR

Sha mkohol u vesen u i er ken inyom i 2005 la, Anmgbian Thierry vea kwase na Nadia, nenge inumbe i i lu a itinekwagh ér, “Pursue Goals That Honor God” (Er Nen Akaa A Nan Aôndo Icivir) la. Inumbe i i er sha kwagh u Timoteu, i i har sha Bibilo ne, kôr ve ken ishima, shi i na ve seer lun a isharen i za eren tom ape kwagh a hembe gban sha mbapasenkwagh u Tartor la. Thierry kaa ér: “Inumbe ne been, ior mba gbe kuren ave yô, m lian ken kwase wam, maa m pine un mer, ‘Ka han se se yemee?’ Kwase wam kaa a mo ér, un kpa ka kwagh u un lu henen sha mi vough je la.” Shighe kar kpuaa yô, ve hii u eren akaa a a wase ve vea kure awashima ve ne yô. Nadia kaa ér: “Kure kure tsô, se pande akaa a se lu a mi la cii, se mase shin a akaa a aa nyôr hen akpa anyiin tseegh yô!”

Ken imese keera: Nadia vea Marie-Madeleine Ken iyan keen: Thierry

Yange ve za nyôr ken Madagascar ken inyom i 2006 la, maa ve gba a mi pasen kwagh, nahan saan ve iyol sha hiihii la je. Nadia kaa ér: “Ior mba ka se zua a ve ken kwaghpasen la, ka ve na i saan se iyol kpishi.”

Nahan kpa, anyom ataratar nga kar yô, Thierry vea kwase na Nadia, ve tagher a mtaver. Yange ngô u Nadia, Marie-Madeleine, u lu ken France la, gba sombo uwegh shi tôndo ivav sha ityough. Thierry vea Nadia mba lamen a ortwer u Marie-Madeleine sha ikyaa ne yô, ve kaa a ngô ve ne ér, a va kohol ve ken Madagascar. Er Marie-Madeleine lu anyom 80 hen shighe ne nahan kpa, a lumun u za kohol ve. A nenge kwagh u za lun ken tar ugen la nena? A kaa ér: “Ashighe agen ka i taver mo u geman mlu wam sha er a zua sha mlu u hen ijiir ne yô. Er m kera fetyô u eren akaa agen ga nahan kpa, m nenge mer m ngu tiônnongo la a iwasen. Kwagh u a ne ve i saan mo iyol sha mimi yô, mve wam ne wase mbayev av u zan hemen a tom ve u pasen kwagh u u lu wasen ior kpishi heen ne.”

“M NENGE ER YEHOVA A WASEM YÔ”

Riana ngu nan kwaghôron ken zwa Tandroy

Anmgbian Riana, ngu anyom 22 hegen. Yange vese hen haregh u inya i doo kpishi, i yer ér, Alaotra Mangoro, u a lu ken vegher u Madagascar ugen la. Yange fa takerada ken makeranta kpishi, nahan soo u zan makeranta u vesen. Kpa va henen Bibilo yô, gema mnenge na la. A kaa ér: “Yange m lu nôngon mer me bee kôleeji fele, nahan m tôndo zwa a Yehova mer, ‘Aluer m ya ikyaren yam i masetyô la yô, me hii u eren pania.’” Riana been makeranta yô, kure ityendezwa na ne. Yange za kohol anmgbian ugen u lu pania yô, shi zua a tom u eren sha ashighe ashighe, maa hii tom pania. A kaa ér: “Kwagh u m tsua u eren la, lu kwagh u hemban doon cii, ken akaa a m tsough u eren ken uma wam yô.”

Nahan kpa, mba hen tsombor u Riana fa er hii ve venda u zan makeranta u vesen ga. A kaa ér: “Terem man anngô u terem u nomso kua anngô u ngô u terem u kwase la cii, ve taver mo ishima ér m za makeranta u vesen. Kpa m gema m soo u den pania sha ci u kwaghmôm tsô kpaa ga.” Cii man shighe ne yô, Riana soo u za pasen kwagh ape kwagh hemba gban sha mbapasenkwagh yô. Lu nyi i na ve lu a isharen nee? A kaa ér: “Mbaiv yange ve va nyôr hen ya wase, ve iim akaa kpishi. Iv mbura na yô, m gbidye kwar sha mkaanem ma Yesu ôr sha kwagh u ‘koson akaa a injaa Sha’ la. Nahan m tsua u eren tom kpoghuloo sha er me ombo uyôughyôughmbaakaav mba ken jijingi yô.” (Mat. 6:19, 20) Maa mough yem ken imbusutariyan i tar na, i gba ica hiinii, mough ape lu la yem her kuma ukilomita 1,300, shi ijiir la lu ikpoghonya je kpaa. Haregh ne lu ijiir i ior mba Antandroy. Lu nyi i na ve mough yem here?

Cii man iv mbura yô, Riana hii u henen Bibilo a ior mba Antandroy uhar. Yange hen asember agen a ken zwa u ior mban, maa gbidye kwar sha kwagh u ior mba Antandroy mbagenev kpishi mba i lu a pase ve loho u dedoo u Tartor ga la. Akaa ér: “Yange m sôn Yehova mer, a wasem me mough me yem hen haregh u i lamen zwa Tandroy her yô.”

Riana mough yem hen haregh ne, kpa fese je maa tagher a zayol. Yange fatyô u zuan a tom ga. Orgen pine un ér: “Hii nan ve u mough u ve heene? Ior mba heen ka ve mough ve yem ape u mough ve, u ve heen ne sha u za keren tom!” Ukasua uhar mba kar yô, Riana mough hen ijiir ne u zan mkohol u vesen, kpa gema lu a annyar kpuaa tseegh, nahan lu henen kwagh u una er yô. Ze mkohol yô, sha iyange i masetyô i una hide la, anmgbian ugen va wa un kwagh ken ikpa i suutu. Yange lu inyaregh ki ki ngee je kuma ki una fatyô u nyôron mato yemen hen haregh u Antandroy la, shi za hiin an-kpenga u teen yôgôôtu a mi yô. Riana kaa ér: Yange “m nenge er Yehova a wasem sha shighe vough yô. Nahan m fatyô u zan hemen u wasen ior mba yange ve zua a ian i henen kwagh u Yehova ga la!” Shi tom lu hen tiônnongo la kpishi. Riana shi kaa ér: “Yange m na kwaghôron, kasua môm a karen yô, shi m na ugen. Yehova lu tsaase mo sha ikyev i nongo  na.” Zan zan nyian, Riana ngu pasen ior kpishi mba ve lamen zwa u Tandroy, mba ve soo u henen kwagh u Yehova la, loho u Tartor her.

‘VER IYOL YOU KEN AÔNDO U MIMI’

Yehova na se vangertiôr ér, “or u nan ver iyol i nan doo doo shin tar yô, nana ver iyol i nan ken Aôndo u mimi.” (Yes. 65:16) Ka sea nôngo kwagh kpoghuloo, sea hemba mbamtaver, nahan sea seer eren tom u pasen kwagh la yô, se nenge a iveren i Yehova. Nenge ase kwagh u Sylviana, u se ter kwagh na sha mhii u ngeren ne la. Umbur, yange lu cian ér, un ngu a tahav mbu za eren tom u pasen kwagh ape kwagh a hembe gban sha mbapasenkwagh la ga. Yange hen nahan sha ci u nyi? A kaa ér: “Nguhar wam u ken imese la, yina sha ku ken iyan la, kuma aseva atar man tiôn. Kwagh ne na yô, ka m zenden m keer, shi m ngôôr vôron ga.”

Sylviana (ken imese) man Sylvie Ann (ken iyan) kua Doratine sha iyange i i er un batisema la

Nahan kpa, ken inyom i 2014 la Sylviana mough kohol Sylvie Ann, u a lu gumkwase shi lu eren pania ken tiônnongo na la, maa ve mough ve yem ken angar ugen u a gbe ica a geri ve i kom ukilomita 85 yô. Er Sylviana tagher a mbamtaver nahan kpa, kure awashima na, nahan zua a iveren i doon tsung! A kaa ér: “Yange m eren tom hen ijiirtom yam i he ne inyom i môm kar yô, Doratine, u a lu gumkwase shi a er nom a mar, u m lu henen Bibilo a na la, er batisema sha mkohol wase u ningir ugen.”

“M WASEN WE”

Er mbapasenkwagh mba ve lu za pasen kwagh hen ape kwagh a hembe gban sha mbapasenkwagh la ve pase nahan, ka sea nôngo sea hemba ma mtaver sha er se seer eren tom u pasen kwagh la yô, se iyol yase se nenge er ityendezwa i Yehova a mbacivir un ne i lu i mimi yô, ér: “M taver we, shi M wasen we.” (Yes. 41:10) Kwagh ne ka a na yô, ikyar i se ye a Yehova la i seer taver. Kwagh ugen yô, ka sea na iyol yase ape se lu la shin ken tar ugen yô, kwagh ne a wa se agoyol sha ityom i Aôndo i i lu keghen se ken tar u he la. Er Didier u se vande teren kwagh na la a pase nahan, “kwagh u za eren tom u pasen kwagh ape kwagh a hembe gban sha mbapasenkwagh la, ka a tsaase se sha gbenda u dedoo, sha kwagh u ken hemen!” Yô, mbapasenkwagh mba ve kegh iyol u eren imba tom ne, kpa ve lu a hii ga la, ve hii u fese je!

^ par. 4 Mba ve lu za eren tom ape kwagh a hembe gban sha mbapasenkwagh la, mough ken tar u Kanada man Czech Republic man France man Jamani man Guadeloupe man Luxembourg man New Caledonia man Sweden man Switzerland man ken ityar i i kohol i cii i yer ér, United Kingdom la kua ken Amerika.

^ par. 8 Mba yer makeranta ne hegen ér, Makeranta u Mbapasen Ivangeli i Tartor. Mbapasenkwagh hanma shighe, mba ve eren tom u pasen kwagh ken tar ugen, shi ve kom u zan makeranta ne la, vea fatyô u wan apelekeshen ér i lôhô ve, vea za makeranta ne ken tar u i mar ve ker la shin ken tar ugen ape i lu eren makeranta ne ken zwa ve u ityôô la yô..