Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Ian i U Lu a Mi I Tsuan Kwagh u U Soo u Eren la, I Gba u Kwagh

Ian i U Lu a Mi I Tsuan Kwagh u U Soo u Eren la, I Gba u Kwagh

“Hen ape Jijingi u Ter A lu yô, ikyangenev mbi her ga.2 KOR. 3:17.

ATSAM: 28, 45

1, 2. (a) Ka mbamnenge kposo kposo mba nyi ior ve lu a mi sha kwagh u ian i or nan lu a mi i tsuan kwagh u nan soo u eren laa? (b) Bibilo tese se nyi sha kwagh u ian i se lu a mi i tsuan kwagh u se soo laa, man ka mbampin mba nyi se lu timen sha mini?

SHIGHE u taver kwase ugen u tsuan kwagh u una er sha ikyaa i tagher a mi la, lam a ijende na sha ikyaa shon. Nahan kpa gema kaa a ijende na la ér: “De kaan a mo wer m hen sha mi ga; kpa, ôrom kwagh u me er yô, a hemba doon.” Kwase la yange hemba soon ér i ôr un kwagh u una er yô, aa u un eren tom a ian i doon tsung i Orgban na a ne un u tsuan kwagh u a soo u eren la. We di ye? Ka u soo u tsuan kwagh u u er la iyol you shin ka u soo wer mbagenev ve tsua sha ci wouwe? U nenge ian i or nan lu a mi i tsuan kwagh u nan soo u eren la nena?

2 Ior gba anyiman sha ikyaa ne hemba anyom uderi imôngo hegen. Mbagenev ka ve kaa ér, or môm ngu a ian i tsuan kwagh u nan soo u eren la ga; sha ci u Aôndo vande tsuan hanma kwagh u se er yô. Mbagenev di kaa ér, saa se lu sha tseeneke wase ve se lu a ian i eren kwagh u se soo la ye. Nahan kpa, aluer se soo u fan ikyaa ne tsembelee yô, saa se ôr Bibilo i i lu Mkaanem ma Aôndo la. Sha ci u nyi? Bibilo pase ér, Yehova gba se na se ian i eren kwagh u se soo yô; ka tahav mbu tsuan akaa a injaa a se er la je la. (Ôr Yosua 24:15.) Bibilo shi na mbamlumun sha mbampin er: Gba u se er tom a ian se lu a mi i tsuan kwagh u se soo la nena? Ian i se lu a mi u tsuan kwagh u se soo la ngi  a ikighirii? Gbenda u se eren tom a ian i Yehova a ne se u tsuan kwagh u se soo la, tese er Yehova a doo se ishima la nena? Se tese icivir sha ian i mbagenev ve lu a mi u tsuan akaa a ve soo la nena?

KA NYI SE FATYÔ U HENEN HEN YEHOVA MAN YESU?

3. Ka ikyav i nyi Yehova a ver se sha gbenda u a eren tom a ian i a lu a mi u eren kwagh u a soo laa?

3 Ka Yehova tseegh a lu a ian gbangelaa i eren kwagh u a soo la ye, Nahan cii kpa, se fatyô u henen kwagh sha gbenda u a eren tom a i la. Ikyav i tesen yô, yange tsua ikyurior i Iserael ér ve lu “nongo Na,” nahan i yilan ve sha iti na. (Dut. 7:6-8) Yange lu a ityôkyaa i i na ve tsua ve yô. Sha ci u soo u kuren ityendezwa i yange er a ijende na Aberaham, anyom uderi imôngo ken ijime la. (Gen. 22:15-18) Kwagh ugen yô, Yehova eren tom a ian i a lu a mi i eren kwagh u a soo la sha dooshima man sha mimi. Gbenda u tsahan Mbaiserael mba ve venda mcivir u mimi acin imôngo la, tese se kwagh ne wang. Sha ci u yange vea gema ishima sha mimi yô, Yehova a tese ve dooshima shi a zungwe ve mhôônom kpaa. Yange kaa ér: “Me wanger mhirjime ve, vea gba doon mo ishima tsô.” (Hos. 14:4) Yehova ver se ikyav i dedoo sha u eren tom a ian i a lu a mi u eren kwagh u a soo la sha u wasen mbagenev!

4, 5. (a) Lu ana Yehova hii nan nan ian i tsuan kwagh u nan soo u erene, man nan er tom a ian shon nena? (b) Ka mpin u nyi i gbe u se asange asange se pine ayol ase?

4 Yehova yange tsua u gban mbatyomov man uumace cii, aa ian i eren kwagh u ve soo yô. Or u Yehova hii nan nan ian ne yô, lu Waniunda na, u a lu “ibeen i Aôndo u i nengen a Na ga” la. (Kol. 1:15) Cii man Yesu a va shin tar ne je kpa, tsua u eren kwagh a Ter na sha mimi, lu u dondon Satan sha u hemban ato ga. Shighe kar yô, Yesu va shin tar ne, zum ne kpa, er tom a ian i a lu a mi u eren kwagh u a soo la sha u vendan imeen i Orihyom u hemban cii la. (Mat. 4:10) Hen tugh mbu lu u kpernan a wua Yesu la, er msen a ishima i môm, sha u seer taver ishima i kange ér una er ishima i Aôndo la. Yange kaa ér: “Tere! Wea lumun yô, tôôm iyongo ne kera, nahan kpa ka ishima Yam ga, i̱ lu ishima You i̱ er ye.” (Luka 22:42) Sha nahan yô, se dondo nen ikyav i Yesu la sha u eren tom a ian i se lu a mi i eren kwagh u se soo la, sha u nan Yehova icivir shi eren ishima na! Kpa se fatyô u eren kwagh ne je he?

5 Jighilii yô, se fatyô u dondon ikyav i Yesu la sha ci u se kpa, i er se sha ibeen i Aôndo man sha inja i mlu na. (Gen. 1:26) Nahan kpa, ian i se lu a mi i eren kwagh u se soo la ngi a ikighir. Se mba a ian gbangelaa er Yehova nahan ga. Mkaanem ma Aôndo pase ér, ian i se lu a mi i eren kwagh u se soo la ngi a akighir, nahan gba u se fa akighir a Yehova a ver se vough vough la, se peren a ga. Ikyav i tesen yô, gba u kasev vea ungwan imo i noov vev, shi mbayev kpaa vea ungwan imo i mbamaren vev. (Ef. 5:22; 6:1) Akighir a Yehova a ver la ka a bende a gbenda u se eren tom a ian i Yehova a ne se i eren kwagh u se soo la nena? Mlumun u sha mpin ne, una wase se u fan aluer ka u se va zua a uma u tsôron ken hemen yô.

SE FATYÔ U EREN TOM A IAN I SE LU A MI I EREN KWAGH U SE SOO LA SHA INJA SHIN SHA INJA GA

6. Gba hange hange u ian i se lu a mi i eren kwagh u se soo la ia lu a akighir sha ci u nyi? Tese ikyav.

6 Aluer ian i se lu a mi i eren kwagh u se soo la ngi a ikighir nahan, se fatyô u kaan ser se mba a ian shon mimi? Een, se fatyô! Se fatyô u kaan nahan sha ci u nyi? Sha ci u akighir a i ver se sha ian i se lu a mi i eren kwagh u se soo la, aa fatyô u kuran se. Ikyav i tesen yô, se fatyô u tsuan ser, se naha mato se yem hen geri u a lu ica a vese yô. Nahan kpa, aluer se mba hendan kwagh sha zege gbenda u i ver akav a hendan kwagh ga, shi hanmaor nan lu hendan kwagh er nan soo la nahan, a doo se u hendan kwagh sha imba gbenda la kpa? Jighilii yô, a doo se ga! Aluer se soo u zuan a averen a ian i  eren kwagh u se soo la, i ve a mi la yô, gba hange hange u se peren akighir a i ver se la ga. De se nenge akav agen ken Bibilo a a tese er akighir a Yehova a ver la aa wase se yô.

7. (a) Ian i Yehova na Adam i eren kwagh u a soo la na yô, due kposo a annyamev mba ve lu ken sule u Eden la nena? (b) Pase gbenda môm u Adam yange er tom a ian i lu a mi i eren kwagh u a soo la yô.

7 Yehova gba Adam, or u hiihii la, na un ian i tsuan u eren kwagh u a soo la, vough er na mbatyomov nav mba shaav mbara nahan. Kwagh ne yange na yô, Adam due kposo aa annyamev mba ve dondon atindi a sha marami aa ka a mgbegha ve u eren kwagh la. Nenge ase gbenda u Adam yange er tom a ian i lu a mi i eren kwagh u a soo la, sha gbenda u injaa yô. Yange i gba annyamev cii ve, i gba Adam ye. Nahan kpa, Aôndo yange ii annyamev mban ati ga ér, Adam a va ii ve ati, nahan i doo un. Bibilo kaa ér, Aôndo “va a mi hen or la ér Una nenge er nana yila ve yô.” Hanma inyam yô, Adam yange nenge er i eren kwagh yô, maa a na i iti i i kum sha i yô. Yehova yange venda iti i Adam na hanma inyam la ga. Sha ci u Bibilo kaa ér: “Hanma myer u or la a yila hanma kwagh u uma yô, maa hingir iti na je.”—Gen. 2:19.

8. Adam yange vihi ian i lu a mi i eren kwagh u a soo la nena, man lu nyi i due kere?

8 Kwagh ka a er i vihi yô, tom u Yehova yange na Adam ér a kahan sule shi a nengen sha paradiso u shin tar ne la kuma Adam ga. Ian i Aôndo na Adam ér a er tom u wa un sha ikyev la, kuma Adam ga. Aôndo kaa a na ér: “Mar nen kpishi, seer nen ngeen, iv nen tar, gema nen u, u̱ lu sha ikyev yen; ishu . . . man inyon i purugh . . . man hanma kwagh u uma u a zenden sha tar cii, ve̱ lu sha ikyev yen.” (Gen. 1:28) Kpa Adam gema er kwagh kar akighir a Aôndo ver un la, sha u yan ityamegh ki kon u Aôndo ta un icin ér a de ye ga la. Adam yange er kwagh a ian i Aôndo na un la sha gbenda u vihin tsung, nahan kwagh ne va uumace cii a ican man mnyoon kuma anyom udubu imôngo hegen. (Rom. 5:12) Er se fe akaavihin tsung a a dugh ken kwagh u Adam tsua u eren la yô, kwagh la a mgbegha se u eren kwagh a ian i se lu a mi i eren kwagh u se soo la sha inja shi peren akighir a Yehova a ver la ga.

9. Yehova yange na ikyurior na Iserael ian i eren nyi, man yange ve kaa ér nyi?

9 Uumace cii ya dyako u myen man ku hen Adam man Ifa. Nahan kpa, mba a ian i eren kwagh u ve soo la her. Gbenda u Aôndo er kwagh a ikyurior i Iserael la tese se kwagh ne wang. Yehova yange na Mbaiserael ian i lumun shin vendan u hingir nongo Na, sha ikyev i Mose. (Eks. 19:3-6) Nahan ve er nena? Yange ve tsua u hingir ior mba Aôndo shi ve lumun akighir a ver la, nahan ve cii ve gba zwa môm ér: “Akaa a TER A kaa cii, sé er.” (Eks. 19:8) Kwagh er vihi yô, ikyurior la va vihi ityendezwa i ve er a Yehova la. Se fatyô u henen kwagh u vesen ken ieren ve la. Nahan yô, ian i se lu a mi i eren kwagh u se soo la i gba se kwagh hanma shighe, shi se za nen hemen u lun vea Yehova kôôsôô shi dondon atindi na a perapera la.—1 Kor. 10:11.

10. Ka akav a nyi a tese wang ér, uumace mba ve yen ne, vea fatyô u eren tom a ian i ve lu a mi i eren kwagh u ve soo la, sha u civir Aôndo? (Nenge foto u a lu sha mhii u ngeren ne la.)

10 I ôr se kwagh u mba civir Aôndo iorov 16 ken Mbaheberu ityough 11, mba yange ve venda u peren akighir a Yehova ver sha ian i ve lu a mi i eren kwagh u ve soo la yô. Sha nahan yô, ve zua a averen a vesen shi ve lu a ishimaverenkeghen i bunden mayange ga la. Ikyav i tesen yô, Noa yange tese ér un ngu a jighjigh u nan tsung, nahan dondo akaawan a Aôndo la, sha u gban tso u va war tsombor na kua kov u uumace u ken hemen la yô. (Heb. 11:7) Aberaham man Sara kpa, yange ve ungwa imo i Aôndo sha u moughon yemen ken tar u ityendezwa la. Er ve lu yemen gôgô zende ne nahan je kpa, yange “ve lu a ian i hiden” ken gar u Ur u lu yôughyôugh la. Kpa ve gema ve ver ishima ve sha “uityendezwa” mba Aôndo mbara, nahan  ve za hemen u yemen ken tar u u “hembe doon” la. (Heb. 11:8, 13, 15, 16) Mose kpa, yange gema ijime a akaa a injaa a ken Igipiti la, nahan “lu un guda u i̱ er a na dang a nongoior u Aôndo imôngo a u una lu ken mdoom ma isholibo ma ma lu sha anyangem kpeghee la.” (Heb. 11:24-26) Yô, se dondo nen jighjigh u nan ve la, sha u wan ian i se lu a mi i eren kwagh u se soo la ikyo, shi eren ishima i Aôndo kpaa.

11. (a) Ian i se lu a mi i eren kwagh u se soo la ngi ve se a iveren i vesen igen i nyi? (b) Ka nyi ia wase u u eren tom a ian i u lu a mi i eren kwagh u u soo la sha injaa?

11 Shin er ka i lu ican ga u kaan ser, orgen nana tsua kwagh u se er la sha ci wase nahan kpa, aluer se er nahan yô, se lu yangen iyol yase u zuan a iveren i vesen i ka sea er tom a ian i se lu a mi i eren kwagh u se soo la ve, se zua a mi la. I pase se iveren la ken Duteronomi 30:19, 20 la. (Ôr.) Ken ivur u sha 19 la, i pase se ér Aôndo yange na Mbaiserael ian i tsuan kwagh u ve soo u eren yô. Ken ivur i sha 20 la di, se hen se fa er Yehova na ve ian i injaa i pasen un er ishima i lu ve ker yô. Se kpa se fatyô u tsuan u civir Yehova. Se mba a ian i doon tsung i eren tom a ian i se lu a mi i eren kwagh u se soo la sha u civir Yehova shi tesen un ser se soo un!

PALEGH U NZUGHUL A IAN I U LU A MI I EREN KWAGH U U SOO LA

12. Ka nyi i gbe u se palegh u eren a ian i se lu a mi i eren kwagh u se soo laa?

12 Tôô ase wer u er ijende you iyua sha ma kwagh u doon tsung. Aluer u fa wer ijende you la ta iyua shon shin uihyôugh shin i er tom a i sha u vihin or iyol nahan a lu u ken ishima nena? A vihi u tsô! Nahan nenge ase er ka i lu Yehova ken ishima shighe u ior ve lu nzughul a ian i ve lu a mi i eren kwagh u ve soo la ken uma ve, sha u vihin mbagenev iyol yô. Bibilo kaa wang je ér “ken ayange a masejime yô” ior vea lu “mbalun a ishughun ga.” (2 Tim. 3:1, 2) Yô, mayange se kenger ian i doon tsung i Yehova a ne se ne ashe ashe ga. Sha nahan yô, se er nena ve, se palegh u nzughul a ian i se lu a mi i eren kwagh u se soo laa?

13. Ka gbenda môm ugen u nyi nahan Mbakristu vea fatyô u palegh u nzughul a ian i ve lu a mi i eren kwagh u ve soo laa?

13 Hanma wase cii nan ngu a ian i tsuan azende man gbenda u wuhan iyol man hwe kua iemberyolough i nan soo yô. Nahan kpa, aluer se tsua u hingir ikpan i asaren a iyolough shin se mba dondon akaa a ihyeenegh shin mvershigh u taregh yô, kwagh la una na ian i se lu a mi i eren kwagh u se soo la ia ‘hingir kwagh  u yisan ifer.’ (Ôr 1 Peteru 2:16.) Kpa, mayange doo u se gema ‘mlu wase u se lu ken uikyangen ga la, a hingir se ityôkyaa i iyolough ga,’ kpa se kangen ishima u tsuan akaa a a wase se u dondon kwaghwan u a kaa ér: “Eren nen akaa cii sha ci u icivir i Aôndo” la.—Gal. 5:13; 1 Kor. 10:31.

14. Gba u se suur sha Yehova shighe u se lu eren tom a ian i se lu a mi i eren kwagh u se soo la sha ci u nyi?

14 Gbenda ugen u se fatyô u eren kwagh a ian i se lu a mi i eren kwagh u se soo la yô, ka u suur sha Yehova shi eren kwagh karen akighir a Yehova a ver la ga, sha er una kura se yô. Bibilo kaa ér, ka Yehova tswen a lu ‘tesen se kwagh u una lu se a inja, shi a lu hemen se sha gbenda u se zenden sha mi la’ ye. (Yes. 48:17) Gba u se lumun a kwagh u Bibilo i kaa ér: “Gbenda u or ngu sha ikyev i nan ga; or u zenden la, mvershigh u iaven i angahar a nan ngu sha ikyev i nan ga” la. (Yer. 10:23) Nahan yô, doo u mayange se gba ken hôn u suur sha mkav wase er Adam man Mbaiserael mba ve hemba ato la nahan ga. Kpa se gema se “suur sha TER a ishima [yase] cii.”—Anz. 3:5.

TESE ICIVIR SHA IAN I MBAGENEV VE LU A MI I EREN KWAGH U VE SOO LA

15. Ka nyi se hen ken kwaghwan u a lu ken Mbagalatia 6:5 laa?

15 Gba u se na ian i mbagenev ve lu a mi i eren kwagh u ve soo la icivir, ka ikighir igen i i ver se je la. Sha ci u nyi? Sha ci u se cii se mba a ian i eren kwagh u se soo yô, nahan ka hanma shighe cii Mbakristu uhar vea fatyô u tsuan akaa a vea er la kwaghmôm ga. Kwagh ne kua akaa a a gbe a zua sha ieren yase man mciviraôndo wase la kpaa. Umbur kwaghwan u a lu ken Mbagalatia 6:5 la. (Ôr.) Ka sea umbur er i gbe u hanma Orkristu cii nana “tôô ikyav mbi nan iyol i nan” yô, kwagh la a wase se se lu a icivir sha ian i mbagenev ve lu a mi i eren kwagh u ve soo la.

Gba u se tsuan akaa a se soo u eren la, shi se kighir mbagenev ser ve er kwagh u imoshima yase i lumun la ga (Nenge ikyumhiange i sha 15)

16, 17. (a) Ian i or lu a mi i tsuan kwagh u nan soo u eren la, yange va a zayol hen Mbakristu mba ken Korinte la nena? (b) Paulu yange sôr zayol la nena, man kwagh ne tese se nyi sha kwagh u ian i mbagenev ve lu a mi i eren akaa a ve soo laa?

16 De se nenge ikyav i ken Bibilo i i tese er i hii ve i gbe u se tese icivir sha ian i anmgbianev asev ve lu a mi i eren kwagh u imoshima ve i lumun ér ve er la yô. Yange anyiman gba hen atô u Mbakristu mba ve lu ken Korinte la, sha kwagh u yan inyam i yange a er akombo a mi a been yô, i za tee hen ijiir i teen inyam la. Mbagenev yange ve hen ér: ‘Er akombo a lu a inja ga yô, or a fatyô u yan inyam la a imoshima i wang.’ Nahan kpa, mbagenev mba yange ve civir akombo yô hen ér, aluer or ngu yan inyamakombo yô, tese ér nan ngu civir akombo. (1 Kor. 8:4, 7) Kwagh ne lu zayol u vesen, u lu nôngon u van a mpav ken tiônnongo yô. Nahan Paulu yange wase Mbakristu mba ken Korinte la, u nôngon a zayol ne nena?

17 Hiihii yô, Paulu umbur ve cii ér, ka kwaghyan una na ve vea seer lun kôôsôô a Aôndo ga. (1 Kor. 8:8) Been yô, ta ve cii icin ér, ve de deen ‘tahav vev mbura’ ér mbu “hingir mba ve taver ga la ityôkyaa i nôngon gbev ga.” (1 Kor. 8:9) Shighe kar yô, Paulu shi wa mba ve lu a imoshima i i taver ga la kwagh ér, ve de ôron mba ve tsough u yan inyam la ijir ga. (1 Kor. 10:25, 29, 30) Nahan lu u hanma Orkristu nana tsua u eren kwagh u nan soo yô, sha ikyaa i vesen i i gba zua a mciviraôndo la. Sha nahan yô, se kpa gba u se tese icivir sha ian i anmgbianev asev ve lu a mi i eren akaa a ve soo la, kua sha akaa a kiriki je kpaa!—1 Kor. 10:32, 33.

18. U er nan ve u tese wer ian i doon tsung i u lu a mi i eren kwagh u u soo la gba u kwaghaa?

18 Yehova na se ian i eren kwagh u se soo yô. (2 Kor. 3:17) Sha nahan yô, ian i Yehova a ne se ne i gba se kwagh tsung, sha ci u ka i wase se u tsuan akaa a a tese Yehova er se soo un i za kighir la yô. Nahan yô, se za nen hemen u tesen iwuese sha ian i doon tsung ne sha u civir Yehova shi tesen icivir sha ian i mbagenev ve lu a mi i eren kwagh u ve soo la kpaa.