“Ka gbenda je ne, za nen sha u.”YESAIA 30:21.

ATSAM A A GBER YÔ, KA: 65, 48

1, 2. (a) Ka icintan i nyi i war ior kpishi? (Nenge foto u a lu sha mhii u ngeren ne la.) (b) Aôndo kor ior nav sha u ve de gbe ken kwaghbo ga nena?

“TILE, NENGE, KEGH ATO.” Hanma ijiir i pa u matoo u pelegh sha gbenda girgidogo ken tar u Amerika yô, ka i nger mkaanem man sha sainboodu u vesen kpeher kpeher i tim her. I er kwagh ne hemba anyom 100 hegen. Sha ci u nyi? Sha ci u girgidogo i de te sha mato shighe u a lu peren sha gbenda shon ga yô. Ngeren ne war ior kpishi sha ci u ve wa icintan la ikyo.

2 Yehova er kwagh u a hembe akav a yangen se iyolvihin la ca je yô. Ngu kuran ior nav sha er vea fatyô u palegh kwaghbo shi vea va zua uma u tsôron yô. Yehova ngu er orkuranilev u lun a dooshima u nan hemen ilev mbi nan shi nan kor mbi sha er mbia palegh igbenda i bo yô.Ôr Yesaia 30:20, 21.

 YEHOVA KURAN IOR NAV HANMA SHIGHE CII

3. Er nan ve uumace cii lu zan sha gbenda u kuugh?

3 Yehova ne ior atindi shi we ve kwagh, hii shighe u i gba uumace la je. U tesen ikyav yô, Yehova yange wa atindi a wang ken sule u Eden, a a wase tsombor u uumace u zuan a uma u tsôron man msaanyol yô. (Genese 2:15-17) Kpa Adam man Ifa venda atindi a Ter ve u lun dooshima la. Ifa yange lumun kwaghwan u lu inja er a due hen iyô la, Adam di va kegh ato a kwase na. Nahan lu nyi i eree? Kwagh la va ve cii a ican shi ve kpe a ishimaverenkeghen shio. Shi ihyembeato ve la na yô, uumace cii lu zan sha gbenda u kuugh.

4. (a) Shighe u Mngerem ma Deemee uma sha tar kera la, gba u a wa atindi agen sha ci nyi? (b) Er mlu u ior va gema yô, kwagh la wase se u fan gbenda u Aôndo a nengen uma la nena?

4 Aôndo yange na Noa atindi a yange war ior yô. Shighe u Mngerem ma Deemee uma sha tar kera la, Yehova wa ior tindi ér ve de ye shin me awambe ga. Sha ci u nyi? Sha ci u Yehova soo u nan ior ian ér ve hii u yan inyam. Er mlu u ior gema hen shighe la yô, gba u a wa ve atindi kpa a he: “Saa di inyam kua uma u i tsô, ka awambe a i je la, de ye nen ga.” (Genese 9:1-4) Tindi ne wase se se fa gbenda u Aôndo a nengen uma u a ne se la yô. Ka Aôndo a gbe akaa shi a ne se uma ye, sha nahan yô, ngu a ian i wan se atindi sha kwagh u uma. U tesen ikyav yô, yange wa tindi ér uumace ve de woo or ga. Aôndo nenge awambe man uma ér ka icighankwagh, nahan una tsaha nyityô or u nan nzughul a uma man awambe cii.Genese 9:5, 6.

5. Ka nyi se lu timen sha mi hegen, man ka sha ci nyi?

5 Noa va kpe kera kpa, Aôndo za hemen u wan ior nav atindi a wasen ve. Ken ngeren ne, se nenge akav kpuaa a a tese gbenda u Aôndo lu wan ior nav kwagh yô. Kwagh ne una wase se u seer kangen ishima ser se dondo atindi a Yehova zan zan se kar nyôron ken tar u he la.

IKYURIOR I HE MAN ATINDIAKAA A HE

6. Yange gba hange hange u ior mba Aôndo vea kura tindi u na ve sha ikyev i Mose la sha ci nyi, man lu ieren i nyi gba u Mbaiserael vea lu a mini?

6 Sha ayange a Mose la, Yehova wa ior nav atindiakaa a wang sha kwagh u ieren man mcivir ve. Sha ci u nyi? Sha ci u akaa shi va kôr gema. Mbaiserael yange ve lu ikpan ken Igipiti hemba anyom deri uhar. Ior mba ken tar la cii civir mbakpenev man ieev shi ve eren akaa agen kpishi a van a i lahan sha iyol i Aôndo. Ior mba Aôndo yange mba dugh ken Igipiti kera yô, gba u a na ve atindi a he. Nahan vea hingir ikyurior i dondon Tindi u Yehova tseegh. Ityakerada igen i pasen asember kaa ér, ka a ôron kwagh u ishember i ken zwa Heberu i i gem ér “tindi” la yô, i lu kwagh u “akaawan” i lu ôron ye. Tindi la yange wase Mbaiserael u palegh idya man kwaghaôndo u aiegh u akuraior a a kase ve eren la. Mbaiserael yange vea kegh ato a Aôndo yô, a har ve iveren na. Kpa yange vea venda u ungwan un yô, ve ya ican tsung je.Ôr Duteronomi 28:1, 2, 15.

7. (a) Pase er yange hii ve Yehova wa ior nav atindi yô. (b) Tindi u Mose la lu orkuran u Mbaiserael nena?

7 Yange gba u a na Mbaiserael atindiakaa a he sha ci u ityôkyaa igen kpaa.  Tindi u Mose la wa ve agoyol sha awashima u Yehova u hange hange ugen, lu mve u Mesiya, ka Yesu Kristu je la. Tindi la umbur Mbaiserael ér ve yina. Shi umbur ve ér gba u a na naagh ku vough ku paan ve, sha er a de ve asorabo ve vindi vindi yô. (Mbagalatia 3:19; Mbaheberu 10:1-10) Shi kwagh ugen yô, Tindi la kura tsombor u Mesiya va due ker la shi wase Mbaiserael u fan un shighe u va la. Jighilii yô, Tindi la lu er ortesen gbenda shin “orkuran” nahan. Yange kura ve zan zan za a ve hen Kristu.Mbagalatia 3:23, 24.

8. Doo u se de ser akaawan a ken Tindi u Mose la a hemen se sha ci u nyi?

8 Er se lu Mbakristu yô, se kpa se fatyô u zuan a iwasen ken atindiakaa a Yehova a ken Tindi u Mose la. Sha nyi gbenda? Se fatyô u tilen shi nengen sha akaawan a ken Tindi shon la. Er se kera lu sha ikyev i tindi la ga nahan kpa, se fatyô u dondon akaawan a ken Tindi la ken uma wase shi dondon a sha u civir Yehova. Yehova na i nger Tindi u Mose la ken Bibilo sha u se hen kwagh ker shi akaawan a ker la a̱ kura se, shi i doo se er Yesu a tese se kwagh u a hembe Tindi la yô. Sha nahan yô, kegh ato a kwagh u Yesu yange kaa ne, ér: “Ne ungwa er i kaa er: De eren idya ga. Kpa Mo yô, M kaan ne Mer, hanma or u nana kenger kwase sha u nana tôm un yô, nan er idya a na ken ishima je ve.” Nahan yô, gba u se palegh idya tseegh tsô ga, kpa gba u se dugh mhen man isharen i ijimbagh ken a vese kera.Mateu 5:27, 28.

9. Ka mlu u he u nyi yange na ve hingir hange hange u Aôndo una na ior nav atindiakaa a he?

9 Yesu yange hingir Mesiya yô, Yehova na atindiakaa a he shi seer pasen akaa agen sha kwagh u awashima na la vindi vindi. Lu u kwagh a lu nahan keng sha ci u nyi? Sha ci u ken inyom i 33 la, Yehova venda ikyurior i Iserael la, gema tsua nongo u Kristu ér u lu nongo na. Sha nahan yô, mlu u ior mba Aôndo shi gema hen shighe ne kpaa.

AKAAWAN SHA CI U ISERAEL U KEN JIJINGI

10. Yange i na Mbakristu atindi a he sha ci u nyi, man nga kposo a atindi a i na Mbaiserael la nena?

10 Yehova yange na Mbaiserael Tindi u Mose la, sha er a̱ tese ve er vea eren kwagh ken uma ve shi vea civir un yô. Hii sha ayange a mbaapostoli la je, ior mba Aôndo kera lu ikyurior môm ga, kpa ve hingir u lun ken akuraior kpishi shi ve due sha ajiir kposo kposo. Maa i gema yilan ve ér Iserael u ken jijingi. Ve hingir nongo u Kristu shi ve lu sha ikyev i ikyuryan i he. Yehova yange ôr ve akaa a he shin seer wan ve atindi a a tese ve er vea eren kwagh ken uma ve shi vea civir un yô. Sha mimi yô, “Aôndo ka u sangen a sange ior ga, kpa ken hanma ikyurior yô, or u nan cie Un, nan eren perapera kpaa yô, Una lumun nan.” (Aerenakaa 10:34, 35) Mbakristu lu dondon “tindi u Kristu” u yange lu akaawan a i nger sha awen ga, kpa i nger ken asema a ve la. Lu u tindi ne una kura Mbakristu shi una wase ve sha hanma ijiir i ve lu sha tar cii.Mbagalatia 6:2.

11. “Tindi u Kristu” la bende a akaa ahar a Mbakristu ve eren ken uma ve la nena?

11 Iserael u ken jijingi zua a iwasen kpishi ken akaa a Yehova wa ve sha ikyev i Yesu la. Cii man Yesu a na ve ikyuryan i he la yô, vande wan ve atindi a vesen ahar.  Tindi u hiihii la lu sha kwagh u tom u pasen kwagh. U sha uhar la di lu sha kwagh u inja i Mbakristu man er vea eren kwagh ayol a ve yô. Akaawan ne lu sha ci u Mbakristu cii, nahan se nyian kpa nga se a iwasen, sea lu a ishimaverenkeghen i yemen sha shin va lun shin tar ne je kpaa.

12. Gbenda u pasen kwagh la yange u gema nena?

12 Sha ayange a tsuaa la, yange i gba u akuraior aa za ken Iserael sha u za civir Yehova. (1 Utor 8:41-43) Kpa Yesu va wa tindi u i nger ken Mateu 28:19, 20 la. (Ôr.) Yesu yange kaa a mbahenen nav ér ve “za” pase ior cii kwagh u Aôndo. Sha Pentekosti u ken inyom i 33 la, Yehova tese ér un soo ér i pase loho u dedoo la sha tar cii. Sha iyange la, i har icighan jijingi sha iorov mba kuman er 120 nahan ken nongo u he la, maa ve hii u lamen a Mbayuda man mba ve nyôr a nyôr Mbayuda la, ken ijô kposo kposo. (Aerenakaa 2:4-11) Shighe kar yô, i pase kwagh ar a Mbasamaria. Mba ker ken inyom i 36 la yô, i pase kwagh zan zan ar a Atôatyev kpaa. Kwagh ne tese ér yange gba u Mbakristu vea pase kwagh a ar a ior sha tar cii!

13, 14. (a) “Tindi u he” u Yesu la wa nyi man nyi kere? (b) Ka nyi se hen ken ikyav i Yesu a ver se laa?

13 Shi Yesu yange wa “tindi u he” u a tese er se eren kwagh a anmgbianev asev mba nomso man mba kasev yô. (Ôr Yohane 13:34, 35.) Gba u se tesen ve dooshima hanma iyange shi se kegh iyol u kpen sha ci ve je kpaa. Kwagh ne lu kwagh u Tindi u Mose la tese ér i eren ga yô.Mateu 22:39; 1 Yohane 3:16.

14 Yesu ver se ikyav i hemban cii i or u nan tesen dooshima u tangen iyol ga yô. Yange soo mbahenen nav kpishi je yô, a lumun u kpen sha ci ve kpaa. Nahan a soo ér mbadondon un cii ve dondo ikyav na la. Sha nahan yô, doo u se kegh iyol u wan ishima a mbamtaver shi kpen sha ci u anmgbianev asev.1 Mbatesalonika 2:8.

AKAAWAN A NYIAN MAN A KEN HEMEN

15, 16. Aôndo ngu koson se nyian nena, man mlu wase gema nyian nena?

15 Yesu ver “wanakiriki u jighjigh man u fan kwagh” ér a naan mbadondon un “kwaghyan” u ken jijingi “sha ashighe ashighe.” (Mateu 24:45-47) Kwaghyan la kua akaa a injaa a Aôndo ka a wa ior nav shighe u mlu ve a va gem la kpa ker. Mlu wase gema nena?

16 Se mba ken “ashighe a ican,” shi ica a gba ga tsô zegecan u i lu je a lu a vande eren ga la una va. (2 Timoteu 3:1; Marku 13:19) Shi kwagh ugen yô, i gbihi Satan man azôv a na cii shin tar, nahan mba nan uumace ican. (Mpase 12:9, 12) Kwagh u seer yô, se mba dondon tindi u Yesu sha u seer pasen ior kpishi kwagh ken ijô kposo kposo sha tar cii.

17, 18. Doo u se dondo akaa a i lu tesen se la nena?

17 Nongo u Aôndo na se akaa a wasen se u eren tom u pasen kwagh la. Nahan u eren tom a akaa a i ne se la kpa? Ka i tese se ken mbamkombo asev er se er tom a akaa shon sha gbenda u injaa yô. U nengen ityesen ne wer ka hen Yehova i dugh kpa?

18 Aluer se soo ser, Aôndo a na se iveren na yô, a gba u se ver ishima sha akaa  a Aôndo a tesen se sha ikyev i nongo u Kristu la cii. Aluer se mba ungwan imo na hegen yô, a va hemba lun se ican ga u dondon akaawan a na sha shighe u “zegecan,” zum u a tim botar u Satan ne cii la. (Mateu 24:21) Zegecan la una been yô, a tese se er se eren kwagh ken tar u he u perapera, u ua kera lu sha ikyev i Satan ga la yô.

A va na se uruamabera ken tar u he la, mba vea lu a akaawan a he a tesen se akaa a se eren ken Paradiso yô (Nenge ikyumhiange 19, 20)

19, 20. Ka uruamabera mba nyi a va bugh, man ka nyi ia eree?

19 Sha shighe u Mose la, yange gba u a tese Mbaiserael akaa a he a vea eren la, nahan Aôndo na ve Tindi. Yesu va ve yô, gba u nongo u Kristu ua dondo “tindi u Kristu” la. Shi Bibilo kaa a vese ér ken tar u he la kpa, a va na se uruamabera mba vea lu a akaawan a he yô. (Ôr Mpase 20:12.) A̱ shi nan kpa, uruamabera mbara vea pase akaa a Yehova una soo ér uumace ve eren hen shighe la yô. Ior cii vea hen uruamabera mbara, kua mba a va nder ve la kpaa, nahan ve cii vea fa akaa a Aôndo una soo ér se eren la. Uruamabera mbara vea wase se u seer fan er Yehova a eren kwagh yô. Shi se hemba fan Bibilo hen shighe la, nahan se doo ayol a ase ken Paradiso shi se naan ayol a ase icivir. (Yesaia 26:9) Sha kpôô yô, se va hen akaa kpishi sha ikyev i Tor wase Yesu Kristu, shi se tesen mbagenev a kpaa!

20 Aluer se va dondo akaawan “a i nger ken uruamabera mbara” shi se za hemen u civir Yehova sha mimi sha shighe u ikyaren i masetyô la yô, Yehova una nger ati ase ken “ruamabera u uma” la, aa lu ker gbem sha won. Nahan se zua a uma u tsôron! Sha nahan yô, gba u se TILE, inja na yô, se ôron Bibilo shi se NENGE, sha er se kav inja i akaa a se ôron la shi se KEGH ATO u ungwan imo i Aôndo hegen je. Aluer se er akaa ne yô, se va war zegecan la, nahan a doo se u henen kwagh u Yehova, Aôndo wase u a fe kwagh shi se doo un ishima la, gbem sha won.Orpasenkwagh 3:11; Mbaromanu 11:33.