Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Maaci 2016

Agumaior Ne Wa Agoyol u Eren Batisema Nena?

Agumaior Ne Wa Agoyol u Eren Batisema Nena?

“Doom u eren ishima You, Aôndo wam.”PASALMI 40:8.

ATSAM A A GBER YÔ, KA: 51, 58

1, 2. (a) Pase er i hii ve batisema a lu kwagh u nengen beelee ga yô. (b) Ka nyi i gbe u or a fa a kuma nan ve nana mase eren batisema, man ka sha ci u nyi?

U NGU gumor u u soo wer u er batisema yôô? Aluer ka nahan yô, u soo u eren kwagh u civirigh u hemban cii. Er i vande pasen ken ngeren u karen la nahan, batisema ka beerkwagh ga. Aluer u er batisema yô, mbagenev vea fa je ér u tsegha iyol you sha ci u Yehova, inja na yô, u tôndo zwa a na wer u civir un gbem sha won, shi u nenge kwagh u eren ishima na la wer ka kwagh u hemban cii. Er ityendezwa you a Aôndo i lu beerkwagh ga yô, gba u u er Batisema shighe u u vie i kom, shi i sar u u eren nahan, shi u kav kwagh u a lu u or tseghan iyol i nan sha ci u Aôndo yô.

2 Nahan kpa, alaghga u nenge wer ka a kuma u u eren batisema ga. Shin alaghga u nenge wer, kuma u u eren batisema, kpa mbamaren ou gema nenge ér we u seer vian or shi we u seer zuan a mfe ken uma. Nahan u er nena? Iyol i de kpeen we ga. Kpa gema er kwagh hen shighe ne u una wase u u zan  ikyura yô, sha er ica a gba ga je maa u kuma u a er u batisema yô. Kwagh ne una wase u u hemban veren ishima sha akaa atar a i ter heen ne: (1) akaa a u ne jighjigh a mi la, (2) aeren a ou, man (3) iwuese you.

AKAA A U NE JIGHJIGH A MI LA

3, 4. Agumaior a a fatyô u henen nyi ken ikyav i Timoteu laa?

3 Hen ase er u fatyô u nan mlumun sha mbampin mban yô: Hii nan ve m ne jighjigh mer Aôndo nguu? Hii nan ve m ne jighjigh mer ka Aôndo a ne i nger Bibilo? Hii nan ve m kor atindi a Aôndo, m vende u dondon aeren a taregha? Mbampin mban vea wase u u dondon kwaghwan u apostoli Paulu ne, ér: ‘Kar [shin tôv] er ishima i Aôndo i lu yô man kwagh u a doo man a kom u lumun un man shi a lu vough la kpaa yô.’ (Mbaromanu 12:2) Doo u u er nahan sha ci u nyi?

Timoteu lumun mimi la sha ci u yange kar mimi la iyol na cii ve na jighjigh a mi ye

4 Ikyav i Timoteu la ia fatyô u wasen we. Yange fa Ruamabera kôr inya sha ci u ngô na man ngô u ngô na ve tesen un keregh. Nahan cii kpa, Paulu shi kaa a Timoteu ér: ‘Lu ken akaa a i tese u, u ne a jighjigh la.’ (2 Timoteu 3:14, 15) Ishember i ‘na jighjigh’ la, ngi ôron ka “kwagh u u fe vindi vindi shi u lu a vangertiôr wer ka u mimi yô.” Nahan yange gba u Timoteu una lu a vangertiôr ér una fatyô u zuan a mimi ken Ruamabera. Yange lumun mimi ne sha ci u ngô na man ngô na u tamen kaa ér a lumun ga, kpa a kar mimi la iyol na cii ve a na jighjigh a mi ye.—Ôr 1 Mbatesalonika 5:21.

5, 6. Gba u u ‘kar akaa cii’ shighe u u lu iyev la sha ci u nyi?

5 Hide we di ye? Alaghga u fa mimi ica i gba hegen. Aluer kwagh ngu nahan yô, gbidye kwar sha atôakyaa a a ne ve u ne jighjigh yô. Kwagh ne una wase u u taver jighjigh wou shi u palegh u eren akaa sha ibume sha u dondon mbakov wou shin mhen u taregh shin mbamnenge ou je kpaa.

6 Er u lu gumor her ne, aluer u “kar” mimi u nenge yô, u fatyô u nan mlumun sha mbampin mba mbakov wou vea pine u ne, ér: ‘Er nan ve u fe wer mimi je Aôndo nguu? Aluer se doo Aôndo ishima yô, hii nan ve a de akaabo a lu erenee? U fa wer Aôndo ngu a mhii man mkur ga nena?’ Aluer u vande wan agoyol yô, mbampin mbara vea fatyô u van we a akperan ken ishima ga, kpa vea mgbegha u u seer henen Bibilo.

7-9. Pase er ngeren mba wasen or u henen kwagh mba ve lu sha Intanet, mba “Bibilo Tese Ér Nyi Jimi?” la, vea wase u u taver jighjigh wou yô.

7 Aluer u ngu henen kwagh zulee sha tseeneke wou yô, kwagh ne una wase u u nan mlumun sha mbampin shin dughun akperan ken ishima you kera, shi seer taver jighjigh wou u nan kpaa. (Aerenakaa 17:11) Se mba a ityakerada kpishi i ia wase u u eren kwagh ne yô. Ior kpishi zua a iwasen sha u henen antakerada u The Origin of Life—Five Questions Worth Asking (Mbampin Utaan mba I Doo u A Pine sha Kwagh  u Mhii u Uma Yô) man u Is There a Creator Who Cares About You? (Or Ngu u Nan Gbe Tar U Nan We U Ikyo Yôô?) la. Shi ka i doo agumaior kpishi u timen sha akaa a wasen or u henen kwagh, a i veren hen ijiir yase i sha Intanet i jw.org la. U fatyô u zuan a akaa ne ape i nger ér ATESEN A BIBILO AGUMAIOR “Bibilo Tese Ér Nyi Jimi?” la. Agumaior kpishi zua a iwasen ken akaa ne. I er akaa a wasen or u henen kwagh ne sha gbenda u aa wase u u na jighjigh a ma kwagh u Bibilo i tese yô.

8 U henen Bibilo kpoghuloo, nahan alaghga u vande fan mbamlumun sha mbampin mbagenev mba i ne hen ijiir shon la. Kpa u nenge wer, mbamlumun ou mbara mba shami kpa? Akaa a wasen or u henen kwagh la aa wase u u gbidyen kwar sha avur a Bibilo kposo kposo, nahan ishima ia taver we u ngeren atôakyaa aa ne ve u ne jighjigh la shin inya. Kwagh ne una wase u u fa er u pase mbagenev akaa a u ne jighjigh a mi la yô. Aluer u fatyô u zan sha Intanet henpe i nger ér “Bibilo Tese Ér Nyi Jimi?” la yô, u hen kwagh sha tseeneke wou a akaa a i ver her la sha er jighjigh wou una seer taver yô.

9 Gba u u tôv u fa aluer ka mimi je ne yô. Kwagh ne una wase u u wa agoyol u eren batisema. Gumkwase ugen yange kaa ér: “Cii man m er batisema yô, yange m hii henen Bibilo, nahan m na jighjigh mer ka kwaghaôndo u mimi je ne. Man hanma iyange yô, jighjigh wam ne ka a seer taver.”

AEREN A OU

10. Gba u Orkristu u nan er Batisema nana eren akaa a tesen ér nan ngu a jighjigh u nan sha ci u nyi?

10 Bibilo kaa ér: “Jighjigh u nan kpaa, aluer ngu a aeren ga yô, un iyol na una lu kpenegh.” (Yakobu 2:17) Aluer u na jighjigh taveraa yô, u tese sha aeren a ou. U hingir u lun ken ‘icighanmlu shi civir Aôndo,’ er Bibilo i kaa nahan.Ôr 2 Peteru 3:11.

11. Pase inja i ishember i “icighanmlu” la.

11 Ka nyi i lu “icighanmlu”? Aluer aeren a ou nga wang yô, tese ér u ngu a icighanmlu.  Ikyav i tesen yô, gbidye kwar sha akaa a u er ken atô u iwer ataratar i karen ne. Shighe u i lu meen we ér u er kwaghbo la, u gbidye kwar zulee hen shighe la sha kwagh u a lu u shami shin shami ga la kpa? (Mbaheberu 5:14) U umbur ashighe jighilii a u hemba imeen shin u venda kwagh a mbakwav wou kpa? U eren kwagh u dedoo ken makeranta u mbagenev vea dondo kpa? U ngu civir Yehova sha mimi shinii, ka u nôngon wer u lu er mbayev mba ken klase wou sha er ve de sen we ga? (1 Peteru 4:3, 4) Ka mimi, or môm kpa nan ngu vough ga. Ashighe agen mba ve civir Yehova ica i gbe je kpa, alaghga vea cia ashe shi a taver ve u pasen mbagenev kwagh. Kpa or u nan tsegh iyol i nan sha ci u Aôndo yô, kunya ngu ker nan u pasen ér nan ngu Orshiada u Yehova ga, shi ka nan tese kwagh ne sha ieren i nan i wang la.

12. Ka akaa agen a nyi nga a tese ér or ngu ‘civir Aôndo,’ man doo u u nenge a nena?

12 Ka aeren a nyi nga a tese ér se mba ‘civir Aôndo’? Aeren ne ka akaa a u eren ken tiônnongo la, er u zan mbamkombo shi duen kwaghpasen nahan. Shi aeren ne kua akaa agen a u eren, a mbagenev ve nengen ga la kpa ker, er u eren msen hen Yehova shi henen kwagh sha tseeneke wou nahan. Or u nan tsegh iyol i nan sha ci u Yehova yô, nan nengen ér akaa ne ka ikyav ga. Ka nan lu a mnenge u Tor Davidi kpa lu a mi la. A kaa ér: “Doom u eren ishima You, Aôndo wam; atindiakaa a Ou ngam ken ishima.”Pasalmi 40:8.

Ka u ter akaa a u soo u sônon Aôndo la jighilii ken mbamsen ou kpa, shi mba tesen ér Yehova doo u ishima tsung je he?

13, 14. Ka mbampin mba injaa mba nyi vea wase u u ‘civir Aôndo,’ man ve wase agumaior agen nena?

13 Takerada u Questions Young People Ask—Answers That Work, Tihi u sha 2 la, ngu a mbampin sha peeji 308 zan zan 309, mba vea wase u u tsuan akaa a u er yô. Sha upeeji mbara, u fatyô u ngeren mbamlumun sha mbampin er mban nahan: “U teren akaa a u soo u sônon Yehova la jighilii ken mbamsen ou kpa, shi mbamsen ou mba tesen ér Yehova doo u ishima tsung je he?” “Ka nyi man nyi u henen ken kwaghhenen wou u sha tseeneke laa?” “U dugh kwaghpasen shighe u mbamaren ou ve dugh ga la kpa?” Shi upeeji mbara mba a ijiir i u fatyô u ngeren akaa a u we ishima u eren sha kwagh u msen man kwaghhenen u sha tseeneke man kwaghpasen yô.

14 Agumaior kpishi a a soo u eren batisema la nenge ér mbampin mba ve lu ken takerada u Young People Ask mbara mba a inja kpen kpen. Gumkwase ugen u i yer un ér Tilda yô, kaa ér: “Mbampin mbara yange ve wasem u tsuan akaa a me er yô. Yange m er akaa a m tsua u eren la cii, nahan inyom i môm karen yô, kumam u eren batisema.” Gumor ugen u a lu anmgbian yô, iti na ér Patrick, un kpa mbampin mbara yange ve wase un. A kaa ér: “Yange m fa akaa a m wa ishima u eren la, kpa er m nger a shin inya yô, kwagh ne  wasem m hemba nôngon kpoghuloo u eren a.”

Aluer mbamaren ou de u civir Yehova nahan, u za hemen u civir un her je he? (Nenge ikyumhiange i sha 15 la)

15. Pase er i hii ve iyoltseghan i lu kwagh u or a tsua a ishima i nan yô.

15 Mpin môm ken mbampin mbara kaa ér: “Aluer mbamaren ou man azende a ou de u civir Yehova nahan, we u za hemen u civir un her je he?” Ka wea tsegha iyol you sha ci u Yehova shi wea er batisema yô, u hingir u yan ikyar a na kôôsôô. Nahan kwagh u u eren sha ci u Yehova la har sha kwagh u orgen shin mbamaren ou ve eren ga. Aluer u ngu ken icighanmlu shi u ngu civir Aôndo yô, aeren a ou a tese ér u na jighjigh wer ka mimi je ne shi u soo u dondon atindi a Aôndo. Ica a gba ga maa u kuma u a er u batisema.

IWUESE YOU

16, 17. (a) Doo u a lu nyi ia mgbegha or nana hingir Orkristuu? (b) U tese wer u ngu a iwuese sha naagh ku ipaan kura nena? Tese ikyav.

16 Orgen u fa Tindi u Mose tsema tsema yô, yange va pine Yesu ér: “Atindi cii ka hanmô ker a lu tindi u tamena?” Yesu gema kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii.” (Mateu 22:35-37) Yesu pase ér ityôkyaa i ka i na ve or er batisema shi nan hingir Orkristu yô, ka sha ci u Yehova doo nan ishima. Môm ken  akaa a hemban doon cii, a u er ve Yehova una hemba doon we ishima yô, ka u gbidyen kwar zulee sha iyua i hemban cii, i Aôndo a ne sha u paan uumace la. (Ôr 2 Mbakorinte 5:14, 15; 1 Yohane 4:9, 19.) Aluer u er kwagh ne yô, a sar u u tesen iwuese sha iyua i doon tsung ne.

17 A fatyô u pasen iwuese i u lu a mi sha naagh kun ne sha gbenda ne: Tôô ase wer u ngu kuan shin mnger, maa orgen va yima u. U uma iyol, maa u kar u yem ken ya, u hungur a kwagh u or la nan er a we laa? Mayange ga! U wuese or u nan yem u la hanma shighe! Se kpa, gba u se wuese Yehova man Yesu sha ci u naagh ku ipaan kura. A lu ve ga yô, ma se lu uma ga! Ve yima se sha ikyev i isholibo man ku. Se mba a ishimaverenkeghen hegen u va lun uma gbem sha won ken Paradiso shin tar, sha ci u se doo ve ishima!

18, 19. (a) Gba u u cia u lun kwagh u Yehova ga sha ci u nyi? (b) Aluer u ngu civir Yehova yô, kwagh la una na uma wou una hemba doon nena?

18 U ngu a iwuese sha kwagh u Yehova a er sha ci wou la kpa? Aluer ka nahan yô, iyoltseghan man batisema ka kwagh u i doo u u er yô. Iyoltseghan you la tese ér u tôndo zwa a Aôndo wer u er ishima na gbem sha won. Doo u u cia u eren imba ityendezwa laa? Mayange ga! Yehova soo ér u zua a kwagh u hemban doon cii ken uma, shi una na mba ve eren ishima na la injar. (Mbaheberu 11:6) Aluer u tsegha iyol you sha ci u Aôndo shi u er batisema yô, uma wou una hemba doon, una gba a gba kera ga! Anmgbian ugen u lun anyom 24, u yange er batisema cii ve via or yô, kaa ér: “Luun er yange me a via or cii yô, ma m hemba lun a mkav, kpa er m tsegha iyol yam sha ci u Yehova shighe u m lu iyev la yô, kwagh ne na m palegh u zendan akaa a taregh.”

Satan soo iyol na tseegh shi kwagh wou gba un ishima ga

19 Yehova soo ér u zua a kwagh u hemban doon cii ken uma. Kpa Satan yô, soo iyol na tseegh shi kwagh wou gba un ishima ga. Aluer u dondo un ijime kpa, una na u kwagh u dedoo môm ga. Ngu a kwagh u dedoo ga, nahan una zua a mi han ve una na u we? Ngu a loho u dedoo ga, shi ishimaverenkeghen kpa ngu a mi ga. Ngu a kwagh u dedoo sha ci u wou ken hemen ga, sha ci u un iyol kpa kwagh u dedoo ngu keghen un ga!Mpase 20:10.

20. Ka nyi gumor nana er ve nana vese a kuma u tseghan iyol i nan sha ci u Yehova shi eren batisema? (Shi nenge ngeren u kiriki u a lu a itinekwagh ér “Kwagh u Una Wase U u Vesen ken Jijingi Yô” la.)

20 Aluer u tsua u tseghan iyol you sha ci u Yehova yô, ka kwagh u hemban doon cii je u er ye. U wa agoyol u eren kwagh ne vee? Wea wa yô, de cie u eren iceghzwa la ga. Kpa aluer u nenge wer u ngu a wa agoyol u eren nahan ga yô, dondo mbamhen mba i dugh a mi ken ngeren ne la, nahan za hemen u vesen ken jijingi. Paulu yange kaa a anmgbianev mba ken Filipi ér ve za hemen u vesen ken jijingi. (Mbafilipi 3:16) Aluer u dondo kwaghwan ne yô, ica a gba ga tsô a sar u u tseghan iyol you sha ci u Yehova shi eren batisema.