Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Febewari 2016

Za Hemen u Civir Yehova Saan Saan

Za Hemen u Civir Yehova Saan Saan

KA HANMA iyange i lu iyange i hemban saan we iyol ken uma wou ciilii? Ka iyange i u er ivese la, shin ka iyange i u mar wou wan u hiihii laa? Shin ka iyange i i er u batisema laa? Alaghga tsô lu iyange i u er batisema la, lu iyange i injaa i hemban saan we iyol ken uma cii ye. Sha iyange shon la, saan anmgbianev ou mba nomso man mba kasev iyol u nengen er u tese wer Aôndo doo u ishima a ishima you cii, man a uma wou cii, man a mfe wou cii kua a agee ou cii yô!—Marku 12:30.

Shi alaghga tsô, hii shighe u u er batisema la je, u zua a msaanyol kpishi sha u civir Yehova. Nahan kpa, mbapasenkwagh mbagenev kera saan ve iyol er lu sha hiihii la nahan ga. Ka nyi i ne ve kwagh a lu nahana? Ka atôakyaa a nyi nahan se lu a mi u zan hemen u civir Yehova saan saana?

KWAGH U A NE VE I KERA SAAN MBAGENEV IYOL GA YÔ

Loho u Tartor la ka u va se a msaanyol kpen kpen. Sha ci u nyi? Sha ci u Yehova tôndo zwa ér ica a gba ga tsô Tartor la ua tim botar ne kera, kpa ua gema a va a tar u he u Aôndo la. Sefania 1:14 kaa a vese ér: “Iyange i vesen i TER mgbôghom, ngi van fefa je!” Kpa aluer se nenge ser se kegh hemba er yange se ver ishima la yô, a kera saan se iyol er ngise lu nahan ga. Kwagh ne una na yô, se kera lu civir Yehova sha gbashima ga.—Anzaakaa 13:12.

Ka sea luun vea anmgbianev asev mba nomso man mba kasev yô, se zua a ishimataver i zan hemen u civir Yehova saan saan. Alaghga ka ieren i dedoo i ior mba Yehova la yange i mgbegha se se va ken mcivir u mimi shi i wase se se hii u civir Aôndo saan saan ye. (1 Peteru 2:12) Nahan kpa, ka nyi ia fatyô u eren, shighe u i tsaha ma anmgbian u nomso shin u kwase sha ci u nan venda u dondon atindi a Aôndo laa? Adooga kwagh ne una na iyol a kpe mbagenev ken tiônnongo shi a kera saan ve iyol ga.

Isharen i lun yôughyôugh kpa ia fatyô u nan se se ure. Nena yô? Tar u Satan ne soo ér se fa ser gba u se yam akaa a kwagh a gbe se a mi hange hange ga yô. Nahan yô, doo u se umbur mkaanem ma Yesu man, ér: “Or môm môm ngu u nana fatyô u eren uter uhar tom ga; gadia nana kôr ugen ihyom, ugen á doo nan ishima, shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.” (Mateu 6:24) Se fatyô u civir Yehova saan saan, shi hen shighe shon môm nôngon ser se zua a hanma kwagh u a lu ken tar ne cii ga.

ZUA A MSAANYOL KEN TOM U YEHOVA

Mba Yehova a doo ve ishima yô, u civir un ka ve ikyav ga. (1 Yohane 5:3) Umbur kwagh u Yesu yange ôr ne, ér: “Va nen her a Mo, ne mba i ver ne iyol cii, ikyav mbi yoho ne kpaa, Mo Me na ne mmem. Tôô nen igbur Yam sha ayol a en, va hen nen kwagh sha ikyev Yam, gadia M ngu ishima legh legh, man M kehen ityough kpaa ga, tsô né zua a mmem ken asema a en; gadia igbur Yam leghem man ikyav Yav kpaa  peese.” (Mateu 11:28-30) Mbakristu ka vea civir Aôndo sha mimi yô, ve zua a mmem shi i saan ve iyol. Se mba a atôakyaa a injaa a eren Yehova tom saan saan. De se time sha atôakyaa ne atar.—Habaku 3:18.

Se mba civir Aôndo u sar sar, u a ne se uma la. (Aerenakaa 17:28; 1 Timoteu 1:11, NW) Se fa ser ka Aôndo a gbe se ye. Sha nahan yô, aluer se er batisema, anyom a kar nan nan kpa, se za hemen u civir un saan saan.

Anmgbian Héctor ka a zua a msaanyol sha u umbur ishimaverenkeghen i a lu a mi sha kwagh u Tartor la, shi eren Aôndo tom tsung

Nenge ase kwagh u anmgbian Héctor u civir Yehova shi er tom u sôron atôônanongo kuma anyom 40 la. Er a nyer ken “iyol i been” nahan kpa, ngu eren Yehova tom her saan saan. (Pasalmi 92:12-14) Kwaghnyoon u kwase na na yô, kera fetyô u eren tom u Aôndo er a soo la ga, kpa kwagh la pande msaanyol u Héctor ga. A kaa ér: “Er kwaghnyoon u kwase wam a lu hemban gban a gba kera, shi i lu ican kpishi u nengen sha na nahan kpa, m de mer kwagh ne a yangem u zuan a msaanyol ken tom u m lu eren Aôndo u mimi ne ga. Er m fe mer ka Yehova, u a gbe uumace sha ci u kuren awashima na la a nem uma yô, m nenge mer a kuma u me soo un tsung shi me civir un a ishima yam cii. M ngu nôngon eren tom u pasen kwagh la her kpoghuloo shi nôngon mer ishimaverenkeghen i kwagh u Tartor la i lu kwagh u hiihii ken uma wam sha er a saan mo iyol her yô.”

Yehova tindi Wan na va na naagh ku paan se, sha er se va lu uma saan saan yô. Sha mimi yô, “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yohane 3:16) Aluer se na naagh ku Aôndo a tindi Wan na a va ne la jighjigh yô, a fatyô u den se a asorabo ase shi se va zua a uma u tsôron kpaa. Kwagh ne ka ityôkyaa i injaa i ember! Shi iwuese i se lu a mi sha naagh kura la, ia mgbegha se u civir Yehova saan saan.

Anmgbian Jesús yange pande akaa ken uma na kpishi, nahan a civir Yehova saan saan anyom imôngo

Anmgbian ugen u i yer un ér Jesús, u lu ken tar u Mexico la, kaa ér: “Yange m lu kpan u tom wam, ashighe agen m er tom i hemba ahwa a i nem la ica je, man or kpa kighir mo ér m er nahan ga. M lu eren nahan sha er me seer zuan a inyaregh yô. Maa m va hen kwagh u Yehova kua er a ne Wan na sha ci u uumace yô. Nahan sarem tsung u civir un. Sha nahan yô, m tsegha iyol yam sha ci u Yehova, shi m eren tom hen kômpeni la anyom nga kar 28 yô, m de tom her, m yem m za hii u eren tom u pasen kwagh hanma shighe la.” Lu kwagh u wase Jesús gema civir Yehova saan saan je ne.

Se mba eren dang ga, nahan kwagh ne ka a va se a msaanyol. U umbur uma u ngise u eren cii ve u va fa Yehova la kpa? Apostoli Paulu yange umbur Mbakristu mba ken Roma mbara ér ngise ve lu “ikpan i isholibo,” kpa ve hingir “ikpan i perapera.” Er uma ve lu a acôghor ga yô, ve fatyô u veren ashe  u va zuan a uma u tsôron. (Mbaromanu 6:17-22) Se kpa se mba dondon atindi a Yehova, nahan kwagh ne ka a wase se u palegh ican i or ka nana er dang shin ipila ve nan ya la. Nenge imba er kwagh ne a lu kwagh u nan or msaanyol sha wono!

“Anyom a m hembe zuan a msaanyol ken uma cii yô, ka anyom a m lu civir Yehova ne.”—Anmgbian Jaime

Nenge ase kwagh u Jaime, u ngise na jighjigh ér Aôndo ngu ga, shi akaa cii gba duen abu tsô, shi keren iju la. Jaime yange hiin u zan mbamkombo mba Mbakristu yô, a nenge a dooshima u anmgbianev la, nahan doo un kpishi. Kpa gba u una sôn Yehova ér a wase un una de uma na u tse la cii ve una fatyô u nan un jighjigh ye. Jaime kaa ér, “Tegh tegh tsô, m mase kaven mer Aôndo ngu, u a lu Ter u se doo un ishima shi a zungu mhôônom yô. Er m kor atindi a Yehova a perapera la yô, kwagh ne kuram. Luun er yange m gema inja ga yô, alaghga ma m lu uma hegen ga, er azende a am agen a ngise se keren iju imôngo la nahan. Anyom a m hembe zuan a msaanyol ken uma cii yô, ka anyom a m lu civir Yehova ne.”

DE YEN ISHIMA GA!

Er se lu keghen mkur u botar ne la, ka mnenge u nyi i doo u se lu a mini? Umbur wer, se mba eren ishima i Aôndo shi se mba veren ashe u va zuan a uma u tsôron. Yô, “sé gba nen uwer u eren akaa a dedoo ga, gadia shighe á va kuma yô, sé sunda aluer se yina ishima ga yô.” (Mbagalatia 6:8, 9) Sha iwasen i Yehova yô, se wa nen ishima shi se nôngo kpoghuloo se lu a aeren a i gbe u se lu a mi ve se war “zegecan” shi se za hemen u civir Yehova saan saan la.—Mpase 7:9, 13, 14; Yakobu 1:2-4.

Se mba a vangertiôr ser Yehova una na se injar sha ishimawan yase la sha ci u a fa tom u se lu eren man dooshima u se lu tesen sha ci u iti nan la. Aluer se za hemen u civir un saan saan yô, kwagh wase una lu er u orpasalmi Davidi nahan. Yange kaa ér: “M ver TER sha ishigh yagh gbem; er A lum ken uwegh ku yanegh yô, me tenger ga. Ka sha ci u nahan man ishima yam, i ember, uma wam kpaa saan un iyol tsung je, iyol yam kpaa ia lu gbar gbar.”—Pasalmi 16:8, 9.