Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Febewari 2016

Dondo Ikyav i Mba Ve Ya Ikyar a Yehova Kôôsôô La

Dondo Ikyav i Mba Ve Ya Ikyar a Yehova Kôôsôô La

“Ka mba ve cie Yehova la ve ye ikyar kôôsôô a na ye.”—PASALMI 25:14, NW.

ATSAM A A GBER YÔ, KA: 106, 118

1-3. (a) Er nan se fe ser se kpa se fatyô u hingir azende a Aôndo? (b) Ka unô ior se lu timen sha kwagh ve ken ngeren nee?

BIBILO yila Aberaham ajiir ahar ér ikyar u Aôndo, shi i yila un ijiir igen ér huror u Aôndo kpaa. (2 Kroniku 20:7; Yesaia 41:8; Yakobu 2:23) Ka un tswen Bibilo i yer un ér ikyar shin huror u Aôndo ye. Nahan kwagh ne tese ér ken uumace cii ka Aberaham tswen hingir ijende i Aôndo yee? Mayange ga. Bibilo tese ér se kpa se fatyô u yan ijende vea Aôndo.

2 Mkaanem ma Aôndo ôr kwagh u nomso man kasev mba jighjigh kpishi mba ve cia Yehova, shi ve na un jighjigh, nahan ve hingir azende na a kôôsôô yô. (Ôr Pasalmi 25:14, NW.) Mba ken “ikpela i mbashiada i vesen” i Paulu ôr kwagh u i la. Ior mban cii lu azende a Aôndo.—Mbaheberu 12:1.

3 De se time nen sha kwagh u iorov utar mba ve lu azende a Yehova, i er kwagh ve ken Bibilo la. Ve yô ka: (1) Rutu, gumkwase u ken Mbamoabi, u lu kwasecôghol shi tile sha mimi la, (2) Hesekia, tor u Mbayuda u tile sha mimi la,  man (3) Maria, ngô u Yesu, u lu kwase u hiden a iyol ijime la. Se fatyô u henen nyi sha gbenda u hanmô ve ya ijende vea Yehova laa?

A TESE DOOSHIMA U MIMI

4, 5. Ka kwagh u taver tsung u nyi yange gba u Rutu una tsuaa, man er nan ve lu kwagh u tavera? (Nenge foto u a lu sha mhii u ngeren ne la.)

4 Naomi vea kasev mba ônov nav, Rutu man Orpa mough ken tar u Moabi lu yemen gôgô zende ken Iserael. Er ve lu yemen sha gbenda la, Orpa hide yem ken ya na, ken Moabi. Kpa Naomi yô, kange ishima ér una yem ken tar na, ken Iserael. Rutu di er nana? Yange gba u una tsua kwagh u una er yô, man lu kwagh u taver kpishi. Una hide a yem ken ya, ken Moabi una za kohol tsombor na shinii, una dondo Naomi, ngô u nom na, vea hide ken Betelehem?—Rutu 1:1-8, 14.

5 Tsombor u Rutu lu ken Moabi. Yange una soo yô, ma hide za kohol ior nav, shi alaghga tsô ma ve nenge sha a na kpaa. Yange fa Mbamoabi man zwa ve kua aeren a ve kpaa. Kpa mayange Naomi kaa a Rutu ér ken Betelehem kpa kape kwagh a za lu la ga. Shi Naomi lu cian ér una fatyô u zuan un a nom shin ya ga. Nahan Naomi kaa a na ér a hide a yem ken Moabi. Er se vande nengen nahan, Orpa yô, ‘hide hen ityô na kua hen aôndo na kpaa.’ (Rutu 1:9-15) Kpa Rutu yô, lumun u hiden hen ior nav man mbaaôndo vev mba aiev mbara ga.

6. (a) Rutu yange tsua kwagh u injaa nena? (b) Er nan ve Boashi kaa ér Rutu ker ijiir i memen shin akper a Yehova?

6 Ikyav tese ér Rutu yange hen kwagh u Yehova hen nom na shin Naomi. A hen fa er Yehova lu er mbaaôndo mba Moabi nahan ga yô. Nahan Yehova doo un ishima, shi fa er a kom u una soo un shi una civir un yô. Nahan Rutu tsua kwagh u injaa kpishi. A kaa a Naomi ér: “Ior ou ka ior av; Aôndo wou kpaa ka Aôndo wam.” (Rutu 1:16) Ka sea hen er Naomi doo Rutu ishima tsung nahan, i doo se kpen kpen. Kpa kwagh u a hembe doon cii je yô, ka er Yehova doo Rutu ishima tsung la. Shi kwagh ne doo Boashi, u va wuese un er a ‘ker ijiir i memen shin akper a Yehova’ la kpaa. (Ôr Rutu 2:12.) Mkaanem ma Boashi man umbur se er wanikyegh ka a yer shin akper a ngôikyegh sha er a kura un yô. (Pasalmi 36:7; 91:1-4) Kape Yehova kpa kura Rutu shi na un injar sha jighjigh na u nan je la. Mayange Rutu vaa afanyô sha kwagh u tsua u eren la ga.

7. Ka nyi ia fatyô u wasen mba i lu taver ve u tseghan ayol a ve sha ci u Yehova laa?

7 Ior kpishi ka ve hen kwagh u Yehova, kpa ve soo ér a lu ijiir ve i yeren ga. Ka ve soo u tseghan ayol a ve sha ci u Yehova shi eren Batisema ga. Aluer we kpa kape ka i lu la yô, hide hen sha kwagh u a ne ve i lu taver we la. Hanma or yô, nan ngu a aôndo u nan civir yô. (Yosua 24:15) Kwagh u se er ve a hemba doon yô, ka u civir Aôndo u mimi la. Ka wea tsegha iyol you sha ci u Yehova yô, u tese wer u na jighjigh wer ngu ijiir you i yeren. Shi una wase u, u za hemen u civir un aluer u tagher a nyi zayol je kpaa. Lu kwagh u Yehova er a Rutu je la.

‘A VAR A YEHOVA’

8. Pase kwagh u mlu u tsombor u Hesekia.

8 Mlu u Hesekia yange kaha a u Rutu kpishi. Yange i mar Hesekia ken ikyurior  i i tsegha i sha ci u Aôndo yô. Kpa lu Mbaiserael cii za hemen u tilen sha mimi ga. Tor Ahashi, ter u Hesekia lu iferor. Ahashi yange tese icivir sha tempel u Aôndo ga, shi na ior ve hingir u civir mbaaôndo mbagenev, shi nande anmgbianev mba Hesekia mba nomso sha usu u nan mbaaôndo mba aiev naagh. Mimi yô, Hesekia tagher akaa a vihin tsung shighe u lu iyev la.—2 Utor 16:2-4, 10-17; 2 Kroniku 28:1-3.

9, 10. (a) Alaghga ishima yange ma ngôôr vihin Hesekia ker ga sha ci u nyi? (b) Doo u ishima ia vihi se a Aôndo ga sha ci u nyi? (c) Er nan ve i doo u se hen ser ka mlu u tsombor wase una na se vihi inja shin se doo inja ga?

9 Alaghga ieren i bo i Ahashi la yange ma i na wan na Hesekia ma vihi ishima a Yehova. Nyian ne mbagenev mba wan ishima a akaa, kpa akaa ne kuma sha kwagh u Hesekia tagher a mi la ga, nahan kpa ve nenge ér mba a ityôkyaa i injaa i “hingir iyongo a [Yehova],” shin vihin ishima a nongo na. (Anzaakaa 19:3) Mbagenev ka ve nenge ér er ve dugh hen tsombor u injaa ga yô, alaghga kwagh la una na vea lu ior mba dedoo ga shin vea er akaa a sha mi ga, er mbamaren vev nahan. (Esekiel 18:2, 3) Kpa mbamnenge vev mban ka mba mimii?

10 Hesekia tese ken uma na ér, mlumun u sha mpin la ka ei! Ityôkyaa i môm ngi i se hingir iyongo a Yehova ga. Ka Yehova a ne akaabo a eren ior ga. (Yobu 34:10) Ka mimi, mbamaren vea fatyô u tesen ônov vev u eren kwagh u dedoo shin u bo. (Anzaakaa 22:6; Mbakolose 3:21) Kpa u ngu wer kwagh la tese ér tsombor u se dugh her la ua fatyô u nan se hingir ior mba dedoo shin mba bov ga. Sha ci u nyi? Sha ci u Yehova gba se, na se ian i tsuan kwagh u se soo cii, nahan se fatyô u tsuan kwagh u bo shin u dedoo iyol yase. (Duteronomi 30:19) Hesekia yange er tom a iyua i injaa i Yehova a ne se ne nena?

Agumaior kpishi ka a ngohol mimi shin er a dugh hen icombor i i ver ikyav i dedoo ga nahan kpaa (Nenge ikyumhiange i sha 9, 10 la)

11. Lu nyi i wase Hesekia ve hingir môm ken ator a Yuda a hemban doon inja ciilii?

11 Er ter u Hesekia lu môm ken ator a Yuda a hemban vihin inja cii nahan kpa, Hesekia yô, lu môm ken a tor a hemban doon inja la. (Ôr 2 Utor 18:5, 6.) Yange dondo ikyav i bo i ter na la ga. Kpa tsua u keghen ato zulee a uprofeti mba Yehova, er Yesaia man Mika man Hosea nahan. Lu keghen ato a kwaghwan ve  zulee, shi vea kôôm un yô, a ungwa. Nahan kwagh ne mgbegha un u sôron akaa kpishi a ter na nzughul la. A wanger tempel shi sôn Aôndo ér a de ior a asorabo a ve, shi a hembe ieev mbi ior civir ken tar la cii kera. (2 Kroniku 29:1-11, 18-24; 31:1) Shi zum u tor Senakeribi u Ashiria va u tan ityav sha Yerusalem la, Hesekia tese jighjigh u nan man ishimataver. A suur sha Yehova ér a kura un, shi a taver ior nav ishima. (2 Kroniku 32:7, 8) Sha shighe ugen la, Hesekia kende a iyol sha, kpa Yehova kôôm un yô, a hide a iyol ijime. (2 Kroniku 32:24-26) Sha mimi yô, Hesekia ver ikyav i doon tsung i se dondo yô. Yange de ér mlu u tsombor na a vihi un ga. Kpa a tese ér un ngu ijende i Yehova.

12. Ior kpishi tese nyian ér mba a azende a Yehova, er Hesekia nahan nena?

12 Tar u se lu ker nyian ne vihi tsung shi dooshima ngu ker ga, nahan mbayev kpishi ka ve vese hen icombor i mbamaren vev ve ban a dooshima shi ve we ve ikyo ga yô. (2 Timoteu 3:1-5) Er Mbakristu kpishi nyian ve dugh ken icombor i i vihi tsung nahan kpa, ve tsua u yan ijende a Yehova. Ka ve tese ér ka mlu u icombor ve la una tese injaor i vea va lu ken hemen ga, er Hesekia nahan. Aôndo na se ian i tsuan kwagh u se soo yô, nahan se fatyô u tsuan u civir un, er Hesekia nahan.

“NENGE, MO KPANKWASE U TER, M NGUN”

13, 14. Alaghga tom u i na Maria la lu inja er ka tom u taver kpishi sha ci u nyi, kpa gema kaa a Gaberiel ér nyi?

13 Hesekia yange kpen anyom nga kar kpishi yô, gumkwase ugen u hiden a iyol ijime, u i yilan un ér Maria yô, ya ijende kôôsôô a Yehova, shi i na un tom u doon tsung u or lu a vande eren ga yô. Lu u una wa iyav, una mar wan u Aôndo shi una yese un! Maria yange doo Yehova ishima shi Yehova na un jighjigh, ka nahan ve na un imba icivir la ye. Kpa shighe u hii ungwan kwagh u tom ne la, a er nena?

“Nenge, mo kpankwase u Ter, m ngun” (Nenge ikyumhiange i sha 13, 14 la)

14 Ashighe kpishi ka se ôr kwagh u zege icivir u i na Maria la. Kpa alaghga gema lu nyi lu ciana? Ikyav i tesen yô, ortyom Gaberiel yange va kaa a na ér una wa iyav a u yaven a nomsoor shio. Kpa Gaberiel gema pase tsombor na man mbawanndor a na gbenda u una wa iyav la ga. Vea hen nyi sha a naa? Una ôr Yosev ér nyi ve una lumun ér un er idya ga? Heela tseegh ga, lu a zegetom u yesen Wan u Aôndo u una mar la! Se fa akaa a yange ishima nyian Maria sha mi cii ga, kpa se gema se fa kwagh u Maria er shighe u Gaberiel va lam a na bee kera la. Maria kaa ér: “Nenge, mo kpankwase u Ter, m ngun; i̱ erem sha mkaanem ou.”—Luka 1:26-38.

15. Se fatyô u kaan ser Maria lu a jighjigh u nan tsung sha ci u nyi?

 15 Mimi yô, Maria lu a jighjigh u nan tsung! Yange kegh iyol u eren nyityôkwagh i i kaa ér a er cii, er kpankwase nahan. A na jighjigh ér Yehova una nenge sha a na shi una kura un. Er nan ve Maria na jighjigh taveraa nahana? Mba maren se a jighjigh u nan ga. Kpa aluer se nôngo yô, se fatyô u lun a jighjigh u nan shi sônon Aôndo ser a ver iniôngon yase la. (Mbagalatia 5:22; Mbaefese 2:8) Maria yange nôngo kwagh kpoghuloo sha er una taver jighjigh na yô. Er nan ve se fe? De se nenge ase nen er yange ungwan kwagh la kua kwaghôron na.

16. Ka nyi i tese ér Maria lu kwase u keghen ato zulee, ungwan kwagha?

16 Er Maria ungwan kwagh la. Bibilo kaa ér se “lu tsev tsev sha u ungwan kwagh kpa [se] gema [se] ngôôr a kwaghôron.” (Yakobu 1:19) Maria lu kwase u ungwan kwagh. Bibilo kaa ér, yange a kegh ato zulee a ungwa kwagh, hemban je yô, akaa a a hen sha kwagh u Yehova la. Shi a tôô shighe a gbidye kwar sha akaa a injaa shon. Ikyav i tesen yô, shighe u mbakuranilev va u nengen a Yesu shighe u i mar un la, Maria kegh ato ungwa loho u ortyom, ú mbakuranilev va ôr un la. Shighe kar, Yesu kom anyom 12 yô, a ôr kwagh ugen u kpiligh Maria iyol yô. Maria yange kegh ato ungwa akaa ne cii, shi lu a mi ken ishima, shi lu henen sha mi zulee.—Ôr Luka 2:16-19, 49, 51.

17. Ka nyi se fatyô u henen ken Maria sha gbenda u ôron kwagh laa?

17 Kwaghôron u Maria. Bibilo ôr se kwagh u akaaôron a Maria kpishi ga. I nger kwaghôron u Maria u a hembe lihen cii la ken Luka 1:46-55. Mkaanem mara tese ér Maria fa Ruamabera u ken Zwa Heberu la kôr inya. Nena yô? Mkaanem ma Maria mara nôngo u lun kwaghmôm a kwagh u Hana, ngô u Samuel ôr ken msen yô. (1 Samuel 2:1-10) A shi nan kpa, Maria ter Mkaanem ma ken Ruamabera ken kwaghôron na nôngo u kuman kwa 20. Kwagh ne tese wang ér yange i doo un u lamen sha akaa a mimi a a hen, hen Yehova, Ijende na i hemban cii la.

18. Se fatyô u dondon ikyav i jighjigh u nan u Maria la sha nyi igbenda?

18 Alaghga se kpa ashighe agen Yehova una na se ma tom u se hen ser u taver gande u se fatyô u eren yô, er Maria nahan. Doo u se dondo ikyav na la, se hide a iyol ijime se ngohol tom shon shi se na jighjigh ser Yehova una wase se. Shi se fatyô u dondon ikyav i Maria ver i jighjigh u nan la, sha u keghen ato a Yehova shi gbidyen kwar sha akaa a se hen sha kwagh na kua mbaawashima nav la. Maa se ôr mbagenev kwagh u se hen la saan saan.—Pasalmi 77:11, 12; Luka 8:18; Mbaromanu 10:15.

19. Aluer se mba dondon ikyav i jighjigh u nan u doon tsung u ior mba i er kwagh ve ken Bibilo la yô, se fatyô u veren ashe a nyi?

19 Ikyav tese wang ér Rutu man Hesekia kua Maria cii lu azende a Yehova, vough er Aberaham nahan. Ve lu ken “ikpela i mbashiada i vesen” igen, i i zua a ian i civirigh i hingir azende a Aôndo la. Yô, se za nen hemen u dondon ikyav i doon tsung i jighjigh ve la. (Mbaheberu 6:11, 12) Aluer se er nahan yô, se fatyô u veren ashe a injar i azende a Yehova a a va zua mi gbem sha won la!