Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Desemba 2016

‘Ver Ishima sha Kwagh u ken Jijingi sha er U Zua a Uma man Bem Yô’

‘Ver Ishima sha Kwagh u ken Jijingi sha er U Zua a Uma man Bem Yô’

‘Mba ve lu ken jijingi yô, ka akaa a ken jijingi ve veren ishima sha mi ye.’—ROM. 8:5.

ATSAM: 57, 52

1, 2. Mbaromanu ityough 8 ngu mba i shigh ve mkurem la a inja kpishi sha ci u nyi?

YANGE u ôr Mbaromanu 8:15-17 la, shighe u i lu umbur ku u Yesu la kpa? Alaghga tsô yange u ôr. Avur la pase er ka i er ve Mbakristu ve fa ér i shighe ve mkurem yô; jijingi ka a er shiada vea jijingi ve ér i shighe ve mkurem. Shi avur a a hii ityough ki shon la ôr kwagh u “mba ve lu ken Kristu Yesu” la. Kpa Mbaromanu ityough 8 ôr kwagh u mba i shigh ve mkurem la tseeghlee? Shin a ôr kwagh u mba ve lu a ishimaverenkeghen i va lun uma shin tar la kpaa?

2 Ka Mbakristu mba i shigh ve mkurem la jighilii i er kwagh ve ken ityough kira ye. Ve ngohol “jijingi” er mba ve lu ‘keghen mlumun u á va lumun ve ér mba ônov la, ka mpaa u ayol a ve je la.’ (Rom. 8:23) Jighilii yô, vea va yem sha vea za lu ônov mba Aôndo. Kwagh ngu nahan sha ci u yange mba hingir Mbakristu mba er ve batisema yô, Aôndo er tom a naagh ku ipaan kura, nahan de ve a asorabo ve shi gema ve ve hingir ônov nav mba ken jijingi mbaperapera.—Rom. 3:23-26; 4:25; 8:30.

3. Se kure ikyaa ser gba u Mbaromanu ityough 8 una lu mba ve lu a ishimaverenkeghen i va lun uma shin tar la a inja sha ci u nyi?

3 Nahan kpa, Mbaromanu ityough 8 ngu mba ve lu a ishimaverenkeghen i va lun shin tar la kpa a iwasen sha ci u Aôndo nenge  ér ve kpa ka mbaperapera. Mhii u washika u Paulu nger hen Mbaromanu la wase se u fan kwagh ne. Ken ityough ki sha 4 la, a ôr kwagh u Aberaham. Orjighjigh ne lu uma cii ve Yehova va na Mbaiserael Tindi ye, shi lu uma shighe kar gôgônan cii ve Yesu va kpe sha ci u asorabo a ase ye. Kpa Yehova nenge a jighjigh u nan u Aberaham u tsung la, nahan gema un hingir orperapera. (Ôr Mbaromanu 4:20-22.) Kape nyian kpa, Yehova una fatyô u nengen a perapera u Orkristu u jighjigh, u nan lu a ishimaverenkeghen i i har sha Bibilo, i va lun uma shin tar gbem sha won la je la. Nahan vea fatyô u zuan a iwasen ken kwaghwan u a lu ken Mbaromanu ityough 8 u i we mbaperapera la.

4. Ka mpin u nyi i doo u Mbaromanu 8:21 una wase se u gbidyen kwar sha mi?

4 Ken Mbaromanu 8:21 la, se zua a vangertiôr ser tar u he la ua va keng abunde ga. Ivur la tôndo zwa er: “Akaa a i gbe a la kpaa á va pase a sha ikyev i mlu u hôôn la á tuhwa, á za a mi ken mlu u engem u lun a ikyangenev ga u ônov mba Aôndo la.” Kpa zayol u a lu yô, se va lu ker shin se lu ga, se zua iyua la shin se zua a mi ga? U ngu a vangertiôr wer u va lu ker kpa? Mbaromanu ityough 8 due a gbenda u ua wase u u va lun ker yô.

ISHIMAVEREN I IYOLOUGH

5. Ken Mbaromanu 8:4-13 la, ka nyi kwagh i vesen Paulu lam sha mini?

5 Ôr Mbaromanu 8:4-13. Mbaromanu ityough 8 ôr kwagh u mba ve zenden ‘sha iyol’ la, kposo a mba ve zenden ‘sha Jijingi’ la. Alaghga mbagenev vea nenge ér mkposo ne ka u hen atô u mba ve lu ken mimi a mba ve lu ga yô, shin mba ve lu Mbakristu aa mba ve lu ga yô. Nahan kpa, Paulu yange nger washika ne hen ‘mba ve lu ken Roma mba ve doo Aôndo ishima la cii mba i yila ve ér ve̱ lu uicighanmbaiorov la.’ (Rom. 1:7) Sha nahan yô, Paulu lu paven Mbakristu mba ve zenden sha iyol la veren kposo a Mbakristu mba ve zenden sha jijingi la. Mkposo ve lu nyi?

6, 7. (a) Ka sha igbenda i nyi nahan i ter ishember i “iyol” la ken Bibilo? (b) Paulu er tom a ishember i “iyol” la, ken Mbaromanu 8:4-13 nena?

6 Hiihii yô, nenge ase kwagh u ishember i “iyol” la. Lu nyi Paulu lu ôrono? Bibilo ter ishember i “iyol” la sha igbenda kposo kposo. Ashighe agen, ka i ôron kwagh u iyol i inyam man awambe la kpôô kpôô. (Rom. 2:28; 1 Kor. 15:39, 50) Ashighe agen di, i lu kwagh u tsombor. Yesu yange “due ken tsombor u Davidi sha mlu u or” shi Paulu kaa ér Mbayuda ‘ka anmgbianev nav  mba ve lu ityô na ken iyol’ yô.—Rom. 1:3; 9:3.

7 Nahan cii kpa, kwagh u Paulu a nger ken ityough 7 la wase se u kaven inja i ishember i “iyol” i i er kwagh u i ken Mbaromanu 8:4-13 la. Paulu tôô kwagh u lun “uma ken iyol la” kar sha “asaren a bo” a lu “eren tom ken alegh [ave]” la. (Rom. 7:5) Kwagh ne ta iwanger sha mkaanem ma “mba ve lu ken iyol” mba Paulu kaa ér “mba veren ishima sha akaa a iyolough” la. Yange lu ôron kwagh u ior mba asaren a iyolough lu hemen ve, shi er orumace a yen yô, ve lu veren ishima sha asaren man mbamhen vev la. Jighilii yô, lu mba ve lu dondon asaren ve, er u yaven a or shin asaren agen la nahan.

8. Er nana ve Mbakristu mba i shighe ve mkurem la je kpa, i ta ve icin sha kwagh u “veren ishima sha akaa a iyolough” la nahan, lu sha injaa?

8 Paulu yange ta Mbakristu mba i shighe ve mkurem la icin sha kwagh u bo u lu ken ieren i “lun uma sha iyol” la sha ci u nyi? Nyian kpa imba kwaghbo la ia fatyô u tseren Mbakristu mba Aôndo a lumun ér mba azende na shi a nenge ér mba mbaperapera laa? Kwagh er vihi yô, hanma Orkristu cii nana fatyô hiin u zenden sha iyol. U tesen ikyav yô, Paulu nger ér mbagenev ken atô u anmgbianev mba ken Roma la hingir ikpan i “iyav vev,” alaghga tsô lu isharen i yaven a or shin i sha kwaghyan shin msôrom ma man gayô sha akaa agen. Mbagenev di yô, lu “tsumen a asema a mbakaven kwagh ga” mbara. (Rom. 16:17, 18; Fil. 3:18, 19; Yuda 4, 8, 12) Umbur wer sha shighe ugen la, anmgbian ugen ken Korinte lu a ‘kwase u ter na.’ (1 Kor. 5:1) Nahan kwagh ne kera taver se er i hii ve Aôndo mgbegha Paulu ta Mbakristu icin sha kwagh u “veren ishima sha akaa a iyolough” la ga.—Rom. 8:5, 6.

9. Icintan i Paulu a te ken Mbaromanu 8:6 la, wa nyi ker ga?

9 Icintan la ngi se a inja nyian kpaa. Alaghga Orkristu u nan civir Aôndo anyom imôngo yô, nana va hii u veren ishima i nan sha akaa a iyolough. Kpa kwagh la ngu ôron kwagh u Orkristu u ashighe agen, ka nan hen sha kwagh u kwaghyan shin tom u uke shin iemberyolough gayô sha kwagh u kwase shin nomsoor la ga. Hanma or u civir Aôndo cii nana fatyô u henen sha akaa ne. Kwaghbo ngu sha mi ga. Yesu kpa yange a ya kwagh shi a koso mbagenev. Paulu nger ér kwagh u mba ve vôso ayol a ve, yaven ayol a ve la, ka kwagh u vesen ken ivese.

Iliam you i tesen ér u ver ishima sha a akaa a ken jijingi shin ka a sha iyolougho? (Nenge ikyumhiange i sha 10, 11 la)

10. Ishember i ‘ishimaveren’ i i ter ken Mbaromanu 8:5, 6 la, ngi ôron nyi kwagha?

10 Nahan lu nyi Paulu lu ôron sha kwagh u  ‘ishimaveren i iyolough’ laa? Ishember i ken zwa Grika i Paulu er tom a mi la inja na yô “ka u or veren ishima i nan cii sha kwagh, shin henen sha kwagh u nan soo u eren la tsung. Ishember ne hemba veren ishima sha mlu u nan shin ieren i nan kpôô kpôô.” Mba ve lu ken iyol mbara ka ve de iyol ve i i yen ne i tesen ve kwagh u vea eren ken uuma vev yô. Orfantakerada ugen ôr kwagh u ishember i mba ve lu ken iyol, i ken Mbaromanu 8:5 la ér: “Ka ve ver ishima ve sha akaa a iyolough shi akaa shon a hemba gban ve ishima shi ve hemban lamen sha mi shi wuese a gayô ve uve ityough eren a.”

11. Ka akaa a nyi nahan shighe u se lu pinen ayol ase mpin u ‘Ka nyi i hembe gban mo kwagh ken uma’ la ve se wa kere?

11 Yange gba u Mbakristu mba ken Roma la vea time a nenge akaa a hemba gban ve ishima la. Lu “akaa a iyolough” hemba gban ve kwagh ken uma yee? Se nyian kpa gba u se time se fa aluer ka akaa a iyolough a hembe gban se kwagh ken uma yô. Ka nyi i hemba gban se kwagh, man ka nyi se hembe soon u lamen sha mi? Ka nyi jighilii se keren ayange ayange? Alaghga mbagenev vea kav ér mba hemban henen sha kwagh u man uwain kposo kposo, shin sôron uya vev iyol ér ve doo ashe shin huan akondo a i za sember duen a mi la shin kôson inyaregh ki van ve a mtsera shin ve hemba veren ishima sha kwagh u zenden nengen tar man amba akaa la nahan. Akaa ne ka akaa a ior ve eren ken uma ayange ayange yô, ka a bo ga. U tesen ikyav yô, sha shighe ugen la Yesu er wain shi Paulu kpa yange kaa Timoteu ér a maan “wain côhiin côhiin.” (1 Tim. 5:23; Yoh. 2:3-11) Kpa Yesu man Paulu “hemban lamen shin wuese gayô uve ityough” u man waina? Ka kwagh u lu ve ken awambe, shi “ve hemban lamen” sha mi laa? Ei. Se di ye? Ka nyi i hembe gban se kwagh ken uma?

12, 13. Kwagh u se ver ishima yase sha mi la, ka beerkwagh ga sha ci u nyi?

12 Gba hange hange u se gbidyen kwar sha mlu wase. Sha ci u nyi? Paulu nger wener: ‘Ishimaveren i iyolough yô ka ku.’ (Rom. 8:6) Kwagh ne ka beerkwagh ga, sha ci u u kpe ken jijingi hegen shi u va kpe ku u kpôô kpôô la ken hemen. Kpa shi, Paulu lu kaan ér aluer or hii u “veren ishima sha akaa a iyolough” yô, ka keng nana kpe ga. Nana fatyô u geman uma u nan. Hen ase sha kwagh u idyaor u ken Korinte u yange lu keren akaa “iyolough” nahan i va dugh un ken tiônnongo kera ne. Kpa va gema ishima. Yange de u keren akaa a iyolough shi hide sha gbenda u mimi.—2 Kor. 2:6-8.

13 Aluer idyaor la je kpa gema ishima yô, nyian kpa Orkristu nana fatyô u geman ishima, hemban je yô, u nan yem keren akaa a iyolough er or u ken Korinte la ga yô. Sha mimi yô, icintan i Paulu sha kwagh u una fatyô u duen ken ieren i ‘or shin kwase u nan ver ishima sha akaa a iyolough’ la, ia mgbegha Mbakristu vea gema nyityôkwagh i i gbe u vea gema ken uuma vev la cii!

‘VER ISHIMA SHA AKAA A KEN JIJINGI’

14, 15. (a) Paulu yange kaa ér se ver ishima yase sha nyi? (b) ‘Ishimaveren i sha akaa a ken jijingi’ la, wa nyi ker ga?

14 Yange apostoli Paulu te se icin sha kwagh u ‘veren ishima sha akaa a ken jijingi’ la been kera yô, maa a kaa ér: “Ishimaveren i jijingi ka uma man bem.” Nenge imba er uma man bem ve lu iyua i doon tsung sha wono! Se zua iyua la nena?

15 ‘Ishimaveren i sha akaa a ken jijingi’ la, tese ér gba u or a de u eren akaa i eren ken uma ayange ayange la ga. Kwagh la tese ér, gba u nana lamen shin nana henen sha kwagh u Bibilo shin sha dooshima u nan lu a mi sha Aôndo kua ishimaverenkeghen i nan lu a mi sha kwagh u akaa a va er ken hemen la tseegh ga. Doo u se umbur ser Paulu  kua mbagenev mba ve lu sha shighe u mbaapostoli, mba ve eren ishima i Aôndo la kpa, ve eren akaa a ken uma a ayange ayange la. Yange ve yaan kwaghyan shi ve maan kwagh. Mbakpishiv er noov shin kasev shi ve tser tsombor shi ve eren ityom i ia wase ve u nengen sha ayol a ve man tsombor ve yô.—Mar. 6:3; 1 Tes. 2:9.

16. Er Paulu eren akaa a ken uma a ayange ayange la nahan kpa, ka nyi yange i hemba gban un kwagh ken uma ciilii?

16 Nahan kpa, mbacivir Aôndo mban de ér akaa a ve eren ken uma ayange ayange la, a ya tor ken uuma vev ga. U tesen ikyav yô, er Paulu lu eren tenti sha u zuan a inyaregh nahan kpa, i pase se kwagh u hemba lun kwagh u vesen ken uma na yô: Yange eren tom u kwaghpasen man u tesen ior la hanma shighe. (Ôr Aerenakaa 18:2-4; 20:20, 21, 34, 35.) Man ka ityom i yange kaa ér anmgbianev nav mba nomso man mba kasev mba ken Roma ve eren je la. Sha mimi yô, kwagh u hemba lun Paulu zegekwagh ken uma yô lu u civir Aôndo. Nahan yange gba u anmgbianev mba ken Roma mbara vea dondo ieren na la man ka kwagh u i gbe u se kpa se er je la.—Rom. 15:15, 16.

17. Aluer se ‘ver ishima yase sha akaa a ken jijingi’ yô, uma wase una lu nena?

17 Aluer se za hemen u civir Aôndo yô, ka nyi ia due kere? Mbaromanu 8:6 na mlumun sha mpin ne wang, ér: “Ishimaveren i jijingi ka uma man bem.” Kwagh ne tese ér gba u se de ser icighan jijingi u Yehova a hemen se shi se henen kwagh sha gbenda u a soo la. Se fatyô u lun a vangertiôr ser, aluer se ver ishima sha akaa a ken “jijingi” aa uma wase a har sha mi la yô, se zua a mkom shi uma wase kpa una lu se a inja hegen je. Shi ken hemen yô, se zua a uma u tsôron, aluer ka sha shin ka shin tar ne kpaa.

18. Ka sea ‘ver ishima sha akaa a ken jijingi’ yô, se zua a bem nena?

18 De se gbidye kwar sha kwagh u Paulu a kaa ér ‘ishimaveren i jijingi ka bem’ la. Ior kpishi mba nôngon ér vea zua a bemshima. Er ve lu keren a ker bemshima nahan kpa, se yô se zua mi kera je. Gbenda môm u ka se tese ser se mba a bemshima yô, ka u nôngon ser se lu ken bem vea mba hen tsombor wase kua mba ken tiônnongo. Se fa wang je ser, se cii se yina. Sha nahan yô, ashighe agen zayol ka a due hen atô wase, aluer imbakwagh ne er yô, i tese ér se dondo kwaghwan u Yesu ne, ér: “Za vande himen a anngôu.” (Mat. 5:24) Ka sea umbur ser anmgbianev asev mba nomso man mba kasev kpa mba civir “Aôndo u bem” la yô, kwagh ne a lu ican u eren ga.—Rom. 15:33; 16:20.

19. Ka bem u hemban cii u nyi se fatyô u zuan a mini?

19 Shi bem ugen ngu u a hemba hanma kwagh cii yô. Aluer se ‘ver ishima sha akaa a ken jijingi’ yô, se lu ken bem vea Orgban wase. Yesaia yange nger kwagh u kure sha ayange a na, kpa a gem a lu kuren hegen sha gbenda u vesen yô, ér: “Ishima i taver i geman kposo ga la, Ú [Yehova] kura i, ia lu bem bem, gadia ngi suur sha a We.”—Yes. 26:3; ôr Mbaromanu 5:1.

20. U ngu a iwuese sha kwaghwan u a lu ken Mbaromanu ityough 8 la sha ci u nyi?

20 Aluer i shighe se mkurem shin sea lu a ishimaverenkeghen i va lun uma gbem ken paradiso shin tar kpa, se mba a iwuese sha kwaghwan u jijingi mgbegha Paulu nger ken Mbaromanu ityough 8 la. Ishima i i̱ taver se ér se de deen “akaa a iyolough” a hingir se kwagh u vesen ken uma ga la doo je zua ga! Se fa je ser aluer se ‘ver ishima sha akaa a ken jijingi’ yô, se zua a injar i doon tsung. Injar shon yô, a lu uma u tsôron, sha ci u Paulu nger ér: “Injar i isholibo i kimbin yô, ka ku, kpa iyua i sha mlumun u sha mhôôn u Aôndo yô, ka uma u tsôron ken Kristu Yesu Ter wase.”—Rom. 6:23.