Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Desemba 2016

Gema Nen Ishimanyian Yen la Cii, Haa Nen sha Yehova

Gema Nen Ishimanyian Yen la Cii, Haa Nen sha Yehova

“Gema nen ishima i nyian yen la cii, haa nen sha [Yehova], gadia ka Un A lu koson ne ye.”—1 PET. 5:7.

ATSAM: 60, 23

1, 2. (a) Gba u a kpiligh se iyol shighe u se tagher a ishimanyian ga sha ci u nyi? (Nenge foto u a lu sha mhii u ngeren ne la.) (b) Se lu timen sha nyi ken ngeren nee?

SE MBA ken ashighe a ican kpishi. Ishima vihi Satan Diabolo ker tsung, nahan “ngu zenden er begha u tan kume nahan, keren or u una ya yô.” (1 Pet. 5:8; Mpa. 12:17) Sha nahan yô, se mba civir Yehova je kpa, ashighe agen ishima ka i nyian se. Mbacian Aôndo mba sha ayange a tsuaa la, er Tor Davidi nahan, ashighe agen yange ‘ishima i nyian’ un. (Ps. 13:2) Shi umbur wer, apostoli Paulu lu a ‘ishima i nyian sha kwagh u atôônanongo.’ (2 Kor. 11:28) Kpa shighe u ishima i nyian se yô, se fatyô u eren nyi?

2 Ter wase u sha, u lun a dooshima la, yange wase mbacivir un mba sha ayange a tsuaa la, shi nyian kpa, a er akaa a a wase se u panden ishimanyian yô. Bibilo wa se kwagh ér: “Gema nen ishima i nyian yen la cii, haa nen sha a Na, gadia ka Un A lu koson ne ye.” (1 Pet. 5:7) Kpa se fatyô u eren kwagh ne nena? De se nenge igbenda inyiin i se fatyô u eren kwagh ne yô. Ka igbenda shon je ne: (1) Eren msen. (2) Ôron mkaanem ma Aôndo shi gbidyen kwar sha mi. (3) Sôn Yehova a na u icighan jijingi na. (4) Pase or u u ne nan jighjigh la, er ishima i lu u ker yô. Er se lu timen sha  igbenda inyiin ne, nenge aluer ka u u seer eren kwagh sha ma gbenda yô.

“HAA AKAA A ZAN WE IYOL CII SHA TER”

3. U fatyô u “haa akaa a zan we iyol cii sha [Yehova]” ken msen nena?

3 Gbenda u hiihii u se fatyô u haan ishimanyian yase sha Yehova yô, ka u eren msen hen a na a ishima i môm. Aluer u tagher a zayol u a ne u lu memen ga shi ishima i ze u iyol gayô ishima i lu nyian we yô, pase Teru u sha, u lun a dooshima la er ishima i lu u ker yô. Orpasalmi Davidi yange zamber a Yehova ér: “Ver ato sha msen wam, Aôndo.” Ken pasalmi shon môm tsô, Davidi shi kaa ér: “Haa akaa a zan we iyol cii sha [Yehova], tsô Una taver we.” (Ps. 55:1, 22) Aluer u er hanma kwagh u u fetyô la cii sha u sôron ma zayol kpa u kanshio yô, hemba doon u u er msen hen Yehova a ishima i môm, a u den wer ishima i nyian we sha zayol shon yô. Kpa msen una wase u u palegh ishimanyian i za karen ikyaa inya la nena?—Ps. 94:18, 19.

4. Gba hange hange u se er msen shighe u ishima i nyian se la, sha ci u nyi?

4 Ôr Mbafilipi 4:6, 7. Yehova una ver ato sha msen u se er a ishima i môm man a uwegh gban shio la. Nena yô? Una er kwagh ne sha u nan se bemshima, nahan ishima ia kera za se iyol ga. Mbakpishiv Yehova wase ve sha imba gbenda ne, nahan vea fatyô u lumun a kwagh ne. Er ishima ma i lu zan ve iyol sha akaa a ve tagher a mi la yô, Aôndo gema wase ve ve zua a bemshima kpishi, u a hembe hanma mfe u orumace jimin cii yô. We kpa kwagh wou una fatyô u lun nahan. Sha nahan yô, “bem u Aôndo” una fatyô u wasen we u hemban hanma zayol u u tagher a mi jimin cii. U fatyô u suur sha ityendezwa i Yehova a er ne, ér: “De enger kenger sha mcie ga, gadia Mo M ngu Aôndo wou, M taver we, shi M wasen we.”—Yes. 41:10.

SE FATYÔ U ZUAN A BEMSHIMA KEN MKAANEM MA AÔNDO

5. Mkaanem ma Aôndo maa na se bemshima nena?

5 Gbenda u sha uhar u se fatyô u zuan a bemshima yô, ka u ôron Bibilo shi gbidyen kwar sha mi. Kwagh ne ngu hange hange sha ci u nyi? Bibilo ngi a akaawan a injaa a ken jijingi a a wase u u palegh shin panden gayô nôngon a ishimanyian yô. Nahan de nengen iwasen i i lu ken Mkaanem ma Aôndo la ashe ashe ga, sha ci u ma a kwaghfan u a dugh hen Orgbanakaa la. Er u lu gbidyen kwar sha mbaawashima mba Aôndo, tugh shin atetan shi u lu nengen gbenda u u hembe doon u u er tom a akaawan a injaa a ken Bibilo la yô, u zua a ishimataver tsung je. Yehova tôô kwagh u ôron Mkaanem nam la zua sha u ‘lun taveraa, taver ishima’ la, ka sha u ‘cian kwagh shi lun a mciem iyol ga.’—Yos. 1:7-9.

6. Mkaanem ma Yesu ma a fatyô u benden a we sha gbenda u injaa nena?

6 Akaaôron a Yesu a kundun iyol la, nga ken Mkaanem ma Aôndo. Mkaanem ma Yesu man atesen a na, yange lu akaa a naan mba ve ungwan a na mbara mpeveryol yô. Ior kpishi vaan hen a na sha ci u yange a na mba asema a ze ve iyol la mmem ken asema, shi a taver mba ve ver la cii asema shi a sur mba ishima i nyian ve la ishima. (Ôr Mateu 11:28-30.) Yange tesen ikyo i wan sha mbamgbe mba mbagenev mba ken jijingi man mba ken ishima kua mba sha iyol kpaa. (Mar. 6:30-32) Er Yesu er ityendezwa u suen mbaapostoli mba ve zenden vea na la yô, kape se nyian kpa una sue se je la. Gba u u lu vea Yesu kpôô kpôô ve una sue u ga. Er Yesu a lu Tor u sha yô, una za hemen u tesen se dooshima. Sha nahan yô, shighe u ishima i lu nyian we yô, una fatyô u ‘wasen we’ man a lu “sha shighe vough.” Sha mimi yô, Yesu una fatyô u wasen we u nôngon a ishimanyian shi una fatyô u ivin ishima you a  ishimaverenkeghen man ishimataver kpaa.—Heb. 2:17, 18; 4:16.

JIJINGI U AÔNDO UNA WASE U U LUN A AEREN A AÔNDO A LUMUN A MI YÔ

7. Icighan jijingi u Aôndo ka a wase se nena?

7 Yesu yange er ityendezwa ér mba ve sen Ter wase u sha la, icighan jijingi na cii una na ve keng a bunde ga. (Luka 11:10-13) Kwagh ne wase u u fan kwagh u sha utar u vesen u una wase u u been a ishimanyian yô, ka ityamegh ki jijingi je la. Aeren a dedoo a Icighan jijingi u Aôndo ka a mgbegha se u lun a mi la, ka aeren a Aôndo kpa a lu a mi je la. (Ôr Mbagalatia 5:22, 23; Kol. 3:10) Aluer u ngu a ityamegh ki jijingi kira yô, mlu wou vea mbagenev una seer doon. Man u nenge er akaa kpishi a ma a fetyô u van a zayol la, a kera lu ga yô. De se hen er ityamegh ki jijingi kira ki a wase se sha igbenda igen jighilii yô.

8-12. Ityamegh ki icighan jijingi u Aôndo la ki a wase u u nôngon shin palegh akaa a a va u a ishimanyian la nena?

8 “Dooshima man msaanyol man bem.” Aluer u ngu nan ior icivir yô, alaghga u nenge er u hemba fan u nôngon a mbamhen ou mba kpeegh mbara yô. Kwagh a lu nahan nena? Er u lu tesen ior dooshima shi nan ve icivir la, u palegh akaa a a fatyô u van a ishimanyian la.—Rom. 12:10.

9 “Ishima i wan man sar sar man mlu u dedoo.” Aluer u dondo kwaghwan ne yô, u fatyô u van a bem hen atô wou a mbagenev, ér: “Lu nen sar sar ayol a en, zungwen nen mhôônom, de nen ayol a en kwaghbo.” (Ef. 4:32) Aluer u er nahan yô, u yange akaa a a va hingir u van we a ishimanyian la. Shi u hemba fan u nôngon a zayol u uumace mba ve yen ne ka ve va a mi la kpaa.

10 “Jighjigh.” Nyian ne, akaa a a hembe nan se ishimanyian yô, ka zayol u inyar man uyôughyôughmbaakaav. (Anz. 18:11) Nahan kpa, aluer u na Yehova jighjigh taveraa wer una fatyô u koson we yô, kwagh la una wase u u nôngon a ishimanyian shin u palegh imba ishimanyian la kuaa je kpaa. Kwagh a lu nahan nena? U fatyô u palegh ishimanyian sha u ungwan kwaghwan u jijingi yange mgbegha apostoli Paulu nger ér: “Kwagh u ne lu a mi yô, a̱ kuma ne” la. Paulu shi kaa ér: “[Aôndo] kaa ér: Mayange Me undu u ga, Me kende u kpaa ga.” Nahan yô, se fatyô u kaan a vangertiôr ser: “[Yehova] ka Orwasen mo, me kera cia ga, ka nyi je or á ereme?”—Heb. 13:5, 6.

11 “Ishima i legh legh man u kôron iyol tsaha.” Hen ase er aluer u ngu a aeren ne ve a wase u yô. Aeren ne a wase u u palegh u eren akaa a van we a ishimanyian la, shi u palegh “ishima i yuan man ishima i nyoon man iyugh man u zôhôn genger genger man ityuhwanev” kpaa.—Ef. 4:31.

12 Sha mimi yô, a gba u u hide a iyol jime ve u fatyô u suur sha “uwegh ku Aôndo ku ageegh” kura shi u gema ‘ishima i nyian you la cii, u haa sha a Na’ ye. (1 Pet. 5:6, 7) Aluer u ngu or u hiden a iyol ijime yô, Aôndo una lumun we shi una sue u. (Mika 6:8) Sha nahan yô, aluer u fa kwagh u u fatyô u eren man u u fatyô u eren ga yô, u suur sha Aôndo, nahan ishima ia kera nyian we a za kar ikyaa inya ga.

‘ASEMA A̱ DE NYIAN NE GA’

13. Inja i kwagh u Yesu kaa ér: ‘Asema a̱ de nyian ne ga’ la ér nyi?

13 Ken Mateu 6:34 (ôr) la, Yesu wa se kwagh u una wase se kpishi yô, ér: ‘Asema a̱ de nyian ne ga.’ Nahan kpa alaghga a lu inja er taver u dondon kwaghwan shon nahan. Inja i kwagh u Yesu kaa ér: ‘Asema a̱ de nyian ne ga’ la ér nyi? Jighilii yô, Yesu lu kaan ér, mayange je ishima ia nyian or u nan civir Aôndo, sha shighe ugen ga ze. Se vande teren kwagh u Davidi man Paulu ôr sha ikyaa ne yô. Kpa Yesu lu wasen mbahenen nav u  fan ér ishimanyian i karen ikyaa inya la, i kur ma zayol ga yô. Hanma iyange yô, ngi a mbamtaver mba i. Sha nahan yô, gba u ishima i a nyian Mbakristu kpishi sha akaa a ken ijime man a ken hemen la ga. Kwaghwan u Yesu la una wase u u panden ishimanyian i za karen ikyaa inya la nena?

14. U nôngo a ishimanyian i sha akaa a ken ijime a u er sha mi ga la nena?

14 Ashighe agen ishima ka i nyian or sha akaa a nan er ken ijime sha mi ga la. Alaghga nana lu yan ican ken ishima sha akaa a yange nan er anyom a kar kpishi ken ijime yô. Ashighe agen yange i lu Tor Davidi er ‘aferakaa na cir un, yisa’ nahan. A kaa sha mimi nahan ér: “M toghor sha ci u anzughul a ken ishima yam.” (Ps. 38:3, 4, 8, 18) Ka nyi nahan lu u Davidi una er ken mlu na la ve a lu sha kwaghfana? Yange er nyi? Yange suur sha Yehova ér a zungwen un mhôônom shi a de un a isholibo na. Yange ôr a vangertiôr ér: “Saan or u i de nan kwaghbo u nan la iyol.”—Ôr Pasalmi 32:1-3, 5.

15. (a) Doo u ishima ia nyian we sha mbamzeyol mba u lu tagher a mi ave a ve la ga sha ci u nyi? (b) Ka akaa a nyi nahan u fatyô u eren sha er u pande ishimanyiana? (Nenge ngeren u kiriki u a lu a itinekwagh ér “Igbenda i Injaa Igen I Panden Ishimanyian” la.)

15 Sha ashighe agen yô, alaghga mbamzeyol mba u lu tagher a mi ave a ve la, vea na u ishimanyian. Ikyav i tesen yô, shighe u Davidi nger Pasalmi 55 la, lu yevese sha er una war a uma na yô. (Ps. 55:2-5) Nahan kpa yange de ér ishimanyian na la, i yange un u suur sha Yehova ga. Davidi yange sôn Yehova ken msen ér a wase un u nôngon a zayol na la, kpa shi fa er gba hange hange u una er kwagh sha zayol u lu nan un ishimanyian la yô. (2 Sam. 15:30-34) Ikyav i Davidi la i a fatyô u wasen se. Nahan yô, er kwagh u u fetyô la cii sha u nôngon a zayol wou la shi suur sha Yehova, a u den wer ishima i nyian we je i za kar ikyaa inya la.

16. Iti i a Aôndo la ia taver jighjigh wou u nan nena?

16 Ashighe agen alaghga ishima ka i nyian Orkristu sha ci u mbamzeyol mba nana va tagher a mi ken hemen la. Nahan kpa, doo u u de wer ishima i nyian we sha kwagh u u fe kwagh sha mi shio la ga. Sha ci u nyi? Sha ci u ashighe kpishi akaa ka a va lu er alaghga se lu cian ser aa va lu la ga. Kwagh u seer yô, ma kwagh môm u una hemba Aôndo u se haa ishimanyian yase sha a na la kpa ngu ga. Inja i iti na kpôô kpôô la ér: “Gem Ne Kwagh Lu.” (Eks. 3:14, NW) Inja i iti la, na se vangertiôr ér Aôndo una fatyô u eren hanma kwagh u a we ishima la cii sha ci u mbacivir un mbara. U fatyô u lun a vangertiôr wer Aôndo una haa mbacivir un sha mimi cii iveren shi una wase ve vea nôngo a ishimanyian ve i ken ijime man i hegen kua i ken hemen la kpaa cii.

LAM A OR U U NE NAN JIGHJIGH YÔ

17, 18. Aluer u pase or er ishima i lu u ker la sha mimi yô, kwagh la una wase u u nôngon a ishimanyian nena?

17 Gbenda u sha u unyiin u ua wase u u nôngon  a ishimanyian yô, ka u pasen or u u ne nan jighjigh yô, er i lu u ken ishima la. Alaghga or u u vese nan shin ijende you i kôôsôô shin ortamen u ken tiônnongo nana fatyô u wasen we u nôngon a ishimanyian you la sha gbenda u vough. Bibilo kaa ér: “Ishima i nyian ka i na or nan ure, kpa kwaghôron u saan saan ka a na nan iember.” (Anz. 12:25) Aluer u pase nan er i lu ken ishima la sha mimi yô, nana wase u u kav kwagh u a lu zan we iyol la kua gbenda u u nôngo a mi la kpaa. Bibilo shi kaa a vese ér: “Mbaawashima ka ve bunde henpe idyu i teman i lu ga yô, kpa sha iwasen i mbawasenmhen imôngo la, ka ve lu taveraa.”—Anz. 15:22.

18 Mbamkombo mba tiônnongo kpa ka ve wase se u panden ishimanyian. Ka wea za mbamkombo mban yô, u lu vea mba u civir Yehova a ve imôngo, mba kwagh wou a gbe ve ishima shi ve soo u taver hanma or ishima la. (Heb. 10:24, 25) Gbenda u ‘taver ayol ase asema’ ne ua wase u u hiden taver ken jijingi nahan a kera lu u ican ga u nôngon a ishimanyian.—Rom. 1:12.

IKYARYAN YOU VEA AÔNDO IA TAVER WE ISHIMA TSUNG

19. U fatyô u lun a vangertiôr wer ikyaryan you vea Aôndo ia taver we ishima sha ci u nyi?

19 Nenge ase er ortamen u ken tiônnongo ugen u ken tar u Kanada yange hen er i lu a inja u haan ishimanyian na sha Yehova yô. Yange tesen tica, man tom ne u na yô, i lu un ken ishima hang kpishi shi lu nôngon a angev mbu mbu naan un ishimanyian yô. Anmgbian ne yange nôngo a zayol ne nena? A kaa ér: “Kwagh u hemba wasen mo yô, yange m nôngo kpoghuloo m taver ikyaryan yam vea Yehova, nahan Yehova taver mo ishima m nôngo a ishimanyian yam la. Iwasen i azende a mimi man anmgbianev mba ken tiônnongo la, ka i taver we ishima shighe u ishima i lu nyian we yô. Ka m ôr kwase wam er i lum ken ishima la sha mimi. Mbatamen mbagenev kua ortamen u sôron atôônanongo yange ve wasem kpishi u nengen sha zayol wam ne sha gbenda u vough. Shi yange m za iyouci shi m eren tom a shighe wam sha inja shi m sôr shighe m ver u memen kua u eren anumbe kpaa cii. Kure kure tsô, m hii u hiden sha mar wam. Ka mea va tagher a akaa a a gandem yô, m gema a m wa sha ikyev i Yehova.”

20. (a) Se haa ishimanyian yase sha Aôndo nena? (b) Ka nyi se lu timen sha mi ken ngeren u a dondo laa?

20 Ngeren ne wase se u fan er se fatyô u haan ishimanyian yase sha Aôndo, sha u eren msen sha mimi hen a na shi ôron Mkaanem nam, shi gbidyen kwar sha mi yô. Shi se nenge er i doo u se sôn Aôndo icighan jijingi na shi se lam a or u se ne nan jighjigh la sha zayol wase shi se zaan mbamkombo yô. Se va hen ken ngeren u a dondo la er Yehova a ne se ishimaverenkeghen i va zuan a injar, nahan se nenge er kwagh ne a seer taver se ishima yô.—Heb. 11:6.