Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Mbampin mba Mbaôron Takerada Ne Ve Pin La

Mbampin mba Mbaôron Takerada Ne Ve Pin La

Pasalmi 144:​12-15 ôr ka kwagh u ior mba Aôndo shinii ka kwagh u atôatyev a wan afer a i ôr kwagh u a ken ivur i sha 11 laa?

Gbenda u yange i nger avur ne ken zwa Heberu la yô, tese ér a fatyô u kaven a sha igbenda i ihiar la cii.

  1. Er se ôr nahan kpa, atôakaa a se ter shin heen ne wase se u kaven kwagh u avur ne a er jighilii yô:

  2. Nenge ase kwagh u Pasalmi 144 la a lu ôron yô. Se kav nahan ser ivur i sha 12 zan zan 14 la ngi ôron kwagh u averen a mbaperapera vea zua mi yô. Ka ve mba ve sôn ér i ‘yima shi i dugh’ ve sha ikyev i aferaior kera la (ivur 11). Ivur i sha 15 ape i ter ishember i, “saan” i kuma kwa har la kpa ngi ôron ka kwagh u mbaperapera mban di tsô. Ka ve mba “[Yehova] A lu Aôndo ve la.”

  3. Mkav u i zough a mi heen ne zua sha kwagh u avur a Bibilo agen kpa a er sha kwagh u ityendezwa i Aôndo a ior nav yô. Pasalmi ne ôr kwagh i ishimaverenkeghen i Davidi, u yange nger un la lu a mi yô. Davidi lu veren ishima ér, shighe u Aôndo una yima Mbaiserael sha ikyev i mbaihyomov vev la, Una ver ior nav doo doo, a saan ve iyol shi a kpe ve iyol kpaa. (Lev. 26:​9, 10; Dut. 7:13; Ps. 128:​1-6) Ikyav i tesen yô, Duteronomi 28:4 kaa ér: “Iveren ia lu sha tsombor wou man iyiagh ki hen inya you, man ônov mba uzendenya ou, man ibua you i maren kua iyôngo you i maren kpaa.” Jighilii yô, shighe u Solomon, wan u Davidi lu tor la, yange bem gba ken ikyurior la shi kpe ior iyol kpaa. Heela tseegh ga, mkpeyol u hemen u Solomon la lu tesen kwagh u una va za hemen ken hementor u Mesiya yô.​—⁠1 Utor 4:​20, 21; Ps. 72:​1-20.

U masen yô, gbenda u se kav Pasalmi 144 nahan la, wase se u nengen er takerada u Pasalmi la cii u seer pasen kwagh u ishimaverenkeghen i mbacivir Yehova ve lu veren ashe a mi zan zan hegen yô. Mba a ishimaveren ér Yehova una va tim aferaior, nahan mbaperapera vea tema bem bem shi a kpe ve iyol kpaa gbem sha won.​—⁠Ps. 37:​10, 11.