Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Iyoukura (I Henen)  |  Agusutu 2016

Mbampin mba Mbaôron Takerada Ne Ve Pin La

Mbampin mba Mbaôron Takerada Ne Ve Pin La

Ave a ôôn yange lu mbaihyomov mba Yesu kwagh u vesen sha ci u nyi?

Kwagh ne yange lu môm ken akaa kpishi a na ve mbaihyomov mba Yesu lu a zayol a na man mbahenen nav yô. Tindi u Mose la yange lu a atindi agen sha kwagh u wanger iyol, er shighe u kwagh a dugh or shi kwase ken iyol shin nan gbe imande gayô nan bende a orkpen shin aninyam u kpen nahan. Shi Tindi ne tese akaa a a er sha u wanger hôngor kera yô. Yange i er kwagh ne sha u nan naagh shin ôôn or shin ma kwagh u a hôngor yô, gayô mishen or mngerem iyol.—Lev., ityou. 11-15; Num., ityou. 19.

Yange Mbayuda mba ve lu mbatesen la ve seer atindi agen sha atindi ne. Takerada ugen kaa ér, yange a gba u a wanger or yô, mbatesen mban ve “pine nan mbampin kpishi er i hii ve nan hingir u lun wang ga la, shi gbenda u hôngor u nan la ua fatyô u tsaren mbagenev man aluer ka u ua fatyô u tsaren ior kpishi yô. Shi ve ter ikyav man akaa a kwagh u hôngorough shon una fatyô u nan mbi lun wang shin lun wang ga la kpaa. Maa ve mase kuren sha u pasen akaa a i gbe u nana er ve a wanger nan la, man gbenda u a wanger nan la kpaa.”

Yange mbaihyomov mba Yesu pine un ér: “Ka nyi mbahenen Ou ve kor atindi a mbayiase ga, ve ye kwaghyan ave ili?” (Mar. 7:5) Mbaihyomov mbara lu ôron ér or a ôô ave ga nana ya kwagh yô, kwagh a nyoon nan ga. Kpa mbatesen mban lu kaan ér saa a haa or mngerem sha ave cii ve nana ya kwagh ye, er ve eren nahan. Takerada la shi kaa ér: “Yange shi ve gba anyiman sha kwagh u mkam ma haan or mngerem sha ave a mi man mngerem ma ma hembe doon la, man or u nana haa mngerem ma shon la, kua er a haa mngerem mara sha ave a za kighir la kpaa.”

Yesu yange na mlumun sha kwagh u atindi a uumace seer ne sha gbenda u taver u kaven ga. A kaa a mbahemenev mba kwaghaôndo u Mbayuda mbara ér: “Kwagh u Yesaia a tsengaôron sha a ven yô, ka vough je, ne mbaimangerev, i nger nahan ér: Nongoior ne ngu civir Mo sha ityumbuzwaa tseegh, kpa ishima ve yô, ngi ica a Mo je; nahan ka gbilin tsô, ve gur ve civir Mo ye, sha ci u ityesen i ve tesen la, ka atindi a ior tsô. Gadia ne mba gbihin tindi u Aôndo, geman kuran aeren a ior.”—Mar. 7:6-8.