TOM u civirigh u mbatamen ve lu a mi ken nongo u Yehova tar sha won cii la doo ve kpishi. Kwagh ne ka iveren hen a vese cii! Nahan kpa, semberee ne i hide i sôr akaa sha tom ve la. Yange i kaa a mbatamen mba ve bee iyol la ér ve gema ityom ve i vesen igen ve na mbatamen mba ve lu agumaior la. Lu u a er kwagh ne nena?

Yange gba u mbatamen mba sôron atôônanongo kua mba ve tesen ken imakeranta i nongo u Yehova mba ve nyer anyom 70 cii yô, vea mem ityom la. Shi gba u mbatamen mba ve nyer anyom 80 cii vea gema ityom igen vea na mbatamen mba ve lu agumaior yô; er tom u wasen Kômatii u Nengen sha Branci, shin lun ortamen u wasen mzough u mbatamen tom hen tiônnongo nahan. Nahan mbatamen mbabeenyol mba doon se ishima mban er nena sha kwagh nee? Ve tese ér Yehova man nongo na doo ve ishima sha mimi!

Ortamen ugen u er tom u wasen Kômatii u Nengen sha Branci kuma anyom 49 yô, iti na ér Ken. A kaa ér: “Yange m lumun a mi ishima imôm. Jighilii yô, hen pepe u m ungwa kwagh ne la, m vande eren msen sônon Yehova mer una lumun yô, ma a ne ortamen u nan lu gumor, ma nan er tom u wasen Kômatii u Nengen sha Branci ne.” Kwagh u Anmgbian Ken er ne zua sha kwagh u anmgbianev mba jighjigh tar sha won cii kpa er yô. Ka mimi, er doo ve kpishi  u eren tom sha ci u anmgbianev vev yô, sha hiihii la mgem ne wa vihin ve.

Ortamen ugen u yange eren tom u wasen mzough u mbatamen tom ken tiônnongo na yô, iti ne ér Esperandio, a kaa ér: “Yange wa vihin mo kpuaa.” Nahan kpa shi a kaa ér: “Yange gba u me seer lun a shighe sha er me nenge sha kwaghnyoon wam tsembelee yô.” Esperandio za hemen u civir Yehova sha mimi, shi ngu tiônnongo na a iwasen kpen kpen.

Hide mbatamen mba ningir sha mba i hide i ne ve ityom igen la di ye? Ortamen ugen u a er tom u ningir sha anyom 38 yô, iti na ér Allan. A kaa ér: “Shighe u m ungwa kwagh ne yô huan mo iyol.” Nahan cii kpa, a nenge er i lu a inja kpishi u tsaase agumaior sha ci u tom yô, shi ngu civir Yehova her sha mimi kpaa.

Ortamen ugen u yange er tom u ningir sha shi tesen ken imakeranta i nongo u Yehova kuma anyom 40 yô, iti na ér Russell. A kaa ér: “Iantom la yange i doo se kpishi shi se hen ser se mba a agee a eren tom ne her.” Hegen ne, Russell vea kwase na mba eren tom a akaa a yange i tese ve la kua mfe ve sha u wasen tiônnongo ve, nahan ka i doo mbapasenkwagh mba ken tiônnongo la kpen kpen.

Aluer ka u ken ishima er ior mba i ter kwagh ve sha heen ne ga kpa, kwagh u i ôr ken 2 Samuel la una fatyô u wasen we u kaven er hii ve lu ve nahan yô.

Hide umbur ase shighe u Abesalom, wan u Tor Davidi, soo u ngohol tor hen ter na sha igyosogh la. Davidi yange yevese due ken Yerusalem yem ken Mahanaim, vegher u Ifi u Yordan la. Hen shighe ne, kwagh gba Davidi kua mba ve lu a na la a akaa a vea nôngon a uma yô. U umbur kwagh u za hemen kpa?

Yange iorov mbagen utar hen ijiir la va ve a ugambe man akaayan atô kposo kposo kua ikyav mbi yôron. Môm ken ve yô, lu Barshilai. (2 Sam. 17:27-29) Mba va been a zayol u Abesalom la yô, gba u Davidi una hide ken Yerusalem, nahan Barshilai ver un gbenda zan zan va ar hen Yordan. Tsô Davidi kaa ér Barshilai a va vea na ken Yerusalem. Tor soo ér una za naan Barshilai kwaghyan, shin er Barshilai lu “shagbaor” shi lu u kwagh a gba un a kwaghyan u Davidi soo u za nan un la ga nahan kpaa. (2 Sam. 19:31-33) Kpa ikyav tese ér alaghga tsô Davidi soo ér ma a va lu a na ken Yerusalem sha er Barshilai a waan un kwagh yô; gadia lu or u tsan sha won shi lun a mfe. U za lun hen ya u tor shi eren tom her la yange ma lu ian i civirigh kpen kpen!

Nahan kpa er Barshilai lu or u hiden a iyol ijime shi lun a mnenge u vough yô, a kaa ér un ngu anyom 80. Shi a kaa ér: “Me fatyô u fan mkposo u kwagh u a doo shin u a vihi kpa?” Yange ôr nahan ver ishigh er nyi? Er Barshilai tsa sha won kpishi yô, ka keng yange una lu a kwaghfan. Yange lu sha ian i una fatyô u wan or kwagh u injaa, vough er “mbatamen” mba ve va wa Tor Rehobiam kwagh la nahan. (1 Utor 12:6, 7; Ps. 92:12-14; Anz. 16:31) Sha nahan yô, kwagh u Barshilai ôr sha kwagh u fan mkposo  u kwagh u a doo man u a vihi la, alaghga lu ôron kwagh u akaa a iyolbeen i ne un kera fetyô u eren ga la. A pase wang ér, iyolbeen na yô, un kera fetyô u ungwan dedoo shin fan mnyohom ma kwaghyan man kwaghman ga. (Orpa. 12:4, 5) Nahan Barshilai iyol na kaa a Davidi ér a yem a Kimham u lu gumor, man a shi nan kpa lu wan na la ken Yerusalem.—2 Sam. 19:35-40.

Mgem u i ve a mi u mbabeenyol geman ityom ve nan agumaior u se ter sha mhii u ngeren ne la wa zuan sha kwagh u Barshilai la. Nahan kpa sha shighe wase ne yô, lu kwagh u or môm tseegh er lu sha shighe u Barshilai la nahan ga. Lu u a tôv sha ikyaa ne tsembelee nahan a fa kwagh u a hembe doon sha ci u mbatamen sha tar cii yô.

Mbakristu mbabeenyol mba ve hiden a iyol ve ijime mban kpa nenge ér, aluer anmgbianev mba ve lu agumaior la kar mba eren ityom i ve mbabeenyol mban ve er anyom anyom la yô, nongo u Yehova ua lu her taveraa shi ua za hemen u vesen. Ashighe kpishi, ka i lu anmgbianev mba nomso mbabeenyol mban yange ve tsaase agumaior la ye; di vough er ikyav i tese ér lu Barshilai tsaase wan na shi apostoli Paulu kpa tsaase Timoteu nahan. (1 Kor. 4:17; Fil. 2:20-22) Anmgbianev mba ve lu agumaior mban tese wang hegen ér ve mba ior mba i ne ve lu “uiwua,” mba ve lu wasen “sha u maan iyol i Kristu” yô.—Ef. 4:8-12; nenge Numeri 11:16, 17, 29.

Ior kpishi ken nongo u Yehova sha tar mba ve gem ityom ve, ve ne agumaior la zua a ian i eren ityom i he gayô seer eren Yehova tom sha igbenda igen.

Ortamen ugen u yange er tom u zenden sha kuma anyom 19 yô, iti na ér Marco, a kaa ér: “Ian i m lu sha mi hegen ne na yô, ka m zua a shighe u lamen a noov mba kasev vev ve lu anmgbianev asev hen tiônnongo wase la.”

Ortamen ugen u er tom u ningir sha kuma anyom 28 yô, iti na ér Geraldo. A kaa ér: “Awashima wase hegen yô, ka u wasen mba ve de u zan mbamkombo la, shi henen Bibilo a ior kpishi.” A kaa ér hegen ne un vea kwase na mba henen Bibilo a iorov mba kuman 15, shi mbagen mba yange ve de mbamkombo mba zan yô, hide mba van.

Allan u se vande teren kwagh na la kaa ér: “Hegen ne, se zua a ian i pasen kwagh sha igbenda igen kpaa. Ka se due kwaghpasen u ken igbar shi se pase kwagh hen ajiir a eren kasua shi se lam a mba ve dondo ya a vese la; ve mbagen uhar je yô, ve va mkombo ken Iyou i Tartor je kpaa.”

Aluer u ngu anmgbian u civir Yehova sha mimi u i ne u tom u he ken nongo u Yehova yô, gbenda u injaa ugen kpa ngu u u fatyô u wasen yô. U fatyô u suen tom u Yehova sha u wasen agumaior a ken tiônnongo a mfe wou la. Russell u se vande teren kwagh na la kaa ér: “Yehova ngu tsaase agumaior a doon ishima a a lu a mfe yô, shi ngu eren tom a ve kpaa. Ka ve er tom a gbong gbong ve la u tesen shi kuran iyôngo i Yehova, man kwagh ne ngu wasen anmgbianev sha won cii!”—Nenge ngeren u kiriki u a lu a itinekwagh ér, “ Wase Agumaior A Fa u Eren Akaa A Ve Lu a Mkav sha Mi la Tsembelee” la.

Aluer semberee ne u ngu eren Yehova tom sha iantom igen kpa, lu a mnenge u vough. Fa wer tom u u vande eren sha gbashima la bende a ior kpishi, nahan za hemen u eren nahan. Yange u doo ior ishima, shi ior vea za hemen u soon we kpaa.

Kwagh u hemban cii je yô, u er kwagh u mayange Yehova una hungur a mi ga yô. Mayange je ‘tom wen ua hungur Un ga, shin dooshima u ne tese sha ci u iti Na kpaa ga er ne lu eren uicighanmbaiorov tom shi ne mba eren her kpaa.’ (Heb. 6:10) Ivur la taver se cii ishima nahan ér, ityendezwa la saa sha tom u yange se er ken ijime  la tsô ga. U doo Yehova ishima tsung, ka u mayange je una hungur a akaa a yange u er shi u lu eren her sha er u na i saan un iyol la ga!

Nahan kpa aluer ka we iyol you i musan we iantom ga ye? Aluer kwagh ngu nahan kpa, kwagh u i ôr ne una fatyô u benden a we. Sha nyi gbenda?

Aluer u ngu ikyua a anmgbian u beenyol u nan civir Yehova sha mimi u i va musan iantom i nan yô, u fatyô u zuan a mtsera kpishi ken a nan, sha ci u nan via ken jijingi shi nan zua a mfe kpishi ken anyom a nan lu civir Yehova la. Keren kwaghwan hen nan. U fatyô u pinen nan mnenge u nan sha ma kwagh. Nengen er nan lu eren tom a mfe u nan la sha u civir Yehova ape nan lu hegen la yô.

Aluer ka we u lu anmgbian u beenyol u i musan iantom you shin u ngu anmgbian u nomso shin u kwase u u fatyô u zuan a mfe hen anmgbian u beenyol kpa, umbur wer Yehova soo mba ve civir un sha mimi ica i gbe shi ve lu eren nahan her la, shi ve gba un kwagh kpaa.