Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Mbampin mba Mbaôron Takerada Ne Ve Pin La

Mbampin mba Mbaôron Takerada Ne Ve Pin La

Ka unô yange ve lu Mbawasenior mba Yesu ôr kwagh ve hen tugh mbu kpernan i wua un laa, man er nan i yilan ve sha ititor nee?

Hen tugh mbu kpernan i wua un la, Yesu wa mbaapostoli nav kwagh ér ve de keren iti duen shin nôngon ér i fa ve wuee ken mbananjighjigh ga. A kaa a ve ér: “Utor mba tar ne ka ve eren tahav sha ior vev, shi ior mba nengen uzegembaiorov mba ve tesen mhembe sha a ve la ér ka Mbawasenior. Kpa ne yô, de lu nen nahala ga.”—Luka 22:25, 26NW.

Mbawasenior mba Yesu ter ve heen ne lu unô? Ngeren mba sha ikpandeawen kua isham i sulee man ngeren mbagen tese ér, yange lu ieren i Mbagrika kua Mbaroma u nan ior mba tagher tagher shin ator ititor i Euergetes shin Orwasenior la. Yange i er ve icivir ne sha ci u ve er kwagh u a wase ior kpishi yô.

Yange ator kpishi lu a ititor i Orwasenior ne. Ve mbagen yô, lu Ptolemy III Euergetes (er 247-222 C.S.Y. nahan) man Ptolemy VIII Euergetes II (er 147-117 C.S.Y. nahan), ve lu ator a ken Igipiti. Shi mbahemenev mba ken Roma er Julius Caesar (48-44 C.S.Y.) man Augustus (31 C.S.Y.–14 S.Y.) nahan kpa lu a ititor ne; shi Herode u Tamen, u lu tor u Yudia la kpa lu a ititor ne. Herode yô, a shi nan kpa yange zua a ititor ne sha ci u yange yam alakema va na ior nav shighe u ijen gba yô, shi na mbaatsanev akondo.

Orgen u timen sha akaa a ken Bibilo u ken tar u Jamani, u i yer iti na ér Adolf Deissmann yô, kaa ér yange ior kpishi lu a ititor i Orwasenior la. A kaa wener: “Aluer u mough u keren ititor ne sha ikyav mbi sha ayange la yô, a tôô u shighe ga je maa u zua a akaa a yange i gber ititor ne sha mi yô, aa hemba deri môm.”

Nahan shighe u Yesu kaa a mbahenen nav ér “Kpa ne yô, de lu nen nahala ga” la, lu ôron ér nyi? Yange lu kaan ér kwagh a de gbe ve sha kwagh u ior gaa? Mayange ga cii. Kwagh u Yesu lu ôron yô, lu kwagh u yange a mgbegha ior u eren akaa a dedoo a mbagen la.

Sha ayange a Yesu la, uzegembaiorov ve keren iti i dedoo, nahan ve suen uiniongo man anumbe ken mbaagirigi, shi ve maa ajiir a memen kua utempel man ambaakaa la nahan. Yange ve eren kwagh ne sha u i wuese ve, shi vea due iti shi ior ve soo kwagh ve nahan ve haa ve ishangen yô. Ngeren ugen kaa ér: “Shin er ior mbagen yange ve er akaa a dedoo a awashima u injaa nahan kpa, ashighe kpishi ior ve er kwagh ne sha ci u mtsera ve u patii.” Ka isharen i keren mtsera wou iyol you la Yesu lu kaan a mbadondon un ér ve palegh ye.

Yange anyom nga karen yô, apostoli Paulu shi va ôr kwagh ne, pase er i hii ve i doo u or a lu a awashima u dedoo shighe u nan lu eren iyua yô. A nger mbananjighjigh a na imôngo mba ken Korinte ér: “Hanma or nana̱ na er nan we ken ishima i nan la nahan, i̱ de lu zunguluu ga, i̱ de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.”—2 Kor. 9:7.