U FA ma anmgbian u nomso shin u kwase u nan undu tar u nan, nan mough nan yem ken tar ugen, ape kwagh a hembe gban sha mbapasenkwagh u Tartor yôô? I lu nahan u pine iyol you wer, ‘ka nyi ka i mgbegha ve u za eren tom u pasen kwagh ken tar ugen vee? Ka ve wa agoyol u za eren tom ne nena? Me fatyô u za eren tom ne er ve nahan kpa?’ Gbenda u doon u se fatyô u zuan a mlumun sha mbampin mban yô, ka u lamen a anmgbianev mba nomso man mba kasev mban. Yô, de se lam nen ase a ve

KA NYI KA I MGBEGHA VE?

Ka nyi yange i mgbegha u ve u hii u henen sha kwagh u za pasen kwagh ken tar ugen, ape kwagh a hembe gban sha mbapasenkwagh laa? Anmgbian u kwase ugen ken tar u Amerika, u a hembe anyom 30 hegen yô, iti na ér Amy. A kaa ér: “Yange m hen sha kwagh u za pasen kwagh ken tar ugen la anyom kpishi, kpa lu inja er ka kwagh u me fatyô u eren ga nahan.” Lu nyi i na ve gema mnenge na nee? A kaa ér: “Ken inyom i 2004 la, anmgbian ugen vea kwase na, mba ve lu pasen kwagh ken tar u Belize yô, kaa ér mo m za ve inya, m za er pania vea ve uwer môm. Mo kpa m za, nahan doom kpishi! Inyom i môm i kar yô, m mough m yem ken Ghana, m lu za eren tom pania ker.”

Aaron vea Stephanie

Anyom a karen ken ijime kpuaa nahan, anmgbian u kwase u i yer un ér Stephanie, u a zurum anyom 30 hegen, shi un kpa, a lu ken tar u Amerika yô, hen sha mlu na zulee. A kaa ér: ‘Mo m ngu a gbong gbong iyol shi m ngu a or u hen tsombor wam u m lu nengen sha a nan kpaa ga. Jighilii yô, me fatyô u eren Yehova tom hemban er m lu eren hegen ne.’ Yange gbidi kwar sha kwagh ne a ishima na i môm yô, kwagh ne mgbegha un mough yem ken Ghana, za seer eren tom u pasen kwagh la. Anmgbian Filip vea kwase na Ida mba ve dugh ken tar u Denmark shi ve kav ishigh yô, mba eren tom pania. Hanma shighe yô, yange i sar ve u za pasen kwagh hen haregh u kwagh a hembe gban sha mbapasenkwagh yô. Yange ve ker igbenda kposo kposo i vea kure isharen ve ne yô. Filip kaa ér: “Yange se mba va zough a ian i kuren isharen yase ne yô, lu se inja er Yehova lu kaan a vese ér: ‘Gba zan nen tsô!’ nahan.” Ken inyom i 2008 la, ve mough ve  yem ken tar u Ghana ve za er tom u pasen kwagh la ker hemba anyom atar.

Brook vea Hans

Anmgbian Hans vea kwase na Brook, ve hemba anyom 30 hegen shi mba eren tom pania ken Amerika. Yange ijeverahumbe igen va ta sha tar u Amerika ken inyom i 2005 la been kera yô, ve za er tom u wasen ior mba aahe ne tser ve la. Shighe kar yô, ve nger apelekeshen ér i na ve ian i za maan kwagh sha ityar ityar, kpa i na ve ian ga. Hans kaa ér: “Yange se za ungwa kwaghôron ugen sha mkohol u vesen, u pase ér Tor Davidi yange fe ér i na un ian i maan tempel ga yô, a tsua u eren kwagh ugen kposo la. Kwagh la wase se se kav ser, aluer se wa ishima u eren ma kwagh ken nongo u Yehova, kpa va gba sha mi ga yô, sea tsua u eren ugen kpa, ka kwaghbo ga.” (1 Kron. 17:1-4, 11, 12; 22:5-11) Brook kpa kaa ér: “Yehova yange soo ér se ker kwagh ugen se er.”

Yange Hans man Brook mba ongo akaa a doon tsung a a er azende a ve a a yem ityar igen lu za pasen kwagh la yô, kwagh ne mgbegha ve ve mough ve yem ken tar ugen ve lu za eren pania ker. Ken inyom i 2012 la, ve mough ve yem ken Ghana, nahan ve fatyô u za eren tom u pasen kwagh la iwer inyiin, shi ve lu wasen tiônnongo ugen u eren mkombo ken iliam i sha ave kpaa. Er gba u vea hide vea yem ken tar u Amerika nahan kpa, tom u ve er ken Ghana la na yô, hemba saren ve u zan hemen u eren akaa a a wase ve vea ver kwagh u Tartor hiihii ken uma ve yô. Hii shighe la je, ve wase u maan afishi a branci u ken tar u Micronesia la.

AKAA A VE ER VE WASE VE U KUREN AWASHIMA VE YÔ

Yange ne wa agoyol u za eren tom ape kwagh a hembe gban sha mbapasenkwagh la nena? Stephanie * kaa ér: “Yange m tôv sha ngeren mba ken Iyoukura mba ve er kwagh u za eren tom ape kwagh a hembe gban sha mbapasenkwagh la. Shi m lam a mbatamen mba ken tiônnongo wam kua ortamen u sôron atôônanongo vea kwase na, er sarem u za pasen kwagh ken tar ugen yô. Kwagh u hemban cii yô, ashighe kpishi m pase Yehova isharen yam ne ken msen.” Er Stephanie lu eren akaa ne la, shi a pande akaa agen kpishi ken uma na, nahan kwagh ne wase un u koson inyaregh ki una za vihin shighe u una yem ken tar ugen yô.

 Hans kaa ér: “Yange se sôn Yehova ser a wase se, sha ci u se soo u zan ape una tese se la. Shi se ter werayange jighilii u se soo u eren kwagh u se wa ishima u eren la kpa ken msen wase.” Maa anmgbian ne vea kwase na ve nger ubranci unyiin washika. Yange branci u ken Ghana la lumun ér ve za yô, ve mough ve yem ker, kpa awashima ve lu u za tsan iwer ihiar tseegh. Hans kaa ér: “Yange doo se u eren tom u pasen kwagh vea tiônnongo la kpishi je yô, se seer ayange a se soo u tsan la.”

Adria vea George

Anmgbian George vea kwase na Adria, mba ken tar u Canada. Ve zurum anyom 40 hegen. Yange ve fa ér or ka nana tsua akaa a injaa shi nana er a yô, Yehova a ver nan, veren mbamhen mba injaa mba ken ishima tseegh tsô ga. Nahan ve er akaa jighilii a yange wase ve ve kure awashima ve yô. Yange ve zua a anmgbian u kwase ugen u lu eren tom u pasen kwagh ape kwagh a hembe gban sha mbapasenkwagh ken Ghana yô, maa ve pine un mbampin kpishi. Shi ve nger branci u tar u Canada man u tar u Ghana la washika ve pine kwagh u vea er yô. Adria kaa ér: “Yange se ker igbenda se pande akaa ken uma wase hemba er se vande panden la ica je.” Nahan akaa a ve tsua u eren la wase ve ve mough ve yem ken Ghana ken inyom i 2004 la.

ER VE NÔNGO A MBAMTAVER MBA VE TAGHER A MI LA YÔ

Yange u mough u yem ken tar ugen nahan, lu mbamtaver mba nyi u za tagher a mini, man u nôngo a ve nena? Mtaver u Amy u hiihii yô, sar un u za nengen a ior nav. A kaa ér: “Hanma kwagh yange kaha kposo a kwagh u m vande hoghol a mi la.” Lu nyi i wase unu? A kaa ér: “Er mba hen tsombor wam lu yilan mo sha telefon, pasen mo er m lu eren tom u injaa yô, kwagh ne wasem m za hemen u umbur ityôkyaa i yange na ve m mough m yem ken tar ugen yô. Shighe kar yô, mo vea tsombor wam se gema lamen sha kômputa, nengen a ishigh yasegh. Er se lu nengen a ishigh yasegh sha kômputa yô, lum er tsombor  wam kera ngu ica a mo ga nahan.” Amy kaa ér yange un kôr ijende a anmgbian u kwase ugen hen ityônya u fa kwagh u aeren a ityôô tsembelee yô. Anmgbian u kwase la wase un fa aeren a ityôô kposo kposo. Amy kaa ér: “Ior yange vea er ma kwagh, man mea kav inja na ga yô, m za hen ijende yam ne. Sha iwasen na yô, m hen kwagh u me er man u me palegh yô. Nahan kwagh ne wasem kpishi u eren tom wam u pasen kwagh la saan saan.”

George vea Adria ve kaa ér shighe u ve za nyôr ken Ghana ikyagh la, lu ve inja er ve hide mba eren akaa a mbayiase la nahan. Adria kaa ér: “Se lu ôôn akondo shin ubokoti, kera lu sha umashin ga. Yange se tôô shighe kpishi u yôron iwer i hemba er se vanden eren kera la. Kpa shighe kar yô, mbamtaver mban hingir se akaa a he a se tagher a mi ken uma wase tsô.” Brook di kaa ér: “Se upania ka sea tagher a mbamtaver nan nan kpa, se za hemen u zuan a mkom ken uma. Ka sea hen sha akaa a doon tsung a a er se la cii yô, se umbur akaa a injaa a yange se er la, nahan i saan se iyol.”

VE ZUA A MTSERA KEN TOM U PASEN KWAGH LA

U fatyô u kaan a mbagenev wer ve kpa ve er tom u Tartor ne sha ci u nyi? Stephanie kaa ér: “Ka wea pasen kwagh hen haregh u u zough a ior mba i sar ve tsung u henen kwagh u mimi, je yô ve soo ér we u henen Bibilo a ve hanma iyange yô, kwagh la a na u msaanyol kpishi. Tom u za pasen kwagh ape kwagh a hembe gban sha mbapasenkwagh la, ka môm ken akaa a hemban doon cii, a m tsough u eren ken uma yô!” Ken inyom i 2014 la, Stephanie vôso Aaron, nahan nyian mba eren tom shin afishi a branci a ken tar u Ghana la.

Anmgbian u kwase Christine, ka pania ken tar u Germany, a poso anyom 30 hegen. A kaa ér: “Tom pania doo je gande.” Christine yange er tom pania ken tar u Bolivia cii ve mase moughon yemen ken Ghana ye. Shi a kaa ér: “Er m lu ica a tsombor wam yô, ka m sônon Yehova hanma shighe mer a wasem. Nahan a hingir mo or kpôô kpôô, hemba ave a tse. Shi ka m nenge er ior mba Yehova ve lu ken mzough u kpilighyol yô. Tom ne na uma wam hemba doon cii.” Christine sember vôson Gideon, nahan ve za hemen u pasen kwagh imôngo ken Ghana.

Christine vea Gideon

Anmgbian Filip vea kwase na Ida ve pase se kwagh u yange ve er ve ve wase mba ve henen Bibilo a ve la ve vese ken mimi yô. Ve kaa ér: “Yange se hen Bibilo a iorov 15 shin i hemba nahan, kpa se va pande shi iorov 10 tseegh sha er se fatyô u tesen mba se henen Bibilo a ve ne tsembelee yô.” Mbahenen Bibilo mban yange ve zua a iwasen je he? Filip kaa ér: “Yange m hen kwagh a gumor ugen u i yilan un ér Michael yô. Yange a hen kwagh hanma iyange shi a wa iyol sha kwagh u se va hen la tsembelee je yô, se hen takerada u Bibilo Tese la cii se bee ken atô u uwer môm. Se mba been takerada la yô, Michael hingir orpasenkwagh u nan lu a er batisema ga yô. Iyange i hiihii i due kwaghpasen la, a pinem ér: ‘U fatyô u wasen mo u henen kwagh a mba m henen Bibilo a ve la je he?’ Nahan m gema m kenger un, kpiligh mo iyol. Michael pasem ér un hii Bibilo i henen a iorov utar, nahan un soo ér mo m wase un u henen kwagh a ve.” Nenge ase yô, kwagh gba sha mbatesen je yô, mba i lu henen Bibilo a ve la kpa, hingir mbatesen mbagenev Bibilo!

Ida vea Filip

Amy pase er yange ica gba ga je tsô maa un kav er tom lu kpishi u eren yô. A kaa ér: “Yange se za nyôr ken Ghana, ica lu a gba ga maa se za pase kwagh hen angar ugen, se lu keren mbaakondoato. Hen angar la tseegh kpa, se zua a mbaakondoato je kuma iorov anigheni!” Hen shighe ne, Amy vôso Eric, nahan mba eren tom u ikpur pania la imôngo hegen. Mba wasen tiônnongo ugen u a eren mkombo ken iliam i sha ave yô, sha er vea wase mbapasenkwagh mba kondon ato mba ve hembe 300 la, kua mba i sar ve u henen Bibilo ken Ghana la. George vea Adria yô, ve nenge ér tom u pasen kwagh u ve eren ken Ghana la, bugh ve ian i fan kwagh u or a er ve nana lu ormishen yô. Nahan yange saan ve iyol kpishi shighe u i lôhô ve ér ve za Makeranta u Gileadi, klase u sha 126 la! Nyian ne, mba eren tom u mishen ken tar u Mozambique.

DOOSHIMA MGBEGHA VE U ZA PASEN KWAGH

Ka kwagh u doon se tsung er ior kpishi ve mough ken ityar ve ve yem ken ityar igen, ve lu za eren tom u pasen kwagh kpoghuloo vea anmgbianev mba nomso man mba kasev mba hen ityônya, sha er vea kohol sunda yô. (Yoh. 4:35) Hanma kasua ken inyom yô, ka i er ior batisema ken Ghana i kuma iorov 120. Er iorov 17, mba ve mough ve yem ken Ghana ve za eren tom ape kwagh a hembe gban sha mbapasenkwagh la nahan, mbapasen ivangeli mbagenev udubu imôngo sha tar cii mba “nan naagh sha ayol a ve sha asema a dedoo” sha ci u Yehova doo ve ishima. Mba pasen kwagh sha ajiir a kwagh a hembe gban sha mbapasenkwagh u Tartor la. Mbapasenkwagh mba ve ne ayol a ve u eren tom u pasen kwagh la na yô, saan Yehova iyol je ka u henen hen ga!—Ps. 110:3; Anz. 27:11.

^ par. 9 Ikyav i tesen yô, nenge ngeren u a lu a itinekwagh ér, “U Fatyô u Za Eren Tom hen Ijiir i Kwagh a Hembe Gban sha Mbapasenkwagh u Tartor la Kpa?” man u a lu a itinekwagh ér, “Ú Fatyô u Peren Yande Masedonia Keen Kpa?” la.Iyoukura i Aipor 15 man i Disemba 15, 2009.