Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 NGEREN U TIMEN SHA MI 34

Er Yehova Tom Saan Saan sha Ian Igen

Er Yehova Tom Saan Saan sha Ian Igen

“Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga.”—HEB. 6:10.

ICAM 38 Una Taver We

KWAGH U I TIM SHA MI KEN NGEREN NE YÔ *

1-3. Ka akaa a nyi nahan nga a na i gba u alaghga mba ve eren tom u icivirigh ayange ayange la vea yem ape gene?

ANMGBIAN ugen u i yer iti na ér Robert yô, vea kwase na, Mary Jo, kaa ér: “Yange se er tom mishen anyom 21, shi anyom ne cii saan se iyol. Ica i gbe ga yô, mbamaren asev unyiin cii va beeyol, hingir kor kor nahan gba u a nengen sha a ve. Yange doo se u za nengen sha ve. Kpa er gba u se mough hen ijiir i i doo se ishima kpishi la yô, vihi se kpen kpen.”

2 Anmgbian ugen u i yer iti na ér William yô, vea kwase na Terrie di kaa ér: “Shighe u gba u se kera za hemen a tom wase ga sha ci u kwaghnyoon la, se vaa tsung. Isharen yase cii lu u za eren Yehova tom ken tar ugen, kpa kwagh ne na yô, gba u se kera fatyô ga.”

3 Anmgbian ugen iti na ér Aleksey. A kaa ér: “Yange se fa er mbaahendanev soo u cirin branci wase ape m lu eren tom la yô. Kpa shighe u kwagh ne va er nahan gba u se due shin Betel kera la, kpiligh se iyol je gande.”

4. Ka mbampin mba nyi se lu nengen sha mi ken ngeren nee?

4 Anmgbianev mba ve eren tom shin Betel udubu imôngo kua mbagen mba eren tom u icivirigh ayange ayange kpaa gba u vea za er Yehova tom sha aan agen, er anmgbianev mba se ter kwagh ve sha heen ne nahan. * Alaghga a lu anmgbianev mban ican kpishi u moughon undun tom u yange u doo ve ishima kpishi la yemen ape gen. Shighe u kwagh a er nahan yô, ka nyi ia wase ve u nôngon a mgem nee? We u fatyô u wasen ve nena? Mbamlumun  mba se zua a mi sha mbampin mban la vea wase se cii u fan kwagh u se er zum u akaa a gem ken uma wase yô.

ER U NÔNGO A UMA ZUM U AKAA A GEM YÔ

Er nan ve shighe u i gbe u anmgbianev mba ve eren tom u icivirigh ayange ayange vea kera za hemen a tom ve ga la, ka i lu kwagh u taver ve kpishi? (Nenge ikyumhiange i sha 5) *

5. Shighe u i gbe u se kera er tom ape yange se vanden eren la ga yô, ka nyi man nyi nahan alaghga se tagher a mi?

5 Aluer se mba eren tom ka hen ma haregh shin ka shin Betel kpa, ijiir i se lu la kua ior mba ve lu her la ka ve doo se ishima. Nahan ka a va gba u se mough hen ijiir la yô, i vihi se kpishi. Ka i vihi se u yemen undun anmgbianev mba se lu eren Yehova tom imôngo la kpishi, shi ka a gba u se mough hen ijiir la kera sha ci u ka tôvon se a ican her je yô, ishima i hemba zan se iyol sha kwagh ve cii. (Mat. 10:23; 2 Kor. 11:28, 29) Heela tseegh ga, ka a tindi se ér se za er tom ape gen shin a gba u se hide ken ya kpa, i za se iyol kpishi; sha ci u sea yem ape gen kpa a gba u se za hen a hen kwagh u aeren a ior mba hen ijiir la, shi sea hide ken ya kpa, se undu ya shighe lihe, nahan ka i lu ican. Robert vea kwase na, Mary Jo kaa ér: “Yange kwagh u hen ijiir yase hungur se zan zan je yô, u pasen kwagh ken zwa wase kpa hingir se ican. Lu se inja er se mba ior mba van a va nahan.” Mbagen yô, mbamgem mban ka ve na ve kera lu a kwagh ga. Ashighe agen ka ve fa kwagh u ve lu sha mi ga, shi i lu ve er mba a or ijime ga nahan, shi iyol i kpe ve. Ka nyi ia fatyô u wasen ve?

Gba hange hange u se kporom hen Yehova shi se suur sha a na (Nenge ikyumhiange i sha 6-7) *

6. Se er nan ve se lu kôôsôô a Yehova?

6 Lu a Yehova kôôsôô. (Yak. 4:8) Se er kwagh ne nena? Se er kwagh ne sha u suur sha na, gadia “ongo msen.” (Ps. 65:2) Pasalmi 62:8 kaa ér: “Pase nen asema a en sha ishigh Nagh.” Yehova una fatyô u eren kwagh je “á hemba kwagh u se sen shi se lu henen la ica je kpaa.” (Ef. 3:20) Ka kwagh u se sen la tseegh Yehova a ne se ga. Una fatyô u eren kwagh u se ver ishima ga kpaa. Una er kwagh a vese je a hemba kwagh u se hen la, sha u sôron mbamzeyol asev.

7. (a) Ka nyi ia wase se u lun kôôsôô a Yehova? (b) Er i pase ken Mbaheberu 6:10-12 nahan, aluer se za hemen u civir Yehova sha mimi yô, ka nyi ia due kere?

7 Ôron Bibilo ayange ayange shi gbidyen kwar sha kwagh u u ôr la, ka nahan ve u lu a Yehova kôôsôô her ye. Anmgbian ugen u ngise lu ormishen yô, kaa ér: “Eren mcivir u hen tsombor hanma shighe shi waan agoyol sha hanma mkombo vough er yange u eren ape u lu eren Yehova tom la nahan.” Shi za hemen u eren tom u pasen loho u dedoo la kpoghuloo hen tiônnongo wou u he la. Yehova hungur a mba ve ze hemen u civir un  sha mimi la ga, aluer mba fantyô u eren er ngise ve eren la ga je kpaa.—Ôr Mbaheberu 6:10-12.

8. Mkaanem ma ken 1 Yohane 2:15-17 mara ma a wase se, se palegh u keren uma u yôughyôugh nena?

8 De keren uma u yôughyôugh ga. Mayange de lumun wer akaa a nyian ishima a tar u Satan ne a “imbishi” tom u ú lu eren Yehova la ga. (Mat. 13:22) De lumun wer azende a ou shin anmgbianev mba hen tsombor ve mgbegha u, u yem zendan inyaregh ken tar u Satan sha er a kpe u iyol ga. (Ôr 1 Yohane 2:15-17.) Suur sha Yehova, gadia a tôndo zwa u nan we hanma kwagh u una wase u u civir un cii, kua mlu u kundu kundu shi una kure ugbayol ou kpaa “sha shighe vough.”—Heb. 4:16; 13:5, 6.

9. Kwaghwan u ken Anzaakaa 22:3, 7 la tese ér doo u se palegh u gban anzô dang dang sha ci u nyi, man ka nyi ia wase se u tsuan akaa sha kwaghfana?

9 Palegh anzô a gban dang dang. (Ôr Anzaakaa 22:3, 7.) Shighe u or mough nan yem hen ijiir igen yô, alaghga a gba u nana vihi inyaregh kpishi. Kwagh ne ngu a na or ngôôr nyôron ken injô ga. Nahan palegh u yamen akaa sha injô, hemban je yô, akaa a kwagh a gbe u a mi keng keng ga la. Shighe u i va hingir se hang er zum u se lu nengen sha or wase u nan lu uange nahan yô, alaghga a taver se u fan er se gba injô se za kighir la. Zum u kwagh a lu nahan yô, umbur wer aluer u er ‘msen shi u zamber’ yô, kwagh la una wase u u eren kwagh sha kwaghfan. Yehova una ungwa mbamsen ou mbara, nahan una na u bem u ‘una kura ishima you man mbamhen ou’ yô. Una na ishima ia gba u shimi, nahan u tsua kwagh u a hembe doon u u er yô.—Fil. 4:6, 7; 1 Pet. 5:7.

10. Se zua a azende a injaa nena?

10 Lu kôôsôô a azende a dedoo. U fatyô u pasen azende ou a injaa ne er i lu u ken ishima la, shi u fatyô u ôron ve akaa aa u lu tagher a mi la kpaa, hemban je yô, mba ve kpa yange ve zua a msaanyol ken tom u Yehova shi ve tagher a mbamtaver kpaa yô. Aluer u er nahan yô, ishima ia pever we. (Orpa. 4:9, 10) Ior mba yange u kôr azende a ve ape u lu vanden eren Yehova tom la mba azende a ou her. Nahan kpa, gba u u kôr azende a he ape u va lu hegen ne kpaa. Nahan fa wer gba u u luun a ior sar sar shi u eren kwagh a ve kundu kundu ve, we kpa vea ya ijende a we ye. U er kwagh ne nena? Ôron mbagenev akaa a doon a a er u ken mcivir u Yehova la sha er ve kpa vea kav er i saan we iyol ken tom u Yehova yô. Aluer mbagen ken tiônnongo kav er i hii ve kwagh u eren Yehova tom hanma shighe la ngu a maa u iyol ga je kpa, mbagen yô, ikyav you i dedoo la ia doo ve nahan vea ya ijende a we, shi vea lu u azende a injaa kpaa. Kpa, gema wa ikyo sha er u goom a kwaghôron la cii una har sha iyol you tseegh, shin akaa a u er ken nongo ne ga yô. Shi de zeren lamen sha akaa a vihin we ishima ker la ga.

11. U er nena ve a saan ne iyol ken ivese yene?

11 Aluer gba u u de tom u u lu eren ken nongo u Yehova la sha ci u orya shin kwase wou va gba  angev yô, de ne un ibo ga. Hide we iyol you di ye? Aluer angev va kôr u yô, de ne iyol you ibo, i luun we inja er u va nomou shin kwase wou ahenge ga. Umbur wer, ne mba “iyol i môm,” shi yange ne bum sha ishigh ki Yehova ér ne nenge sha ayol a en doo doo ken hanma mlu u ne nyer ker cii. (Mat. 19:5, 6) Aluer kwase wou va wa iyav aburabur, man gba u ne kera za hemen a tom wen ga yô, nôngo wan wen la a fa er un hembe gban ne kwagh a tom wen la yô. Nôngo nen a fa ér mimi je, ne nenge ér un ngu “injar” i Aôndo a ne ne yô. (Ps. 127:3-5) Shi ôr un nen akaa a dedoo a yange er ne, shighe u ne lu eren tom shon la. Aluer ne er nahan yô, kwagh la una mgbegha wan wen la u eren tom u Yehova u saan iyol ne, er ne nahan.

ER MBAGENEV VEA FATYÔ U WASEN YÔ

12. (a) Se wase mba ve lu eren tom u icivirigh ayange ayange la sha er vea za hemen u eren tom ve nena? (b) Ka nena se wase ve sha er a ngôôr hoghol ve shighe u ve hide ve va lu ken tiônnongo wase la ga?

12 Atôônanongo kpishi kua anmgbianev mba nomso man mba kasev mbagen ka ve er hanma kwagh u ve fetyô cii, u wasen mba ve lu eren tom u icivirigh ayange ayange la. Ieren ne kuma iwuese. Ka ve er kwagh ne sha u taver ve ishima shi nan ve inyaregh shin kwagh u kuren gbayol ve a mi, gayô wasen u nengen sha ior vev mba ve lu ken ya la. (Gal. 6:2) Aluer anmgbianev mba ve eren tom u icivirigh ayange ayange la hide mba hen tiônnongo wou yô, de nengen wer ve za kanshio u eren tom, shin ve za er kwaghbo ve i kaa er ve hide ga. * Kpa gema wase ve, sha er a ngôôr hoghol ve ga yô. Ngohol ve saan saan er ve va nyer la shi aluer angev na mba kera fantyô u eren akaa kpishi ga kpa, wuese ve sha tom u yange ve er la. Nôngo fa ve. Za ikyua a ve, zua a kwaghfan hen a ve.

13. Ka iwasen i nyi nahan se fatyô u nan mba i hide a ve, ve va lu hen tiônnongo wase laa?

 13 Sha hiihii la, a gba u a wase anmgbianev mba i hide a ve, ve va lu hen tiônnongo wase la sha er vea zua a ijiir i tsan kua er vea ningir a eren akaa la man tom kua akaa agen a hange hange a kwagh a gbe ve a mi la. Shi a gba u u pase ve gbenda u i eren akaa hen ijiir yen la, er kpandegh ku tan man u yamen akaa ken kasua nahan. Kpa kwagh u a hembe lun hange hange yô, ka u nôngon kaven mlu ve la jighilii. Alaghga vea lu nôngon a angev vev shin kwaghnyoon u or ve u hen tsombor. Shin alaghga ku er ve, mba zungwen. * Ashighe agen je yô, alaghga vea lu zungwen ken ishima er ve kera lu ken tom u icivirigh u yange ve eren vea anmgbianev mbagen ayange ayange la ga yô. Ka i gba u a wa ishima a ve tsung er kwagh ne ngu a na ashighe agen i lu ve dang kpishi yô.

14. Mbapasenkwagh mba hen tiônnongo ugen yange ve wase anmgbian u kwase ugen sha er a hoghol un a haregh u tiônnongo na u he la nena?

14 Kwagh ugen yô, aluer u ngu duen kwaghpasen vea ve, shi veren ikyav i dedoo i ia taver ve ishima yô, kwagh ne una wase ve u hoghol a ijiir ve i he ne. Anmgbian u kwase ugen u yange er tom ken tar ugen anyom ngee yô, kaa ér: “Shighe u m lu eren tom u Yehova ken tar ugen la, hanma sev yô, yange m hen Bibilo a ior kpishi. Nahan kpa, hegen ne ka i taver kpishi u ian i bugh i u fatyô u ôron or ivur Bibilo shin tesen nan vidio ken kwaghpasen yô. Kpa mbapasenkwagh mba hen tiônnongo wam u he ne ka ve za a mo se za sôr ior shi se hen kwagh a ve. Ka mea nenge er anmgbianev mba nomso man mba kasev mba tseen ishima mban ve lu henen Bibilo a ior shi ior mba shon ve lu vesen ken jijingi nahan ishima i taver mo. M hen u hiin iliam a ior hen haregh ne. Akaa ne cii na yô, hide saan mo iyol.”

ZA HEMEN U EREN KWAGH U U FETYÔ CII!

Ker igbenda i u seer pasen kwagh hen ape u hide u za lu la yô (Nenge ikyumhiange i sha 15-16) *

15. U fatyô u zan hemen u civir Yehova doo doo hen ijiir i he i u hidi u za lu la nena?

15 U fatyô u zan hemen u civir Yehova doo doo hen ijiir i u hide u za lu la. Mayange de nengen wer yange u er kwagh sha mi ga ve i gbe u u va lu ken tiônnongo ape u lu la ga. Shi de henen wer u kera ngu a iwasen ga ze. Ver ishima you sha igbenda kpishi i Yehova a lu wasen we hegen la,  shi za hemen u pasen kwagh. Dondon ikyav i Mbakristu mba jighjigh mba sha ayange a mbaapostoli la. Ape vea lu cii, yange vea “yem han han, [kpa] ve lu yôôn Loho u Dedoo.” (Aer. 8:1, 4) Aluer u za hemen u pasen kwagh yô, iniôngon you la ia saa gbilin ga, ia ume atam a dedoo. Ikyav i tesen yô, upania mbagen mba yange i zenda ve ken tar ugen yô, mough yem ken tar u u dondo a u ngula, ape kwagh gba sha mbapasenkwagh mba ken zwa u ve lamen la kpishi yô. Ken atô u iwer kpuaa tseegh, i ver iniongo i eren mkombo kpishi, shi iniongo ne lu vesen leva leva kpaa.

16. U er nan ve u zua a iember ape u lu eren Yehova tom hegen laa?

16 “Iember i ne ember TER la ka agee a en je.” (Neh. 8:10) Kwagh u vesen u i doo u una na se iember yô, gba u a lu ikyar i se ye a Yehova la, ka tom u se lu eren un la ga, aluer tom shon doo se ishima nan nan je kpaa. Sha nahan yô, za hemen u zenden vea Yehova shi suur sha a na wer a na u kwaghfan, shi a hemen we shi a suen we kpaa. Umbur wer tom u yange u lu eren Yehova la yange u doo u ishima sha ci u u na ishima you cii sha u wasen ior mba hen haregh la. Nahan yô, na ishima you cii sha tom u u lu eren Yehova hegen ne, nahan nenge er Yehova una wase u, u ngun kpa ua doo u ishima yô.—Orpa. 7:10.

17. Ka nyi i gbe u se umbur sha kwagh u tom u se lu a mi hegen nee?

17 Doo u se umbur ser gba u se za hemen u shiren Yehova zan zan gbem sha won, kpa nyityô tom i se lu eren un hegen ne cii ka hila tsô. Shighe u se va nyôr ken tar u he la, alaghga se cii a na se ityom igen. Aleksey u se ter kwagh na ken mhii u ngeren ne la ngu a vangertiôr nahan ér, akaa a un lu tagher a mi hegen ne, nga wan un agoyol sha ci u mbamgem mba ken hemen la. A kaa wener: “Kera je m fa mer Yehova ngu mimi shi tar u he la kpaa ngu jim jim, kpa yange akaa ne cii a wa lun mo hiinii. Kpa hegen ne, Yehova ngum sha ishi shi tar u he la kpaa, ka i lum er ka u goom je me goom me nyôr ker ne nahan.” (Aer. 2:25) Hanma tom u i gbe u se er ken nongo u Yehova cii kpa, se za nen hemen u lun kôôsôô a na. Mayange una kende se ga, kpa una wase se u eren hanma kwagh u se fetyô ken nongo na cii saan saan.—Yes. 41:13.

ICAM 90 Se Taver Anmgbianev Asema

^ par. 5 Ashighe agen ka i gba u anmgbianev mba nomso man mba kasev mba ve eren tom u icivirigh ayange ayange la, vea de tom ne, gayô a na ve tom ugen ken nongo u Yehova. Ngeren ne ter mbamtaver mba ka ve tagher a mi la kua akaa a a wase ve, vea za hemen u eren Yehova tom hen imba shighe la yô. Shi a ter akaa a mbagenev vea fatyô u eren sha u taver ve ishima shin suen ve yô, shi a tese er Bibilo ia fatyô u wasen se cii zum u akaa a gem ken uma wase yô.

^ par. 4 Anmgbianev mbagen mba yange ve lu a ityom ave ken nongo u Yehova yange mba va nyôron sha anyom a i ver la yô, ve gema ityom la ve na anmgbianev mba ve lu a tsa i nyôr nahala ga yô. Nenge ngeren u “Mbakristu Mbabeenyol—Ieren Yen i Mimi la Doo Yehova Kpishi” la ken Iyoukura i Setemba 2018 man u “Za Hemen u Lun a Bem u ken Ishima Zum u Akaa a Gem ken Uma Wou Kpaa” la ken Iyoukura i Oktoba 2018.

^ par. 12 Mbatamen mba ken tiônnongo u yange ve lu la ve nger washika u pasen kwagh u or u nan mough ken tiônnongo ugen nan yem ken ugen la fese je, ve de timbir ga sha er anmgbianev mbara vea za hemen u lun pania shin mbatamen gayô diakon ken tiônnongo u he la yô.

^ par. 13 Nenge ungeren mba ve lu a itinekwagh ér “Help for Those Who Grieve” la ken Awake!, 2018 Namba 3.

^ par. 57 NGEREN U PASEN FOTO: Anmgbian ugen vea kwase na u i va hingir hange hange u vea de tom u mishen u ve lu eren ken tar ugen la, mba eren tiônnongo u ve lu moughon her kera la ba-bai a mliam ashe.

^ par. 59 NGEREN U PASEN FOTO: Mba hidi ken tar ve yô, ka ve shi eren msen hen Yehova sha gbashima ér a wase ve u nôngon a mbamtaver mba ve lu tagher a mi la.

^ par. 61 NGEREN U PASEN FOTO: Sha iwasen i Yehova yô, anmgbian ne vea kwase na hide mba eren tom u pasen kwagh hanma shighe hegen. Er ve fe zwa u i lamen ape yange ve eren tom mishen la tsembelee yô, mba pasen or u hen ijiir shon u a ve ken tar ve yô kwagh hen haregh u tiônnongo ve u he la a pasen kwagh yô.