Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Ishughun Ngi A Tahav

Ishughun Ngi A Tahav

“M SUGH U! U ngu nena?”

We kpa alaghga ka u sugh ior nahan. Alaghga ka u na or u u sugh nan la uwegh shin ashighe agen u kuve nan je kpaa. Gbenda u se sughun ior kua asember a se sughun ve a mi hen ijiir yase la a fatyô u kahan a ijiir igen, kpa akaa a ka i ter ken ishughun la cii nôngo u lun kwagh môm. Jighilii yô ka wea sughun ior ga shin wea lumun ishughun ga yô, ashighe agen i nenge ér ieren la tese dooshima ga, shin u ngu a inja i dedoo ga.

Kpa ka ior cii ve soon u sughun mbagen ga. Mbagenev ka ve soo u sughun ior ga sha ci u mba cie ashe shin kunya ka u kôr ve a ayol a ve, ve hen ér ve gba kwagh ga. Mbagenev di yô, ka i taver ve u sughun mba ken akuraior agen shin mba aeren a ityô ve a kaha shi mlu ve a kaha yô. Nahan kpa, aluer se sugh or kpase tseegh kpa kwagh u dedoo una fatyô u duen ken ishughun la.

Pine iyol you wer: ‘Me sugh or nahan, ka nyi ia due ken ishughun laa? Man Mkaanem ma Aôndo ma a fatyô u tesen mo nyi sha kwagh u ishughun-nu?’

SUGHUN “NEN IOR CII”

Shighe u apostoli Peteru ngohol Korneliu, Ortyôtyev u hii van ken nongo u Kristu la, Peteru kaa ér: “Aôndo ka u sangen a sange ior ga.” (Aer. 10:34) Shighe kar yô, Peteru nger ér “sar [Aôndo u] ior cii ve̱ gema asema.” (2 Pet. 3:9) Adooga se ôr mkaanem mara ikyagh yô, se hen ser ma ôron ka kwagh or u nan lu henen a hen mimi yô. Kpa Peteru shi yange taver Mbakristu ishima ér: “Waan nen ior cii iko, anmgbianev ve̱ doo ne ishima.” (1 Pet. 2:17) Sha nahan yô, doo u se sughun ior mba ken hanma ikyurior kua mba aeren a ityôô a ve a kaha a a ase, shin vea due han han kpaa. Ngun kpa ka gbenda môm u wan ior ikyo shin nan ve icivir shi tesen ve dooshima.

Apostoli Paulu yange wa mba ken tiônnongo kwagh ér: “Rumun nen ayol a en er Kristu kpaa A rumun ne . . . nahan.” (Rom. 15:7) Paulu yange ter anmgbianev mba ve ‘sur un ishima kpishi’ la sha ati ati. Nyian u Satan a lu tan num sha ior mba Aôndo sha ishimavihin ne je yô, hemba kan hange hange u se taver anmgbianev asev asema cii.—Kol. 4:11; Mpa. 12:12, 17.

Akav a ken Ruamabera tese ér ishughun ka i er kwagh i hemba di u nan or henen ér i ngohol nan sar sar la.

ISHUGHUN KA I TESE IKYO I WAN MAN DOOSHIMA SHI NGI TAVER OR ISHIMA

Yange ka kom shighe u a gema uma u Wan u Aôndo a wa ken yav mbu Maria yô, Yehova tindi ortyom ér a va lam a Maria. Ortyom la ve yô, a sugh Maria ér: “Mba sughun we, we u i rumun we sha mhôôn tsung ne, Ter ngu a we.” Kpa “ishima ta [Maria] kwe kpishi” sha ci u a fa ityôkyaa i ortyom lu lamen a na ga. Ortyom la nengen nahan yô, a kaa a na ér: “De cie ga, Maria, gadia u zua a mrumun u sha mhôôn her Aôndo.” A pase Maria ér Aôndo wa ishima ér a mar Mesiya. Nahan Maria kera de ér ishima i zer zan un iyol ga, kpa a ôr sha icivir ér: “Nenge, mo kpankwase u Ter, m ngun; i̱ erem sha mkaanem ou.”—Luka 1:26-38.

Yange lu ortyom ne kwagh u civirigh kpishi u zan ityom i Yehova; shi mayange nenge wener un gande u lamen a orumace u nan yen ne sha icivir nahan ga. Kwagh u hii eren shighe u va la yô, a sugh Maria. Se fatyô u henen kwagh ken ikyav na ne kpa? Doo u se keghen iyol u sughun mbagen shi taver ve asema. Aluer se lam kpuaa tseegh kpa, se fatyô u wasen mbagenev shi nan ve vangertiôr ér mimi je, ve kpa mba ior i Yehova.

Paulu yange fa ior kpishi ken atôônanongo a ken Ashia u Kiriki kua ken Yuropa. Yange sugh mbagen kpishi sha ati jighilii ken uwashika nav. Se fatyô u nengen a kwagh ne ken Mbaromanu ityough 16. Paulu yange tindi a ishughun hen Mbakristu kpishi. A ter Fibi, “anmgbian wase u kwase,” shi a kaa a  anmgbianev ér: “Rumun nen un ken Ter er i kom hen uicighanmbaiorov nahan. Wase nen un sha hanma kwagh u una gba un cii.” Paulu sugh Priseka man Akula, shi a kaa ér: “Ka mo tseegh m lu sughun ve ga, ka iniongo i Kristu i ken atôatyev cii kpaa.” Shi yange sugh mbagen mba i fe ve nyian kpishi ga yô. Ve yô ka “Epineto, or u doon mo ishima” kua “Terufina man Terufosa mba ve eren tom tsung ken Ter” la. Mimi yô, Paulu yange kegh iyol u sughun anmgbianev nav mba nomso man mbakasev.—Rom. 16:1-16.

Hen ase er anmgbianev mban yange vea ember kpishi ér Paulu ngu umbur ve her yô. Kwagh la yange una na Paulu a seer doon ve shima, shi ve kpa vea seer soon ayol a ve. Shi Mbakristu mbagen kpa yange vea ungwa ishughun la nahan ishima ia taver ve, shi kwagh la a wase ve vea za hemen u tilen sha mimi. Sha mimi yô, ka wea sugh or sha gbenda u tesen wer kwagh u nan gba u ishima sha mimi shi wea wuese nan yô, ikyar i ne ye la i seer taver shi kwagh ne ka a na mbacivir Aôndo ve seer lun kangenaa.

Shighe u Paulu lu zan ken Roma ve za hungwa hen ihyongo i ken Putioli la, Mbakristu mbagen hen haregh la mough va kegh un gbenda. Paulu te ashe nengen a ve yô, “a sugh Aôndo, nahan ishima taver un.” (Aer. 28:13-15) Ashighe agen yô, alaghga se sugh or sha u sen a nan cuku shin eren nan uwegh. Kwagh ne tseegh kpa una fatyô u wasen or u alaghga nan ure shin nan lu ken ishimavihin yô.

GBENDA U HIIN ILIAM

Yange gba u orhenen Yakobu una wa Mbakristu mbagen kwagh taveraa. Mbakristu mbagen nyôr u eren idya i ken jijingi sha u yan ikyar a tar. (Yak. 4:4) Kpa nenge ase gbenda u Yakobu hii washika na ne yô:

“Yakobu, kpan u Aôndo man u Ter Yesu Kristu ngu sughun ikwe i pue kar ihiar i i sambe la.” (Yak. 1:1) Ikyav tese ér, Mbakristu mba nger ve washika ne yange vea nenge er a sugh ve tsembelee u tesen er ve lu civir Aôndo ken mzough nahan, a hemba lun ve zange u ungwan kwaghwan la. Sha kpôô yô, aluer se hide a iyol ijime se sugh mbagenev yô, kwagh la una fatyô u bughun ian i lamen sha akaa a vesen je kpaa.

Aluer se sugh or kpase tseegh kpa, ishughun la ia fatyô u wasen, nahan kpa gba u ia due ken atô u ishima yase shi ia tese dooshima kpaa. Aluer ka inja er or wongor iyol sha ishughun shon ga je kpaa. (Mat. 22:39) Iyange igen la anmgbian u kwase ugen ken tar u Ireland va nyôr ken Iyou i Tartor shighe mkombo lu nôngon u hiin yô. Er lu torough u nyôron la, anmgbian ugen gema kenger un, se teghelee maa kaa ér: “M sugh u. M nenge a we nahan doom kpishi.” Anmgbian u kwase la kar za tema inya.

Ukasua mba kar kpuaa yô, anmgbian u kwase ne za kohol anmgbian la, a kaa a na ér un ngu nôngon a zayol ugen ken ya hegen shighe kar. A kaa ér: “Yange ishima vihim ker aikighe la je gande, shi kpuaa yange ma m va ken Iyou i Tartor kpaa ga. Shi me fatyô u umbur akaa a yange m ungwa ken mkombo la yum kpaa ga, ka di ishughun you la tseegh. Yange u sughum nahan ishima gbam shimi je gande. M sugh u.”

Cuku kpa anmgbian ne fa er ishughun i un sugh anmgbian u kwase ne kpase tseegh la wase un imba la nahan ga. Anmgbian la kaa ér: “Zum u va ôrom er ishughun i m sugh un di kpase la nahan wase un kpishi yô, doom kpishi er yange m sugh un yô. Saan mo iyol kpishi je.”

Solomon yange nger ér: “Kende ruam wou shin mnger, gadia ayange á va kar kpishi, tsô ú zua a mi.” (Orpa. 11:1) Aluer se fa ser ishughun yase ngi a inja, hemban je yô, hen mba ve lu Mbakristu a vese imôngo la yô, se na a saan ve iyol kua se ayol a ase kpaa. Nahan yô, mayange de nengen wer ishughun ngi a tahav ga ze, ngi a mi.