Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Ihyembeato ken Tar u Jijingi

Ihyembeato ken Tar u Jijingi

Er Satan nyôr ken iyô lam a Ifa yô, a nyôr ken ihyembeato la sha u hendan a Aôndo

Mbaityomov mba Yehova yange gba la cii ve lu dedoo. Kpa orityom u môm hingir u bo. Ka Diabolo Satan je la. Yange Satan soo er ior cii sha tar ma ve civir un ma i lu Yehova ga. Ka kwagh u yange lu ne:

Ken sule u Eden la, ikyon yange lu kpishi i umen atam a doon u yan. Yehova kaa a Adam man kwase na, Ifa er, ve gbaa yan i tsô. Kpa kon lu môm u Aôndo ta ve cin er ve de ye u ga yô. A kaa a ve er aluer ve ya u yô, vea kpe kpee je.—Genese 2:9, 16, 17.

Sev mbugenev yô ịyô va lam a Ifa shie u lu un tswen la. Kpa jim yô, lu ịyô la i lam ga; kpa lu Diabolo Satan yange na sha u i lu er ka ịyô i lu ôronkwagh ye. Satan kaa a Ifa er aluer á ya kon u i te cin shami la yô, una lu a kwaghfan vough er Aôndo nahan. Shi á kaa a na er una kpe kpaa ga. Akaaôron ne cii lu aie. Nahan cii kpaa, Ifa ne satan jighjigh tsô a ya kon la. Ken maseityô yô, a za a u a za na Adam, un kpa ya je.—Genese 3:1-6.

Ken kwaghôron u mimi ne, se hen yô Satan ka orihyembeato kua or u eren aie kpaa. A kaa a Ifa er aluer a hemba Aôndo ato kpaa, una kpe ga. Kpa lu aie. Á kpe shi Adam kpa kpe. Satan yô kera kpe heregh ave ave ga, kpa una va kpe ken masejime sha ci u un kpaa a er kwaghbo. Kpaa, hegen yô, hila ngu uma shi ngu zan hemen u tsughun uumace heregh. Ka or u aie heregh, shi ka a meen ior sha u ve per atindi a Aôndo.—Yohane 8:44.

 Mbaityomov Mbagenev Hembato

Ken hemen yô, mbaityomov mbagenev kpaa hingir mbabov. Mbaityomov mban nenge a kasev mbadoonashe sha tar nahan sar ve u ma ve yav a ve. Tsô ve sen shin tar ve gema ve hingir ayol er ior nahan. Tsô ve gba vôsun kasev sha asema a ve. Kwagh ne lu u hendan a awashima u Aôndo.—Genese 6:1, 2; Yuda 6.

Mbaityomov mbaaferev mban yange ve sen shin tar ve hôngor ayol a ônkasev mbaiorov

Shi kwagh ne va a ican kpishi hen orumace. Kasev mba mbaityomov ve vôsu ve la ve mar ônov a ve, kpa ve kera lu vough er ônov nahan ga. Ve vese ve taver agee shi ve lu akôraior a vihin tu kpaa. Ken maseityô yô tar mgbough a ifer nahan Yehova maa tim aferaior la kera sha mngerem ma deemee. Ior mba yange ve war Mngerem mera yô lu tsombor u perapera u Noa la tseegh.—Genese 6:4, 11; 7:23.

Nahan cii kpaa, mbaityomov mbabov mbera, ve hide ken tar u jijingi; ve kpe ga. Kpa i tsaha ve. I kera lumun er shi ve nungwa ken tsombor u mbaityomov mba Aôndo mbaperapera mbera ga. U seer shami yô, Yehova kera de er shi ve haa ayol a ior ga. Shi ken masejime yô a va tim ve sha zegeiyange i ijirigh la.—2 Peteru 2:4; Yuda 6.

 I Zenda Satan Kera Sha

Satan kua mbaityomov nav mbabov cii i zenda ve shaala kera

Ken vegher u hiihii u derianyom wase u sé lu keregh ne, ityav pev sha. Ken Bibilo takerada u Mpase pase se kwagh u yange za hemen yô: “Tsô ityav gba Sha, Mikael [ka Yesu Kristu je la] kua mbatyomov nav lu nôngon a darakon. Darakon (ka Satan je le) a mbatyomov nav kpaa lu nôngon, kpa a hemba ga, ian kera lu sha ci ve Sha kpaa ga. I gbihi zegedarakon la shin inya, ka tseyô je la, u i yer un er Diabolo man shi Satan la, u a lu tsughun tar cii la, i gbihi un shin tar shi i gbihi mbatyomov nav a na imôngo kpaa.”

Nahan za kule nena? Kwaghôron la za hemen er: “Nahan yô, ember nen ne Usha, man shi ne mba ne tem ker kpaa.” Lu kwagh u saan mbaityomov mbadedoo mbera iyol sha ci u Satan kua mbaityomov nav mbaiferev mbera, shin ujijingi mbera, kera lu sha ga. Kpa ior mba shin tar di ye? Bibilo i kaa er: “Kpa kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô.”—Mpase 12:7-9, 12.

Een, Satan kua mbaaferv nav mbera mba tsughun ior shi van a akaatseren ior sha tar. Mba yer mbaityomov mbaiferev mban er azôv. Ka mbaihomov mba Aôndo. Ve cii ka mbaiferv.