Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Azôv Nga Woo!

Azôv Nga Woo!

Satan kua azôv mba eren akaabo man anzaakaa a vihin kpishi hanma shighe cii. Ken ashighe a tsuaa la Satan vande wuan ilev kua mbatomov mba orjighjigh Yobu. Shi a wua ônov mba Yobu mba puev mbera ken “zegehiar” shi hembe iyou i ve tsaan keregh la kpaa. Been heela kera yô shi Satan “va haa Yobu avav a nyoon, hii shin akevangahar a na je, ar sha ihaghtyou na.”—Yobu 1:7-19; 2:7.

Ken ayange a Yesu la, azôv yange kondon ior mbagenev ikyer shi pirin ve ashe kpaa. (Mateu 9:32, 33; 12:22) Ve na orgenegh la ican je a yôôsụ genger genger shi á kômbon iyol na sha awen kpaa. (Marku 5:5) Shi ve nzuul a wanye u genegh la je á ngoron imo taver taver, shi a ta un inya, “vihi un iyol caver caver.”—Luka 9:42.

Ken ashighe a tsuaa la, azôv nzuul a ior je naan ve angev shi ve naan mbagenev gbaan ikyungu

 Nyian kpaa, Satan kua azôv mba wuan ior heregh tsô. Sha mimi yô, tom ve u ifer ne ngu seer a seer sha er i zende ve kera sha yô. Mba zuan a abaver sha tar cii nyian u pasen tuvihin ve. Ka ve haa mbagenev angev. Mba cien ior mnyam tugh, yangen ve mnyam shi nan ve atsan a cieriyol ken mnya. Mba nzuul a mbagenev sha u yaven a ve. Shi ka ve ta ior mbagenev ihyundugh, vé na iwoo-or, shi vé mgbegha or sha u nana za sende iyol i nan yô.

Nyian kpaa azôv ka a mgbegha ior mbagenev ve hingir anomaior a vihinkwagh; ka ve nzuul a mbagenev tugh, shi ve cien ve ken mnya

Lintina, u á lu ken tar u Suriname la, kaa er, ujijingi mbaiferev mban, shin azôv ne, ve wua ior ken tsombor na kuma iorov 16 nahan shi ve na un ican coholoo shi ve nzuul un a ityough je kuma anyom 18 nahan. Shi kwagh u un iyol na kpaa vande eren un yô a pase wen-er “doo azôv ne u nan mba ve vende u eren ve tom la ican je aren ken ku.”

Kpa Yehova yô ngu kuran mbacivir un duen a ve kera sha ikyev i Satan.—Anzaakaa 18:10.