Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

Azôv Na Cihi i Hemban Aôndo Ato

Azôv Na Cihi i Hemban Aôndo Ato

Aeren a genegh bende sha aie u i kaan er mbakpenev mba nengen a vese la

Kpa hii nan man Satan kua azôv a na ne ve eren tom coholoo sha u tsughun ior nahana? Ka sha ci u ve soo er se kohol ve ken ihyembeato ve la. Ve soo er se civir ve. Ve soo er se na aie ve la jighjigh shi se eren akaa a Yehova a soo ga la. Ambaakaa ne kpishi je yô ka sha aeren a a zough sha kwagh u mbakpenev yô.

Ku u or u doonshima ka u nyoon u kôr ken ishima kpee, shi u tesen ijungwen shami kpaa ka gbaaôndo je. Shighe u huror na Lasaru kpe yô, Yesu “vaa.”—Yohane 11:35.

Aeren a a zough sha kwagh u kuugh nga kpishi, shi aeren ne nga kposu kposu sha won cii. A genegh kpishi nga vough a ityesen i Bibilo. Nahan kpaa, a genegh di yô, hemba haren sha mhen u kaan er mbakpenev mba uma shi mba nengen a mbaumav la. Ikyutsan, u zungwen karen ikyaa inya, kua ukumbakumba mbaakaav mbera cii mba eren ve sha u cian u vihin ujijingi mba mbakpenev mbera ishima. Kpa er mbakpenev ve fe “ma kwagh ga” yô, mba ve eren ambaakaa la cii ka aie u Satan ve lu samber a mi ye.—Orpasenkwagh 9:5.

Aeren a genegh yô har sha aie u i kaan er mbakpenev mba pin iwasen hen a vese la

 Aerenakaa shin anzaakaa a genegh yô i na jighjigh er mbakpenev mbera soo iwasen hen mbaumav shi vea er mbaumav mbera kwaghbo aluer ve wam ve ga yô. Ken ityar i genegh yô iniongo i yan kua iniaav mbi nan kpaa ka i na shighe u ayange a kar i kom 40 nahan shin inyom imôm. Kwagh ne ka u wasen or u a saaku la sha u ‘a per’ a nyôr ken tar u jijingi yô. Ieren i genegh yô ka i ver orkpen la kwaghyan man kwaghman kpaa.

Akaa ne ka shami ga sha ci u nga wasen u samber a aie u Satan sha kwagh u mbakpenev la. Yehova una lumun er se eren makwagh u a gbe a zough sha aeren a a lu ityesen i azôv kpa? Maiyange ga!—2 Mbakorinte 6:14-18.

Mbacivir Aôndo u mimi yô vea nyôr iyol ken aeren a a lu ishuwen i mbaaie mba Satan mbera ga. Guda yô, vea hemba haren sha u wasen mbaumav mbera shi surun ve asema sha dooshima. Ve fa er ka or a kpeen kera yô, ka Yehova tseegh una faityô u wasen nan ye.—Yobu 14:14, 15.

 Aôndo Venda Tomahir

Ior mbagenev mba lamen a azôv jim jim shin sha ikyev i mbaeren tomazôv. Mba yer ve er mbaahiriv. Mbaimev, tommbatsav, tomahir, ishor i lamen, kua mbapinen mbakpenev kwagh cii ka igbindatom i mbatarev.

Aôndo venda aferakaa ne. A soo er i civir un tsesgh.—Ekesodu 20:5

Bibilo i yange akaa ne i kaa er: “Or u nan er wan u nan u nomso shin u kwase a̱ kar ken usu, i̱ de zough a nan ken a we ga, . . . shin or u nan pin jijingi u orkpen kwagh, shin nan pin jijingi u tsengan pasen akaa kwagh, shin or u lamen a mbakpenev. Gadia hanma or u nan eren akaa angan cii, nan ngu [Yehova] kwagh u ihôngorough je.”—Duteronomi 18:10-12.

Hii nan Yehova a te se cin sha akaa ne ciligh ciligh yum nahana?

Sha mkpeiyol wase yô, Yehova ta se cin sha hanma tom u azôv cii. Ior doo un ishima shi we  ikyo sha kwagh ve kpaa, shi a fa dedoo er mba ve eren tom azôv cii vea ya ican.

Kwase u genegh iti na er Nilda, u ken Brazil un kpaa yange eren tomazôv. Azôv nzuul a na je hingir humeen. A pase er: “Azôv . . . hoghom ken a mo, hingir u ningir a mo sha asema a ve. Ka mlu sha mar wam kpa shighe u genegh mkera lu sha mar wam ga, nahan hingir u a mandem igbe hen ijiir i mba lun ityough vough ga. Azôv nam ican je mbamhen av kpa gema. Tsô m gba menan mcimbim ma nan mo mnyam ma yaven shi mhii msôrom ma man kua ityu i man hanma shighe. Kwagh ne za hemen anyom ngee.”

Mba ve eren tomahir cii ka ze a ve ka doon ga. Ya ve, shin mlu ve u ken uikyangen ga la, man uma ve je kpaa vea faityô u saan ve ishe

Ken maseityô, sha iwasen i Yehova kua Mbashiada nav hen tar ne yô, Nilda osough sha ikyev i azôv kera nahan uma na hingir sha inja vough hegen. A kaa er: “Mngu taver mbagenev ishima mer, mayange ma shighe môm tsô kpaa, ve de waan ave sha tom u jijingi [mbaiferev] ga.”