Er nan ve yange ior nyoon ishima a Yeremia?

Yehova yange war Yeremia

Ka sea ôron ior kwagh u Yehova yô, ashighe agen ve laha se gayô ve nyoon ishima a vese. Kwagh la una na yô, se kera soo u ôron ior kwagh u Yehova ga. Shighe ugen ior ka nana laha u nahan, u kera soo u ôron ve kwagh u Yehova gaa?— Bibilo ôr se kwagh u gumor ugen u yange Yehova doo un ishima kpishi, kpa va kera soo u ôron ior kwagh u Yehova ga yô. I yilan un ér Yeremia. De se seer fan kwagh na.

Shighe u Yeremia lu gumor la, Yehova kaa a na ér a ta ior icin ve de u eren aferakaa. Yange lu Yeremia ican kpishi u eren kwagh ne, shi cier un iyol kpaa. A kaa a Yehova ér: ‘M fa kwagh u me ôr ga. M ngu wanye.’ Kpa Yehova kaa a na ér: ‘De cie ga. Me wase u.’

 Yeremia maa hii u tan ior icin ér aluer ve de afer a ve eren la ga yô, a tsaha ve. U hen wer ior mbara yange ve er kwagh u Yeremia kaa laa?— Ei. Yange ve laha un shin ve nyoon ishima a na. Mbagenev je yô yange ve soo ér vea wua un! U hen wer yange lu Yeremia ken ishima nena?— Yange cier un iyol je, a kaa ér: ‘M kera ngu ôron ior kwagh u Yehova ga.’ Kpa yange de u ôron ior kwagh u Yehova mimii?— Ei, yange de ga. Yehova doo un ishima kpishi je, a de u ôron ior kwagh na ga. Shi er Yeremia yange yina ishima ga yô, Yehova lu kuran un.

U tesen ikyav yô, kwagen la aferaior agen kende Yeremia shin ihyungwa i zan kweng, i amgbiôr lu shimi poo yô. Lu a kwaghyan ga, mngerem ma man kpa lu a mi ga. Ior mbara yange ve soo ér a kpe shimi. Kpa Yehova wase un, a war!

Ka nyi u fatyô u henen sha ieren i Yeremia ne?— Shin er yange i cier Yeremia iyol ashighe agen nahan kpa, mayange de u ôron ior kwagh u Yehova ga. Shighe u ú lu ôron ior kwagh u Yehova yô, alaghga vea laha u shin vea nyoon ishima a we. Alaghga u nenge wer u hee gayô a cier we iyol. Kpa mayange de deen u ôron ior kwagh u Yehova ga. Una wasen we hanma shighe cii, vough er yange wasen Yeremia nahan.

ÔR KEN BIBILO YOU

  • Jeremiah 1:4-8; 20:7-9; 26:8-19, 24; 38:6-13