Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Tesen Ônov Ou

 ITYOUGH 4

Wankwase Ugen Yange Er Kwagh u Doon Baba Na man Yehova

Wankwase Ugen Yange Er Kwagh u Doon Baba Na man Yehova

Yefeta ngu tôndon zwa a Yehova ér nyi?

Wan u Yefeta u kwase la yange er kwagh u baba na tôndo zwa la, shin er lu kwagh u taver nahan kpaa

U nenge a wankwase shon ken foto ne kpa?— Wankwase ne ka wan u orgen u i yilan un ér Yefeta yô. Bibilo ôr se iti i wankwase shon ga, kpa se fa ser yange na saan baba na man Yehova iyol. De se time se fa kwagh na kua baba na, Yefeta.

Yefeta lu a inja i dedoo shi tesen wan na u kwase la kwagh u Yehova hanma shighe cii. Lu a agee kpishi shi fa u hemen ior kpaa. Nahan Mbaiserael kaa a na ér a hemen ve vea za nôngo ityav a mbaihyomov vev.

Yefeta er msen ér Aôndo a wase un una hemba ityav mbira. Yefeta tôndo zwa ér una hemba ityav mbira una hide yô, or u nana due ken ya na, nana va kegh un gbenda cii, una gema nan una na Yehova, nana za lu ken tabernakel u Aôndo,  nana eren tom ker sha ayange a uma u nan cii. Tabernakel lu ijiir i ior zaan her za civir Aôndo sha ayange la yô. Yefeta yange hemba ityav mbira! U fa or u yange nan hii duen va keghen un gbenda shighe u za hide ityav la kpa?

Lu wan u Yefeta u kwase la! Yefeta mar wan ugen ga, lu wankwase ne tseegh, man gba u una kera lu vea Yefeta ga. Kwagh ne na yô, Yefeta zungwe kpishi. Kpa umbur wer Yefeta vande tôndon zwa. Wan na u kwase la maa kaa a na ér: ‘Baba, u tôndo zwa a Yehova, nahan gba u ú er kwagh la.’

Hanma inyom yô, azende a wan u Yefeta u kwase yange a za hen a na

Wan u Yefeta u kwase la kpa zungwe kpishi. Lu u una za vôso nom, una mar ônov ken tabernakel ga. Kpa yange soo ér una er kwagh u baba na tôndo zwa u eren la shi una na i saan Yehova iyol. Kwagh la hemba lun un kwagh u hange hange, a u eren nom shin maren ônov la. Nahan a undu ya na, a za lu ken tabernakel sha ayange a uma na cii.

U hen wer kwagh u wankwase ne er la doo baba na man Yehova?— Een, yange doo ve! Aluer Yehova doo u ishima shi u ngu ungwan imo na yô, u lu er wan u Yefeta u kwase la nahan. We kpa u na a saan mbamaren ou kua Yehova iyol tsung.

ÔR KEN BIBILO YOU

  • Duteronomi 6:4-6

  • Mbaajiriv 11:30-40

  • 1 Mbakorinte 7:37, 38