Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Tesen Ônov Ou

 ITYOUGH 5

Samuel Yange Za Hemen u Eren Kwagh u Vough

Samuel Yange Za Hemen u Eren Kwagh u Vough

Samuel yange za lu ken tabernakel lu eren tom ker, hii shighe u lu wanye cuku la je. Tabernakel lu ijiir i ior zaan her za civir Yehova yô. U fa er yange hii ve Samuel za hingir u lun ken tabernakel kpa? De se hii fan kwagh u mama u Samuel, Hana.

Yange wan sar Hana tsung, kpa fatyô u maren wan fele ga. Nahan a er msen hen Yehova, a zamber a na ér a wase un. Hana tôndo zwa ér una mar wan u nomso yô, una na un a za lu ken tabernakel, a eren tom ker. Yehova ungwa msen u Hana er la, nahan a mar wan u nomso. A ii wan shon iti ér Samuel. Samuel va kuman er anyom atar shin anyiin nahan yô, Hana er kwagh u yange tôndo zwa ér una er la, a tôô Samuel a yem a na ken tabernakel ér a za eren Yehova tom ker.

Eli lu pristi u tamen ken tabernakel. Ônov nav mba nomso uhar kpa eren tom ken tabernakel. Umbur wer, tabernakel lu iyou i Aôndo i i civir un ker yô, nahan lu ijiir i yange gba u a eren akaa a dedoo her yô. Kpa ônov mba Eli lu eren aferakaa kpishi. Samuel nenge kwagh u ve lu eren la. Samuel yange er aferakaa er ônov mba Eli nahanaa?— Ei, yange za hemen u eren kwagh u vough, er mbamaren nav tese un nahan.

U hen wer Eli yange ma er nyi sha kwagh u ônov nav mba uhar mbara?— Yange ma tsaha ve. Ma de ér ve za hemen u eren tom ken iyou i Aôndo ga. Kpa Eli er nahan ga, nahan Yehova nyoon ishima a na kua ônov nav mba uhar mbara cii. Yehova maa tsaha ve.

Samuel yange ôr Eli loho u Yehova

Iyange igen, er Samuel lu yaven tugh yô, a ungwa or yila un ér: ‘Samuel!’ Samuel maa yevese za ape Eli lu la, kpa Eli kaa a na ér: ‘M yila u ga.’ Kwagh ne er kuma kwa tar. Maa Eli kaa a Samuel ér shi una ungwa imo la yô, a kaa ér: ‘Gba ôron tsô, Yehova, m ngu ungwan.’ Nahan lu kwagh u Samuel er je la. Yehova maa kaa a Samuel ér: ‘Kaa Eli wer m  ngu tsahan tsombor na sha aferakaa a ve er la.’ U hen wer yange cier Samuel iyol u za ôron Eli loho la ga he?— Een, yange cier un iyol. Shin er cier Samuel iyol nahan kpa, yange er kwagh u Yehova kaa ér a er la. Kwagh u Yehova kaa la va er nahan vough. Yange i wua ônov mba Eli mba uhar mbara, shi Eli iyol na kpa kpe.

Samuel lu a ieren i dedoo, i se kpa i doo u se lu a mi yô. Yange er kwagh u vough, shin er nenge ior mbagenev lu eren aferakaa nahan kpaa. We ye? U za hemen u eren kwagh u vough er Samuel nahan kpa? U er nahan yô, u na a saan Yehova kua mbamaren ou iyol.

ÔR KEN BIBILO YOU

  • 1 Samuel 2:22-26; 3:1-21