Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITYOUGH 2

Rebeka Yange Soo u Eren Ishima i Yehova

Rebeka Yange Soo u Eren Ishima i Yehova

Rebeka lu kwase u Yehova doo un ishima yô. I yilan iti i nom na ér Isaka. Un kpa Yehova doo un ishima. Rebeka yange fa Isaka nena? Yange tese ér un soo ér i saan Yehova iyol nena? De se seer fan kwagh u Rebeka.

Mbamaren mba Isaka lu Aberaham man Sara. Ve lu ken tar u Kanaan, ape ior civir Yehova ga la. Kpa Aberaham soo ér wan na a vôso kwase u nan civir Yehova yô. Nahan a tindi wanakiriki na, u a̱ shi nan kpa lu Elieser la, ér a za er kwase sha ci u Isaka hen ijiir igen i i yilan ér Haran, ape anmgbianev mba Aberaham mbagenev lu la.

Rebeka yange kese mngerem ayem ayem kwa kimbir kimbir

Elieser yem zende la vea mbatomov mba Aberaham mbagenev. Ijiir la gba ica kpishi. Yange ve za zende la a urakumi pue, mba ve tôô kwaghyan man uiyua yô. Elieser una er nan ve una fa kwase u i doo u Isaka una vôso? Elieser man mbatomov mbagenev mbara mba za sôôn hen Haran yô, ve mem hen kpe u ijôr igen, sha ci u Elieser fa ér ica ia gba ga tsô ior vea due ken gar u va kesen mngerem. Maa a er msen hen Yehova, a sôn ér: ‘Aluer m kaa a ma iniunkwase mer i nam mngerem me ma; man i nam shi i na urakumi av kpaa, ve̱ ma yô, me fa je mer ka kwase u u tsough je la.’

Tsô gumkwase Rebeka za va hen ijôr la. Bibilo kaa ér yange doo kwase kpishi.  Elieser maa kaa a na ér a na un mngerem una ma, nahan a kaa a Elieser ér: ‘Me na u mngerem, shi me kese me na urakumi ou kpaa ve̱ ma.’ Nenge sha wono! Urakumi mba imura i ker ve ka ve ma mngerem kpishi, nahan gba u Rebeka una kese mngerem shin ijôr ayem ayem kwa kimbir kimbir. U nenge ken foto ne, er a lu eren tom la kpoghuloo kpa?— Yange kpiligh Elieser iyol u nengen er Yehova ungwa msen na la yô.

Elieser na Rebeka uiyua mba dedoo kpishi. Rebeka maa kaa a Elieser kua mbatomov mbagenev mbara ér ve kar vea yem sha ya u ter na. Elieser za pase er i hii ve Aberaham a tindi un hen a ve, man er Yehova a ongo msen na kpaa yô. Yange doo tsombor u Rebeka kpishi u nan un ian ér a vôso Isaka.

Rebeka yem vea Elieser ken tar u Kanaan za vôso Isaka

Kpa u hen wer Rebeka yange soo u vôson Isaka?— Rebeka fa er Yehova tindi Elieser hen a ve yô. Nahan tsombor u Rebeka ngu pinen un ér a pase ve, una soo u yemen tar u Kanaan za vôson Isaka yô, a kaa a ve ér, ‘Een, m soo.’ Her ave ave je maa, a yem vea Elieser. Mba za nyer ken tar u Kanaan yô, Rebeka vôso Isaka.

Er Rebeka er kwagh u Yehova soo ér a er la yô, Yehova na un injar. Anyom nga kar kpishi yô, i va mar Yesu ken tsombor u Rebeka! Aluer u ngu er Rebeka nahan shi u er kwagh u doon Yehova yô, we kpa una na u injar.

ÔR KEN BIBILO YOU

  • Genese 12:4, 5; 24:1-58, 67