Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Tartor u Aôndo Ngu Hemen!

 ITYOUGH 22

Tartor Ngu Eren Ishima i Aôndo Shin Tar

Tartor Ngu Eren Ishima i Aôndo Shin Tar

KWAGH U I TIM SHA MI KEN ITYOUGH KIN YÔ

Tartor la er akaa a Aôndo a tende zwa u eren sha ci u uumace man tar ne la cii

1, 2. (a) Hii nan ve ashighe agen ka i taver se u nengen ser Paradiso ngu kpôô kpôô? (b) Ka nyi ia wase se ve se taver jighjigh u se ne uityendezwa mba Aôndo laa?

ANMGBIAN u a civir Yehova sha mimi yô, va mkombo, kpa a vôr kpishi sha ci u akaa a a er ken iyange shon la. Orvesen u sha ijiirtom na u kwagh a kom un mayange ga yô, nzughul a na je gande. Ishima za un iyol sha kwagh u koson tsombor na man sha kwagh u angev mbu kwase na. Mba ngur kuhwan ityogholov mbi wan icam i hiin mkombo yô, a shir ishima foo, doo un kpishi er un lu vea anmgbianev nav mba nomso man mba kasev ken Iyou i Tartor yô. Icam la ôr kwagh u ishimaverenkeghen i va lun uma ken Paradiso; man asember a icam la kaa ér, a̱ nenge a iyol na ken tar u he la. Icam ne vande doon un kera. Er a lu wan i vea tsombor na la, ishima gba un shimi sha ci u ishimaverenkeghen i akaa a dedoo a a lu van ken hemen la.

2 I lu nahan kwagh er u imba ne vee? Anmgbianev kpishi kwagh er ve nahan. Kpa sha mimi yô, uma u ken tar u tse nzughul a vese yô, ashighe agen ka i taver se u nengen ser Paradiso la ka kwagh u kpôô kpôô. Se mba ken “ashighe a ican,” shi tar u se lu ker ne u za ikyua a paradiso cuku tsô kpaa ga. (2 Tim. 3:1) Ka nyi ia wase se u nengen ishimaverenkeghen yase la ser ka kwagh u mimi? Er nan ve se fe ser Tartor u Aôndo ngu sôôn hemen uumace ciilii? Se time nen sha akaaôron a profeti a Yehova kpuaa, a ior nav yange ve nenge kure vough vough sha ayange a tsuaa la yô. Shi se nenge er akaaôron a profeti shon kua agen a lu kuren sha gbenda u kpilighyol hegen yô. Se timen sha akaa ne cii, aa taver jighjigh wase u nan yô, maa se mase nengen er akaaôron a profeti ne aa va kure ken hemen yô.

Er Yehova Kure Uityendezwa Nav sha Ayange a Tsuaa la Yô

3. Ka ityendezwa i nyi yange i̱ sur Mbayuda mba ve lu uikyangen ken Babilon la asema?

3 Hen ase er uma yange una taver Mbaiserael mba ve lu uikyangen ken Babilon, er anyom 2,600 nahan ken ijime la. Mbaiserael kpishi yange ve vese ken Babilon, er uter vev nahan, shi uma taver ve ken tar la je zua ga. Mbababilon nahan ve tar sha ci u jighjigh u ve na Yehova la. (Ps. 137:1-3) Ken anyom la cii, Mbayuda mba ve civir Aôndo sha mimi la cii za hemen u lun a ishimaverenkeghen ne, ér: Yehova una hide a ior nav ken tar ve. Yehova kaa ér tar ve la ua doo, je yô a kar tar u Yuda la sha sule  u Eden, u yange u lu paradiso la! (Ôr Yesaia 51:3.) Uityendezwa mba Yehova er ne lu sha u taver ior nav ishima, er vea lu a akperan ken asema ve mayange ga yô. Er nan se fe nahana? De se time nen sha akaaôron a profeti agen jighilii.

4. Yehova yange tôndozwa a Mbayuda ér una kura ve ken tar ve nena?

4 Mkpeyol. Yange gba u Mbaiserael mba i yem a ve uikyangen la vea hide a yem ken paradiso kpôô kpôô ga, kpa vea yem ken tar u icaa, u or kera lu her ga anyom 70 la, man lu tar u ve mbagenev kpishi ve lu a vande nengen a u ga yô. Ngise la, ubegha man ugbaseela man mbaanyam kua inyamkyume igen lu ken ityar i í er kwagh u i ken Bibilo la kpishi. Nahan alaghga orya nana hen ér, ‘Me kura kwase wam kua mbayev av sha ikyev i inyamkyume ne nena sha wono? Man iyôngo yam kua ibua ye, me kura i nena?’ Hanma or je kpa ishima ia de zan nan iyol nahan ga. Nenge ase ityendezwa i Aôndo er ken Yesaia 11:6-9 ne, man er yange i taver Mbaiserael ishima yô. (Ôr.) Mkaanem ma doon tsung ma Yehova ôr man taver ior nav mba ve lu uikyangen ne asema ér, kwagh môm una er ilev vev ga. Kwagh u i kaa ér begha una ya toho la inja na yô, una ya ibua i Mbayuda ga. Ityôkyaa lu i mbajighjigh mbara vea cia inyamkyume ne ga. Yehova yange tôndo zwa ér ior nav vea hide a tema ken tar u Yuda kundu kundu, ken taaikyôngo man ken akô je kpa kwagh a er ve ga.—Esek. 34:25.

5. Ka akaaôron a profeti a nyi yange wase Mbayuda mba ve hide ken tar ve la u lun a vangertiôr ér Yehova una na ve akaa a kwagh a gbe ve a mi la mgbeghaa?

5 Kwaghyan a dumbur. Ishima yange ia nyian ve sha akaa agen kpaa, vea lu henen ér, ‘Me fatyô u koson tsombor wam ken tar wase, shighe u se hide la je kpa? Se lu hana? Tom ua lu u eren kpa, man ityom i se lu eren la ia hemba doon a ityom i sha ican i mbavesen asev ken Babilon ve kighir se a mi la je he?’ Mbampin mban kpa Yehova na mlumun sha mi ken akaaôron a profeti agen. Yehova tôndo zwa ér ura ua nôôn ken tar u ior nav mba vea ungwan imo na la hanma shighe, nahan iyiav mbi ken ishule ve kpaa “mbia doo ken zwa, shi mbia taver or agee.” (Yes. 30:23) Yehova tôndo zwa a ior nav sha kwagh u uya man tom u dedoo kpaa, ér: “Vea maa uya man vea tema keregh, vea kaha ishule i ikyon i wain, man vea ya atam a i. Mayange vea maa ya, orgen á kar á tema ker ga, vea lôô, man orgen á kar á ya, ga.” (Yes. 65:21, 22) Lu u uma ve una doo sha igbenda kpishi a hemba er ve lu uikyangen ken Babilon, u lu ijiir i mbafanaôndoga la. Kpa mbamzeyol vev mba vesen, er mba ve na ve i yem a ve uikyangen ken Babilon la yô, Yehova er kwagh sha mi kpa?

6. Ior mba Aôndo yange ve gba nyi uange, man Yehova tôndo zwa a ior nav mba ve lu hiden ken uikyangen la ér nyi?

6 Vea civir Aôndo sha mimi. Ior mba Aôndo yange ve vôr ken jijingi anyom kar kpishi cii ve i va yem a ve uikyangen ye. Yehova yange ôr kwagh u ior nav sha ikyev i profeti Yesaia ér: “Ityough cii gba angev, kua ishima cii kpaa ure.” (Yes. 1:5) Yange ve pir ashe shi ve kondo ato sha akaa a ken jijingi, gadia ve lu lumun u ungwan kwaghwan u Yehova ga, shi ve soo u nengen a iwanger i Aôndo lu tan ve la kpaa ga. (Yes. 6:10; Yer. 5:21; Esek. 12:2) Aluer Mbaiserael mba ve lu hiden ken tar ve ne kpa, kwagh  ve hingir nahan yô, vea zua a mkpeyol u mimi kpa? Ve kpa Yehova una lumun ve ga. Nahan ityendezwa i Yehova er a ve ne yange ia taver ve ishima kpen kpen. A kaa a ve ér: “Sha iyange la mbaakondoato vea ungwa akaaôron a ruamabera, man ashe a mbaapirashe kpaa, mba ve lu ken aôndoaimegh man ime, vea nenge kera.” (Yes. 29:18) Yehova una sôr mlu u ken jijingi u ior nav mba yange tsaha ve, maa ve gema asema la. Lu u vea za hemen u ungwan imo na yô, un kpa una de u wan ve kwagh ga, shi una za hemen u nan ve mkav u una kura uuma vev yô.

7. Aôndo yange kure uityendezwa mba er a ior nav mba ve hide ken tar ve la nena, man mkur u uityendezwa mba shon seer taver jighjigh wase u nan sha ci u nyi?

7 Yehova yange kure ityendezwa na ne kpa? Akaa a yange er sha shighe la na mlumun sha mpin ne. Yehova ver Mbayuda mba ve hide ken tar ve la, sha u kuran ve shi koson ve, shi wasen ve ér ve civir un sha mimi. U tesen ikyav yô, Yehova yange kura ve sha ikyev i akuraior a a wa ndor a ve, a a hemba ve agee shi a hemba ngeen a ve kpaa la. Inyamkyume tim ilev mbi Mbayuda ga. Er Mbayuda mbara nenge er akaaôron a profeti a Yesaia man Yeremia kua Esekiel nger la kure sha gbenda u kiriki nahan kpa, mkur u akaaôron a profeti ne doo ior mba Aôndo mban, shi wase ve hen shighe la kpen kpen. Aluer se mba henen sha akaa a Yehova er a ior nav sha ayange a tsuaa la yô, jighjigh wase una hemba taver cii. Er akaaôron a profeti la kure sha gbenda u kiriki tseegh kpa doo kpishi nahan, aa va kure sha gbenda u vesen je yô a lu nena sha wono? Nenge ase kwagh u Yehova a er a vese nyian ne.

Er Yehova a Lu Kuren Uityendezwa Nav sha Shighe Wase ne Yô

8. Ka “tar” u nyi ior mba Aôndo ve tem ker nyiana?

8 Ior mba Yehova mba a tar ve hegen shin mba a ma ijiir i ve tem her ve tseegh ga. Kpa Mbakristu mba i shigh ve mkurem la mba ikyurior i ken jijingi, ka “Iserael u Aôndo” je la. (Gal. 6:16) Ahuraior a ve a a lu “iyôngo igen” la kohol ve, mba ken nongo u Yehova u ú lu er ka “tar” u ve tem ker, ve civir Yehova Aôndo ken mzough la. Mcivir ve la ka gbenda u ve eren akaa ken uma yô. (Yoh. 10:16; Yes. 66:8) Man “tar” shon u Yehova a ne se mba se lu iyôngo igen la yô ka nyi? Ka paradiso u ken jijingi. Akaa a tesen mlu u dedoo u ken sule u Eden, a Aôndo yange tôndo zwa u eren sha ci u a Mbayuda la nga kuren sha mi nyian ken jijingi. De se nenge ikyav i kwagh ne sha akaa kpuaa.

9, 10. (a) Kwaghôron u profeti u ken Yesaia 11:6-9 la ngu kuren sha mi nyian nena? (b) Ka nyi i tese ér ior mba Aôndo mba ken beme?

9 Mkpeyol. Kwaghôron u profeti u ken Yesaia 11:6-9 la tese ér mzough man bem una lu hen atô u inyamtoho, man hen atô u uumace vea uzendenya vev. Kwagh u Bibilo i er ne ngu kuren sha mi nyian ken jijingi kpa? Een, ngu kuren! Ivur i sha 9 la pase se er i hii ve akaauma ne aa vihi kwagh ga yô, ér: “Gadia tar ua mgbough a mfe u [Yehova] er mngerem ma ngee shin zegemnger nahan.” ‘Mfe u Yehova’ gem aeren a inyamtoho? Ei, ka uumace ka vea fa Aôndo Uhembansha la shi vea hii u dondon igbenda na i bem la ve, ve gema anza ve ye. Ka nahan ve se lu nengen a  mkur u kwaghôron u profeti u dedoo ne ken paradiso wase u ken jijingi ne sha ayange ase ne ye. Mbadondon Kristu mba ve lu sha ikyev i hemen u Tartor la mba henen u den tswam shi tan aeren a lun er ka aeren a inyamtoho la kera, nahan lun ken bem vea anmgbianev mba nomso man mba kasev mba ve civir Yehova imôngo la.

10 U tesen ikyav yô, se vande timen sha gbenda u Mbakristu ve we ave sha akaa a taregh ga la ken takerada ne, shi se nenge a ityôkyaa i se eren nahan la ken Bibilo, man er i tev ior mba Aôndo a ican sha ci u ve venda u nyôron iyol ken akaa a taregh yum yô. Kpilighyol er ken tar u ipila i ngee ker ne nahan, “ikyurior” igen i waren ngeen i̱ vende u nyôron iyol ken nyityô ipila i eren cii ga he? Ka a ta ve mciem iyol ér vea er nahan ga a wua ve je kpaa. Kwagh ne tese wanger wanger ér ior mba ve lu sha ikyev i Tor Mesiya la cii mba a bem hen atô ve, er Yesaia yange pase nahan! Yesu yange kaa ér a fa mbadondon nav sha dooshima u ve lu a mi hen atô ve la. (Yoh. 13:34, 35) Kristu ngu eren tom a “wanakiriki u jighjigh” la kure kure ken atôônanongo sha u tesen Mbakristu mba mimi cii, er vea lu bem bem ayol a ve, vea soo ayol a ve shi vea lu inja kundu kundu yô.—Mat. 24:45-47.

11, 12. Ka ijen i nyi i gbe sha tar nyiana, kpa Yehova na ior nav kwaghyan mgbeghaa nena?

11 Kwaghyan dumbur. Tar cii ngu ijen ken jijingi. Bibilo yange i kaa ér: “Nenge, ayange nga van, kape Ter AÔNDO A kaa  ne, a Me tindi ijen shin tar, kpa á lu ijen i kwaghyan shin imura i mnger ga, kpa á lu sha u ungwan kwaghôron u TER.” (Amo. 8:11) Mba ve lu sha ikyev i Tartor u Aôndo la kpa mba ijenee? Yehova yange tsengaôron mkposo u una lu hen atô u ior nav man mbaihyomov nav yô, ér: “Nenge, mbayev Av vea ya kwagh, kpa ne yô, nea lu ijen; nenge, mbayev Av vea ma kwagh, kpa ne yô, nea lu imura; nenge, mbayev Av vea ember, kpa ne yô, kunya ua kôr ne.” (Yes. 65:13) U nenge er mkaanem man ma lu kuren sha mi kpa?

12 Se mba zuan a akaa a ken jijingi kpishi er ifi u a lu van mngerem shi gbanger seer a seer nahan. Ityakerada yase i pasen Bibilo man icer man uvidio kua mbamkombo asev man mbamkohol kua akaa a i ngeren sha ijiir yase i sha Intanet la cii ka kwaghyan u ken jijingi u se lu zuan a mi seer a seer ken tar u ior kpishi ve lu ijen ken jijingi ne. Kwaghyan ne ngee er mngerem ma van saren avenge nahan. (Esek. 47:1-12; Yoel 3:18) Doo u kpishi er u lu zuan a kwaghyan u ken jijingi hanma shighe er Yehova yange tôndo zwa nahan ga he? U ngu yan kwaghyan sha tebul u Yehova hanma shighe kpa?

Atôônanongo ase nga wasen se u yan kwaghyan u ken jijingi shi zuan a mkpeyol shi lun gbong gbong kpaa

13. U nenge a mkur u ityendezwa i Yehova a er i bughun mbaapirashe ashe man mbakondonato ato la nena?

13 Se mba gbang gbang ken jijingi. Ior kpishi nyian pir ashe shi kondo ato a ken jijingi. (2 Kor. 4:4) Nahan kpa, Kristu ngu been ior angev sha tar cii. U nenge er i lu bughun ior ashe shi bughun mbakondonato ato kpa? Aluer u nenge a ior mba i tese ve mimi u Mkaanem ma Aôndo, ve zough a mfe u vough la, nahan ve vende mbaaie mba ukwaghaôndo mba yange ve kondo ve ato shi ve pir ve ashe u nengen a mimi la yô, fa wer ka ityendezwa i Aôndo i ken takerada u Yesaia ne i lu kuren sha mi ye. Aôndo yange tôndo zwa ér: “Sha iyange la mbaakondoato vea ungwa akaaôron a ruamabera, man ashe a mbaapirashe kpaa, mba ve lu ken aôndoaimegh man ime, vea nenge kera.” (Yes. 29:18) Hanma inyom yô, ka i bee ior udubu deri imôngo angev mbu ken jijingi mbun sha tar cii. Zum u or nan dugh ken Zegebabilon kera nan va kohol se ken paradiso u ken jijingi ne, se lu civir Yehova imôngo cii yô, tese ér uityendezwa mba Yehova mbara mba kuren vough!

14. Ka nyi se hen sha mi ve ia taver jighjigh wase u nana?

14 Hanma ityough ki takerada ne yô tese wang ér Kristu va a mbadondon nav ken paradiso u ken jijingi ken ayange a masejime ne. Yô, se za nen hemen u henen sha igbenda kpishi i se lu zuan a averen ken paradiso ne nyian la. Se er nahan yô, jighjigh u se ne uityendezwa mba Yehova a er sha kwagh u mlu u ken hemen la una seer taver.

“Tartor Wou u̱ Va”

15. Er nan se lu a vangertiôr ser tar ne ua va hingir paradiso?

15 Yehova wa ishima u geman tar ne hingir paradiso ica i gba hegen. Yange ver Adam man Ifa ken paradiso, shi wa ve tindi ér ve mar ve iv tar shi ve nengen sha akaauma a sha tar cii. (Gen. 1:28) Kpa Adam man Ifa gema dondo Satan, ve hemba Aôndo  ato, nahan ve va a myen man isholibo kua ku sha ônov vev cii. Nahan kpa, awashima u Aôndo la gema ga. Aôndo ka una ôr kwagh yô, kwaghôron na la a kure sha mi vough. (Ôr Yesaia 55:10, 11.) Nahan se na jighjigh ser, ônov mba Adam man Ifa vea iv tar ne keng shi vea gema u ua lu sha ikyev ve, vea nengen sha akaa a Yehova a gbe la, shighe u tar cii ua lu paradiso la. Zum la, akaaôron a profeti a yange i ôr a Mbayuda mba ve lu uikyangen ér vea hide a yem ken tar ve, u ua doo er paradiso nahan la, aa kure sha gbenda u vesen! Nenge ase er kwagh ne una va er yô.

16. Bibilo pase kwagh u mkpeyol u se va lu ker ken Paradiso la nena?

16 Mkpeyol. Ken hemen yô, kwagh u doon tsung u i er ken Yesaia 11:6-9 la una mase kuren cica cii, je se nenge sha ashe kpôô kpôô. Hanma ijiir sha tar ne i nomso man kasev man mbayev ve ze cii yô, vea tagher a kwagh môm u anger ve ga. Kwaghuma môm una ta ve mciem iyol ga, a̱ lu oruma shin inyamtoho kpaa. Hen ase shighe u tar ne cii ua hingir ya wou, ape u fatyô u ôôn uwe shin ufi man uber kua uityeku shi zenden sha iwo man ken toho, a mciem iyol shio la. Shighe u tugh mbu il kpa ishima ia nyian we ga. Zum la kwagh u i er ken Esekiel 34:25 la una kure vough, nahan ior mba Aôndo vea fatyô u ‘teman bem bem ken taaikyôngo shi yaven shin ikyô je kpaa.’

17. Er nan ve i doo u se na jighjigh ser Yehova una na se akaa a kwagh a gbe se a mi la mgbeghaa, shighe u Tartor la ua hemen tar cii laa?

17 Kwaghyan una dumbur. Nenge ase shighe u ibanave ia kera lu ga, ijen kpa ia bee shi ityôkyaa ia kera lu i nan mbaatsanev iwasen ga la. Kwaghyan u ken jijingi u ior mba Aôndo ve ngee a mi hegen ne ka ikyav i tesen ér, Tor Mesiya una koso mba ve lu ken Tartor na la sha hanma gbenda cii. Shighe u Yesu lu shin tar la kpa, a er akaa kpuaa a tesen ér una fatyô u kuren ityendezwa ne, gadia a koso ior udubu ubudu sha ikpenbredi man ishu kpuaa tseegh. (Mat. 14:17, 18; 15:34-36; Mar. 8:19, 20) Shighe u Tartor u Aôndo ua hemen tar cii la, akaaôron a profeti er kwagh u i tsengeôron ken Yesaia 30:23 la nahan una kure sha mi kpôô kpôô. Ivur la kaa ér: “Una na ura sha ci u ivor you i lôôn ken sule, kua alakema u eren bredi a mi, ka iyiav mbi i zough a mi ken sule je la; mbia doo ken zwa, shi mbia taver or agee. Sha iyange la yô, uzendenya ou vea ya toho hen ijiir i yan toho i gbangese.”

18, 19. (a) U nenge kwaghôron u profeti u ken Yesaia 65:20-22 la nena? (b) Ayange a ase aa lu “er ayange a ikyon” nahan sha nyi gbenda?

18 Nyian ne ior kpishi na jighjigh ér vea tsa sha won kpa vea lu a ya u dedoo shin tom u dedoo ga. Er anyighe a dumbur ken tar ne yô, mbatomov kpishi nenge ér ve mba zough a mtsera u una wase ve shin tsombor ve sha tom u ve eren kpoghuloo la ga; mbainyarev man mbahuav mba yan mtsera sha a ve. Nenge ase er kwaghôron u profeti u ken Yesaia 65:20-22 ne una kure sha tar cii ve a lu yô. Ijiir la kaa ér: “Vea maa uya man vea tema keregh, vea kaha ishule i ikon i wain, man vea ya atam a i. Mayange vea maa ya, orgen á kar á tema ker ga, vea lôô, man orgen á kar á ya, ga; gadia er ayange a ikyon a lu nahan kape ayange a ior Av kpaa aa lu la; uicuwan Av kpaa vea ya tom u ave ve zan zan je.”

 19 Inja i kwagh u i Bibilo i kaa ér, ayange a ase aa lu “er ayange a ikyon” nahan la ér nyi? Ka wea tile shin itine i kon u u kehe shi u tav kpishi yô, ihidi i ta u iyol, u gba henen anyom a kon shon u tse, kaan ken ishima wer alaghga tsô u hemba tsan a mbamaren ou mbatamen je kpaa. Adooga u umbur hen shighe la wer, er u lu orumace u lun vough ga yô, afarenga u va kpe u undu kon la ua za hemen u lun her a zayol shio zan zan shighe u a masen umbur a umbur kwagh wou tseegh tsô la. Yehova er kwagh doo kpishi, a kaa a vese ér ken Paradiso u a lu van la, se za hemen u lun uma gbem a zayol shio! (Ps. 37:11, 29) Shighe ngu van u ayange a ikyon i tsan gbem je kpa aa hingir se er ka ayange a toho u ka u mende u ngôôr ga tsô shi u use la nahan, kpa se yô se za hemen u lun uma her gbem sha won!

20. Mba ve sue Tartor la sha mimi la vea hingir gbong gbong nena?

20 Se lu gbong gbong. Nyian ne, angev man ku tema tor sha ior cii. Inja na yô se cii se mba uange. Se gba icôronuange, u yer ér isholibo la. Ka nagh ku ipaan ku Kristu la tseegh kua fatyô u been se angev mbun ye. (Rom. 3:23; 6:23) Sha shighe u Hemen u Anyom Dubu la, Yesu man mba vea tema tor a na imôngo la vea wase ior u zuan a mtsera ken nagh kura, nahan a kar a isholibo i uumace mba jighjigh mbara kera kure kure, zan zan ia kar been. Nahan kwaghôron u profeti u ken Yesaia 33:24 la una kure sha mi sha gbenda u vesen. A kaa ér: “Ma or u nan tem ker kpaa nana kera kaa er: Kwagh nyoon mo, ga; ior mba ve tem heregh kpaa, á de ve asorabo a ve.” Hen ase shighe u or a kera pir ashe shin nana kondo ato shin nana gba iwan ga la. (Ôr Yesaia 35:5, 6.) Ma angev môm tsô kpa mbua gande Yesu u sôron ga, a̱ lu mbu sha iyol shin mbu ken ityou shin mbu ken ishima je kpaa. Mba ve suen Tartor sha mimi la cii, kwagh a kera nyoon ve mayange ga!

21. Ka nyi ia er ku, man er nan ve ityendezwa i sha kwagh u kuugh la i lu kwagh u surun we ishima?

21 Man gema kwagh u angev mbu ve a mi, u uumace cii ve tagher a mi sha ci u isholibo, u i yer ér ku la di ye? Ku ka “orihyom” wase “u masetyô,” ka orihyom u uumace mba ve lu vough ga mban cii ka ve va mase tagher a mi a kwagh u eren shio yô. (1 Kor. 15:26) Kpa ku ka orihyom u Yehova a lu a kwagh u eren un ga yôô? Nenge kwagh u Yesaia yange tsengaôron ne, ér: “Una tim ku sha won kera; Ter AÔNDO Una ese mliam sha ishiv mbi iorov cii.” (Yes. 25:8) Nenge ase a shighe la ken ishima you. Ku-iin a kera lu ga, iwar i mbakpenev kpa ia lu ga, shi or a kera vaa, a zungwe ku ga! Kwagh a gema a er kposo hen shighe la. Ior a lu vaan mliam ma iemberegh zum u Yehova una kure ityendezwa na i doon tsung i nderen mbakpenev la! (Ôr Yesaia 26:19.) Shighe ne ishimavihin i ku u ve ior kpishi a mi la ia bee.

22. Ka nyi ia er shighe u Tartor u Mesiya ua na a gema eren ishima i Aôndo shin tar laa?

22 Sha mkur u Hemen u Anyom Dubu la nahan, Tartor la ua er ishima i Aôndo shin tar a bee, maa Kristu una gema hemen la una na Ter na. (1 Kor. 15:25-28) Hen shighe la, uumace vea hingir vough, nahan vea wa agoyol u tagher a ikyaren i masetyô shighe u a dugh Satan shin ihungwa i i ze kweng kera la. Ikyaren  la ia been yô, Kristu una mase timin bo-iyô la vea ior nav cii. (Gen. 3:15; Mpa. 20:3, 7-10) Kpa mba Yehova a doo ve ishima sha mimi la yô, kwagh a er ve u doon tsung. Ka mkaanem ma i er ken takerada u Mbaromanu heen ne je i lu inja er ma hemba pasen kwagh ne doon cii ye. Mkaanem mara ka ityendezwa i Aôndo a er wener, mbajighjigh mbara vea lu ken “mlu u engem u lun a ikyangenev ga u ônov mba Aôndo la.”—Rom. 8:21.

Tartor ua er akaa a Yehova a tende zwa u eren a uumace shi a we ishima u eren shin tar la cii

23, 24. (a) Uityendezwa mba Yehova vea kure kpee a bunde ga sha ci u nyi? (b) U kange ishima u eren nyi?

23 Uityendezwa mba Aôndo mban cii ka ishimaveren i gbilinigh shin mnyamciem ga, shi i kpen tômon a tôm ga. Uityendezwa mba Yehova vea kure kpee a bunde ga! Sha ci u nyi? Umbur mkaanem ma Yesu ma se tim sha mi ken ityough ki hiihii ki takerada ne la. Yange tese mbadondon nav u eren msen hen Yehova ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mat. 6:9, 10) Tartor u Aôndo ka mhen u or tem tsô nan za due a mi ga. Ka kwagh u kpôô kpôô! Ngu hemen sha hegen. U hii u kuren uityendezwa mba Yehova ka anyom deri je ne, man ngu kuren ve ken nongo u Kristu sha igbenda i se kpa se lu nengen yô. Nahan yô, se na nen jighjigh ser, uityendezwa mba Yehova cii vea kure vough shighe u Tartor u Aôndo ua va ngohol tar ne cii ua lu sha ikyev i u la!

24 Se fa ser Tartor u Aôndo ua va. Se fa ser hanma kwagh u Yehova a tende zwa u eren cii yô, una er un. Sha ci u nyi? Sha ci u TARTOR U AÔNDO NGU HEMEN! Doo u hanma wase nana pine iyol i nan ér, ‘Tartor la ngu hemen mo kpa?’ Yô, se er nen kwagh u se fetyô cii sha er se lu sha ikyev i Tartor la hegen, se suen u sha mimi yô. Ka nahan ve se kuma u lun sha ikyev i mtemtor u vough man u perapera la gbem sha won ye!