U NGU henen Bibilo a or, maa u nenge nan ngu kpegher sha ityou, er nan zough a mkav sha ivur Bibilo i u sember timen sha mi vea nan yô. Nan kende tegheelee nan pine ér, “Inja na yô u ngu kaan wer Bibilo tese ér se va lu ken Paradiso shin tar ne gbem sha wonoo?” Or u ú dugh kwaghpasen vea nan imôngo la nan se tegheelee man nan pine ér, “I ôr ken Bibilo heela ér nyi?” Shile orhenen Bibilo la iyol je nan wa uwegh zwa, nan kaa ér: “Kpiligh mo iyol, ka hiin yam u ungwan imba kwagh la je ne!” Shi u umbur wer yange nan vande ôron imba kwagh ne a we ukasua kar ken ijime kpuaa, zum u nan hii fan ér iti i Aôndo kpôô kpôô ka Yehova yô.

I lu nahan or u ú henen Bibilo a nan nan er imbakwagh ne a we vee? Ior mba Aôndo kpishi imba kwagh ne er ve. Akaa nga kpuaa, a aa wase se u umbur hanma kwagh sha kwagh u iyua i injaa i i ne se ne yô, ka iyua i mfe u mimi la je la! Hide hen ase: U zua a iyua la nena? Se time sha mpin la ken vegher u hiihii ne. Gbenda u ior mba Aôndo ve lu zuan a mkav sha akaa a ken jijingi kure kure la ka ikyav i tesen wang ér Tartor u Aôndo ka gomoti kpôô kpôô. Tor u Tartor la, Yesu Kristu, er tom kpoghuloo anyom deri môm hegen, sha u nengen ér i tese ior mba Aôndo mfe u mimi.