Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Tartor u Aôndo Ngu Hemen!

 ITYOUGH 11

Akaa a I Ser sha Kwagh u Aeren Ase Sha Er Se Lu Uicighanmbaiorov Er Aôndo Yô

Akaa a I Ser sha Kwagh u Aeren Ase Sha Er Se Lu Uicighanmbaiorov Er Aôndo Yô

KWAGH U I TIM SHA MI KEN ITYOUGH KIN YÔ

Er Tor la a tese mba a lu hemen ve la u kuran atindi a Aôndo a we sha kwagh u aeren a wang la yô

Nenge ase er u nyôr ken tembe u ken won u tempel u Yehova u ken jijingi u hemban cii la ve a lu u yô

1. Ka kwagh u tan ihindi iyol u nyi Esekiel nenge a mini?

HEN sha kwagh ne: Tôô wer u ngu zurum a zege tempel u a engem shi a mondo ashe kpishi yô. Ortyom u ageegh tile ngu her sha er una tese u ijiir i i engem je i te ihindi iyol ne yô! U unde utsembe utaankaruhar maa u za ar hen hunda ugen ken ihinda ityar i tempel la. Ihinda ne ta u ihindi iyol kpishi. I tav kuma er angahar 100 nahan. Ape karen nyôron ken atô la, u nenge a ayou a mbakuran. I er mtôm mara er ka atineaviligh nahan, doo u nengen kpishi. Aluer u nenge a kwagh nahan kpôô kpôô er ngise profeti Esekiel nenge a mi, anyom a kar hegen er 2,500 nahan yô, u er nena?—Esek. 40:1-4, 10, 14, 16, 22; 41:20.

2. (a) Tempel u Esekiel nenge a mi la tile sha ityough ki nyi? (Nenge ngeren u shin kpe la kpaa.) (b) Akaa a i er sha tempel ne la tese se nyi?

2 Tempel ne lu tempel u ken jijingi u i tese Esekiel ken mpase u sha mnenge yô. Esekiel pase kwagh u tempel ne vindi vindi je yô, mpase la hii ken ityough 40 ki takerada u Esekiel la zan zan kighir ityough 48. Tempel ne tile sha akaa a Yehova a ne zwa ér i eren ken mcivir u mimi la. Hanma kwagh u sha tempel la yô, ngu a inja sha ci u mcivir wase ken ayange a masejime ne. * Ihinda i tempel i taven la tile sha ityough ki nyi? Ihinda la umbur se ér gba u mba ve civir Yehova sha gbenda u a ne zwa ér i eren mcivir u mimi la cii vea dondon atindi na a hemban cii man a perapera la. Atineaviligh a sha kpekpe u tempel la kpa tese ér gba u mbacivir Yehova vea dondon atindi na a perapera la, sha ci u ashighe agen ka a ter aviligh ken Bibilo yô, i lu ôron kwagh u perapera. (Ps. 92:12, NW) Ayou a mbakuran la di ka nyi? Kwagh la tese wang ér, mba ve vende u kuran atindi a Aôndo la cii, a lumun ér ve nyôr ken mcivir u mimi, u doon tsung, u una za a vese ken uma la ga.—Esek. 44:9.

3. Er nan ve gba u a za hemen u sôron mlu u mbadondon Kristuu?

3 Mpase u sha mnenge u Esekiel la kure sha mi nena? Er se vande nengen ken Ityough 2 ki takerada ne nahan, Yehova yange er tom a Kristu sha u sôron aeren a ior nav ken shighe u ikyarenegh, hii ken inyom i 1914 zan zan mhii u inyom i 1919 la. I sôr aeren ase hen shighe la tseegh maa kwagh bee? Ei! Ken anyom deri môm a a kar ne cii, Kristu ngu suen atindi a Yehova a we sha kwagh u aeren a wang la. Nahan yô, gba u a za hemen u sôron mlu u mbadondon un. Sha ci u nyi? Ityôkyaa yô, Kristu ngu kohol mbadondon un, mba ve lu duen ken tar u ú  hôngor ne, shi Satan kpa ngu den u meen ve sha u ve hide ve nyôr iyol ken ijimba i i dumbur ne ga. (Ôr 2 Peteru 2:20-22.) De se time sha igbenda itiar i i lu sôron aeren a Mbakristu mba mimi yô. Hiihii yô, se time sha kwagh u aeren a yange i sôr la, shi se time sha kwagh u vesen u i eren sha u wanger tiônnongo la. Maa se mase sha kwagh u tsombor.

Aeren a Ior mba Aôndo a Yange i Sôr ken Anyom a Karen La

4, 5. Ka ayom a nyi Satan a ndera eren tom a mini, man ka nyi i dugh kere?

4 Kwagh u aeren a wang man a perapera gba ior mba Yehova ishima kpen kpen. Sha nahan yô, ve ngohol akaawan a ve lu zuan a mi sha kwagh u aeren seer a seer la ave ahar. De se time sha akaawan ne agen.

5 Ijimba i eren. Yehova yange gba nomsoor man kwase na ve ian i yaven ayol a ve sha gbenda u wang man u doon tsung zum u ve er ivaa yô. Nahan kpa, Satan kôr iyua i doon tsung i Aôndo iyol na yange na or la nzughul a mi hingir kwagh u hôngorough shi ngu meen ior mba Yehova a mi sha er una nôngo yô, Aôndo a venda ve yô. Satan ngise yar ikyôr a ayom na ne sha shighe u Balaam la, shi ngu hemban eren tom a mi ken ayange a masejime ne cii.—Num. 25:1-3, 9; Mpa. 2:14.

6. Ka iceghzwa i nyi yange i gber ken Iyoukura, shi i dondon i nena, man er nan ve i va de kwagh u iceghzwa ne? (Nenge ngeren u shin kpe la kpaa.)

6 Iyoukura i Jun 15, inyom i 1908 la, yange i ôr iceghzwa igen sha u vihin ayom a Satan ne. Mkaanem magen ken iceghzwa la kaa ér: “Hanma ijiir i m lu sha hanma shighe cii, ieren yam a nomsoor shin kwase ken iuv ia lu kposo a ieren yam a nan ken igbar ga.” * Er iceghzwa ne lu kwagh u saa or a er keng ga nahan kpa, ior kpishi er i shi ve tindi a ati ve i gber ken Iyoukura i Shion. Er i nenge ér iceghzwa ne wase ior kpishi sha shighe la nahan kpa, anyom nga kar yô, i̱ lu hingir er ka adini nahan; maa i de kwagh u i. Nahan kpa, i de u dondon akaawan a sha kwagh u aeren a wang a i pase ken iceghzwa ne la ga.

7. Ken inyom i 1935 la, lu zayol u nyi Iyoukura ôr kwagh sha mini, man Iyoukura ne i umbur se nyi?

7 Satan yange seer tan num sha ior mba Aôndo her tsô. Iyoukura i Maaci 1, 1935 la i pase zayol ugen u ior mba Aôndo kpishi hii u lun a mi sha ayange la yô. Mbagenev lu henen ér, aluer mba pasen kwagh kpoghuloo yô, kera gba hange hange u vea lu kuran atindi a Yehova a we sha kwagh u aeren a wang la ga. Iyoukura la pase jighilii ér: “Gba u hanma or nana umbur nahan ér u eren tom u pasen kwagh la tseegh, kuma ga. Mbashiada mba Yehova ka ior mba i yer ve sha iti na yô, nahan yô, gba u vea er tom ve u tilen sha ityough ki Yehova shi suen tartor na la tsembelee.” Ngeren la maa wa kwagh wang sha kwagh u ivesegh man kwagh u yaven a or, nahan kwaghwan la wase ior mba Aôndo u ‘yevese idya.’—1 Kor. 6:18.

8. Er nan ve Iyoukura i pase inja i ishember i ken zwa Grika i i gem ér idya la kwa kimbir kimbiri?

8 Ken anyom a a sember karen ne, Iyoukura shi pase kwagh u por·neiʹa, ishember i ken Ruamabera u ken Zwa Grika i i gem ér idya la kwa kimbir kimbir. Inja i ishember la saa sha u yaven a or tseegh ga. Ishember i por·neiʹa la, ngi ôron kwagh u aeren a jimbagh wuee, kua aeren a dang a i eren sha ayou a mbaagbaga la kpaa cii. Sha nahan yô, i kura mbadondon Kristu sha atsan  a ior kpishi ve lu yan sha ci u ijimba i í dumbur shin tar nyian la.—Ôr Mbaefese 4:17-19.

9, 10. (a) Ka ieren i nyi, Iyoukura yange i time sha mi ken inyom i 1935 laa? (b) Bibilo i tese nyi sha kwagh u man msôrom akuma akumaa?

9 Msôrôm ma man karen ikyaa inya. Iyoukura i Maaci 1, 1935 la shi i time sha kwagh u ieren igen kpaa, i kaa ér: “I nenge yô, mbagenev ka ve ma ikyôhô, maa ve mough ve yem kwaghpasen shi ve eren ityom igen ken nongo u Yehova zum u ve me [msôrom] yô. Kpa Ruamabera lumun ér or a fatyô u man wain hanma shighe ciili? A lu or ma wain zan zan hingir u wain la una bende a tom u nan lu eren ken nongo u Ter nahan, a lu shami kpa?”

10 Mlumun u sha mbampin mbara pase mnenge u vough u Bibilo i lu a mi sha kwagh u msôr la. Bibilo i̱ yange wain man msôrom ma man akuma akuma ga, kpa i̱ venda ihyundugh ki msôrough taveraa je. (Ps. 104:14, 15; 1 Kor. 6:9, 10) Hanma shighe u i lu ôron ior mba Aôndo kwagh u ieren i man msôrom, za eren akaa a ken mcivir wase la yô, ka i umbur ve kwagh u ônov mba Aron, man i ndera umbur ve kwagh ne ica gba hegen. Ônov mba Aron yange ve nande usu ugen kposo sha atse a nan Aôndo nagh sha mi, u Aôndo na ve zwa sha u ga yô, nahan Aôndo wua ve. Mba kpen kera cii yô, Aôndo wa tindi ugen u yange pase ityôkyaa i alaghga ônov mba Aron mban er kwagh u vough ga la yô. Tindi la tswer upristi u man msôrom shighe u ve lu eren ityom ve yô. (Lev. 10:1, 2, 8-11) Mbadondon mba Kristu hen kwagh ken kwagh u yange er ne, nahan ka ve wa ikyo tsung sha er vea ma msôrom shighe u i gbe u vea za er ityom i ken jijingi la ga yô.

11. Er nan ve ior mba Aôndo ve lu a iwuese kpishi sha iwanger i ve lu zuan a mi seer a seer sha kwagh u ikyôhô i man laa?

11 Ken anyom a karen ne, mbadondon mba Kristu seer zuan a iwanger sha kwagh u man ikyôhô hanma shighe shi man i kpishi la. Se wuese kpishi er i ne se kwaghyan u ken jijingi sha shighe vough yô, gadia kwagh ne wase ior kpishi u nôngon a kwagh u ikyôhô i man kpoghuloo hanma shighe la, nahan msôrom kera ya tor ken a ve ga. Mbagenev kpishi kwagh ne wase ve u palegh zayol la jimin cii. Doo u mô wase nana de ér msôrom ma man kpishi ma yange nan icivir, shin ma vihi tsombor u nan ga, man u hemban cii je yô, ma yange nan u eren akaa ken mcivir u mimi u Yehova ne ga.

“Se fatyô u henen cuku kpaa ser Ter wase nahan, una suse taav a hide a lu toron mnyim shin una za a ma kwagh u hôngorough ken zwa na ga.”—C. T. Russell

12. Cii man mhii u ayange a masejime ne je kpa, mbadondon mba Yesu nengen kwagh u taav u man nena?

12 Taav u man. Mbadondon mba Kristu hii u vendan kwagh u taav u man cii man ayange a masejime ne hii kpaa ye. Ngise, anmgbian u been iyol ugen u i yilan un ér Charles Capen yô, umbur kwagh u er shighe u hii zuan shigh a Charles Taze Russell, i hembe anyom deri hegen la. Capen u lu anyom 13 hen shighe la, vea anmgbianev nav mbanomso utar lu sha tsembe u unden sha iyou i i yilan ér Bible House hen gar u Allegheny, ken kpentar u Pennsylvania la. Russell zough a ve, kar gbe yemen yô, a gema a pine ér: “M kar heen nahan m ungwa ihyuma taav, ka ne ne lu man taav yee?” Ve kaa a na ér mba man taav ga. Ikyav tese ér yange ve kav mnenge na sha kwagh u taav u man. Anmgbian Russell pase kwagh u i er ken  2 Mbakorinte 7:1 la ken Iyoukura i Agusutu 1, 1895 la, ér: “M nenge a kwagh môm u tesen ér aluer Orkristu ngu man taav shin eren nyityô kwagh igen a mi yô, a lu sha ci u icivir i Aôndo shin mtsera u nan ga. . . . Se fatyô u henen cuku kpaa ser Ter wase nahan, una suse taav a hide a lu toron mnyim shin una za a ma kwagh u hôngorough ken zwa na ga.”

13. Ka ieren i ior mba Aôndo i nyi yange i sôr ken inyom i 1973 laa?

13 Ken inyom i 1935 la, Iyoukura yila taav ér ka “ahu a hôngorough” shi i kaa ér, antior u nan tam un shi nan me un cii nana kera kuma u lun ken tsombor u Bethel shin eren tom u pania shin tom u zenden sha ken iti i nongo u Aôndo ga. Ken inyom i 1973 la i seer kôôm ior mba Aôndo sha kwagh ne. Iyoukura i Jun 1, yange i pase ér Orshiada u Yehova u nan de ieren i wuan or, i hôngorough man i tesen dooshima ga ne cii yô, nana vihi mlu u nan vea nongo u Kristu. Mba yange ve venda u den kwagh u taav cii yô, i dugh ve ken tiônnongo kera. * Lu kwagh u vesen ugen u Kristu er sha u wanger mbadondon un je ne.

14. Aôndo wa tindi sha kwagh u awambe ér nyi, man kwagh u awambe a tan la samber sha tar wuee nena?

14 U nzughul a awambe. Sha ayange a Noa la, Aôndo kaa ér u yan awambe ka kwaghbo. Shi va kimbir pasen kwagh ne ken Tindi u na ikyurior i Mbaiserael la, shi kaa a nongo u Kristu nahan ér, “ve̱ nyagh . . . awambe.” (Aer. 15:20, 29; Gen. 9:4; Lev. 7:26) Nahan kpa, i de kpiligh se iyol ga, Satan zua a gbenda sha ayange ne u mgbeghan ior kpishi sha u ve per tindi u Aôndo a we sha kwagh u awambe ne yô. Mbatwerev hii kwagh u tan ior awambe la hemba anyom deri môm hegen, nahan kpa, yange mba va fe kwagh u atô awambe kposo kposo yô, kwagh ne hemba samber cii. Ken inyom i 1937 la, i hii kwagh u kuran awambe a ior koson her la, shi Ityav mbi Tar Cii Mbi sha Uhar mbira na kwagh u awambe a tan sa kwan yem a yem hemen. Ica i gba ga je maa mbatwerev gema tan ior awambe sha tar wuee.

15, 16. (a) Mbashiada mba Yehova yange ve kange ishima u eren nyi sha kwagh u awambe a tana? (b) Ka iwasen i nyi mbadondon Kristu ve zough a mi sha kwagh u awambe a tan man twer u eren a awambe shio laa, man ka nyi i dugh kere?

15 Kpa hii ken inyom i 1944 la je, Iyoukura pase ér, awambe a tan ka gbenda ugen u yan awambe jighilii je. Ken inyom i dondon la, i seer zuan a iwanger sha mnenge u Ruamabera sha ikyaa ne, shi i seer taver mnenge ne. Mba ker ken inyom i 1951 yô, i gber mbampin man mbalumun mba vea wase ior mba Aôndo u lamen a mbatwerev yô. Mbadondon Kristu mba jighjigh sha tar cii, yange ve kange ishima u tilen sha kwagh u Ruamabera a tese sha ikyaa ne la, shin er ashighe agen i naha ve tar, shin i er a ve dang, gayô i tôv ve a ican nahan kpaa. Kpa Kristu za hemen u mgbeghan nongo na ér u sue ior nav. Yange i gber antakeradav kua ungeren mba ve pase akaa a i time sha mi vighe vighe yô.

16 Ken inyom i 1979 la, mbatamen mbagenev hii u zan hen ayoucii, za wasen mbatwerev u kaven mtil wase sha kwagh u awambe wang, man atôakyaa a ken Ruamabera a se te awambe ga yô, kua igbenda i vea fatyô u sôron twer a awambe shio yô. Ken inyom i 1980 la, i tsaase mbatamen ken agar a vesen 39 ken tar u Amerika tsembelee sha ci u tom ne. Shighe kar yô, Mbahemenev mba Shin Itine kaa ér, i̱ tsua anmgbianev sha ajiir kposo kposo sha tar ve lu ken Kômatii u Wasen sha Kwagh u  Iyouci. Kwagh u injaa due ken iniôngon ve ne ken anyom a karen ne je he? Nyian ne, mbatwerev udubu udubu mba eren kwagh ken ijouave vea mbauangev mba ve lu Mbashiada yô; ka vea soo ér i̱ er ve twer a awambe shio yô, mbatwerev mban ve lumun u eren ve twer u sha ishima ve la. Ayouacii kpishi nga lumun u eren twer a awambe a tan shio, shi agen je yô, nenge ér ka gbenda u ú hembe doon u eren twer je la. Sha mimi yô, ka wea hen sha igbenda i Yesu a lu kuran mbadondon un shin er Satan a lu nôngon kpoghuloo ér una hôngor ve la nahan, i doo u ga he?—Ôr Mbaefese 5:25-27.

Ayouacii kpishi nga lumun u eren twer a awambe a tan shio shi agen je yô, nenge ér ka gbenda u ú hembe doon u eren twer je la

17. Se tese ser gbenda u Kristu a lu sôron aeren a mbadondon nav la doo se nena?

17 Doo u se pine ayol a ase ser, ‘Gbenda u Kristu a lu sôron aeren a mbadondon nav, shi tesen se u kuran atindi a Yehova a we sha kwagh u aeren a wang la, doo se kpa?’ Aluer u doo se yô, gba u se umbur ser, hanma shighe yô Satan ngu a nôngon ér se de kera we ikyo sha akaa a Aôndo a we sha kwagh u aeren a wang la ga, sha er una pav se a Yehova man Yesu yô. Nongo u Yehova kpa u tema a tema ga, ngu wan se kwagh hanma shighe sha dooshima, shi umbur se igbenda i tar ne u uve ityough ken aeren a bo la. Yô, se lu nen tsevaa, se keghen nen ato shi se dondon nen kwaghwan u injaa la.—Anz. 19:20.

 U Kuran Tiônnongo sha Er A Yange Ityuhwanev mbi Aeren Bo Nga a Va a Mi La

18. Mpase u sha mnenge u Esekiel la tese nyi sha kwagh u mba ve nômbo ikyôr u hemban Yehova ato laa?

18 Gbenda u sha uhar u i lu sôron aeren a ior mba Aôndo yô, ka kwagh u i eren sha u tiônnongo a lu wang la. Kwagh er vihi yô, ka ior mba ve lumun atindi a Yehova a we sha kwagh u aeren a wang shi ve tsegh ayol a ve sha ci Na la cii ve eren sha iceghzwa ve la ga. Mbagenev ishima ngi i va gema ve ker, nahan ve per atindi ne sha apera. Gba u a er a ambaaior la nena? Kwagh u tempel u ken jijingi u Esekiel nenge a mi u i pase ken mhii u ityough kin la, wase se u fan kwagh môm u a fatyô u eren a ambaaior la yô. Umbur kwagh u ihinda i tempel ne i taven la. Hanma ian i karen nyôron yô, ayou a mbakuran nga her. Ikyav tese ér mbakuran mbara kuran tempel la sha er or u nan “tsenge ken ishima ga” cii yô, nana nyôr ker ga yô. (Esek. 44:9) Kwagh ne tese ér, ka mba ve lumun u dondon aeren a wang a Yehova la tseegh ian i civir un sha mimi ne i lu sha ci ve ye. Kape ian i eren akaa vea Mbakristu imôngo la kpa i lu sha ci u hanma or nyian ga je la.

19, 20. (a) Kristu wase mbadondon nav kure kure u sôron gbenda u ve nengen sha kwagh u mba ve er asorabo a vesen la nena? (b) Ka sha atôakyaa atar a nyi nahan, a fatyô u dughun orsholibo u nan vende u geman ishima la ken tiônnongo kera?

19 Ken inyom i 1892 la, Iyoukura kaa ér, ka “tom wase (se Mbakristu) u dughun mba ve vende ken igbar shin ken myer ér, Kristu na nagh sha uma na sha u paan [u kimbin kwagh u vough sha ci u] ior cii ga la, ken nongo u Kristu kera.” (Ôr 2 Yohane 10.) Ken inyom i 1904 la, takerada u The New Creation, kaa ér, mbara mba ve nômbo ikyôr u eren akaa a bo la, vea fatyô u vihin tiônnongo gburu gburu. Sha ayange la yô, tiônnongo jimin cii a tema “ijir i côôci” sha u nengen sha asorabo a vesen a ior ve er yô. Kpa, i faan eren kwagh ne ga. Ken inyom i 1944 la, Iyoukura kaa ér ka anmgbianev mba ve lu a ityom ken tiônnongo tseegh ve ôron ajir ye. Ken inyom i 1952 la, i gber ngeren u tesen er á fatyô u sharen or ijir la ken Iyoukura, ngeren la pase ityôkyaa i vesen i í gbe u a dugh mbaasorabo mba ve vende u geman ishima la ken tiônnongo kera yô; lu sha u tiônnongo a lu wang yô.

20 Hii shighe la je zan zan, Kristu ngu wasen mbadondon nav u zuan a iwanger sha igbenda i vea nenge sha kwagh u asorabo a vesen a ior ve er la shi ngu wasen ve u nyôôso igbenda shon kpaa. I tsaase mbatamen mba ken Kristu tsema tsema u ôron ajir sha mimi man sha mhôôn er Yehova a soo la. Nyian ne, a hemba kpa se fatyô u nengen a atôakyaa atar, a i hii ve ka i dugh orsholibo u nan vende u geman ishima ken tiônnongo kera yô. Ka atôakyaa shon je ne: (1) sha u kwagh la a de ve a ityuhwanev sha iti i Yehova ga yô, (2) sha u a kura tiônnongo er isholibo i vesen i or er la ia hôngor un ga yô, man (3) sha u alaghga a wase orsholibo la, nana gema ishima yô.

21. Er nan ve kwagh u dughun orsholibo u nan vende u geman ishima ken tiônnongo kera la, i lu kwagh u wasen ior mba Aôndo?

21 We u nenge er kwagh u dughun or ken tiônnongo sha la a lu iveren hen mbadondon mba Kristu nyian kpa? Sha shighe u Mbaiserael la, ashighe agen mbaasorabo ve vihi ikyurior la  sha aeren ve la, ashighe agen je yô, yange ve hemba ngeen a mba Yehova a doo ve ishima, ve lu nôngon u eren kwagh u vough la. Sha nahan yô, ashighe kpishi ikyurior la i va a ilyahan sha iti i Yehova, nahan Yehova a gema ijime a ve. (Yer. 7:23-28) Nyian ne, Yehova ngu eren tom a nomso man kasev mbajighjigh. Er i dughun mbaasorabo mba ve vende u geman ishima mbara hen atô wase kera yô, mba den ér ve hingir ityumugh ki Satan una er tom a mi u seer vihin kwagh ken tiônnongo shi hôngor un ga. Ka i gba u a wa ikyo sha er ieren ve la ia samber ga yô. Nahan se mba a vangertiôr ser Yehova una gema ijime a nongo u mbacivir un ga. Umbur wer, Yehova tôndo zwa ér: “Hanma ityumugh ki i var sha ci u vihin we iyol, ikôl ia lagh ki ga.” (Yes. 54:17) Se mba suen mbatamen mba ve eren tom u vesen u ôron ajir la kpa?

U Wuese Un u Icombor Cii I Dugh hen a Na La

22, 23. Doo u se wuese ieren i anmgbianev asev mba ngise ve lu uma er anyom 100 nahan ken ijime la sha ci u nyi, kpa ka nyi i tese ér yange gba u vea seer wan icombor ve ikyo?

22 Gbenda u sha utar u i lu sôron mlu u mbadondon mba Kristu ve ve lu zuan a iwasen kpishi yô, ka sha kwagh u ivaa i eren man uma u hen tsombor. I sôr mnenge wase sha kwagh u tsombor ken anyom a karen nee? Een. U tesen ikyav yô, ka sea ôr kwagh u mbacivir Aôndo mba yange ve lu uma er anyom 100 nahan ken ijime la yô, i kpiligh se iyol shi i doo se u nengen er ve na ayol a ve u eren tom u Yehova yô. Se wuese ieren ve i veren kwagh u mcivir ve hiihii ken uma ve la. Nahan kpa, aluer se nenge tsembelee yô, yange gba u vea eren kwagh akuma akuma. Se ôr nahan sha ci u nyi?

23 Ashighe kpishi anmgbianev eren tom u pasen kwagh shin tom u ningir sha, nahan ve undun icombor ve iwer imôngo. Ashighe agen je yô, i taver ior ishima u lun kwav je i za per uwer, i hemba kwagh u Bibilo i tese la, shi i faan tesen Mbakristu er vea taver avese a ve ga. Nyian kpa, kape mbadondon Kristu ve eren laa? Mayange ga cii!

Se mba ne ishima sha ityom i Yehova je ka hembe se u nengen sha icombor yase ga

24. Kristu wase ior nav mbajighjigh mbara u zuan a kwaghwan u ken Ruamabera u una wase ve sha kwagh u ivesegh kua uma u hen tsombor nena?

24 Nyian ne, se mba ne ishima sha ityom i Yehova je ka hembe se u nengen sha icombor yase ga. (Ôr 1 Timoteu 5:8.) Shi Kristu wase mbadondon nav mbajighjigh mba ve lu shin tar la mba zuan a kwaghwan u ken Ruamabera hanma shighe u a wasen ve sha kwagh u ivesegh kua uma u hen tsombor yô. (Ef. 3:14, 15) Ken inyom i 1978 la, i due a takerada u Making Your Family Life Happy la. Anyom nga kar 18 yô, i due a takerada u Kwaghmyer u Msaanyol hen Tsombor la. Shi i gber ungeren kpishi ken Iyoukura mba vea wase noov man kasev u dondon akaawan a Ruamabera ken ivese ve yô.

25-27. Nongo u Yehova er akaa ken anyom a karen ne a tesen ér u wa mbayev mba lun anyom kposo kposo ikyo nena?

25 Man mbayev di ye? Ve kpa, ken anyom a karen ne cii i kende ve ga, i lu wan ikyo sha mbamgbe vev seer a seer. Nongo u Yehova ndera duen a akaa a injaa sha ci u mbayev mba lun anyom kposo kposo ica gba hegen. Sha hiihii la akaa ne lu kpuaa, kpa a dumbur hegen. U tesen ikyav, ngise i hii u gberen ngeren u Bibilo i henen sha ci u agumaior, ken magazin u The  Golden Age ken inyom i 1919 zan zan 1921 la, i yilan ér “Juvenile Bible Study.” Ken inyom i 1920 la di, i due a antakerada ugen i yilan ér, The Golden Age ABC, shi i due a takerada ugen ken inyom i 1941 la, i yilan ér Children. Ken kwavanyom u 1970 la, i due a takerada u Listening to the Great Teacher man u Your Youth—Getting the Best out of It la, kua Takerada Wam ú Akaaôron a Bibilo. Ken inyom i 1982 la, i hii u gberen ngeren u “Young People Ask” la ken magazin u Awake!, shighe kar yô, i gema ngeren mban hingir takerada u Questions Young People Ask—Answers That Work la, i gber takerada ne ken inyom i 1989 la.

Yange ior zua a antakerada u Akaa a Bibilo I Tesen Mo La hen mkohol ne ken tar u Jamani nahan, saan ve iyol je gande

26 Nyian ne, se mba a takerada u Young People Ask la, Tihi u sha 1 man 2, shi i za hemen u gberen ngeren mba sha kwagh u mbampin mba ikyaior la, sha ijiir yase i sha Intanet i jw.org la. Shi se mba a takerada u Hen Kwagh sha Ikyev i Ortesen Uhemban La. I ver akaa kpishi a i er sha ci u agumaior yô hen ijiir yase i sha Intanet la, er ukaade mba pasen kwagh u ior mba ken Bibilo man ngeren mba timen ken Bibilo sha ci mbayev kiriki man mba ve we ganden yô, kua anumbe man uvidio man akaaôron a ken Bibilo kua ngeren u akaa a Bibilo i tesen mo la sha  ci u mbayev mba ve lu anyom atar shin i yen nahan la. Sha mimi yô, hii shighe u Kristu kuve mbayev sha ayange a mbaapostoli la je, ngu a gema gbenda u a eren kwagh a mbayev la ga. (Mar. 10:13-16) A soo ér agumaior ase, a fa er a doo se ishima yô, shi a soo ér i koson ve ken jijingi kpa tsembelee.

27 Yesu shi soo ér i kuran mbayev sha er kwagh a er ve ga yô. Ken tar u anza a dang a lu yemen aôndo aôndo ne, ieren i nzughul a mbayev la ngi seer a seer. Sha nahan yô, i gber ngeren mba ve pase kwagh u ieren ne wang yô, sha er vea wase mbamaren u kuran mbayev vev sha ieren i vihin tsung ne yô. *

28. (a) Er i tese ken mpase u sha mnenge u Esekiel la nahan, aluer se soo u lun ken mcivir u mimi yô, ka nyi i gbe u se eree? (b) U kange ishima wer u er nyi?

28 Ka sea gbidye kwar sea nenge er Kristu a ze hemen u sôron mlu u mbadondon un, tesen ve u kuran atindi a Yehova a sha kwagh u aeren a wang la, sha er vea zua a mtsera nahan, i lu kwagh u doon se ga he? Hide shi hen sha kwagh u tempel u Esekiel nenge a mi la. Umbur ihinda na i taven la. Kpa jighilii yô, tempel la ka imaagh kpôô kpôô ga, ka tempel u ken jijingi. Nahan cii kpa, se nenge ser ka kwagh u a lu jim jim je he? Se mba nyer ken tempel ne sha u zan mkombo ken Iyou i Tartor shin bughun Bibilo shin za keman ior a ve sha ihinda pasen ve kwagh tsô ga. Ngura ka akaa a i nengen a mi sha ashe tseegh yô. Or u wan atseregh kpa nana fatyô u eren akaa ne, kpa mayange nana nyôr ken tempel u Yehova la ga. Nahan kpa, aluer se mba eren akaa la, shi kuran atindi a Yehova a we sha kwagh u aeren a wang la, shi eren ityom i ken mcivir u mimi la a ishima i vough yô, tese ér se nyôr ken icighan ijiir u hemban cii la, se mba civir Yehova ker! Icighan ijiir ne ka akaa a Yehova a ne zwa ér i eren ken mcivir na u mimi la. Yô, ian i icivirigh ne i gbaan se kwagh hanma shighe cii. Se za nen hemen u nôngon sha afatyô wase cii sha er se kuran atindi a Yehova a perapera la, nahan se lu uicighanmbaiorov er Yehova nahan!

^ par. 2 Ken inyom i 1932 la, i hii pasen ken takerada u Vindication, tihi u sha 2 la ér, akaaôron a profeti a Bibilo i er sha kwagh u mhidi u ior mba Aôndo ken tar ve la, nga kuren nyian sha Iserael u ken jijingi la, ka sha tar u Iserael kpôô kpôô ga. Akaaôron la tese er a va hide a hii mcivir u mimi yô. Iyoukura i Maaci 1, 1999 la pase ér tempel u Esekiel nenge a mi la, lu sha kwagh u mcivir u mimi u a hide a hii la, nahan yô, kwaghôron u profeti la ngu kuren ken ayange a masejime ne ken jijingi.

^ par. 6 Iceghzwa la yange i tswer nomsoor man kwase u lun ken iyou ve uhar tseegh, aluer gba u vea lu ken iyou ve uhar tseegh yô, saa vea ver hunda ivegher gbangeraa, gayô saa vea lu ior mba ve vese ayol a ve shin anmgbianev mba hen tsombor môm tseegh. Yange i kimbir iceghzwa ne hanma iyange shighe u tsombor u Betel ua eren Mcivir u Pepe yô. I er kwagh ne anyom imôngo.

^ par. 13 Aluer or ngu man taav shin nan ngu tamen un gayô nan ngu man kule-taav, shin nan kaha taav sha ci u atôôkyaa ne yô, tese ér nan de kwagh u taav ga.

^ par. 27 U tesen ikyav yô, nenge ityough 32 ki takerada u Hen Kwagh sha Ikyev i Ortesen Uhemban La; shi nenge Awake! u Oktoba 2007, peeji 3 zan zan 11.