U ER orwanndor a we ugen uwegh er u lu karen gbenda ikyua a ya na la. Semberee ne, u nenge er ka wea karen vea tsombor wou ve, a kenger ne yô. Un kpa a er u uwegh, maa a yila u. A kaa a we ér: “M soo u pinen we ankwagh. Er nan ne lu inja kposo nahana?” U kende u pine un wer, “Se mba inja kposo nena?” Maa a pine ér: “Ne mba Mbashiada mba Yehova zan ga̱? Ne mba er ior mbagenev nahan ga. Adua wen kpa ngu kposo. Ne mba ye kirimishi ga, inyom i he kpa ga, pati kpa ne mba eren ga, shi ityav kpa ne mba nenge ga. Or wen môm nan me taav ga. Tsombor wou cii ngu eren kwagh jighilii. Er nan ve ne lu kposo sha igbenda kpishi nahana?”

U fa er se eren akaa ne ga sha ci u ityôkyaa ne yô: Se mba sha ikyev i hemen u Tartor u Aôndo. Yesu u a lu Tor wase la ngu wanger se ayange ayange. Ngu wasen se u dondon ikyav na la, sha er se lu kposo a ior i tar u bo ne yô. Vegher u takerada ne u sha 3 ne, una wase se u nengen er Tartor u Mesiya la u lu wanger ior mba Aôndo ken jijingi man sha aeren a ve kua nongo ve kpaa cii, sha ci u icivir i Yehova yô.