Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Tsombor Wou Ua Fatyô u Lun ken Msaanyol

 VEGHER U SHA 8

Shighe u Kwaghbo a Er Ne Yô

Shighe u Kwaghbo a Er Ne Yô

“Ancan u peesa u sha anshighe kpeghee ne ngu sôron se a sôr iengem i tsôron i vesen i ganden cii.”—2 Mbakorinte 4:17

Nea nôngo nan nan ner ivese yen i doo shi i saan tsombor wen iyol kpa, ashighe agen akaa aa er ne aburabur, a aa na ne ure yô. (Orpasenkwagh 9:11) Aôndo ka a wase se shighe u se tagher a mbamtaver yô, sha ci u se doo un ishima. Aluer ne dondo akaawan a Bibilo a a lu shin heen ne yô, aa wase ne kua tsombor wen cii, ken mbamlu mba taver tsung je kpaa.

 1 SUUR NEN SHA YEHOVA

KWAGH U BIBILO I KAA YÔ: “Gema nen ishima i nyian yen la cii, haa nen sha a Na, gadia ka Un A lu koson ne ye.” (1 Peteru 5:7) Umbur wer ka Aôndo se na un ibo sha ameen a se tagher a mi la ga. (Yakobu 1:13) Aluer ne kporom hen Aôndo yô, una wase ne sha gbenda u hemban doon cii. (Yesaia 41:10) “Pase nen asema a en sha ishigh Nagh.” —Pasalmi 62:8.

Shi aluer ne mba ôron Bibilo shi timen ker ayange ayange yô, ne zua a ishimasurun kpishi je. Nahan ne nenge er Yehova “a surun se asema sha atsan a ase cii” yô. (2 Mbakorinte 1:3, 4; Mbaromanu 15:4) A tôndo zwa u nan ne “bem u Aôndo u a gande hanma mfe wase cii” la.—Mbafilipi 4:6, 7, 13.

KWAGH U NE FATYÔ U EREN YÔ:

  • Sôn nen Yehova a wase ne u kundun ishima shi eren mhen tsembelee

  • Hide hen nen sha akaa a ne soo u eren la, nahan tsua nen kwagh u a hembe lun a inja, u ne er yô

2 NENGE SHA IYOL YOU MAN TSOMBOR WOU CII

KWAGH U BIBILO I KAA YÔ: “Ishima i orkavenkwagh ka i zua a mfe, ato a orfankwagh kpaa nga keren mfe.” (Anzaakaa 18:15) Fa kwagh u a lu inya la. Fa kwagh u hanma or hen tsombor wou nan soo yô. Lamen a ve. Shi keghen ato a ve kpaa.—Anzaakaa 20:5.

Kpa zum u or wen nan kpe di ye? Kunya u de ker ne u zungwen ga. Umbur wer Yesu je kpa yange “vaa.” (Yohane 11:35; Orpasenkwagh 3:4) Heela tseegh ga, doo u ne yav shi ne mem tsembelee. (Orpasenkwagh 4:6) Kwagh ne una na yô, a lu ne ican u wan ishima a ma kwaghbo u a er ne ga.

KWAGH U Ú FATYÔ U EREN YÔ:

  • Lamen a tsombor wou hanma shighe cii, i de lu shighe u zayol a ve tseegh ga. Nahan shighe u zayol a za ve kpa, mba hen tsombor wou vea lam a we gbar gbar

  • Lam a mbagenev mba alaghga ve kpa ve tagher a imba zayol la yô

 3 ZUA NEN A IWASEN I NE KEREN LA

KWAGH U BIBILO I KAA YÔ: “Huror yô, lu a dooshima gbem, man shi i mar anmgbian sha ci u ayange a ican.” (Anzaakaa 17:17) Alaghga azende a en soo u wasen ne, kpa nga fan kwagh u aa er jighilii ga. (Anzaakaa 12:25) Heela tseegh ga, pine nen mba ve fe Bibilo tsembelee yô, ve tese ne er ne dondo akaawan a Bibilo yô. Akaawan a ken Bibilo a vea wa ne la aa wase ne.—Yakobu 5:14.

Aluer ne mba lun vea ior mba ve ne Aôndo jighjigh sha mimi shi ve lu suur sha uityendezwa nav la yô, ne zua a iwasen i ne keren la. Shi aluer ne kpa ne mba wasen mbagenev mba i gbe u a taver ve ishima la yô, ne zua a msurshima kpishi. Pase nen ve jighjigh u ne ne Yehova kua uityendezwa nav la. Eren nen tom u wasen mba i gbe u a wase ve la kpoghuloo, shi de lu nen paleghaa a mba ne doo ve ishima shi ve we ne ikyo la ga.—Anzaakaa 18:1; 1 Mbakorinte 15:58.

KWAGH U NE FATYÔ U EREN YÔ:

  • Lam nen a ma ijende yen i i lu a ven kôôsôô yô, nana wase ne

  • Pase nen nan akaa a ne soo la wang man sha mimi kpaa