Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 IAVEN I SHA 14

Aôndo Ngu a Nongo sha ci u Nyi?

Aôndo Ngu a Nongo sha ci u Nyi?

1. Aôndo yange kohol Mbaiserael cii ve hingir nongoior môm sha ci u nyi?

Aôndo yange kohol ônov mba tertamen Aberaham cii ve hingir ikyurior shi na ve atindi kpaa. Yange yila ikyurior la ér “Iserael.” Lu ikyurior ne tseegh i lu a mcivir u mimi shi Aôndo na ve mkaanem nam ye. (Pasalmi 147:19, 20) Nahan lu u akuraior a sha won cii aa zua a iveren sha ikyev i Iserael.—Ôr Genese 22:18.

Aôndo yange tsua Mbaiserael ve lu mbashiada nav. Akaa a yange er Mbaiserael mba sha ayange a tsuaa la wase se u fan mtsera u ior ka ve zua a mi zum u ve kor atindi a Aôndo yô. (Duteronomi 4:6) Nahan lu u akuraior agen cii aa fa Aôndo u mimi la sha ikyev i Mbaiserael.—Ôr Yesaia 43:10, 12.

2. I kohol Mbakristu mba mimi cii ve hingir nongoior môm sha ci u nyi?

Shighe kar yô, Yehova Aôndo venda Iserael, a gema a ver nongo u Kristu sha ityough ki ikyurior la. (Mateu 21:43; 23:37, 38) Nyian ne, Mbakristu mba mimi kar tile sha ityough ki Mbaiserael, mbá mbashiada mba Yehova, er ngise Mbaiserael kpa lu mbashiada nav nahan.—Ôr Aerenakaa 15:14, 17.

Yesu yange kohol mbadondon un ve hingir nongoior môm sha u ve er shiada sha kwagh u Aôndo shi ve gema akuraior cii a hingir mbahenen. (Mateu 10:7, 11; 24:14; 28:19, 20) Tom ne ngu zan u za kuusu hegen u se lu ken ayange a masetyô ne. Ka hiin je Yehova a kohol ior umiliôn umiliôn ken akuraior cii ken mcivir u mimi ne. (Mpase 7:9, 10) I kohol Mbakristu mba mimi cii ve hingir nongoior môm sha er vea taver ayol a ve asema shi vea wasen ayol a ve yô. Mba tesen ve ityesen i môm ken Bibilo ken mbamkombo vev sha tar jimin cii.—Ôr Mbaheberu 10:24, 25.

 3. Kwaghaôndo u Mbashiada mba Yehova yange hii sha shighe wase ne nena?

Ken kwavanyom u 1870 la, annongo ugen u henen Bibilo yange hii u kaven akaa a mimi a ken Bibilo, a ior kera fa a ga ica i gba yô. Yange ve fa er Yesu kohol nongo u Kristu ér u̱ yôô angwe u Tartor u Aôndo sha tar jimin cii yô, nahan ve hii u pasen kwagh u Tartor sha tar cii. Ken inyom i 1931 la, ve tôô iti i Mbashiada mba Yehova la.—Ôr Aerenakaa 1:8; 2:1, 4; 5:42.

4. I kohol Mbashiada mba Yehova cii ve hingir nongo môm nyian nena?

Sha ayange a mbaapostoli la, iniongo i Kristu i ken ityar kpishi zuan a iwasen hen mbahemenev mba shin itine mba ve nenge Yesu ér ngu Ityough ki nongo u Kristu la. (Aerenakaa 16:4, 5) Nyian ne kpa, Mbashiada mba Yehova mba zough a iwasen hen Mbahemenev mba Shin Itine mba ve lu mbatamen mba lun a mkav kpishi la. Mbahemenev mban mba nengen sha afishi a Mbashiada mba Yehova kposo kposo, ape i geman ityakerada i henen Bibilo a mi shi i gberen i ken ijô i i hembe 600 yô. Nahan Mbahemenev mba Shin Itine mban mba taver iniongo i Kristu i Mbashiada mba Yehova i i hembe 100,000 la asema, shi mba we i kwagh ken Ruamabera kpaa. Ken hanma nongo u Kristu cii, ior mba ve kom yô, mba eren tom u mbatamen, shin mbakuran. Ior mban mba kuran iyongo i Aôndo sha dooshima.—Ôr 1 Peteru 5:2, 3.

I kohol Mbashiada mba Yehova ve hingir nongo môm sha u ve pase loho u dedoo shi ve gema ior ve hingir mbahenen yô. Se mba pasen ior kwagh ken uya vev er mbaapostoli kpa eren nahan. (Aerenakaa 20:20) Shi ka se na ayol a ase sha u henen Bibilo a ior mba kwagh u mimi a doo ve ishima tsung la. Kpa Mbashiada mba Yehova, ka di ior mba i kohol ve ve lu nongo môm tsô ga. Se mba tsombor môm, u lun a Ter u se doo un ishima yô. Se mba anmgbianev mba nomso man mba kasev mba ve we ayol a ve ikyo yô. (2 Mbatesalonika 1:3) Er i kohol ior mba Yehova ken nongo môm sha u ve eren ishima i Yehova shi ve wasen mbagenev yô, mba ken tsombor môm u i hembe saan u iyol a hanma tsombor ugen sha tar cii yô.—Ôr Pasalmi 33:12; Aerenakaa 20:35.