Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Loho U Dedoo U Ú Dugh Hen Aôndo La!

 Iaven I Sha 13

Ka Nyi ia Va Er Ukwaghaôndo?

Ka Nyi ia Va Er Ukwaghaôndo?

1. Ka ukwaghaôndo cii ve doo yee?

Iniongo i kwaghaôndo kpishi ngi a ior mba mimi mba ve soo u eren ishima i Aôndo yô. Aôndo nengen a ambaaior la shi we ve ikyo kpaa. Nahan kpa, kwagh er vihi yô, ior mbagenev gema kwaghaôndo hingir ve gbenda u eren akaabo. (2 Mbakorinte 4:3, 4; 11:13-15) Akaa a i ôron sha abaver la tese ér, ukwaghaôndo mbagenev je yô nyôr iyol ken tswam u eren man atemtyo man ityav mbi nôngon kua ieren i nzughul a mbayev. Sha kpôô yô, ior mba nan Aôndo jighjigh sha mimi ka vea nenge akaa ne nahan, ishima i vihi ve kpen kpen!Ôr Mateu 24:3-5, 11, 12.

Kwaghaôndo u mimi ne Aôndo icivir, kpa kwaghaôndo u aiegh yô, gem eren akaa a vihin Aôndo ishima ker. Kwaghaôndo u aiegh tesen akaa a a lu ken Bibilo ga yô, shi ngu a atesen a aiegh a sha kwagh u Aôndo man mbakpenev. Nahan kpa, Yehova soo ér ior ve fa mimi sha kwagh na.Ôr Esekiel 18:4; 1 Timoteu 2:3-5.

2. Ka nyi ia va er ukwaghaôndo?

Kwagh er doo yô, ukwaghaôndo mba ve senge ér Aôndo doo ve ishima, kpa i gem i lu tar u Satan jighilii u doo ve ishima la, Aôndo lumun a aeren a ve la ga. (Yakobu 4:4) Mkaanem ma Aôndo yila ukwaghaôndo mbaaiev cii ér “Zegebabilon.” Babilon lu gar u ngise mcivir u aiegh hii ker, shighe u i tim tar sha Mngerem ma Deemee, sha ayange a Noa la. Ica a kera gba ga tsô, Aôndo una tim ukwaghaôndo mba ve tsughun uumace shi ve nzughul a ve la kera.Ôr Mpase 17:1, 2, 5, 16, 17; 18:8.

Nahan cii kpa, Yehova hungur a mbaasemaamimi mba ve lu ken ukwaghaôndo mbaaiev kposo kposo sha tar la ga. Ngu kohol ambaaior la imôngo sha u tesen ve mimi.Ôr Mika 4:2, 5.

 3. Gba u mbaasemaamimi vea er nyi?

Kwaghaôndo u mimi ngu wasen ior u lun ken mzough

Yehova we ior mba kwagh u dedoo kua mimi a doo ve ishima la ikyo. Ngu kaan a ve ér ve due ken kwaghaôndo u aiegh kera. Ior mba Aôndo a doo ve ishima cii yô, kegh iyol u geman sha er vea er ishima i Aôndo yô.Ôr Mpase 18:4.

Sha ayange a mbaapostoli la, zum u mbaapostoli pase mbaasemaamimi loho u dedoo yô, ve ngohol u a iember. Yehova yange tese ve gbenda u he u eren akaa ken uma ve; lu gbenda u ua na a hemba saan ve iyol, shi vea fa kwagh u uma ve a til sha mi shi vea lu a ishimaverenkeghen kpaa yô. Yange ve ngohol loho u dedoo la, ve lu eren akaa ken uma ve a tesen ér kwagh u Yehova gba ve ishima hemba hanma kwagh ugen cii, nahan ve ver se ikyav i dedoo.Ôr 1 Mbatesalonika 1:8, 9; 2:13

Yehova ngu ngohol ior mba ve undu kwaghaôndo u aiegh la sha u ve hingir ior mba ken tsombor na u mbacivir un la. Aluer u lumun myer u Yehova a yer u ne yô, u hingir ijende na shi u lu ken tsombor u he, u mbacivir Yehova a we imôngo, u dooshima a mgbough ker la, shi u zua a uma u tsôron kpaa.Ôr Marku 10:29, 30; 2 Mbakorinte 6:17, 18.

4. Aôndo una va uumace mba sha tar cii a msaanyol nena?

Ijirôron i Aôndo a lu van a mi sha kwaghaôndo u aiegh la, ka loho u dedoo. Kwagh ne una bee a ieren i nzughul a ior la sha tar cii kera. Mayange kwaghaôndo u aiegh una kera tsume a uumace shi una va a mpav hen atô ve ga. Ior mba vea lu sha tar hen shighe la cii vea civir Aôndo u a lu u mimi tswen la ken mzough.Ôr Mpase 18:20, 21; 21:3, 4.