Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Loho U Dedoo U Ú Dugh Hen Aôndo La!

 Iaven I Sha 1

Ka Nyi I Lu Loho u Dedoo?

Ka Nyi I Lu Loho u Dedoo?

1. Ka loho u nyi u dugh hen a Aôndo?

Aôndo soo ér ior ve ember uma sha tar. Yange gba tar man hanma kwagh u a lu sha u cii, sha ci u uumace doo un ishima. Ica a gba ga tsô, una er kwagh u a kpe ior mba ken ityar kposo kposo cii iyol yô. Una kar a hanma kwagh u a ve uumace a ican i yan cii kera.Ôr Yeremia 29:11.

Gomoti môm tsô ngu a fatyô u been a ipila man angev shin ku ga. Kpa loho u dedoo ngu sha ci wase. Ica a gba ga tsô, Aôndo una kar a ugomoti mba uumace kera, una gema a ver gomoti na. Ior mba vea lu sha ikyev i gomoti na la vea lu ken bem, shi vea lu gbong gbong kpaa.Ôr Yesaia 25:8; 33:24; Daniel 2:44.

2. Er nan ve loho u dedoo u lu kwagh u hange hange nyiana?

Ka shighe u Aôndo una tim aferaior shin tar ne kera la ican i yan ia bee ye. (Sefania 2:3) Kwagh ne una er hanma shighee? Mkaanem ma Aôndo tsengaôron kwagh u akaa a a lu anger uumace hegen ne. Akaa a bo a a lu eren ne tese ér shighe u Aôndo una tim mbaaferev la zurum.Ôr 2 Timoteu 3:1-5.

3. Gba u se er nyi?

Gba u se hen kwagh u Aôndo ken Mkaanem nam, ka Bibilo je la. Ngi er ka washika u ma ter u ônov mba nan ve doo nan ishima nan nger hen a ve nahan. I̱ tese se kwagh u se er ve uma wase una doo hegen yô, man kwagh u se er ve se zua a uma u tsôron ken hemen la kpaa. Mimi yô, alaghga mbagenev vea nenge er i lu wasen we fan Bibilo nahan, a doo ve ga. Kpa er Aôndo a tende zwa u va eren akaa a van se a mkpeyol yô, mayange je se lumun ser mbagenev ve yange se u henen kwagh u uityendezwa mban ga.Ôr Anzaakaa 29:25; Mpase 14:6, 7.