Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Loho U Dedoo U Ú Dugh Hen Aôndo La!

 Iaven I Sha 4

Ka An Nan Lu Yesu Kristu?

Ka An Nan Lu Yesu Kristu?

1. Uma u Yesu yange hii nena?

Ka aeren a Yesu a nyi yange na ve ior vaan ikyua a na?MATEU 11:29; MARKU 10:13-16.

Ken uumace cii, ka Yesu tseegh yange vande lun ortyom sha, cii ve i va mase maren un shin tar ne ye. (Yohane 8:23) Ka un, Aôndo yange hii gban ye, shi yange wase Aôndo u gban akaa agen cica cii. Ka Yesu tseegh Yehova yange gba un sha uwegh nagh ye, sha nahan yô i yila un ér “Waniunda” u Aôndo. (Yohane 1:14) Yesu lu Orshua u Aôndo, nahan shi mba yer un ér “Imo.”Ôr Anzaakaa 8:22, 23, 30; Mbakolose 1:15, 16.

2. Er nan ve Yesu yange va shin taraa?

Aôndo yange tindi Wan na shin tar; yange gema uma u wan na, shighe u lu sha vea na la, wa ken iyav mbu iniunkwase i Mbayuda igen, i yilan i ér Maria. Nahan orumace môm lu ter u Yesu ga. (Luka 1:30-35) Yesu va shin tar ne sha ci u atôakyaa atar: (1) sha u va tesen mimi sha kwagh u Aôndo, (2) sha u va veren se ikyav i se dondon sha u eren ishima i Aôndo yô, man (3) sha u va nan uma na u vough la a̱ hingir “ipaan” sha ci wase.Ôr Mateu 20:28.

3. Er nan ve i gbe u a paa se?

Ipaan ka kwagh u i kimbi sha ityough ki or sha u yiman nan shighe u kwagh a tser nan je a lu zan a nan ken ku yô. (Ekesodu 21:29, 30) Aôndo yange gba uumace a awashima u ve been iyol shi ve kpeen ga. Er nan ve se fe nahana? Aôndo yange kaa a Adam, nomsoor u hiihii la ér aluer a er kwagh u Bibilo i yer ér “isholibo” la yô, una kpe. Adam yange una er isholibo ga yô, ma kpe mayange ga. (Genese 2:16, 17; 5:5) Bibilo kaa a vese ér ku  “nyôr” shin tar sha ikyev i Adam. Nahan, isholibo i Adam la pelegh sha ônov nav cii, kua injar i isholibo shon kpaa, ka ku je la. Gba u a paa se ken ikyangenev mbi ku u se ye dyako u ú hen Adam la.Ôr Mbaromanu 5:12; 6:23.

Ka an yange nan lu sha ian i paan se sha ikyev i ku? Zum u or ka nana kpe yô, nan kimbi injar i isholibo la sha ci u asorabo a nan tseegh tsô. Or u lun vough ga môm môm nana fatyô u kimbin injar i paan mbagenev sha asorabo a ve ga.Ôr Pasalmi 49:7-9.

4. Er nan ve Yesu yange kpe?

Yesu yange lu or u vough, kpa se yô se mba vough ga. Sha nahan yô, yange gba u una kpe sha ci u asorabo na ga, gadia a er isholibo mayange ga. Kpa gema kpe sha ci u asorabo a mbagenev. Aôndo yange tindi Wan na sha u a̱ va kpe sha ci wase, nahan a̱ tese er uumace ve doo un ishima kpishi yô. Yesu kpa tese se dooshima gadia yange ungwa imo i Ter na, nahan a na uma na sha ci wase.Ôr Yohane 3:16; Mbaromanu 5:18, 19.

5. Yesu ngu eren nyi hegene?

Shighe u Yesu lu shin tar la, lu been ior angev shi nderen mbakpenev shi yiman ior ken atsan a ve. Nahan yô, kwagh ne tese ér ken hemen yô una va er akaa ne sha ci u uumace mba ungwan imo i Aôndo. (Mateu 15:30, 31; Yohane 5:28) Yesu yange kpen yô, Aôndo nder un shin ku, a hide a hingir or u ken jijingi. (1 Peteru 3:18) Yesu maa za tema ken uwegh ku yanegh ku Aôndo gba keghen zan zan shighe u Yehova kar nan un tahav mbu lun Tor u tar ne jimin cii la. (Mbaheberu 10:12, 13) Hegen ne Yesu ngu Tor, ngu hemen sha, shi mbadondon un mba ve lu shin tar la mba yôôn loho u dedoo sha tar cii.Ôr Daniel 7:13, 14; Mateu 24:14.

Ica a gba ga tsô, Yesu una er tom a tahav nav mbu torough mbura sha u been a hanma ican i yan cii, shi timin mba ve ne ve ior ve lu yan ican la. Ior umiliôn umiliôn mba ve ne Yesu jighjigh sha u ungwan imo na la vea ember uma ken paradiso shin tar.Ôr Pasalmi 37:9-11.