Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 IAVEN I SHA 2

Ka An Nan Lu Aôndo?

Ka An Nan Lu Aôndo?

1. Gba u se civir Aôndo sha ci u nyi?

Ka Aôndo u mimi la a gbe akaa cii ye. Ngu a mhii ga shi mayange una lu a mkur kpaa ga. (Pasalmi 90:2) Loho u dedoo u Bibilo la due hen a na. (1 Timoteu 1:11) Er i lu Aôndo a ne se uma yô, ka un tseegh i gbe u se civir un ye.—Ôr Mpase 4:11.

2. Aôndo yô, ngu nena?

Or môm ngu a nenge a Aôndo ga, sha ci u un ka Jijingi, inja na yô mlu u uma na hemba u akaauma a iyolough aa a lu shin tar ne la. (Yohane 1:18; 4:24) Nahan cii kpa, akaa a Aôndo a gbe la wase se u fan aeren a na. U tesen ikyav yô, ka sea hen sha kwagh u atam a ikyon kposo kposo kua uimondon kposo kposo nahan, se nenge a dooshima u Aôndo kua kwaghfan na la. Er sha man tar ve kehe kpishi yô, kwagh ne tese se ér Aôndo ngu a tahav kpishi.—Ôr Mbaromanu 1:20.

Se fatyô u seer henen kwagh u aeren a Aôndo sha u ôron Bibilo. U tesen ikyav yô, Bibilo pase se akaa a Aôndo a soo man aa a soo ga la, man er a eren kwagh a ior yô, kua gbenda u kwagh ka una er ve a nenge sha mi la.—Ôr Pasalmi 103:7-10.

3. Aôndo ngu a iti jee?

Yesu yange kaa ér: ‘Ter wase u Sha, i̱ tsegha iti You.’ (Mateu 6:9) Aôndo ngu a atiatom kpishi, kpa iti na jim jim ngi i môm tseegh. Hanma zwa yô, mba yer iti ne ker kposo. Mba yer i ken zwa Tiv ér “Yehova.”—Ôr Ekesodu 6:3.

I dugh iti i Aôndo ken Ubibilo kpishi kera, i gema i nger ititom na i Ter shin Aôndo la sha ityough ki iti la. Kpa  shighe u yange i nger Bibilo la, iti i Yehova due ker kuma er ajiir 7,000 nahan. Yesu yange una pasen ior kwagh u Aôndo yô, a ôr ve kwagh u iti i Aôndo la.—Ôr Yohane 17:26.

4. Yehova we se ikyo je kpa?

Er ter u lun a dooshima ne nahan, Aôndo ngu eren kwagh u una na a kpe se iyol gbem sha won yô

Ican i ior kpishi ve lu yan nyian ne tese ér Yehova ka Aôndo u a we se ikyo ga yôô? Ior mbagenev mba kaan ér Yehova de ér se ya ican sha er una kar se yô, kpa kwagh ngu nahan ga.—Ôr Yakobu 1:13.

Aôndo na se ian i tsuan kwagh u se soo la, sha nahan yô, a na se icivir sha ieren na ne. Doo se kpishi er se lu a ian i tsuan u civir Aôndo nahan ga he? (Yosua 24:15) Kpa ior kpishi tsua u eren mbagenev aferakaa, ka nahan ve ican i yan i dumbur ye. Yehova ka una nenge ior a eren aferakaa angan nahan i vihi un kpishi.—Ôr Genese 6:5, 6.

Yehova ka Aôndo u a we se ikyo yô. A soo ér se ember uma. Ica a gba ga tsô, una kar a ican i yan kua mba ve ve a i la kera. Kpa cii man shighe la yô, gema ngu a ityôkyaa i dedoo i i ne ve a de ér ican i yan i hila za hemen sha anshighe kpuaa yô. Se hen kwagh u ityôkyaa shon, se fa i, ken iaven i sha 8 i antakerada ne.—Ôr 2 Peteru 2:9; 3:7, 13.

5. Se seer kporom ikyua a Aôndo nena?

Yehova lôhô se ér se kporom ikyua a na sha u lamen a na ken msen. Kwagh wase gba un ishima, se asange asange. (Pasalmi 65:2; 145:18) A kegh iyol u den se kwaghbo. Ka sea nôngon ser se er ishima na yô, a fa, shin er ashighe agen ka se kanshio nahan je kpaa. Sha nahan yô, er se yen nahan kpa, mimi mimi je se fatyô u lun kôôsôô vea Aôndo.—Ôr Pasalmi 103:12-14; Yakobu 4:8.

Er i lu Yehova a ne se uma yô, gba u una hemba doon se ishima a hanma or ugen cii. (Marku 12:30) Aluer u ngu tesen wer Aôndo doo u ishima sha u seer henen kwagh na shi eren kwagh u a kaa ér u er la yô, u seer kporom ikyua a na.—Ôr 1 Timoteu 2:4; 1 Yohane 5:3.