Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Loho U Dedoo U Ú Dugh Hen Aôndo La!

 Iaven I Sha 11

Atindi a Aôndo Nga Wasen Se Nena?

Atindi a Aôndo Nga Wasen Se Nena?

1. Er nan ve i gbe u a tese se gbenda u eren kwagh?

Akaa a mimi a i nger ken Bibilo la aa wase se se palegh u eren kwagh u una vihi se iyol shin mbagenev nena?—PASALMI 36:9.

Aôndo u a gbe se la hemba se kwaghfan. Er a lu Ter wase u se doo un ishima yô, we se ikyo. Shi yange gba se ér se lu sha tseeneke wase, a na shio ga. (Yeremia 10:23) Nahan gba u Aôndo una tesen se kwagh u se eren yô, vough er mbayev mba kiriki kpa ka i gba u mbamaren vev vea tese ve kwagh u vea er nahan. (Yesaia 48:17, 18) Atindi a Aôndo nga tesen se kwagh u se er yô, man gbendatesen ne ka iyua i Aôndo a ne se yô.Ôr 2 Timoteu 3:16.

Atindi a Yehova tese se gbenda u uma u ú hembe doon hegen yô, shi a tese se er se er ve se va zua a mbamtsera mba tsôron ken hemen kpaa. Er i lu Aôndo a gbe se yô, doo u se dondo atindi na saan saan je.Ôr Pasalmi 19:7, 11; Mpase 4:11.

2. Mkaanem ma Aôndo ma tesen se gbenda nena?

Akaa a mimi agen a i ôr ken Bibilo la, wase se u fan kwagh u Aôndo a soo ér se er sha atôakaa kposo kposo yô. Atindi agen di pase se kwagh u i gbe u se er jighilii yô. (Duteronomi 22:8) Akaa a mimi a i nger ken Bibilo la nga a pase se kwagh u se er yô, kpa saa se henen kwagh sha inja keng ve se fatyô u kaven er ma kwagh u mimi u i nger ken Bibilo la á pase se kwagh u se er la ye. (Anzaakaa 2:10-12) U tesen ikyav yô, Bibilo tese ér uma ka iyua i Aôndo a ne se yô. Mimi u ken Bibilo u a lu kwagh u vesen ne, una fatyô u tesen se gbenda u se eren kwagh hen ijiir tom yase man hen ya man shighe u se lu zan zende kpaa yô. Nahan se wa ikyo sha er se er kwagh u una vihi se iyol shin mbagenev ga yô.Ôr Aerenakaa 17:28.

3. Ka atindi a ahar a nyi a lu a vesene?

Yesu yange ôr kwagh u atindi ahar, a a lu a vesen yô. Tindi u hiihii la pase ityôkyaa jighilii i uumace ve lu uma yô. Ityôkyaa yô, gba u se fa Aôndo, una doo se ishima shi se civir un sha mimi kpaa. Gba u hanma kwagh u se soo u eren cii yô, se umbur tindi u hiihii ne. (Anzaakaa 3:6) Mba ve kor tindi ne yô, ve hingir azende a Aôndo, shi saan ve iyol sha mimi shi vea va zua a uma u tsôron kpaa.Ôr Mateu 22:36-38.

Tindi u sha uhar la una wase se se lu ken bem a mbagenev. (1 Mbakorinte 13:4-7) Gba u se dondo gbenda u Aôndo a eren kwagh a ior la ve se tese ser se mba kuran tindi u sha uhar la ye.Ôr Mateu 7:12; 22:39, 40.

4. Atindi a Aôndo nga wasen se nena?

Atindi a Aôndo nga tesen icombor er ia eren kwagh imôngo ken dooshima yô. (Mbakolose 3:12-14) Mkaanem ma Aôndo shi ma kor icombor, gadia ma tese mimi u injaa ugen u a kuran se yô. Ma kaa ér gba u ivaa ia lu igbekeke.Ôr Genese 2:24.

Aluer se mba dondon atindi a Aôndo yô, kwagh ne una wase se u kuren mbamgbe asev shi se zua a mpeveryol ken ishima. U tesen ikyav yô, mbatôôn ior ityom mba hembe soon u tôôn ior mba dondon atindi a Bibilo, mba ve eren kwagh tsembelee man sha mimi, shi ve we hwev ga la tom. (Anzaakaa 10:4, 26; Mbaheberu 13:18) Mkaanem ma Aôndo shi tese se ér akaa a hange hange a se lu a mi la a̱ kuma se, shi ikyar i se ye vea Aôndo la i̱ hemba gban se kwagh a akaa a iyolough.Ôr Mateu 6:24, 25, 33; 1 Timoteu 6:8-10.

Aluer se mba kuran atindi a Aôndo yô, se lu gbong gbong. (Anzaakaa 14:30; 22:24, 25) U tesen ikyav yô, aluer se mba kuran tindi u Aôndo a we sha kwagh u ihyundugh ki msôrough la yô, se palegh ubombauangev man uaikyôr. (Anzaakaa 23:20) Yehova na se ian ér se maan msôrom akuma akuma. (Pasalmi 104:15; 1 Mbakorinte 6:10) Atindi a Aôndo nga wasen se, gadia nga tesen se u wan ikyo sha aeren a ase man mbamhen asev kpaa. (Pasalmi 119:97-100) Kpa, Mbakristu mba mimi mba kor atindi a Aôndo sha ci u iwasen i vea zua a mi la tseegh tsô ga. Mba kor a sha u nan Yehova icivir kpaa.Ôr Mateu 5:14-16.