Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Kav Jighjigh Ve u Nan

Mhii

Mhii

“Hingir [nen] mbakaven mba ve ya dyako u uityendezwa sha jighjigh u nan man sha ishima i wan kpaa” la.—MBAHEBERU 6:12.

1, 2. Ikyav tese wang ér ortamen u zenden sha ugen yange nengen mbajighjigh mba i er kwagh ve ken Bibilo la nena, man mbajighjigh mban vea fatyô u lun azende ase a injaa sha ci u nyi?

KWASEKRISTU ugen yange ungwa kwaghôron u ortamen u zenden sha ugen u a bee iyol yô, nahan a kaa ér: “A ôr kwagh u ior mba i er kwagh ve ken Bibilo la inja er ka azende na nahan.” Kwagh u Kwasekristu ne ôr la lu vough nahan sha ci u anmgbian ne hen Mkaanem ma Aôndo shighe lihe shi tesen ior ma kpaa, zan zan je yô, hoghol un a mbajighjigh mba i er kwagh ve ken Bibilo la, nahan ka una ôron kwagh ve yô, i lu inja er ngise ve lu azende na a sôngo sôngo nahan.

2 We u nenge wer mbajighjigh mba i er kwagh ve ken Bibilo ne kpishi ka ior mba injaav mba se kôr ijende a ve ga he? U nenge wer yange ve lu ior kpôô kpôô er se nahan kpa? Tôô ase wer, u ngu zenden vea ior er Noa man Aberaham man Rutu man Eliya man Eseter nahan, u ngu lamen a ve, pinen ve akaa, nahan a doo u gaa? Hen ase sha ishima i vea taver we, kua akaa a injaa a vea wa u la!—Ôr Anzaakaa 13:20.

3. (a) Ka mtsera u nyi se zua a mi sha u henen kwagh u nomso man kasev mbajighjigh mba Bibilo i er kwagh ve laa? (b) Ka mbampin mba nyi se time sha mini?

3 Shighe u a va ‘nder mbaperapera shin ku’ la, se fatyô u yan ijende a ior mban sue sue. (Aer. 24:15) Nahan cii kpa, hegen ne je kpa, se fatyô u zuan a mtsera kpishi sha u henen kwagh u ior mba Bibilo i er kwagh ve ér ve lu nomso man kasev mba nan jighjigh la. Nena yô? Apostoli Paulu na mlumun nahan ér: “Hingir [nen] mbakaven mba ve ya dyako u uityendezwa sha jighjigh u nan man sha ishima i wan kpaa” la. (Heb. 6:12) Er se lu timen sha kwagh u nomso man kasev mbajighjigh mban la, se gbidye nen kwar sha mbampin mba ve dugh ken mkaanem ma Paulu man: Ka nyi jim i lu jighjigh u nana, man er nan ve i gbe u se lu a mini? Se kav mbajighjigh mba i er kwagh ve ken Bibilo la nena?

Ka Nyi i Lu Jighjigh u Nana, man Er Nan Ve I Gbe u Se Lu a Mini?

4. Ior mbagenev mba henen ér jighjigh u nan ka nyi, man er nan ve mhen ve la a lu u vough ga?

4 Jighjigh u nan ka ieren i doon tsung i̱ yange i̱ doo nomso man kasev mba se lu henen kwagh ve ken takerada ne la ishima yô. Nyian ne ior kpishi kav kwagh u a lu jighjigh u nan jim ga, ka ve gba tôôn tsô ér jighjigh u nan yô, ka u gban lumun a hanma kwagh cii a ityôkyaa shio tsô. Nahan kpa, mhen ve la ka u vough ga. Jighjigh u nan ka u gban lumun a hanma kwagh tsô ga; ka er ishima i lu or ker la ga. Jighjigh u nan u mimi gbe lumun kwagh ashe ikyusu ga. U gban nan hanma  kwagh jighjigh ashe ikyusu la, ka kwaghbo. Mlu u i lu or ken ishima sha kwagh la tse gbem ga, nahan u gban di nan jighjigh ser Aôndo ngu la tseegh kuma ga, gadia “ujijingi mba bov je kpaa [na] kwagh la jighjigh, ikarikase gem gbidi ve iyol.”—Yak. 2:19.

5, 6. (a) Jighjigh wase u nan la har sha nyi man nyi i se nengen a mi ga? (b) Doo u jighjigh wase u nan una taver nan je? Tese ikyav.

5 Jighjigh u nan u mimi la za shimi hemba ieren i gban lumun a hanma kwagh tsô la. Umbur kwagh u Bibilo i er sha u pasen kwagh u a lu jighjigh u nan la. (Ôr Mbaheberu 11:1.) Paulu yange kaa ér jighjigh u nan har sha akaa ahar a se nengen a mi ga yô. U hiihii yô, a har sha akaa a a lu hegen, kpa i “nengen a mi ga” la. Ashe ase aa fatyô u nengen a akaa a ken jijingi a a lu sha la ga. Se fatyô u nengen a Yehova Aôndo kua Wan na, shin nengen a Tartor u ú lu hemen sha hegen la ga. Kwagh u sha uhar yô, jighjigh u nan har sha “kwagh u ishimaverenkeghen yase i lu sha mi,” kpa a lu a er ga la. Se fatyô u nengen a tar u he u ica ia gba ga tsô Tartor u Aôndo u va a mi la ga. Nahan kwagh la tese ér, jighjigh u se ne akaa a se nengen a mi ga la, kua u se ne akaa a se lu veren ashe a mi la ka gbilinkwagh shinii?

6 Ka nahan ga cii! Paulu yange pase ér jighjigh u nan u mimi we amishe tsembelee. Shighe u kaa ér jighjigh u nan ka u “fan kwagh . . . dedoo a akpelan a tan ga” la, yange ter ishember igen i a fatyô u geman i ér “ityakerada i inyaagh” shin “ityakerada i ya” yô. Tôô ase wer or na u ya. Alaghga nana na u ityakerada i ya shon maa nana kaa a we ér, “Ya ne hingir u wou hegen.” Aluer nan ôr nahan kpa, tese ér gba u ú tsaan sha ityakerada i ya la ga, kpa nan ngu kaan a we ér ityakerada la ka ityakerada i sha tindi, nahan ka ya la kpôô kpôô je la. Jighjigh wase u nan la kpa, ngu a na se lu a vangertiôr ser hanma kwagh u Aôndo a tende zwa u eren ken Mkaanem nam la cii ka inja er a er un kera kpaa nahan.

7. Jighjigh u nan u mimi wa nyi kere?

7 Sha nahan yô, jighjigh u nan u mimi la wa vangertiôr u se lu a mi sha ci u akaa a a vande eren se la, kua u suur sha Yehova hunden ishima kera sha ci u akaa a se fe sha kwagh na la. Jighjigh u nan ngu a na, se nenge Yehova ser ka Ter wase u se doo un ishima yô, shi se lu a vangertiôr ser uityendezwa nav cii vea kure sha mi. Kpa jighjigh u nan u mimi saa heela ga. Ngu er ka kwaghuma u i gbe u a koson un sha er una lu uma her yô. Gba u a tesen un sha aeren, ga yô una kpe.—Yak. 2:26.

8. Er nan ve i gbe hange hange u se lu a jighjigh u nana?

8 Er nan ve jighjigh u nan a lu hange hangee? Paulu na se mlumun u kuman ken ato sha kwagh ne. (Ôr Mbaheberu 11:6.) Se fatyô u zan ikyua a Yehova shin eren ishima na ga, saa se lu a jighjigh u nan. Nahan yô, gba hange hange u se lu a jighjigh u nan ve se kure awashima u hemban cii, u i gbe u  uumace man mbatyomov mba shaav vea kure la ye. Awashima shon yô, ka u kporom ikyua a Yehova, Ter wase u sha la shi nan un icivir.

9. Yehova tese ér un kav er i gbe u se lu a jighjigh u nan nena?

9 Yehova fa er i gbe u se lu a jighjigh u nan yô, nahan a ôr se kwagh u mbananjighjigh u una wase se u lun a jighjigh taveraa shi tesen un sha aeren a ase kpaa yô. A ver ior mba lun a jighjigh ken nongo u Kristu sha u ve hemen u yô. Mkaanem nam kaa a vese ér: “Kav nen jighjigh ve u nan” la. (Heb. 13:7) Kpa ka ve tseegh ga. Paulu ôr se kwagh u “ikpela i mbashiada i vesen” i nomso man kasev mba sha ayange a ngise, mba ve ver ikyav i dedoo sha kwagh u jighjigh u nan yô. (Heb. 12:1) Lu mbajighjigh cica cii Paulu nger ati ve ken Mbaheberu ityough 11 ga. Bibilo ôr se kwagh u nomso man kasev mbajighjigh, mbabeenyol man agumaior a mbamlu vev lu kposo kposo yô; jighjigh ve la tese se er se lu a jighjigh u nan ken tar u ú ban a jighjigh ne yô.

Se Kav Jighjigh u Nan u Mbagenev Nena?

10. Aluer se hen kwagh u nomso man kasev mbajighjigh mba i er kwagh ve ken Bibilo la yô, kwagh la una wase se u kaven jighjigh ve la nena?

10 U fatyô u kaven or ga, saa u nenge er nan eren kwagh yô. Er u ngure ôron takerada ne yô, u nenge er i tev sha kwagh u nomso man kasev mbajighjigh mban tsembelee sha er a wase u u fan er yange ve eren kwagh yô. We kpa doo u ú seer tôvon sha kwagh ve. Shighe u ú lu henen kwagh sha tseeneke wou yô, time sha kwagh u ior mban ken Bibilo; er tom a akaa a timen sha kwagh a u lu a mi la. U nguren gbidyen kwar sha kwagh u ú lu henen la yô, nôngo u nengen a ijiir i yange ve lu la ken ishima you kua kwagh u Bibilo i er la. I̱ lu u er u ngu nengen a kwagh u yange er la, shi u ngu ungwan iov man ihuma-akaa nahan. U hemban cii yô, nôngo u kaven er ishima yange i lu ior mba u er kwagh ve la ker yô. U faan er yange lu nomso man kasev mbajighjigh mban yô, u hemba kaven er yange ve lu ior kpôô kpôô yô, shi u hoghol a ve je, a lu u er mbagenev ken ve ka azende ou a tse nahan.

11, 12. (a) U er nan ve u hemba fan Aberam man Sarai ciilii? (b) Ikyav i Hana man Eliya man Samuel la ia wase u nena?

11 Aluer u fa kwagh ve tsembelee yô, a sar u u̱ kaven ve. U tesen ikyav yô, tôô ase wer u ngu henen kwagh u tom u he u i ne u yô. Nongo u Yehova lôhô u ér u̱ za er tom u pasen kwagh hen ijiir igen. Alaghga i̱ kaa a we ér, u yem hen ijiir i kwagh a hembe gban sha mbapasenkwagh yô, shin i̱ kaa ér we u za pase kwagh sha ma gbenda u ú hoghol a mi ga shin ú taver we yô. Er u lu gbidyen kwar sha tom u i ne u la shi eren msen sha mi la, aluer u hen sha ikyav i Aberam la yô, ia wase u kpishi. Un vea kwase na Sarai, yange ve undu gar u Ur u ve lu her ken mkpeyol la, nahan Yehova ver ve doo doo. U nguren dondon ikyav ve la yô, u mase kaven er u fe ve hegen i hembe ave a tse yô.

 12 Kpa aluer ma or wou nan er kwagh a we u vihin tsung je iyol kpe u, u soo teman inya, kera zan mbamkombo ga ye? Aluer u gbidye kwar sha ikyav i Hana la, shi u nenge er yange de ér ieren i Penina la i yange un u civir Yehova ga yô, kwagh la una wase u ú er kwagh u vough, shi adooga je yô, Hana maa una hingir we er ka ijende you i ishima ishima nahan. Shi aluer ú nenge wer u gba kwagh ga yô, ú nguren ôron ican i Eliya yange ya la man gbenda u Yehova sur un ishima la yô, alaghga u hemba kporom ikyua a Eliya cii. Agumaior a mbakov vev mba ken makeranta mbawan dang ka ve shi meen ve la kpa, vea ôr kwagh u Samuel, er yange venda u nyôron iyol ken hôngor u ônov mba Eli lu eren ken tabernakel la yô, kwagh na una hemba doon ve cii.

13. Aluer u ngu kaven jighjigh u ma or u i er kwagh u nan ken Bibilo yô, tese ér jighjigh wou la gba Yehova kwagh ga shinii? Pase ase yôô.

13 Er u lu kaven jighjigh u nan u mbagenev yô, kwagh la tese ér jighjigh wou u nan la gba Yehova kwagh ga shinii? Mayange ga! Umbur wer, Mkaanem ma Yehova taver se ishima ér se kav ior mba lun a jighjigh u nan. (1 Kor. 4:16; 11:1; 2 Tes. 3:7, 9) Ior mbagenev mba i er kwagh ve ken takerada ne la, ve kpa ve kav jighjigh u nan u mbagenev mba ve vande lun a ve la. U tesen ikyav yô, ken Ityough 17 ki takerada ne la, ikyav tese ér mkaanem ma Maria ôr la lu ma ngise Hana ôr yô, nahan Maria lu kaven jighjigh u Hana la. Kwagh ne tese ér jighjigh u Maria la gba Yehova kwagh ga shinii? Ei! U ma lu nahan yô, jighjigh u Hana la gema wase Maria u lun a jighjigh u nan taveraa sha er una ya ikyar a Yehova Aôndo kôôsôô yô.

14, 15. Ka akaa agen a nyi u fatyô u nengen a mi ken takerada nee, man se er tom a takerada ne sha inja nena?

14 I er takerada ne sha gbenda u ua taver jighjigh wou u nan yô. Mtom ma ma dondo man ka ngeren mba ve lu a itinekwagh ér, “Kav Jighjigh Ve u Nan,” mba yange i hii u gberen ken Iyoukura ken inyom i 2008 zan zan 2013 la. Nahan kpa, i seer ngeren mba hev mbagenev ken takerada ne. Hanma ityough yô, ki a mbampin mba vea wase u u henen takerada ne shi eren kwagh u i nger la yô. I kpera ufoto mba hev mba doon tsung ken takerada ne, shi i seer kehen a mba yange ve vande lun ken Iyoukura la. I tese akaa agen ken takerada ne a a wase se yô, er ashighe a akaa yange er la, man umaape mba i kper mbara nahan. I er takerada u Kav Jighjigh Ve u Nan ne sha gbenda u se fatyô u henen kwagh a mi sha tseeneke wase, shin hen tsombor kua ken tiônnongo kpaa yô. Icombor igen je yô, ia soo u teman imôngo ôron takerada ne duen sha.

15 Yô, takerada ne u wase u u̱ kaven jighjigh u nan u mbajighjigh mba yange ve civir Yehova sha mimi ken ayange a karen la. Shi u seer taver jighjigh wou u nan er u lu kporom hen Yehova, Teru u sha la!