Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Hide hen Yehova

 VEGHER U SHA UTAR

Ishimavihin—Shighe u “Kwagh a Nzughul Orgen a Orgen Yô”

Ishimavihin—Shighe u “Kwagh a Nzughul Orgen a Orgen Yô”

“Anmgbian u kwase ugen ken tiônnongo wam yange wam aie iyol ér mo m ii un inyaregh. Mbagenev ken tiônnongo wam va fa kwagh ne, nahan hii u tan ikyaa a na. Ken masejime yô, anmgbian u kwase ne va kaa a mo ér mimi va due sha kwagh la u a tese ér ka mo m ii ki ga yô. Shin er yange nam anyi a yan nahan kpa, lu u mayange me de un a kwaghbo la ga, sha ci u kunya u m ya sha kwagh ne la.”—Mkaanem ma Linda, anmgbian u kwase ugen.

WE KPA ashighe agen ieren i anmgbian u ken tiônnongo ka i na u ishimavihin tsung er Linda nahana? Kwagh er vihi yô, mbagenev de ieren i anmgbianev mbagenev na ve ishimavihin zan zan je ve mem u civir Yehova kpaa. We kpa kape i lu laa?

Or A Fatyô u “Paven Se a Dooshima u Aôndo”?

Sha kpôô yô, ashighe agen or u se civir Yehova a nan ka nana er se kwagh u vihin yô, i taver se kpishi u den nan kwaghbo. Kera kpa, Bibilo kaa ér Mbakristu ve doo ayol a ve. (Yohane 13:34, 35) Ka a lu or u se civir Yehova vea nan imôngo je nana er se kwagh u vihin yô, iyol ka i kpe se, shi i vihi se i pev.—Pasalmi 55:12.

Ka mimi, Bibilo pase ér ashighe agen “kwagh á nzughul” Orkristu ugen a ugen. (Mbakolose 3:13) Nahan cii kpa, zum u kwagh ne a er se yô, alaghga a taver se u sôron zayol ne. Ma kwagh ngu u una wase se u sôron imba zayol ne yôô? Time ase sha akaawan a Ruamabera a atar ne:

Ter wase u sha fa hanma kwagh u a ze hemen cii. Yehova fa hanma kwagh u a lu zan hemen cii, kua kwaghbo u i er se man ican i i dugh ker la kpaa. (Mbaheberu 4:13) Heela tseegh ga, ka sea yaan ican yô, ishima i za Yehova iyol. (Yesaia 63:9) Mayange una lumun ér “Ican shin ishima i nyian” shin nyityôkwagh igen i ‘pav se a dooshima u Aôndo’ ga; aluer ka or u civir un ugen je kpaa una lumun er nana pav se a dooshima na ga. (Mbaromanu 8:35, 38, 39) Sha nahan yô, se kpa se de ser ma kwagh shin ma or môm nana pav se a Yehova ga.

U den or a isholibo ka u tesen ér i lumun isholibo i nan la ga. Zum u se de or kwaghbo yô, tese ér se lumun a kwaghbo u nan la, shin se nenge ser ka ankwagh u cuku shin se na nan ishô shin se paa nan ityough ga. Umbur wer isholibo i môm i Yehova a lumun a mi ngi ga, kpa den kwaghbo shighe u a nenge ér doo u una er nahan yô. (Pasalmi 103:12, 13; Habaku 1:13) Kwagh u Yehova a kaa ér se de mbagenev kwaghbo la inja na yô, ngu kaan a vese ér se dondo ikyav na la. ‘Ishima nyoon Yehova gbem ga.’—Pasalmi 103:9; Mateu 6:14.

Ka sea wa kwagh ishima a or ga yô, i saan se iyol. Sha nyi gbenda? Nenge ase ikyav ne. Alaghga u tôô iwen i i yoho daalaa yô, u kôr sha uwe. Aluer u kôr iwen la sha anshighe kpuaa tseegh yô, adooga uwegh kua kpe u ga. Kpa aluer u nôngo wer u kôr iwen shon shighe a wa karen di ye? U kôr i a kuma shighe nena? A kuma miniti kpuaa, shin a lu ihwa jimin, shin a hemba nahana? U er nahan yô, uwegh ku a kpe u je ka u henen a hen ga! Myohom ma iwen la yô, ma kaha ga. Kpa er u ker i shighe a lu karen  la, ia lu yuhwan we seer a seer. Kape u wan kwagh ishima a or kpa i lu je la. Aluer u wa kwagh ishima a or yô, a̱ lu ankwagh u cuku je kpa, er shighe a lu karen la, ishima ia lu vihin we seer a seer. Ka nahan ve Yehova a taver se ishima ér se de lun a iyugh ishima a or ga ye. Mimi je, ka sea wa kwagh ishima a or ga yô, i saan se iyol.—Anzaakaa 11:17.

Ka sea wa kwagh ishima a or ga yô, i saan se iyol

“Lum Er Ka Yehova Iyol Na A Lamen A Mo Nahan”

Lu nyi i wase Linda ve wa kwagh ishima a anmgbian u kwase u er kwagh a na dang la ga? Kwagh môm u yange wase un yô, lu u gbidyen kwar sha atôakyaa a Bibilo i tese ér doo u se deen mbagenev kwaghbo la. (Pasalmi 130:3, 4) Kwagh ugen u yange hemba wasen Linda cii yô, lu sha ci u yange fa ér ka sea deen mbagenev kwaghbo yô, Yehova kpa a de se kwaghbo. (Mbaefese 4:32–5:2) Linda pase ér avur a Bibilo la yange wase un yô, a kaa ér: “Lum er ka Yehova iyol na a lamen a mo nahan.”

Shighe kar yô, Linda dugh kwagh la ken ishima na kera. A de anmgbian u kwase la kwaghbo na, nahan hegen anmgbian u kwase la hingir ijende na i ishima ishima. Linda za hemen u civir Yehova her. Fa wer we kpa Yehova soo u wasen we ér u er nahan.