Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITYOUGH 18

Ú Umbur u Kaan Wer, M Sugh ú Kpa?

Ú Umbur u Kaan Wer, M Sugh ú Kpa?

Ú YA kwagh nyian vee?— Ú fa or u nan er kwaghyan shon kpa?— Alaghga ka ngô ú a er kwaghyan shon ye, shin ka ma orgen nan er ye, kpa hii nan ve i doo u se sugh Aôndo sha kwaghyan shono?— Ityôkyaa yô ka Aôndo ka a na iyiav mbi vese ye. Nahan kpa, shi se sugh or u nan yer iwer shon, shin nan ne se kwaghyan shon la kpaa.

Ashighe agen or ka nana̱ er se kwagh u dedoo yô, i hungur se u sughun nan, shin ka nahan ga? Shighe u Ortesen Uhemban lu shin tar la, mbaamandev mbagenev lu, mba ve umbur u nan ishughun ga yô.

Ú fa or u i yer ér orimande kpa?— Orimande ka or u nan lu a angev mbu i yer mbu ér imande yô. Angev mbura ka mbu na inyam i sha iyol i or je kpaa i̱ vur kera. Shighe u Yesu lu shin tar la, mbaamandev vaan ikyua a ior mbagenev ga. Shi orimande nana̱ nenge orgen a nguren van yô, i gba u nana yôô genger genger sha u tan or la icin sha er nana kporom ikyua a nan ga yô. Yange i eren nahan sha er ior mbagenev vea va ikyua a orimande nahan ve kpa angev mbu imandev mbua tsar ve ga yô.

Yange Yesu eren a mbaamandev doo doo. Iyange igen Yesu lu yemen ken Yerusalem, nahan a kar hen angar ugen. Za mgbôghom a gar la yô, mbaamandev pue due va kohol un. Ve vande ungwan er Aôndo na Yesu tahav mbu been hanma ityô uange cii yô.

Mbaamandev mbara kporom ikyua a Yesu ga. Ve tile ica je. Kpa ve na jighjigh ér Yesu una fatyô u been imande ve la. Nahan er mbaamandev mbara nenge a Ortesen Uhemban yô, ve gba yilan un kaan ér: ‘Yesu, Tere, wase se!’

 Kunya ngu ker ú a ior mba ve lu uange kpa?— Yesu yô, yange kunya kôron un a mbauangev. Yange fa er imande i lu kwagh u vihin tsung yô. Nahan á kaa a ve ér: “Yem nen, za tese nen upristi ayol a en, ve̱ nenge.”—Luka 17:11-14.

Kanyi Yesu a lu ôron mbaamandev mban ér ve̱ ere?

Er nan ve yange Yesu kaa ér ve̱ er kwagh nahana? Lu tindi u Yehova wa ior Nav sha kwagh u mbaamandev je la. Tindi la kaa ér pristi u Aôndo nana̱ nenge kwavyolough u orimande. Pristi la nana̱ ôr orimande la shighe u angev mbu nan la mbu bee yô. Nana hingir wang yô, nana fatyô u hiden za lun ken ya, ape mba lun wang ve lu la.—Levitiku 13:16, 17.

Kpa mbaamandev mban lu a angev vev mbura her. Nahan ve yem hen upristi di er Yesu kaa a ve ér ve̱ er nahan kpa?— Een,  ­yange ve yem ave ave la je. A shi nan kpa ior mbara yange vea na jighjigh ér Yesu una bee ve angev vev mbura. Nahan lu nyi i̱ eree?

Er ve lu yemen hen pristi la je, maa angev vev bee. Kwavyolough ve hingir kôngolôô. Ve hingir wang! Jighjigh u ve na tahav mbu Yesu la due gbilin ga. Yange vea ember tsô! Kpa, kanyi yange ma ve er sha u tesen iwuese ve? A lu we yô, kanyi kwagh yange ma ú eree?

Kanyi kwagh orimande ne a umbur u erene?

Môm ken ior mba i bee ve angev la hide va hen Yesu. Á gba wuese Yehova, ôron akaa a doon sha iti i Aôndo. Lu kwagh u sha inja vough je er la, sha ci tahav mbu i bee un angev a mi la lu hen Aôndo mbu due ye. Or la shi gure sha ishigh ki Ortesen Uhemban, sugh un. Kwagh u Yesu er a na la doo un je gande.

Kpa ior mba utaankarunyiin mbara di ye? Yesu gema pine ér: ‘Ka mbaamandev pue je i wanger ve gaa? Man mba utaankarunyiin mba hana? Ka di or môm tseegh tsô a hire sha u una va wuese Aôndo yee?’Kape kwagh lu kpaa je la. Lu di or môm ken mba puev mbara tseegh tsô va civir Aôndo, wuese un shi hide va sugh Yesu ye. Or ne gema lu Orsamaria, lu  ortyôtyev je. Ior mba utaankarunyiin mbagen mbara ve sugh Aôndo ga, shi ve sugh Yesu kpaa ga.—Luka 17:15-19.

We ú bee an ken atô u ior mbanaa? Se soo u lun er Orsamaria la nahan, shin ka nahan ga?— Nahan shighe u or nan er kwagh u dedoo a vese yô, kanyi i doo u se umbur u erene?— Doo u se sugh nan. Ashighe kpishi ka i hungur ior u kaan ér, m sugh ú. Kpa u kaan a or wer, m sugh ú la, ka kwagh u dedoo. Aluer se er nahan yô, a doo Yehova Aôndo man Wan na Yesu kpishi.

Ú fatyô u kaven orimande u yange hide va hen Yesu la nena?

Aluer ú hen sha kwagh ne yô, ú umbur wer ior er akaa a we a doon kpishi. U tesen ikyav yô, i lu nahan ú gba angev vee?— Alaghga i lu je ú ngu a̱ gba angev er mbaamandev mba puev mbara yange ve gba icôron uange nahan la ga, kpa alaghga hough va ú, shin iyav nyoon we. Nahan or nan nenge sha a we kpa?— Alaghga í na ú icigh shi í er akaa agen sha ci wou je kpaa. Yange doo ú er í wase ú, ú zough a guda nahan gaa?

Orsamaria la yange sugh Yesu sha er á bee un angev yô, nahan kwagh la na saan Yesu iyol. Ú hen wer a saan ngô ú shin ter ú iyol shighe u ve er ú akaa a doon, we kpa ú sugh ve la gaa?— Een, a saan ve iyol kpôô.

Hii nan ve i lu a inja u se umbur u sughun oroo?

Hanma sev shin hanma sati yô, mbagenev mba eren akaa sha ci wou. Alaghga akaa a ve lu eren la ka tom u i tee ve je la. Alaghga yô a saan ve iyol u eren ityom shon. Kpa alaghga a hungur we u sughun  ve. Alaghga tica wou u ken makeranta la una nôngo kwagh kpoghuloo je sha u wasen we ér u̱ hen ma kwagh, u̱ fa. Ka tom na je la. Kpa aluer ú sugh un sha er á wase ú ú lu henen kwagh, kaven kpaa yô, nahan a doo un kpen kpen.

Ashighe agen akaa a dedoo a ior ka ve er a we la ka a vese ga. I lu nahan or wase ú ikyav, shin nan kôr ikyav nan tôô ú vee? Shin i lu nahan ú soo u tôôn kwagh kpa ú ar ga, nahan orgen wase ú, tôô kwagh shon na ú vee? Shighe u or nan er kwagh a we nahan yô, ka a inja u kaan a nan wer, m sugh ú.

Aluer se umbur u sughun ior shin tar yô, kape se umbur u sughun Ter wase u sha kpaa je la. Man akaa ngee a se sugh Yehova sha mi yô! Á na se uma kua akaa a a ne ve uma a doo la kpaa. Nahan se mba a ityôkyaa i wuese Aôndo sha u ôron akaa a doon sha iti na hanma sev cii.

Sha kwagh u ishughun i sughun or yô, ôr Pasalmi 92:1; Mbaefese 5:20; Mbakolose 3:17; man 1 Mbatesalonika 5:18.