Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 ITYOUGH 5

“Ngun Ka Wan Wam”

“Ngun Ka Wan Wam”

MBAYEV ka vea er kwagh u doon yô, ka i doo mba ve nengen sha a ve la kpen kpen. Wanye ka nana̱ er kwagh sha inja yô, i doo ter u nan, nan kaan a mbagenev je ér: “Ngun ka wan wam” je ne.

Yesu eren kwagh u doon Ter na hanma shighe cii. Nahan saan Ter na iyol a na. Ú umbur kwagh u Ter u Yesu yange er shighe ugen, u Yesu lu vea mbadondon nav utar la kpa?— Shaala hiinii je, Aôndo ôr kwagh genger genger, kaa a ve ér: “Ngun ka Wan Wam u ishima ishima, u ishima i doom a Na yum yô.”—Mateu 17:5.

Ka i saan Yesu iyol u eren akaa a doon Ter na hanma shighe cii. Ú fa ityôkyaa kpa? Ka sha ci u Ter na doo un ishima sha mimi. Or ka nana̱ eren kwagh sha ci u i kighir nan ér nana er yô, kwagh la ka a taver nan u eren. Kpa ka nana soo u eren kwagh shon a ishima i nan yô, ka i kera taver nan ga. Ú fa inja i kwagh u ka i kaa ér or er kwagh a ishima i nan la kpa?— Inja na yô ka kwagh u i kighir or ga, nan kaa a ishima i nan ér nana er kwagh shon yô.

Cii man Yesu va shin tar je kpa, soon u eren nyityô kwagh i̱ Ter na una kaa ér a̱ er cii. Ityôkyaa yô, Ter na, Yehova Aôndo doo un ishima. Yesu yange lu a zege ian u kpilighyol sha vea Ter na. Kpa Aôndo lu a tom u injaa ú una na Yesu a̱ er yô. Kpa gba u saa Yesu una undu ijiir na i sha la keng ve, una er tom la ye. Gba u saa a mar un shin tar, una lu anikyundan. Yesu kegh iyol u eren tom ne vangertiôr, sha ci u Yehova soo ér a̱ er ú.

Kanyi kwagh ortyom Gaberiel yange ôr Maria?

Kpa cii man i̱ mar Yesu shin tar yô, gba u una lu a ngô keng. Ú fa iti ngô na shon kpa?— Iti na ér Maria. Yehova yange tindi ortyom na Gaberiel shaala ér a̱ va shin tar a̱ va ôr kwagh a Maria. Gaberiel kaa a  na ér una mar wan u nomso. A ii wan la iti ér Yesu. Kpa ter u wan shon a lu di an ou?— Ortyom la kaa ér Ter u wan la a lu Yehova Aôndo. Ka nahan ve á yila Yesu ér Wan u Aôndo ye.

Ú hen wer kwagh ne yange una lu Maria ken ishima nena?— Yange kaa ér, “M soo u lun ngô u Yesu ga,” shinii? Ei, Maria kegh a kegh iyol u eren ishima i Aôndo. Kpa a er nan ve a mar Wan u Aôndo u sha la shin tar una lu anikyundana? Mar u Yesu la yange ú kaha kposo a mar u anikyundanev mbagenev cica cii nena? Ú fa kpa?

Aôndo yange er Adam man Ifa, mbamaren asev mba hiihii mbara sha er vea fatyô u yaven zuan ayol a ve sha gbenda u kpilighyol yô. Shighe u kwagh a er nahan yô, wan man una jile ken yav mbu ngô u nan la, una hii u vesen. Ior kaa ér kwagh ne ka ivande! M fa we kpa kape ú kaa je la.

Kpa Aôndo er ivande i kpilighyol i̱ hemban nahan. Á gema uma u Wan na shaala, á wa ken iyav mbu Maria. Er i gba je, Aôndo lu a̱ vande eren imba kwagh la ga, shi hii shighe la je, ngu a̱ shi a kimbir eren imba ivande la ga. Er Aôndo er ivande ne yô, Yesu maa hii u vesen ken iyav mbu Maria di vough er ônov mbagenev kpa ka ve vese ken iyav mbu ungô vev nahan. Ken masejime yô, maa Maria vôso Yosev.

Shighe va kom u a mar Yesu yô, Maria vea Yosev ve mough ve za zende ken gar u Betelehem. Kpa gar la gema iv a ior ker poo. Iyou i  môm tsô kpa i̱ kera lu sha ci u Maria vea Yosev ga, nahan gba u vea tsa ken ityôruile. Ka ker Maria mar Yesu ye, maa í gbir Yesu shin kpese, er ú nenge heen nahan. Kpese ka anar u í haan ibua kua ilev mbigenev kpaa kwaghyan shimi ve ye yô.

Akaa a saan or iyol yange er hen tugh mbu í mar Yesu la. Ortyom ande hen mbakuranilev mbagenev ikyua a Betelehem. Ortyom la ôr ve ér Yesu ka or u civirigh u vesen. Ortyom la kaa ér: ‘M va ne a loho u dedoo u ua va ior a iember yô, nyian ne i mar or u nana yima ior yô.’—Luka 2:10, 11.

Er nan ve i gbir Yesu shin kpese?

Ortyom la kaa a mbakuranilev mbara ér vea zua a Yesu ken Betelehem, i gbir un shin kpese. Tsô, fese nahan maa mbatyomov mba shaav mbagenev kpa va kohol ortyom u hiihii la, ve gba wuese Aôndo.  Ve lu wan icam kaan ér: “I̱ wuese Aôndo Sha, shin tar yô, bem a̱ lu sha ior mba i doon Un a ve la.”—Luka 2:12-14.

Ka loho u dedoo u nyi ortyom ugen ne a ôr mbakuranileve?

Mbatyomov mbara mba yemen yô, mbakuranilev mbara maa za ken Betelehem, za zua a Yesu ker. Mba za nyer ker yô, ve ôr Yosev man Maria akaa a dedoo a ve ungwa la cii. Ú hen wer yange a saan Maria iyol kpishi sha e̱r un lumun u lun ngô u Yesu gaa?

Ken masejime yô, Yosev man Maria ve tôô Yesu ve yem a na ken gar u Nasareti. Lu hen ape Yesu vese je la. Vesen we ikyondo yô, maa a hii zege tom na u tesen ior la. Ngun kpa lu ken tom u Yehova Aôndo soo ér Wan na a̱ va er shin tar je la. Yesu kpa soo u eren tom la, sha ci u Ter na u sha la doo un ishima tsung je.

 Cii man Yesu hii tom na, hingir Ortesen Uhemban yô, Yohane u eren Batisema er un batisema shin Ifi u Yordan. Maa kwagh u kpilighyol er! Yesu ngur duen shin mnger yô, Yehova ôr kwagh sha, kaa ér: “Ngun ka Wan Wam u ishima ishima, u i doom a Na yum yô.” (Mateu 3:17) Mbamaren ou ka vea kaa a we ér ú doo ve ishima nahan, ka i saan we iyol ga he?— Se fa kape Yesu kpa yange a saan un iyol je la.

Yesu yange eren kwagh u vough hanma shighe cii. Yange sengen ér un ngu orgen kposo ga. Yange bumen ior ér ka un je un lu Aôndo ga. Ortyom Gaberiel yange kaa a Maria wener a yila Yesu ér Wan u Aôndo. Yesu iyol na kpa kaa wener un ngu Wan u Aôndo. Shi mayange ôr ior ér un hemba fan kwagh a Ter na kpaa ga. Kpa a kaa ér: “Ter hembam.”—Yohane 14:28.

Shighe u Yesu lu sha la je kpa, Ter na una na un tom ér a̱ er yô, maa á er ú je. Yange kaan ér una er tom shon, kpa geman eren kwagh ugen kposo ga. Yange Ter na doo un ishima kpishi. Nahan ungwan kwagh u Ter na una kaa la cii. Shi Yesu va shin tar kpa, er kwagh u Ter na u sha yange tindi un ér a̱ va er la vough. Á vihi shighe na sha u eren ma kwagh ugen ga. Ka nahan ve i doo Yehova a Wan na yum ye!

Se kpa sar se pe eren kwagh u doon Yehova ishima, shin ka nahan ga?— Nahan yô saa se kpa se tese ikyav ser, mimi je se mba ungwan imo i Aôndo, di e̱r Yesu kpa yange ungwan un nahan. Aôndo ôron kwagh a vese ken Bibilo. Aluer se senge ser se mba keghen ato a Aôndo, kpa se gema se na kwagh ugen kposo jighjigh shi se mba eren akaa a Bibilo i̱ vende yô, a lu shami ga, shin a lu shami?— Shi umbur kpaa wer, aluer Yehova doo se ishima sha mimi yô, a saan se iyol u eren ishima na.

Ôr ase avur a Bibilo agen a á tese kwagh u i gbe u se fa shi se na jighjigh a mi sha kwagh u Yesu yô: Mateu 7:21-23 man Yohane 4:25, 26 man 1 Timoteu 2:5, 6.